ATUAQQISSAAGASSAQ 12
Allanik misiginneqataagit
‘Tamassi misiginneqataagitsi.’ – 1 PETR 3:8.
ERINARSUUT 103 Paarsisut ilagiinnut tunissutaapput
QILANAARTUUT *
1. Petrusip allagai siulliit 3:8 naapertorlugu misigissutsitsinnik soqutiginnittut ajunngitsumillu kissaassisut akornanniinnissaq sooq nuannarisarparput?
INUIT misigissutsitsinnik soqutiginnittut ajunngitsumillu uagutsinnik kissaassisut akornanniinnissaq nuannarisarparput. Misiginneqataallutik qanoq eqqarsarnerluta qanorlu misiginerluta paasiniaasarput. Sunik pisariaqartitsinerluta maluginiartarpaat ilaatigullu suliluunniit ikioqqunngitsugut ikiortarluta. Uagutsinnik ‘misiginneqataasut’ * qujamasuutigingaarpavut. – 1 Petrusi 3:8 atuaruk.
2. Sooq misiginneqataanermik ersersitsinissaq sulissutigisariaqarparput?
2 Kristumiuugatta tamatta misiginneqataanermik ersersitserusuttaraluarpugut, ajornaatsuujuaannanngilarli. Sooq? Pissutaasut ilagaat naammalluinnanngitsuunerput. (Rom 3:23) Taamaattumik namminissarsioqqajaasarnerput akiorniartussaavarput. Aamma ilatta peroriartornerat siornatigullu misigisimasaat pissutigalugit misiginneqataanermik ersersitsinissaq unamminiarnartittarpaat. Kiisalu, silarsuarmi inuit isiginnittaasiannit sunnerneqarsinnaavugut. Ulluni kingullerni makkunani inuppassuit ‘namminissarsiortuugamik’ allat misigissusiinik soqutiginninneq ajorput. (2 Tim 3:1, 2) Misiginneqataanermik ersersitsinissamut unamminiarnartissinnaasavut qaangerniarlugit suut iluaqutigisinnaavavut?
3. (a) Misiginneqataaneq qanoq ineriartortissinnaavarput? (b) Allaaserisami suut sammissavavut?
3 Jehovap erneratalu Jiisusip ilaarnerisigut misiginneqataaneq 1 Joh 4:8) Jiisusi pissusimigut angusisarluinnarpoq. (Joh 14:9) Nunarsuarmiikkallarami ersersippaa inuk qanoq misiginneqataasinnaasoq. Allaaserisami Jehovap Jiisusillu allat misigissusiinik soqutiginninnerat sammissavarput kingornalu qanoq ilaarsinnaanerlugit eqqartorlugu.
ineriartortissinnaavarput. Jehova Guutiuvoq asannittoq, taamaattumik misigeqatiginninnermut maligassaalluarnerpaavoq. (JEHOVAP MISIGINNEQATAANERA
4. Zakaria 2:12-mi qanoq ersersinneqarpa Jehova innuttami misigissusiinik soqutiginnittoq?
4 Jehovap kiffami misigissusiinik soqutiginninnera Biibilimi ilinniartitsissutigineqarpoq. Assersuutigalugu eqqarsaatigiuk itsaq Israelikkut assigiinngitsunik misilinneqaraangata Jehova qanoq misigisarnersoq. Guutip oqaasiani ima allassimavoq: ‘Erloqissutaat tamaasa erloqissutigai.’ (Es 63:7-9, tastamantitoĸaĸ) Kingorna pruffiiti Zakaria aqqutigalugu Jehova paasititsivoq innuttani naalliukkaangata nammineq naalliuttarluni. (Zakaria 2:12 atuaruk). Jehovap innuttaminik misiginneqataaneranut tamanna assersuutaalluangaarami!
Jehovap misiginneqataanermini Israelikkut Egyptenimi inussiaataanermit aniguisippai (Immikkoortoq 5 takuuk)
