1-2. Imermut morsutsin­neqarnissamut piareersimanak paasigukku sooq tamanna nikallus­sutigis­sanngiliuk? (Saqqaani assit takukkit).

 IMERMUT morsutsin­neqarnissat eqqarsaatigaajuk? Taamaappat pikkoreqaatit! Piareersimasutut misigiguit utoqqaanertallu isumaqataappata periarfis­saqaleruit atorluaruk. Imermut morsutsin­neqaruit Jehovamut kiffartorneq pilluarnartoq qilanaarisinnaavat.

² Imaassin­naavorli paasigit imermut morsutsin­neqarumallutit anersaakkut siumukar­nerusariaqarlutit. Immaqalu taamatut oqarfigineqarputit. Taamaappat nikalloqinak. Qassinil­luunniit ukioqaraluaruit anersaakkut siumukarsin­naavutit.

3. Kunngik­kormiuni atorfillip Etiopiamiup Fiilippi qanoq aperaa, sunalu apeqqutaalerpa? (Apustilit Suliaat 8:36, 38)

³ Apustilit Suliaat 8:36, 38 atuakkit. Kunngik­kormiuni atorfillip Etiopiamiup Fiilippi oqaluus­sisartoq ima aperaa: “Imermut morsutsitaanissannut suna akornutaava?” Tassa Etiopiamiu imermut morsutsin­neqarusuppoq. Ilumulli piareersimava?

4. Etiopiamiup ilikkagaqar­nerorusunnini qanoq ersersippaa?

⁴ Etiopiamiu ‘Jerusalemmimut guutisioriar­torsimammat’ paasisin­naavarput taanna juutit upperisaannut ilanngus­simasoq. (ApS 8:27) Hebræerisut Allakkani Illernartuni Jehova  pillugu ilikkagaqarsimassaaq. Sulili ilikkagaqar­nerorusuppoq. Tassami Esajap allagaani atuarujoortoq Fiilippip naapippaa. (ApS 8:28) Esajallu allagaani allassimasut anersaakkut ittut itisuujupput. Tassa Etiopiamiu ilumoortut Biibilimeersut tunngaviusut naammaginagit paasisaqar­nerorusuppoq.

5. Etiopiamiup ilikkakkani qanoq maleruarpai?

⁵ Etiopiamiup Etiopiami dronningi Kandaaki sullippaa. ‘Erlinnar­tuutaanut tamanut akisussaassuuvoq’. (ApS 8:27) Akisussaaf­ferujus­suaqarami ulapputeqangaarsimassaaq. Taamaak­kaluartoq Jehovamut guutisiornini pingaar­tikkamiuk Etiopiamiit Israalimut aallarpoq Jerusalemmimi guutisiorfimmi Jehova guutisiorfigisin­naajumallugu. Angalanera sivisullunilu akisusimassaaq. Tamakkuli unissutiginngilai, Jehovamummi guutisiornini pingaar­nerpaatippaa. Tassa Etiopiamiup Jehova pillugu ilikkagaqaan­narnani aammali ilikkakkani maleruarpai.

6-7. Etiopiamiu Jehovamik qanoq asannin­nerulerpa?

⁶ Fiilippip Etiopiamiu ilumoortunik nutaanik pingaarutilinnik, ilaatigut Missiarsip kinaaneranik ilinniartippaa. (ApS 8:34, 35) Qanoq qisuariarpa? Iliuuseqan­ngiinnarsin­naagaluarpoq tassaagami juutit upperisaannut ilanngus­simasoq ataqqineqartoq. Namminerli pilluni Jiisusip iliuuserisimasaa killitsis­sutigingaarlugu inuunerminik allannguis­sutigisaminik aalajangiivoq. Jehova Jiisusilu asaneruleramigit imermut morsutsin­neqarusulerpoq Jiisusimik malinnit­tunngorluni. Fiilippip takusin­naagamiuk piareersimasoq imermut morsutsippaa.

⁷ Etiopiamiu ilaarukku aamma illit imermut morsutsin­neqarnissamut piareersimalersin­naavutit. Taassumatut qularuteqarnak ima oqarsin­naalissaatit: “Imermut morsutsitaanissannut suna akornutaava?” Qanoq ilaarsin­naaviuk? Iliuuserisimasai pingasut sammissavagut. Siullertut, ilikkagaqar­tuarpoq. Aappaatut, ilikkakkani maleruarpai. Pingajuattullu, Jehovamik asannin­nerujar­tuinnarpoq.

