1. Ataatsimiigiaq­qaartut ilarpassuisa suna killitsis­sutigisarpaat? (Aamma asseq takuuk).

 TAKORLOORIARUK aappariit Jehovap Nalunaajaasuisa ataatsimiin­nerannut najuuteq­qaartut. Inussiar­nersumik tikilluaq­qusaanertik ilagiin­niittullu asaqatigiinnerat killitsis­sutigingaarpaat. Angerlar­tillutik nuliaasup uini ima oqarfigaa: ‘Jehovap Nalunaajaasuisa allaanerungaarnerat nuanningaarami!’

2. Ilaasa suna unissutigisimavaat?

² Kristumiut asaqatigiinnerat immikkuul­larissuuvoq. Soorunami Jehovap Nalunaajaasui naammal­luinnar­tuunngillat. (Joh 1. 1:8) Uppeqatigut ilisarisimanerujar­tortillugit taakkua kukkussutaat maluginiarpal­laalertoorsin­naavagut. (Rom 3:23) Ajoraluar­tumillu ilaasa allat kukkussutaat unissutigisimavaat.

3. Jiisusip malinnittaasa ilumoortut suna ilisarnaatigaat? (Johannesi 13:34, 35)

 ³ Jiisusip malinnittaasa ilumoortut suna ilisarnaatigaat? Allaaserisami matumani allassimaffik najoqqutarineqartoq takoqqilaariaruk. (Johannesi 13:34, 35 atuakkit). Jiisusi oqarpoq malinnitsini asaqatigiissasut, oqanngilaq naammal­luinnar­tuussasut. Aamma maluginiaruk oqanngitsoq: “Asaqatigiikkussi ilissi nammineq paasissavarsi ilinniar­titarigissi.” Oqarporli: “Asaqatigiikkussi kikkut tamarmik paasissavaat ilinniar­titarigissi.” Tassa inuit allat kristumiut namminis­sarsiornatik asaqatigiinnerat takugaangamikku paasissavaat kristumiuusut ilumoortut.

4. Inuit ilaasa suut eqqarsaatigisarpaat?

⁴ Jehovamik Nalunaajaasuun­ngitsut immaqa apeqqutit uku eqqarsaatigisarpaat: ‘Jiisusip malinnittaasa ilumoortut asanninneq qanoq ilisarnaatigaat? Jiisusi apustiliminut qanoq asannit­tuliortarpa? Aamma Jiisusi qanoq ilaarneqarsinnaava?’ Uaguttaaq Nalunaajaasuusugut apeqqutit taakkua akissutaat eqqarsaatigisariaqarpagut. Taamaalioruttami allat kukkussuteqaraluartut asannit­tuliorfiginerusin­naavagut. – Ef 5:2. 

5. Johannesi 15:12, 13-imilu Jiisusip oqaasii nassuiakkit.

⁵ Jiisusi oqarpoq asanninneq immikkuul­larissoq malinnitsimi ilisarnaatigissagaat. (Johannesi 15:12, 13 atuakkit). Maluginiaruk Jiisusip ima peqqugai: “Uanga ilissinnik asanninnittut asaqatigiigitsi.” Asanninneq taama ittoq qanoq immikkuul­larissuua? Jiisusip nassuiarpaa taama asaqatigiittut  imminut pilliutigeriaan­naassasut allaallu pisariaqassappat uppeqatitik pillugit toqoriaan­naallutik. b

6. Asanninnerup pingaaruteqarnera Biibilimi qanoq ersersin­neqarpa?

⁶ Asanninneq pingaaruteqangaartutut Biibilimi ilinniar­titsissutigineqarpoq. Inuppassuit allassimaffiit uku nuannarisorujussuuaat: ‘Guuti tassaavoq asanninneq.’ (Joh 1. 4:8) “Inoqatit imminut asanittut asassavat.” (Mat 22:39) ‘Asanninnerup ajortuliarpassuit matoortarpai.’ (Pet 1. 4:8) “Asanninneq atuuttuassaaq.” (Kor 1. 13:8) Versinit taakkunannga allanillu erserpoq asanninneq pissuseris­sallugu qanoq pingaaruteqar­tigisoq.