5. Innuttani erloqisut ikiorniarlugit Jehovap iliuuserisimasaasa ilaannik eqqaasaqarit.
5 Jehova kiffaminik misiginneqataaginnarnani ikiorniarlugit iliuuseqartarpoq. Assersuutigalugu Israelikkut Egyptenimi inussiaataagallarmata Jehovap erloqinerat paasivaa tamannalu killinneqaatigalugu iliuuseqarluni. Jehova Mosesimut ima oqarpoq: “Innuttama Egyptenimi naalliunnerat takusimavara, ... nimaarlutik nillianerat tusarpara. Erloqissutaat nalunngilakka. Taamaattumik aqqarpunga Egyptenimiut assaannit aniguisikkumallugit.” (2 Mos 3:7, 8) Jehovap innuttani misiginneqatigigamigit inussiaataanermit aniguisippai. Ukiut hundredillit qaangiuttut nunami neriorsuutigisami Israelikkut akeqqanit saassunneqartarput. Jehova qanoq iliortarpa? Jehovap “naakkigisarpai annikilliortitaanertik nanertugaanertillu pillugit kappialagaangata”. Aammaarluni misiginneqataanini killinneqaatigalugu Jehova innuttani ikiorniarlugit iliuuseqarpoq. Israelikkut akeqqaminnit aniguisinniarlugit eqqartuussisunik siulersuisoqalersippai. – Eqq 2:16, 18.
6. Kukkusumik isiginnittaaseqartup misigissusiinik Jehovap soqutiginninneranik eqqaasaqarit.
6 Innuttani kukkusumik isiginnittaaseqaraluartut taakkua misigissusii Jehovap soqutigingaarpai. Pruffiiti Jona eqqarsaatigiuk. Guutip Ninevemiut eqqartuussummik nalunaarfigiartoqqullugit aallartippaa. Ninevemiut peqqissimimmata Jehova aalajangerpoq inuuinnartinniarlugit. Tamannali Jonap iluarinngilaa. Piuneerunneqarnissamik eqqartuussut tusarliussimasani eqquutitinneqanngimmat Jona kamangaalerpoq. Jehovalli kamagittarluni eqqortumik isiginnittaaseqaqqullugu ikiorpaa. (Jon 3:10-4:11) Kingorna Jehovap ilinniartitsissutiginiagaa Jonap paasilerpaa oqaluttuarlu uagut iluaqutiginiassagatsigu allatsillugu. – Rom 15:4. *
7. Jehovap innuttaminut iliuuserisimasaanit suna paasivarput?
7 Jehovap innuttaminut iliuuserisimasaanit paasivarput kiffani misiginneqatigisarai. Tamattami erloqissutivut naalliuutivullu nalunngilai. Jehovap ‘inuit uummammiugisaat ilisimavai’. (2 Nal 6:30) Eqqarsaativut misigissutsivullu tamaasa pisinnaasattalu killeqarneri ilisimavai. ‘Artukkatsinnillu usserneqarnissarput akuersaarumanngilaa.’ (1 Kor 10:13) Tamanna nalunagu tuppallernangaarami!
JIISUSIP MISIGINNEQATAANERA
8-10. Jiisusip allanik misiginneqataaneranut suut pissutaaqataasimassappat?
8 Jiisusi nunamiikkallarami inunnik misiginneqataangaarpoq. Misiginneqataaneranullu pissutaasut minnerpaamik pingasuupput. Siullertut, soorlu eqqaaneqareersoq, Jiisusi pissusimigut angusisarluinnarpoq. Ataatani qilammiusoq ilaarlugu Jiisusip inuit asavai. Jehovap pinngortitsinerani ikiuunnikuugami pinngortitat tamaasa nuannaarutigai, ingammilli ‘inuit nuannaarutigai’. (Uss 8:31) Asanninnini killinneqaatigalugu Jiisusip allat misigissusii soqutigai.
9 Aappaattut, Jehova ilaarlugu inuit uummammiui Jiisusip nalunngilai. Inuit pissutiginiagaat misigissusiilu paasisinnaavai. (Matt 9:4; Joh 13:10, 11) Taamaattumik Jiisusip malugigaangamiuk inuit nikallungasut misiginneqatigisarpai tuppallersarlugillu. – Es 61:1, 2; Luk 4:17-21.
10 Pingajuattut, artorsaatit inuit misigisartagaasa ilaat Jiisusip nammineq misigai. Assersuutigalugu Jiisusi ilaqutariinni piitsuugunartuni peroriartorpoq. Ataatarsiani Josefi suleqatigitillugu nukersornartumik suliaqarneq ilikkarpaa. (Matt 13:55; Mark 6:3) Jiisusi kiffartulinngikkallarami Josefi toqusimagunarpoq. Taamaattumik ilimanarpoq asasamik toqukkut annaasaqarnerup annernartua Jiisusip misigigaa. Aamma uppeqatiginngisamik ilaqutaqarneq qanoq innersoq Jiisusip nalunngilaa. (Joh 7:5) Pissutsit taakku allallu atorsimasani inuit unamminiarnartitaannik misigissusiinillu paasinnissinnaanissaminut Jiisusip iluaqutigisimassavai.