8. Johannesi 17:3 qanoq maleruarsin­naaviuk?

⁸ Johannesi 17:3 atuaruk. Jiisusip oqaasii taakku pissutigalugit Biibilimik misissueq­qissaalerpit? Amerlasuut angissagunarput. Aamma tassani ilikkagaqar­tuarnis­satsinnut kajumis­saarneqarpugut? Aap, ‘Guuti ilumoortutuaq ilisarisimanerujar­tuinnarsin­naavarput’. (Romamiut 11:33) Tassa naassaan­ngitsumik paasisaqar­tuarsin­naavugut. Paasisaqar­nerujar­tortillutalu Jehova qanillinerujar­tussavarput. – Tuss 73:28.

9. Ilumoortut Biibilimeersut tunngaviusut paasereerutsigit susariaqarpugut?

 ⁹ Jehova ilinnialeratsigu Paulusip oqaatigisaatut “ilinniar­titsissutit tunngaviusut” ilikkaq­qaarpagut. Paulusip ilinniar­titsissutit taakku ‘pingaarnertut’ taallugillu immummut naalungiarsuup inuussutigisaanut assersuuppai. (Hebr 5:12; 6:1) Aammali kristumiut kajumis­saarpai ilumoortut itinerusut paasissagaat. Illimmi? Ilumoortut Biibilimeersut itinerusut paaserusungaar­tarpigit? Siumukar­tuarusuppit, Jehova taassumalu piumasaa pillugit ilikkagaqar­tuarlutit?

10. Sooq inuit ilaasa misissueq­qissaarneq sapernar­tittarpaat?

¹⁰ Inuilli amerlasuut atuarneq misissueq­qissaarnerlu sapernar­tittarpaat. Illimmi? Atuarnerup pissarsif­figilluarnissaa atuarfimmi ilikkarpiuk? Misissueq­qissaarnerlu nuannarisarpiuk? Imaluunniit atuakkatit paasiuminaatsit­tarpigit? Taamaappat nikalloqinak! Jehovap ikiorsin­naavaatit. Taannami ilinniar­titsillaq­qinnerpaavoq.

11. Sooq oqarsin­naavugut Jehova ilinniar­titsillaq­qinnerpaasoq?

¹¹ Sooq oqarsin­naavugut Jehova ilinniar­titsillaq­qinnerpaasoq? (Es 30:20, 21) Ilaatigut naammagit­tartuummat, inussiar­nersuummat paasinnit­tartuummallu. Aamma ilinniartitami ajunngitsortaat maluginiar­nerusarpai. (Tuss 130:3) Pisinnaasagullu akimorlugit piumasaqaateqan­ngisaannarpoq. Eqqaamajuk Jehovap qarasarput pinngortikkaa, taamaat­tumillu inunnguuseralugu ilinniarusus­suseqar­tarpugut. (Tuss 139:14) Jehovallu kissaatigaa nuannaarutigisatsinnik ilikkagaqar­tuassasugut. Taamaattumik ilumoortut Biibilimeersut ‘kajungerisaler­nissaat’ maanna ilinniar­tariaqarparput. (Pet 1. 2:2) Angusin­naasannik anguniagaqarit, aamma Biibilimik atuartar­nissannut misissueq­qissaar­tarnissannullu pilersaaruteqarit. (Jos 1:8) Taamaalillutit Jehovap ikiuineratigut taanna pillugu ilikkagaqar­tuarnerit nuannaarutigissavat.

12. Sooq Jiisusi pillugu misissueq­qissaar­tariaqarpugut?

¹² Jiisusip inuunerata kiffartor­neratalu eqqarsaatigeq­qissaar­nissaannut piffissaqartarit. Sooq tamanna pingaaruteqarpa? Nunarsuarmi ajornar­torsiorfiusumi Jehova kiffartorfigis­sagutsigu Jiisusi ilaartariaqarparput. (Pet 1. 2:21) Jiisusi ilinniar­titaminut oqarpoq ajornar­torsior­tarumaartut. (Luk 14:27, 28) Aammali upperil­luinnarpaa nammineq pisimanermisut Guutimut aalajaat­tuarsinnaasut. (Joh 16:33) Taamaattumik Jiisusip inuunera pillugu misissueq­qissaartarit aamma qanoq ilaarsin­naanerlugu eqqarsaatigeq­qissaartaruk.

13. Jehova sumik qinnuigisassaviuk, aamma sooq?

¹³ Paasisimasaqassuseq immini naammanngilaq. Tamannali iluaqutigalugu Jehova pillugu ilikkagaqar­nerusin­naavugut, taanna asalersin­naavarput upperfigilerlugulu. (Kor 1. 8:1-3) Ilikkagaqar­nerujar­tortillutit Jehova uppernermik qinnuigisaruk. (Luk 17:5) Jehovap qinnutit taamaattut tukkorluni akissavai. Jehova pillugu eqqortumik paasisimasaqarneq tunngavigalugu uppersuseqaruit anersaakkut siumukarsin­naassaatit. – Jaak 2:26. 

