Atuartartut apeqqutaat
Sooruna Samuelimik allakkat aappaanni 21:7-9 allassimasoq Daavip ‘Mefibosheti asattuukkaa’, kingornalu allassimalluni Mefibosheti toqutassanngortikkaa?
Eqqarsaatigivallaarnagit versit taakku atuarsimagaanni taama eqqarsarnarsinnaavoq. Angutilli marluk Mefiboshetimik atillit allaatigineqarput, pisimasullu misissorutsigit ilinniarfigisinnaavagut.
Israalimi kunngi Sauli arfineq-marlunnik erneqarsimavoq marlunnillu paneqarluni. Angajulliliaa Jonatanimik ateqarpoq. Kingorna Saulip nuliami ilaat Rispamik atilik ernertaarfigaa, taannalu Mefiboshetimik atserpaa. Jonatanilli aamma ernini Mefiboshetimik atserpaa. Tassa kunngi Sauli erneqarsimavoq ernutaqarsimallunilu tamarmik Mefiboshetimik atilinnik.
Taamaalluni kunngip Saulip Gibeonimiut tamaasa uumigilerlugit nungutinniarsarilerpai. Amerlasuullu toqutaagunarput, tamannalu ajortuliorneruvoq. Sooq? Josuap nalaani Israalikkunni qullersaasut Gibeonimiunik eqqisseqateqarniarlutik isumaqatigiissimammata. – Jos 9:3-27.
Kunngip Saulip nalaani isumaqatigiissut taanna suli atuussimavoq. Kunngi Gibeonimiunik nungutitseriaraluarami isumaqatigiissummik unioqqutitsivoq. Taamaattumik ‘aammut pisuuneq Saulimi eqqarlerisaanilu ilerpoq’. (Sam 2. 21:1) Daavi kunnginngormat Gibeonimiut amiakkuusut saaffigaat Saulip ajortuliungaarsimanera oqaluttuaralugu. Jehovallu Israalikkut pilluaqqusinnaaniassammagit Daavip Gibeonimiut aperai qanoq ilioruni Saulip ajortuliaanut isumakkeerfigitissanerluni. Gibeonimiut aningaasanik piumanatik angutip ‘nungutikkumallutik pilersaaruteqartup’ erneri arfineq-marluk toqunneqarnissaat piumasaraat. (Mos 4. 35:30, 31) Daavilu taakkua piumasaat naapertorlugit iliuuseqarpoq. – Sam 2. 21:2-6.
Sauli Jonatanilu sorsunnermi toqutaareersimapput, Jonatanilli ernera Mefibosheti suli uumavoq. Taanna meeraalluni aqqunarami pisussinnaajunnaarsimavoq, aatamilu Gibeonikkunnut saassussinerani peqataanngilaq. Aamma Daavi Jonatanilu ikinngutigiinnissamik isumaqatigiissuteqarsimapput, tamannalu Jonatanip kinguaavisa, ilaatigut ernerata Mefiboshetip, iluaqutigaat. (Sam 1. 18:1; 20:42) Biibilimi ima allassimavoq: “Mefiboshetili Jonatanip ernera Saulip ernutaa kunngip [Daavip] asattuuppaa nammineq Jonatanillu Saulip ernerata Naalagaq naqqissigalugu uppernarsaaqatigiinnertik naapertorlugu.” – Sam 2. 21:7.
Daavi Gibeonimiut piumasaat naapertorlugu iliorpoq. Saulip erneri marluk, aappaa Mefiboshetimik atilik, Saulillu ernutai tallimat tunniuppai. (Sam 2. 21:8, 9) Taamaaliornermigullu Israalikkut aammut pisuutitaajunnaarsippai.
Pisimasoq oqaluttuaannaanngilaq. Guutimmi inatsisaani paatsuugassaanngitsumik ima allassimasoqarpoq: ‘Ernerit toqunneqassanngillat ataatamik ajortuliaat pillugit.’ (Mos 5. 24:16) Saulip erneri marluk ernutaalu tallimat pisuussuteqarsimanngitsuuppata toqunneqarnissaat Jehovap akuerisimanavianngikkaluarpaa. Inatsimmimi nangilluni ima allassimavoq: “Kinaluunniilli namminiinnaq ajortuliani pillugit toqunneqassaaq.” Saulip Gibeonimiut nungullugit toqunniarmagit kinguaavi arfineq-marluk taakku arlaatigut peqataagunarput. Ajortuliaallu naapertorlugit pillarneqarput.
Oqaluttuami paasivarput kinaluunniit ajortuliani pillugit utoqqatsissutissarsiorsinnaanngitsoq, aamma allanit ajortulioqquneqarsimagaluaruniluunniit. Torrammik ima ussateqarpoq: “Aqqut atuagassat nakkutigilluarniaruk, ingerlaviillu tamaat nakkutigiuk!” – Uss 4:24-27; Ef 5:15.