Sooq angut Buuarsip eqqartugaa oqarpa Rutsi katikkaluaruniuk pigisani ‘aseruinnassasoq’? (Ruth 4:1, 6)

Biibilip allanneqarnerata nalaani angut nulialik qitornaqarani toquppat nunaataa suneqassava? Atia ingerlateqqinneqassanngila? Moorsisip inatsisaani apeqqutit taakku akineqarput.

Angut nunamik piginnittoq toquppat imaluunniit piitsunngorluni nunaatini tunisimappagu nunaataa suneqassava? Nuna pigisaa qatanngutaata imaluunniit eqqarliata kingornutinngikkuniuk utertissinnaavaa. Taamaalilluni ilaqutariinni pigineqaannassaaq. – Mos 3. 25:23-28; Mos 4. 27:8-11.

Angutip toqusimasup atia qanoq atatiinnarneqartarpa? Sakiatsiariit aappariilertarnerat malillugu aappartaarnikkut, soorlu Rutsimut taama pisoqartoq. Angutip qatanngutigigaluani kinguaassaqaqqullugu uillarnera katittussaavaa taamaalillunilu angutip atia qitornaasup ingerlateqqinniassammagu pigisaalu kingornullugit. Taama aaqqissuulluagaanikkut uillarneq aamma isumagineqartarpoq. – Mos 5. 25:5-7; Mat 22:23-28.

No’omimut pisut eqqarsaatigeriakkit. Taassuma Elimelekimik atilik uigaa. Taanna ernerilu marluk toqummata pilersuisussaaruppoq. (Ruth 1:1-5) Judamut uteramik No’omip ukuani Rutsi oqarfigaa Buuarsi apereqqullugu utertitsisuusinnaanersoq. Buuarsip Elimeleki eqqarleraa. (Ruth 2:1, 19, 20; 3:1-4) Buuarsilli paasivaa qaninnerusumik eqqarleqartoq utertitsisinnaasumik. Taannali Biibilimi atiatigut taaneqanngilaq. – Ruth 3:9, 12, 13.

Aallaqqaammut angut taanna ikiuerusuppoq. (Ruth 4:1-4) Nalunngilaa nuna pisiariumallugu aningaasartuuteqartariaqarluni, aammali nalunngilaa No’omi nunamik Elimelekip pigisimasaanik kingornussisunngortussamik meerartaarnissaminut utoqqaavallaartoq. Tassa angutip nuna pisiariguniuk nammineq pigilertussaagamiuk imminut akilersinnaarpasippoq.

Rutsili katittussaallugu paasigamiuk aalajangerpoq nuna pisiariniarnagu. Ima oqarpoq: “Nunamineq utertillugu pisiarisinnaanngilara pigisara aseruinnarumannginnakku.” (Ruth 4:5, 6) Sooq isummani allanngortippaa?

Angutip taassuma allalluunniit Rutsi katippagu ernertaarpatalu ernertaavata Elimelekip nunaataa kingornutissavaa. Tamatuma utertitsisussap nunaataa qanoq ‘aseruinnarsinnaagamiuk’? Tamanna Biibilimi allassimanngilaq, ukuli pissutaasinnaapput:

• Siullertut, Elimelekip nunaataa Rutsip ernerata pigilertussaammagu aningaasanik atuinera asuliinnarpasissaaq.

• Aappaattut, No’omi Rutsilu pilersorlugillu isumassortussaavai.

• Pingajuattut, Rutsi amerlanerusunik meerartaarpat taakkua utertitsisussap qitornaasa kingornussarsiatik avittussaavaat.

• Sisamaattut, utertitsisussap nammineq qitornartaanngikkuni Rutsip ernertaassaata Elimelekip utertitsisussallu nunaataat kingornuttussaavai. Taamaalilluni utertitsisussaq toquppat nunaataa nammineq aterinngisaminit Elimelekilli aqqanit kingornunneqassaaq. Utertitsisussap No’omi ikiorniarlugu kingornussarsiani annaarusunngilaa. Utertitsisussatut tulliusup, Buuarsip, akisussaaffik tigussagaa piumaneruaa. Buuarsi taamaaliorusuppoq Rutsi “uigigaluata pigisaanik kingornussisussaqaqqullugu”. – Ruth 4:10.

Namminissarsiorluni utertitsisussap atimi kingornussarsiamilu atatiinnarnissaat soqutiginerugunarpaa. Atiali atatiinnarneqanngimmat naluarpulluunniit qanoq ateqarsimanersoq. Aamma Buuarsip pisinnaatitaaffigiligaa pinngitsoorpaa. Tassami Buuarsi Missiarsimut, Jiisusimut Kristusimut, siuaasanngorpoq. Utertitsisussaagaluap namminissarsiorluni pisariaqartitsisumik ikiuinngitsoornerata ajoraluassusia! – Mat 1:5; Luk 3:23, 32.