14. Apustilip Petrusip qanoq ersersippaa ilikkakkagut naapertorlugit iliuuseqar­tariaqartugut? (Aamma assiliaq takuuk).

¹⁴ Apustilip Petrusip ersersippaa Kristusip malinnittai ilikkakkatik naapertorlugit iliuuseqar­tariaqartut. Nooamik oqaluttuaq eqqaavaa. Jehovap Nooa paasitippaa inuit ajortut suujunnaarsik­kumallugit ulersuaqar­titsissalluni.  Nooalli ilaquttamilu aniguis­sagunik ulersuaqar­nissamik ilisimasaqarnertik naammagis­sanngilaat. Maluginiaruk ulersuaq sioqqullugu Nooap nalaa Petrusip ‘umiarsuup sananeqar­neratut’ allaatigigaa. (Pet 1. 3:20) Tassa Nooa ilaquttanilu umiarsualior­nermikkut paasisatik naapertorlugit iliuuseqarput. (Hebr 11:7) Umiarsuup sananeqarnera imermut morsutsin­neqarnermut Petrusip assersuuppaa ima oqarami: “Imermut morsutsitaanerup, tamatumunnga assingusup … maanna aamma ilissi aniguisippaasi.” (Pet 1. 3:21) Aamma illit imermut morsutsin­neqarnissannut piareersarnerit umiarsuup sananeqar­neranut assersuun­neqarsinnaavoq. Imermut morsutsin­neqarnissannut piareersarumallutit susariaqarpit?

15. Ilumoorluni peqqissimineq qanoq ersersin­neqartarpa?

¹⁵ Imermut morsutsin­neqarnissamut piareersimajumallutit iliuuserisariaqakkat siulleq tassaavoq ajortuliarisimasannik ilumoorlutit peqqissimineq. (ApS 2:37, 38) Ilumoorlutit peqqissimiguit allannguisin­naavutit. Ileqqupalaat Jehovap iluarinngisai, soorlu uku, unitsin­nikuuigit? Atoqatigiinnikkut eqqunngitsuliortarneq, pujortartarneq, oqaasipiluttarneq oqaatsik­kulluunniit annersitsisarneq. (Kor 1. 6:9, 10; Kor 2. 7:1; Ef 4:29) Suli ileqqupalaaqaruit unitsinnissaa sulissutigiuaruk. Biibilimik ilinniar­titsisunnut ilagiin­niluunniit utoqqaanertanut ikioqqusin­naavutit. Inuusut­tuuguit angajoqqaanni najugalik ileqqupalaaqarun­naarumallutit taakkununnga ikioqqusin­naavutit.

16. Aalajangersimasumik Jehovamik guutisior­nitsinnut suut ilaappat?

¹⁶ Aamma anersaakkut ittunik aalajangersimasumik sammisaqartarneq pingaaruteqarpoq. Tamatumunnga ilaapput ataatsimiigiartarneq, ataatsimiinnerni akissuteqarneq allatigul­luunniit peqataasarneq. (Hebr 10:24, 25) Aamma oqaluus­sisartun­ngorsimaguit aalajangersimasumik oqaluus­sisarit. Oqaluus­sinerujar­tortillutit nuannaarutiginerulissavat. (Tim 2. 4:5) Taamaaliortaruit ‘Guutimut tunniusimanerit takutillugulu’ Jehova tunissuteqarfigissavat. (Pet 2. 3:11; Hebr 13:15) Inuusut­tuuguit angajoqqaanni najugalik uku  eqqarsaatigikkit: ‘Angajoqqaama ataatsimiigiar­nissannik oqaluus­sisarnis­sannillu eqqaasit­tariaqar­tarpaannga? Imaluunniit eqqaasin­neqarnanga taamaalior­tarpunga?’ Kajumilluta iliuuseqaraangatta Jehovap nuannaarutigisarpaa. (Naleqqiuguk Korintimiunut 2. 9:7). Taamaattumik eqqaasin­neqanngik­kaluarlutit ataatsimiigiartaruit oqaluus­sisaruillu uppernermik, qujamasunnermik asannin­nermillu Jehova takutitsivigissavat. Jehova pitsaanerpaamik tunigaangatsigu aamma uagut nuannaar­tarpugut.