7. Sooq Saatanip inuit ilumoorlutik asaqatigiiler­nissaannut ikiorsin­naanngilai?

⁷ Inuppassuit paaserusut­tarpaat upperisarsiorneq sorleq ilumoor­tuunersoq. Upperisarsioqatigiimmi tamarmik ilumoortoq ilinniar­titsissutiginerar­tarpaat Guutili pillugu assigiin­ngitsunik ilinniar­titsisarlutik. Saatanip inuit paatsiveerutsin­niarlugit upperisarsioqatigiinnik eqqunngitsunik arlalinnik pilersitsisimavoq. Nunanili tamalaani qatanngutigiinnik asaqatigiil­luinnartunik pilersitsisin­naanngilaq. Jehova kisimi taamaaliorsinnaavoq. Asanninnermi ilumoortoq Jehovameersuuvoq. Jehovamit ikiorneqartut anersaavanillu siulersor­neqartut kisimik ilumoorlutik asaqatigiis­sinnaapput. (Joh 1. 4:7) Taamaattumik tupinnanngilaq Jiisusi oqarmat malinnitsimi kisimik namminis­sarsiornatik asaqatigiinneq ilisarnaatigissagaat.

8-9. Jehovap Nalunaajaasuisa asaqatigiinnerat pissutigalugu inuit ilaat qanoq eqqarsarsimappat?

⁸ Jiisusip oqarneratut malinnittaasa asaqatigiinnerat inuppassuit maluginiar­tarpaat. Assersuutigalugu qatanngutip Ianimik atillip timersor­tarfissuarmi ataatsimeersuaq­qaarami tamanna maluginiarpaa. Ataatsimeersuarneq qaammatinik marlunnik sioqqullugu timersor­tarfissuarmi tassani timersorlutik unammisut isiginnaarsimavai. Maannalu ataatsimeersuarnermi Nalunaajaasut pissuserinnerat unammisunik isiginnaartut pissusiinit allaanerul­luinnarpoq. Nalunaajaasut inussiar­nersuunerat, atisaris­saarnerat meeqqallu pissuseris­saarnerat maluginiarpai. Oqalugiartut qanoq oqarnersut eqqaamanngilaa, Nalunaajaasulli qamuuna eqqissillutik pilluarpasinnerat puiukkiuppaa. Taakkunatulli pilluarusuppoq. Aap, uppeqatigut asagatsigit ataqqin­nittumik inussiar­nersumillu pisarpagut. Ilumoorluta asaqatigiinnerput pissuseris­saarnermik kinguneqartarpoq.

⁹ John ataatsimiigiaq­qaarami assingusumik misigisaqarpoq. Nalunaajaasut inussiar­nersuunerat nuannaringaaramiuk allaat eqqarsarpoq kukkujuitsuusimassasut. Asaqatigiinnerat pissutigalugu isummerpoq upperisaq ilumoortoq nassaarisimallugu. Misigisat taamaattut ersersippaat Jehovamik Nalunaajaasut kristumiuusut ilumoortut.

10. Qaqugukkut asannit­tuliornissamut periarfis­saqarluar­tarpugut? (Aamma quppernerup ataani ilanngussaq takuuk).

¹⁰ Eqqaaneqareersutut tamatta naammal­luinnan­ngitsuuvugut. Taamaattumik uppeqatigut ajuallaatigisin­naasatsinnik oqaaseqarlutillu iliuuseqarsin­naapput. c (Jaak 3:2) Taamaat­toqaraangat qisuariarnitta eqqumaf­figineratigut  asannit­tuliornissamut periarfis­saqarluar­tarpugut. Asannit­tuliornissamut tunngatillugu Jiisusi qanoq ilaarsin­naavarput? – Joh 13:15.

