‘Oqaaqqissaarutikka tusaaniarsigit, taava ilisimassuseqalissaasi’
‘Qitornakka! Oqaaqqissaarutikka tusaaniarsigit, taava ilisimassuseqalissaasi.’ – USS 8:32, 33, Testamentitoqaq.
1. Qanoq ilisimassuseqalersinnaavugut, qanorlu iluaqutigissavarput?
ILISIMASSUSEQ Jehovameersuuvoq, taassumalu tukkorluni allanut tunniuttarpaa. Jaaku 1:5-imi allassimavoq: “[Ilisimassutsimigut] inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit.” Guutip anusinngorsaanerata akuerineratigut ilaatigut ilisimassuseqalersinnaavugut. Tamanna ajortuliunnginnissamut Jehovamullu qanittuarnissamut iluaqutigissavarput. (Uss 2:10-12) Aamma naassaanngitsumik inuunissamik nuannersumik neriuuteqarsinnaavugut. – Jud 21.
2. Guutip anusinngorsaanera qanoq qujamasuutigilersinnaavarput?
2 Naammalluinnanngitsuugatta imaluunniit qanoq perorsarneqarsimanerput pissutigalugu anusinngorsarneqarnerup akuerinissaa ajunngitsutulluunniit isiginissaa sapernarsinnaavoq. Guutilli anusinngorsaanerata iluaqutissartai inuunitsinni misigigaangatsigit paasisarparput qanoq asatigigaatigut. Ussatit 3:11, 12-imilu paasitinneqarpugut: “Ernera, Naalakkap perorsaanera asiginnaqinagu.” Imalu nangippoq: “Naalakkammi asasani anusinngorsartarpaa.” Qularinngissinnaavarput Jehovap pitsaanerpaamik kissaakkaatigut. (Hebræerit 12:5-11 atuakkit). Guutip nalunngilluaramisigut uatsinnik anusinngorsaanera naleqquttuaannarlunilu pisariaqartittuaannarparput. Allaaserisami matumani anusinngorsaariaatsit assigiinngitsut sisamat sammissavavut: (1) imminut naqqissinnaaneq, imaluunniit aqussinnaanermik ersersitsineq, (2) angajoqqaat qitornaminnik anusinngorsaasariaqarnerat, (3) ilagiinni anusinngorsarneqartarnerput aamma (4) anusinngorsarneqarnerup annernartuinit sunilluunniit ajornerusoq.
IMMINUT AQUSSINNAAGUTTA ILISIMASSUSEQASSAAGUT
3. Imminut aqussinnaaneq meeqqap qanoq ilinniartarpaa? Assersuuteqarit.
3 Imminut aqussinnaagutta pissusilersoriaaserput eqqarsaativullu pitsanngorsarniarlugit imminut naqqissinnaassaagut. Imminut aqussinnaaneq inunnguuserinnginnatsigu ilinniartariaqarparput. Assersuutigalugu meeraq sikkilernermik ilinniaraangat uppinnginniassammat angajoqqaajusup sikkili paarisarpaa. Meeqqalli uppinnginnissani ilikkariartuleraangagu angajoqqaap sikkili sivikitsukullammik iperarsinnaasarpaa. Meeqqap nammineq sikkilersinnaanera angajoqqaap qulakkeeraangamiuk iperarluinnartarpaa. Taamatuttaaq angajoqqaat meeqqatik ‘Jehovamit pisumik anusinngorsartarlugillu oqaaqqissaaraangamikkit’ imminut aqussinnaanermik ilisimassuseqarnissamillu ilinniartittarpaat. – Ef 6:4.
4, 5. (a) Sooq imminut aqussinnaaneq ‘inuttut pissutsip nutaap’ ilagaa pingaarutilik? (b) Sooq allaat kukkugaluarutta nikallussanngilagut?