Jiisusip misiginneqataalluni angut tusilartoq inunnit avinngarullugu ajorunnaarsikkaa (Immikkoortoq 11 takuuk)
11. Jiisusip misiginneqataasarnera ingammik qaqugukkut ersertarpa? Nassuiaruk. (Saqqaani assiliaq takuuk).
11 Jiisusip misiginneqataanera ingammik tupinnartulioraangat ersertarpoq. Taamaaliortariaqarnini pinnagu inuit naalliuuteqartut ‘nalligingaaramigit’ tupinnartuliortarpoq. (Matt 20:29-34; Mark 1:40-42) Assersuutigalugu angut tusilartoq inunnit avinngarullugu ajorunnaarsikkamiuk uillarnerullu ernitua makitikkamiuk Jiisusi qanoq misiginersoq takorlooruk. (Mark 7:32-35; Luk 7:12-15) Jiisusi inunnik misiginneqataagami ikiuerusuttarpoq.
12. Johannesi 11:32-35 qanoq erserpa Jiisusip Martha Marialu misiginneqatigigai?
12 Jiisusip Martha Marialu misiginneqatigai. Taakkua qatanngummik toqunera pillugu aliasungaartut takugamigit “Jiisusi qissaserpoq”. (Johannesi 11:32-35 atuakkit). Ikinngutiminik qanigisaminik annaasaqarnini pissutigiinnarlugu qianngilaq, nalunngilaami Lazarusi makitikkumaarlugu. Asasamili aliasunnerat paasigamiuk tamanna sunnerneqaatigalugu Jiisusi qialerpoq.
13. Jiisusi inunnik misiginneqataasoq nalunagu sooq qiimmaallannarpa?
13 Jiisusip inunnik misiginneqataanera pillugu ilinniarnerput qiimmassaataavoq. Misiginneqataalluni allanik pinnittarnera asanissaanut killinneqaatigisarparput. (1 Petr 1:8) Maannalu Guutip naalagaaffiani kunngiusoq nalunagu qiimmaallannarpoq. Qanittukkut naalliuutit tamaasa atorunnaarsissavai. Nammineq inuttut nunarsuarmiinnikuugami naalliuutinit anniaatinillu Saatanip aqutsinerata kingunipiluinit aniguisitsinissamut Jiisusi piukkunnarnerpaavoq. ‘Qajannassutsitsinni naakkiginnissinnaasumik’ naalagaqarnerput pilluaqquneqaatigaarput. – Hebr 2:17, 18; 4:15, 16.
JEHOVA JIISUSILU ILAAKKIT
14. Efesosimiut 5:1, 2 eqqarsaatigalugit sunissamut killinneqarpugut?
14 Jehovap Jiisusillu maligassiuinerat eqqarsaatigigaangatsigu nammineq misiginneqataanermik annerusumik ersersitserusuttarpugut. (Efesosimiut 5:1, 2 atuakkit). Taakkuli assiginagit uagut inuit uummammiui takusinnaanngilavut, taamaattorli allat misigissusii pisariaqartitaalu paasiniarsinnaavavut. (2 Kor 11:29) Silarsuarmi inuit namminissarsiortut assiginagit sapinngisatsinnik uagut ‘immikkut nammineq iluaqutissarput piinnarnagu aammattaaq inoqatitta iluaqutissaat isumaginiartarpavut’. – Fil 2:4.
(Immikkoortut 15-19 takukkit) *
15. Pingaartumik kikkut misiginneqataasariaqarpat?
15 Pingaartumik ilagiinni utoqqaanertat misiginneqataasariaqarput. Nalunngilaat Jehovap savaataasa paarinissaanut akisussaaffeqarlutik. (Hebr 13:17) Uppeqatitik ikiorniarlugit utoqqaanertat paasinnittuusariaqarput. Qanoq misiginneqataanertik ersersissinnaavaat?
16. Utoqqaanertaq misiginneqataasoq susarpa, tamannalu sooq pingaaruteqarpa?
16 Utoqqaanertap misiginneqataasup kristumioqatini piffissaqarfigisarpai. Soqutiginnilluni aperisarpoq erinitsajuillunilu tusarnaaqqissaarluni. Tamanna pingaaruteqangaartarpoq uppeqatimi ilaata piumagaluarluni misigissutsiminik eqqarsaatiminillu oqaasertaliinissani ajornartikkaangagu. (Uss 20:5) Utoqqaanertap piumassuseqarluni qatanngutini piffissaqarfigigunigit tatigeqatigiinnertik, ikinngutigiinnertik asaqatigiinnertillu ineriartortissavaat. – ApS 20:37.