11. Jaaku Johannesilu ajortumik sumik pissuseqarpat? (Aamma assiliaq takuuk).

¹¹ Jiisusip naatsorsuutiginngilaa malinnitsini naammal­luinnar­tuussasut. Jehovamit iluarisaanias­sammata pissusiminnik aaqqiinis­saannut asannittumik ikiortarpai. Ilaanni apustilit ilaasa, Jaakup Johannesillu, anaanartik Jiisusimukaqquaat apereqqullugu Kunngeqarfimmi nuimasunik atorfeqalersin­naanersut. (Mat 20:20, 21) Taamaalior­nermikkut makitanertik anneruniar­nertillu ersersippaat. – Uss 16:18.

12. Jaaku Johannesilu kisimik ajortumik pissuseqarpat? Nassuiaruk.

¹² Jaaku Johannesilu pisumi tamatumani kisiartaallutik ajortumik pissuseqan­ngillat. Maluginiaruk apustilit allat qanoq qisuariartut. Biibilimi allassimavoq: “Ilaasa qulit tamanna tusaramikku nukariit quianaagilerpaat.” (Mat 20:24) Jaaku Johannesilu apustileqatitillu oqqattut takorloorsin­naavarput. Immaqa ilaat Jaakumut Johannesimullu  oqarput: ‘Uagutsinniit pingaar­nerusorigassi Kunngeqarfimmi nuimanerusumik atorfeqalerusukkassi? Uaguttaaq ilungersorluta Jiisusi suleqatigisimagatsigu immikkut pisinnaatitaaf­feqaler­nissatsinnut piukkun­narpugut!’ Naluarput qanorpiaq oqarsimanersut, kisianni pisumi tamatumani apustilit asaqatigiin­ngitsoorput.

13. Jiisusip apustilit kukkussutaat qanoq qisuariarfigai? (Matiusi 20:25-28)

¹³ Pisumi tamatumani Jiisusi qanoq qisuariarpa? Kamalinngilaq. Aamma oqanngilaq atorsin­naanagit pitsaanerusunillu maniguuttunik asaqatigiit­tuartunillu apustilitaar­niarluni. Nalunnginnamiuk apustilit eqqortuliorusuttartut naammagit­tarluni oqaluuppai. (Matiusi 20:25-28 atuakkit). Aamma kina arlartik annerunersoq assortuus­sutigigaluaraat asannit­tuliorfigisarpai. – Mak 9:34; Luk 22:24.

14. Juutini isiginnittaaseq suna nalinginnaava?

¹⁴ Juutit upperisarsiornikkut siuttuisa ilinniar­titsissutigisarpaat innuttaaqatigiinni nuimasut kisimik pingaaruteqartut. (Mat 23:6, q.a.i.) Aamma allanit pingaar­nerusoripput. (Luk 18:9-12) d Jiisusip nalunngilaa isiginnittaaseq taama ittoq apustilit imminut allanullu isiginnit­taatsiminnut sunnerneqaatigisimagaat. (Uss 19:11; Joh 2:24, 25) Taamaattumik kukkujuitsuussasut naatsorsuutiginngilaa. Kukkussuteqaraangata kamanneq ajorpoq. Nalunnginnamiuk eqqortuliorusuttut makitanaveersaar­niassammata maniguun­nissamik asannit­tuliornis­samillu ilinniartippai.