4 Inunnut inersimasunngoreerlutik Jehovamik ilisarisimannilersunut tunngatillugu aamma taamaappoq. Immaqa imminut aqussinnaagaluarlutik suli kristumiutut inersimallualersimanngillat. ‘Inuttulli pissuseq nutaaq’ (NW) atigaangamikku Kristusilu ilaaraangamikku inersimanerulertarput. (Ef 4:23, 24) Imminut aqussinnaaneq iluaqutigalugu “perorsarneqarpugut naaggaarsinnaassalluta iluaatsuussusermut silarsuarmiullu kajungerisaannut, silatusaarluta peqqusersuillutalu Guutimillu mianerinnittuulluta silarsuarmi matumani inuusinnaaqqulluta”. – Tit 2:12.
5 Tamattali ajortiliuvugut. (Oqal 7:20) Kukkugutta taava imaappa imminut aquppiarsinnaanngitsugut imaluunniit imminut aqussinnaanngitsugut? Taamaattariaqanngilaq. Ussatit 24:16-imi paasivarput: “Iluartoq arfineq-marloriarluni orlusinnaasaraluarpoq nikueqqittarlunili.” ‘Nikueqqinnissatsinnut’ suna iluaqutigissavarput? Guutip anersaava, imaanngitsoq nammineq nukivut. (Filippimiut 4:13 atuaruk). Imminut naalakkersinnaaneq, imminut aqussinnaanermut assingulluinnartoq, anersaap inerititaanut ilaavoq.
6. Guutip oqaasianik qanoq atuaqqissaallaqqinnerulersinnaavugut? (Allaaserisap aallaqqaataani assit takukkit).
6 Qinusarneq, Biibilimik atuaqqissaartarneq eqqarsaatiginneqqissaartarnerlu imminut aqussinnaalernissamut aamma iluaqutigissavavut. Biibilimimmi atuaqqissaarneq sapernartikkukku imaluunniit nuannarinngikkukku? Nikalloqinak. Jehovap ikiuinera akuerigukku oqaatsimi ‘kajungerinissaanut’ ikiussavaatit. (1 Petr 2:2) Biibilimik atuaqqissaarnissamut piffissaqarniassagavit imminut aqunnissamut Jehovamut ikioqqugit. Immaqa aallaqqaammut minutsialuit atuaqqissaartarsinnaavutit. Piffissap ingerlanerani atuaqqissaarneq ajornannginnerulerlunilu nuannernerulissaaq. Kisimiillutit Jehovap eqqarsaataasa erlinnartut eqqarsaatigeqqissaarnissaat nuannarilissavat. – 1 Tim 4:15.
7. Imminut aqussinnaaneq Jehovamut kiffartornermi anguniakkanik angusinissamut qanoq iluaqutigisinnaavarput?
7 Imminut aqussinnaaneq Jehovamut kiffartornermi anguniakkanik angusinissamut iluaqutigisarparput. Assersuutigalugu ataataasoq misigigami aallussilluarunnaariartorluni pionerinngornissamik anguniagaqalerpoq. Imminut aqussinnaaneq qanoq iluaqutigaa? Pioneriuneq pillugu allaaserisanik atuagassiaatitsinni atuarlunilu qinusarpoq. Taamaaliornikkut Jehovamut attaveqarnini nakussatsippaa. Aamma sapinngikkaangami ikiorti-pioneriusarpoq. Sunaluunniit unissutiginagu anguniakkani sulissutigiuaramiuk piffissap ingerlanerani pionerinngorpoq.
JEHOVAMIT PISUMIK QITORNAT ANUSINNGORSARTARUK
8-10. Angajoqqaat qitornatik Jehovamut kiffartuleqqullugit perorsarneranni suut iluaqutigisinnaavaat? Assersuuteqarit.
8 Angajoqqaat Jehovamit pisumik qitornaminnik ‘anusinngorsaasarnissamik oqaaqqissaarisarnissamillu’ Jehovap akisussaaffilerpai. Ef 6:4) Silarsuarmi matumani tamanna sapernartorujussuuvoq. (2 Tim 3:1-5) Meeqqat inunngoraangamik eqqortoq eqqunngitsumit immikkoortissinnaaneq ajorlugulu nalunngeqatiginnissutaat ilinniartinneqarsimaneq ajorpoq. Taamaattumik nalunngeqatiginnissutertik ilinniartikkumallugu anusinngorsarneqarnissartik pisariaqartippaat. (Rom 2:14, 15) Biibilimik ilisimatooq nassuiaavoq grækerisut oqaaseq ‘anusinngorsaanermik’ nutserneqartoq aamma ‘meeqqamik ineriartortitsinermik’, imaluunniit meeqqamik akisussaassuseqalersitsisumik perorsaanermik, isumaqarsinnaasoq.