17. Utoqqaanertat pissusiini qatannguterpassuatta suna pingaarnerpaatippaat? Assersuuteqarit.
17 Qatannguterpassuatta ilagiinni utoqqaanertat pissusiini misiginneqataasarnerat pingaarnerpaatippaat. Sooq? Adelaide ima oqarpoq: “Paasinnikkumaartut nalunagu oqaloqatiginissaannut ajornannginnerusarpoq. Oqaloqatigitillugit qanoq qisuariartarnerannit ersarippoq misiginneqataasut.” Qatanngut angut qujamasulluni oqaluttuarpoq: “Pissutsit atukkakka utoqqaanertamut oqaluttuaralugit taassuma isai immattut takuakka. Tamanna puiunngisaannassavara.” – Rom 12:15.
18. Misiginneqataaneq qanoq ineriartortissinnaavarput?
18 Misiginneqataanermik ersersitsisinnaasut tassaaginnanngillat utoqqaanertat. Tamatta misiginneqataaneq ineriartortissinnaavarput. Qanoq? Pissutsit ilaquttavit uppeqativillu atugaat paasiniarsarikkit. Ilagiinni inuusuttuaqqat, napparsimasut, utoqqaat asasaminnillu toqukkut annaasaqarsimasut soqutigalugit ersersiguk. Qanoq innersut aperikkit qanorlu misiginerminnik oqaluttuarneranni tusarnaarluarlugit. Misigitikkit pissutsit atugaat ilumut paasisinnaallugit, pisinnaagaangavillu ikiortakkit. Tassa asanninneq ilumoortoq iliuuseqarnikkut ersersinneqartoq. –19. Allanik ikiuiniarnitsinni sooq naleqqussarsinnaasariaqarpugut?
19 Allanik ikiuiniarnitsinni naleqqussarsinnaasariaqarpugut. Sooq? Inuit artorsaatinut assigiinngitsumik qisuariartarmata. Ilaat oqaloqateqarusuttartut allat tunuarsimaarnerusarput. Taamaattumik ikiuiniarnitsinni peqqusiileqilersitsisunik apeqquteqarnissarput mianersuutigisariaqarparput. (1 Th 4:11) Imaassinnaavoq allat oqaloqatigitillugit paasigipput isumaqatiginagit. Taamaattorli akuerisariaqarparput taakku taamatut misigisut. ‘Tusarasuartartoorusuppugut, kisianni oqalukkumaataartuulluta.’ – Jaak 1:19; Matt 7:1.
20. Allaaserisami tulliuttumi suna sammissavarput?
20 Ilagiinni misiginneqataanermik ersersitsinitta saniatigut pissutsimik nuannersumik tamatuminnga aamma oqaluussinitsinni ersersitserusuppugut. Ajoqersuganngortitsiortornitsinni qanoq misiginneqataasinnaavugut? Allaaserisami tulliuttumi tamanna sammissavarput.
ERINARSUUT 129 Pinertusaartuarta
^ imm. 5 Jehova Jiisusilu allat misigissusiinik soqutiginnittuupput. Taakkua maligassiuinerat qanoq ilinniarfigisinnaanerlugu aamma sooq misiginneqataasariaqarnerluta qanorlu misiginneqataasinnaanersugut allaaserisami sammissavarput.
^ imm. 1 NASSUIAAT: ‘Misiginneqataaneq’ tassaavoq allat misigissusiinik paasinninniarsarineq assinganillu misigissuseqarneq. – Rom 12:15.
^ imm. 6 Aamma upperluartut allat nikallunganerinik annilaanganerannillu Jehova misiginneqataasimavoq. Hanna (1 Sam 1:10-20), Elia (1 Kng 19:1-18) Ebed-Melekilu (Jer 38:7-13; 39:15-18) pillugit oqaluttuat eqqarsaatigikkit.
^ imm. 65 ASSIMI MALUGISASSAT: Naalagaaffilersaarfimmi ataatsimiinnerni asannilluta misiginneqataanitsinnik ersersitsinissamut periarfissaqangaarpugut. Assimiipput (1) utoqqaanertap nukappiaraq oqaluussisartoq taassumalu anaanaa inussiarnersumik oqaloqatigigai, (2) ataataasup paniatalu qatanngut arnaq utoqqaq biilinukartoq ikioraat aamma (3) utoqqaanertat marluk soqutiginnillutik qatanngut arnaq siunnersorneqarusulluni ikioqqusoq tusarnaaqqissaaraat.