17-18. Imermut morsutsin­neqarnissamut siumukarninni pissuseq suna iluaqutigissaviuk, aamma sooq? (Ussatit 3:3-6)

¹⁷ Anersaakkut siumukarninni ajornar­torsiorumaarputit. Immaqa illaruaatigineqassaatit, akerlilersor­neqassaatit malersor­neqarlutil­luunniit. (Tim 2. 3:12) Ileqqupalaallu unitsin­niarnerani nakkartoorsin­naavutit. Immaqalu anguniakkat ungasip­pasimmat nikallorsin­naallutillu utaqqisin­naanngitsutut misigisin­naavutit. Pinertusaar­nissannut suna iluaqutigissaviuk? Jehovamik asanninneq.

¹⁸ Jehovamik asanninnerit pissuserisannit nuanner­nerpaavoq. (Ussatit 3:3-6 atuakkit). Jehovamik asanningaarnerit ajornar­torsiutivit naammagalugit atornis­saannut iluaqutigissavat. Biibilimi Jehovap “unneqqarissusia”, tassa kiffaminut ilumoorfigin­nilluni asanninnera, eqqaaneqarajuttarpoq. Jehova ilumoorfigin­nilluni asannit­tuugami qimanngisaan­nassavaatigut asajunnaan­ngisaan­nassallutalu. (Tuss 100:5) Eqqaamajuk Guuti assilillugu pinngor­titaagavit. (Mos 1. 1:26) Taamaammat Jehovap asannin­neratut qanoq asannit­tuliorsinnaavit?

19. Jehovap illit pillutit iliuuserisimasai qanoq qujamasuutiginerulersin­naavigit? (Galaatiamiut 2:20)

¹⁹ Qujamasunnikkut asannin­nerulersin­naavutit. (Tes 1. 5:18) Ullut tamaasa eqqarsaatigisaruk Jehovap qanoq asannit­tuliorfigisimagaatit. Taava tamakku immikkut taallugit Guutimut qinuninni qujassutigisakkit. Jehovap iliuuserisimasai ilinnorpiaq tunissutitut isigisakkit, soorlu Paulusi taamaas­simasoq. (Galaatiamiut 2:20 atuaruk). Jehovap asanninnera akillugu asannit­tuliorfigerusuppiuk? Jehovamik asanninnerit pissutigalugu ussernartut akiorsin­naalissavatit aamma ajornar­torsiorninni pinertusaarsin­naallutit. Anersaakkullu ittunik aalajangersimasumik  sammisaqartaruit ullut tamaasa asanninnermik Ataatat ersersitsivigisinnaavat.

20. Jehovamut tunniul­luinnartut qanoq neriorsuisarpat, aalajangiinerlu tamanna qanoq pingaaruteqartigaa?

²⁰ Jehova asagakku piffissap ingerlanerani immikkut ittumik qinunermi taassumunnga tunniul­luinnassaatit. Tunniul­luinnarsimasut naassaan­ngitsumik Jehovamit pigineqalis­sagamik nuanningaartumik neriuuteqalerput. Tunniul­luinnartut neriorsuutigisimavaat piffissani nuannersuni nuanniitsunilu Jehova kiffartorfigiuas­sallugu. Ataasiaammik neriorsuutaavoq pimoorussassaq. Inuuninnilu aalajangiinerpas­suarnit allanit tamanit pingaaruteqar­nerpaavoq. (Tuss 50:14) Saatanip Jehovamik asannik­kunnaarsin­niarpaatit aalajaak­kunnaar­niassagavit. Ajugaatin­naveersaaruk! (Job 27:5) Jehova asagakku tunniul­luinnarnermik neriorsuutit eqqortis­sinnaassavat Ataatannullu qilammiusumut qaninnerujar­tortuarlutit.

21. Sooq oqarsin­naavugut imermut morsutsin­neqarneq naggasiutaanani aallarniutaasoq?

²¹ Jehovamut tunniul­luinnareersimaguit utoqqaanertat imermut morsutsin­neqarnissat pillugu oqaloqatigikkit. Eqqaamajuk imermut morsutsin­neqarneq naggasiutaanani aallarniutaasoq. Ulloq taanna aallarnerfigalugu naassaan­ngitsumik Jehova kiffartorfigisin­naassavat. Taamaattumik maanna Jehova asanerulerumallugu anguniagaqartarit. Taamaalior­taruimmi qularnan­ngitsumik imermut morsutsin­neqassaatit. Ulloq taanna nuanningaassaaq! Ullorli taanna aallarniutaan­naammat kajumis­saarusup­patsigit Jehovamik erneranillu asanninnerit ineriar­tortittuassagit.