15. Jaakup Johannesillu apustileqataasalu akornganni pisoq qanoq ilinniutigisin­naavarput?

¹⁵ Jaakup, Johannesip apustileqataasalu akornganni pisoq ilinniutigisin­naavarput. Jaaku Johannesilu Kunngeqarfimmi nuimasunik atorfeqalerusukkamik kukkupput. Kisianni aamma apustilit allat ataasioqatigiinnermik siuarsaan­nginnamik kukkupput. Jiisusilli apustilit aqqaneq-marluk tamaasa inussiar­nersumik asannit­tumillu pivai. Qanoq ilinniarfigisin­naavarput? Uppeqatitta iliuusii pingaaruteqaan­naratik kukkugaangata uagut qanoq periarnerput pingaaruteqarpoq. Taamaattumik narrutsas­simagutta uku eqqarsaatigisariaqarpagut: ‘Sooq qatanngutima iliuusaa ajuallaatigaara? Aaqqitassannik sanngiis­suteqarpunga? Qatanngutiga ilungersunartumik atugaqarpa? Narrutsas­simaninnut pissutis­saqaraluarlunga asannillunga isumakkeerfigiin­narsinnaavara?’ Taama asannit­tuliortarutta ersersis­savarput kristumiuusugut ilumoortut.

16. Jiisusi qanoq ilaarsin­naavarput?

¹⁶ Jiisusip maligas­siaanit paasivarput uppeqatigut paasiniarsaris­sagigut. (Uss 20:5) Jiisusip inuit qanoq uummammioqarnersut takusin­naasarpaa. Uagut taamaaliorsin­naanngik­kaluarluta ilisarisimanerulersin­naavagut. Taamaaliorutta kukkugaangata naammagit­tarfiginissaat ajornan­nginnerussaaq. (Ef 4:1, 2; Pet 1. 3:8) Assersuuteqariarta.

17. Ilagiinnik nakkutilliisup uppeqatiminik ilisarisiman­ninnerulernini qanoq iluaqutigaa?

¹⁷ Afrikap kangiani nakkutilliisoq angalasartoq oqaluttuarpoq ilagiit ilaanni inussiar­niippasittumik qatannguteqartoq. Aalajangerporli alarnagu ilisarisimaneruler­niarlugu.  Taamaaliorami paasivaa qatanngut taanna peroriar­tornerminit sunnerneqangaarsimasoq. Ima oqaluttuarpoq: “Paasilerakku qatanngut taanna qanoq tunuliaquttani akiorniarlugu ilungersor­tigisimasoq qanorlu siumukar­tigisimasoq nuannarilerpara. Ikinngutigiil­lualerpugut.” Aap, uppeqatigut paasiniarsarisarutsigit asannit­tuliorfigeriaan­naanerus­savagut.

18. Uppeqatitsinnit ajuallatsin­neqarnermi suut eqqarsaatigisariaqarpagut? (Ussatit 26:20)

¹⁸ Immaqa eqqarsarpugut uppeqaterput uagutsinnik ajuallatsitsisimasoq saaffigisariaqarlugu. Taamaaliun­nginnitsinnili uku eqqarsaatigeq­qaartariaqarpagut: ‘Paasinerluisimavunga?’ (Uss 18:13) ‘Piaarinani ajuallatsit­toorpaanga?’ (Oqal 7:20) ‘Nammineq assingusumik kukkussuteqar­nikuuvunga?’ (Oqal 7:21, 22) ‘Saaffigigukku ajornar­torsior­titsineruliin­nassaanga?’ (Ussatit 26:20 atuaruk). Taakku eqqarsaatigereerlugit immaqa isummissaagut qatannguterput saaffiginagu asagatsigu isumakkeerfigiin­narsinnaallugu.

19. Suna aalajangiusimaviuk?

¹⁹ Jehovap Nalunaajaasuisa asaqatigiinnikkut ersersit­tarpaat Jiisusip ilinniar­titarigaatik. Uagullu inuttut ataasiakkaatut uppeqatigut kukkugaangata asannit­tuliorfigisar­nerisigut ersersit­tarparput kristumiuusugut ilumoortut. Taamaalior­nerpullu inuit allat maluginiarlugu immaqa isummissapput upperisarput ilumoortuusoq Jehovalu Guutiusoq asannittoq guutisiorfigerusulerlugu. Asaqatigiin­nitsigut ersersit­tuartigu kristumiuusugut ilumoortut.