(9 Meeqqat angajoqqaaminnit asannittumik anusinngorsarneqaraangamik toqqissisimalertarput. Paasisarpaat kiffaanngissuseq killeqartoq inuunerminnilu iliuuserisatik tamarmik kinguneqartartut. Taamaattumik angajoqqaat kristumiut perorsaanerminni Jehovamit siulersorneqarnissaat pingaaruteqarluinnarpoq. Qanoq meeqqanik perorsaasoqartarnissaanik isummat nunaniit nunanut nikerarlutillu allanngorartuartarput. Angajoqqaalli Guutimut tusarnaartut qanoq iliorniarnerlutik eqqoriartariaqarnagulu inuit misilittagaat isumaalluunniit tutsuigisariaqanngilaat.
10 Noap maligassiaa ilinniarfigisinnaavarput. Jehovamit umiarsualioqquneqarami Noap naluaa qanoq iliussalluni. Jehova tatigisariaqarpaa, aamma atuarparput Jehovap “peqqusineratorluinnaq” iliortoq. (1 Mos 6:22) Tamanna qanoq kinguneqarpa? Noa ilaqutaalu umiarsualioramik annapput! Noa aamma angajoqqaatut iluatsilluarpoq. Sooq? Guutip ilisimassusia tatigigamiuk. Noa qitornaminik ilinniartitsilluarlunilu maligassaalluarpoq, tamannalu ulersuup siorna pissutsini ajortuni ajornaatsuinnaanngilaq. – 1 Mos 6:5.
11. Sooq angajoqqaat meeqqatik ilinniartinniarlugit tamaviaartariaqarpat?
11 Angajoqqaajuguit qanoq Jehovap “peqqusineratorluinnaq” iliorsinnaavit? Jehova tusarnaaruk. Perorsaaninni ikiuinera akueriuk. Oqaatsimigut peqatigiissortamigullu siunnersuutai atukkit. Kingusinnerusukkut meeqqavit taamaaliornerit pillugu immaqa qutsavigissavaatsit! Qatanngut angut allappoq: “Angajoqqaama perorsaariaasiat qujamasuutigeqaara. Uummatiga killikkumallugu sapinngisaminnik iliorput.” Oqaluttuarpoq angajoqqaami Jehovamut qanillinissamut ikioraanni. Soorunami angajoqqaat sapinngisaminnik ilinniartitsigaluartut imaassinnaavoq meeqqap Jehova qimakkaa. Angajoqqaalli sapinngisaminnik iliuuseqartut ilerasuuteqaratillu neriussinnaapput meerartik taamaalluni Jehovamut uterumaartoq.
12, 13. (a) Angajoqqaat qitornartik ilaajunnaarsitaappat Guutimut naalannertik qanoq ersersissavaat? (b) Angajoqqaat Jehovamut naalannerat ilaqutariit qanoq iluaqutigaat?
12 Angajoqqaat ilaannut qitornap ilaajunnaarsitaanera naalannermi misilinneqaataasut sapernarnerpaat ilagaat. Anaanaasoq panini ilaajunnaarsitaasoq angerlarsimaffimminit nuummat ima nassuerpoq: “Panimma ernuttamalu ilagisarnissaannut Biibililersaarutitsinni utoqqatsissutissanik ujaarlertarpunga.” Imali nangippoq: “Qitornatsinnut akisussaajunnaarnitta akulerutinnginnissattalu paasinissaanut uima asannilluni ikiorpaanga.”
13 Ukiualuit tamatuma kingorna paniat Uss 3:5, 6) Eqqaamajuk Jehovap anusinngorsaanermigut qanoq silatutigalunilu asatigaluta ersersittarmagu. Puiunngisaannaruk Ernini inuiaat pillugit, aamma illit ernerit paniilluunniit pillugu, tunniummagu. Kikkut tamarmik naassaanngitsumik inuuneqalissasut Guutip kissaatigaa. (2 Petrusi 3:9 atuaruk). Taamaattumik angajoqqaajuguit naalannissaq sapernaraluarpalluunniit Jehovap anusinngorsaanera siulersuineralu tatigiuakkit. Guutip anusinngorsaanera akiornagu tusarnaaruk.
ilaalerseqqinneqarpoq. Anaanaasoq oqarpoq: “Maanna ullut tamangajaasa allaffiginngikkuninga sianerfigisarpaanga. Uigalu Guutimut naalannerput nalunnginnamiuk ataqqingaarpaatigut. Attaveqaqatigiinnerput nuannerluinnarpoq.” Ernerit paniilluunniit ilaajunnaarsitaasimappat ‘uummatikkut iluunngarlutit Jehova tatigissaviuk’? Ersersissaviuk ‘nammineq paasisimasaqassutsit tatiginagu’? (ILAGIINNI
14. Jehovameersunik ‘pilittap ilumoortup’ ilitsersuisarnera qanoq iluaqutigisarparput?
14 Jehovap ilagiit kristumiut isumassorniarlugit, illersorniarlugit ilinniartinniarlugillu neriorsorpai. Arlalitsigut taamaaliortarpoq. Assersuutigalugu Ernini ilagiinnik paarsisussanngortippaa, Jiisusillu aalajaattuaqqulluta ‘pilittaq ilumoortoq’ anersaakkut inuussutissanik pilersuisarnissamik suliassippaa. (Luk 12:42) ‘Pilittap’ taassuma pingaarutilinnik ilitsersortarpaatigut, imaluunniit anusinngorsartarpaatigut. Qularnanngitsumik oqalugiaat imaluunniit atuagassiaatitta ilaanni allaaserisaq atuakkat eqqarsartaatsinnik pissusilersoriaatsinnillu allannguinissamut iluaqutigisimassavat. Taamatut allannguisimagavit nuannaarutigisinnaavat, tassami taamaaliornikkut Jehovap anusinngorsaanera akuerisarakku. – Uss 2:1-5.
15, 16. (a) Utoqqaanertat suliaat qanoq iluaqutigisinnaavavut? (b) Utoqqaanertat suliartik nuannarineruniassammassuk susinnaavugut?
15 Aamma Kristusip utoqqaanertat, Biibilimi angutitut ‘tunissutitut’ eqqartorneqartut, ilagiinnik asannittumik paarsisussanngortippai. (Ef 4:8, 11-13) Utoqqaanertat suliaat qanoq iluaqutigisinnaavavut? Uppernerat maligassiuinerallu ilaarsinnaavavut, aamma Biibili tunngavigalugu siunnersuutaat maleruarsinnaavavut. (Hebræerit 13:7, 17 atuakkit). Utoqqaanertat asallutalu Guutimut qanillinissarput kissaatigaat. Ataatsimiigianngitsoortugut aallussilluarunnaartugulluunniit maluginiarunikku ikiorniapallassavaatigut. Tusarnaarlutalu asannillutik Biibili atorlugu kajumissaassallutalu siunnersussavaatigut. Ikiuinerat Jehovap ilinnik asanninneranut uppernarsaatitut isigisarpiuk?
16 Eqqaamajuk utoqqaanertat uagutsinnik naqqiinissartik sapernartissinnaammassuk. Kunngi Daavi ajortuliaminik ingasattumik isertuiniareersoq oqaloqatigalugu pruffiiti Natani qanoq misigisimassasoq takorloorsinnaaviuk? (2 Sam 12:1-14) Petrusi, apustilit aqqaneq-marluk ilaat, kristumiunik hebræerinik kristumiunngorlaanit ajunnginnerusumik pinnittoq naqqittariaqaramiuk apustili Paulusi qanoq misigiva? Paulusi sapiissuseqartariaqarpoq. (Gal 2:11-14) Taamaattumik utoqqaanertat ilinnik naqqiinissaat qanoq ajornannginnerutilersinnaaviuk? Maniguunnikkut, qujamasunnikkut oqaloqatikkuminarnikkullu. Ikiuinerat Guutip asanninneranut takussutissatut isigiuk. Tamanna iluaqutigissavat, aamma utoqqaanertat suliartik nuannaarutigissavaat.
17. Utoqqaanertat qatanngut arnaq qanoq ikiorpaat?
17 Qatanngut arnaq oqaluttuarpoq nalaassimasani pissutigalugit Jehovap asanissaa sapernartillugu, assullu nikallorluni. Ima oqarpoq: “Nalunngilara utoqqaanertat oqaluuttariaqarlugit. Naveernanga isornartorsiornangalu qiimmassarpaannga nakussatsillungalu. Ataatsimiinnerit kingorna tamatigut qanorluunniit ulapitsigigaluarunik ikinnerpaamik ataatsip aperisarpaannga qanoq innersunga. Nalaassimasakka pissutigalugit Guutimit asaneqarsinnaanngitsutut misigisarpunga. Jehovalli ilagiit utoqqaanertallu atorlugit asanninnerminik ersersitsivigiuarpaanga. Qanittuarnissaa qinnutigisarpara.”
ANUSINNGORSARNEQARNERUP ANNERNARTUINIT SUNILLUUNNIIT SUNA AJORNERUA?
18, 19. Anusinngorsarneqarnerup annernartuinit sunilluunniit suna ajornerua? Assersuuteqarit.
18 Anusinngorsarneqarneq annernarsinnaavoq, Guutilli anusinngorsaaneranik ajattuineq suli annernarneruvoq. (Hebr 12:11) Kainip kunngillu Sidkijap maligassiuinerlunnerat ilinniutigisinnaavavut. Kainip qatanngunni uumigigaa toqukkusukkaalu Guutip takugamiuk ima mianersoqquaa: “Sooq ajuallappit? Sooq nakangallutit angalalerpit? Ajunngitsulioruit nakimanak niaqqut makitissimasinnaavat, ajunngitsuliunngikkuilli ajorti matup killingani qamavoq. Pilerigigaluarpaatit, illilli taassumunnga naalagaassaatit.” (1 Mos 4:6, 7) Jehovap mianersoqqussutaa Kainip tusaanagu qatanngunni toquppaa tamatumalu kingunipilui inuunermi sinnerani atorlugit. (1 Mos 4:11, 12) Kaini Guutimut tusarnaarsimasuuguni taama annernartigisunik misigisaqassanngikkaluarpoq.
19 Sidkija kunngiuvoq sanngiitsoq ajortorlu. Naalakkersuinerata nalaani Jerusalemimiut erloqipput. Pruffiitip Jeremiap Sidkija allanngoqqullugu mianersoqqusaqattaaraluarpaa. Jehovalli mianersoqqussutaa kunngip tusaarusunngilaa, tamatumalu kinguneri alianarluinnarput. (Jer 52:8-11) Jehovap pisariaqanngitsumik naalliunnissarput kissaatiginngilaa! – Esaja 48:17, 18 atuakkit.
20. Guutip anusinngorsaaneranik akuersisut aamma ajattuisut qanoq pineqassappat?
20 Nalitsinni silarsuarmi inuppassuit Guutip anusinngorsaanera quiasaarutigisarlugulu soqutigineq ajorpaat. Qanittukkulli kikkulluunniit Guutip anusinngorsaaneranik ajattuisut iliuutsimik kingunipilui naalliuutigissavaat. (Uss 1:24-31) Taamaattumik ‘oqaaqqissaarutit tusaaniartigit, taava ilisimassuseqalissaagut’. ‘Perorsaat tigullarlugu piuk, iperaqinagulu; ilisimassut paaruuk, inuussutigigakku.’ – Uss 4:13, tastamantitoĸaĸ.