ATUAQQISSAAGASSAQ 13
Pinngortitaq iluaqutigalugu meeqqasi Jehova pillugu ilinniartissigit
“Kia pinngortippaa?” – ES 40:26.
ERINARSUUT 9 Jehova kunngigaarput!
QILANAARTUUT a
1. Angajoqqaat suna kissaatigaat?
ANGAJOQQAAJUSUSI, meeqqassi Jehova ilisarisimalissagaat asalissagaallu kissaatigingaarissi ilisimavarput. Guutili takuneqarsinnaanngilaq. Guuti piviusutut isigilernissaanut taassumunngalu qanillinissaannut meeqqasi qanoq ikiorsinnaavisigit? – Jaak 4:8.
2. Angajoqqaat meeqqatik Jehovap pissusii pillugit qanoq ilinniartissinnaavaat?
2 Meeqqat Jehovamut qanimut attaveqalernissaannik ikiueriaaseq pingaarutilik tassaavoq Biibilimik misissueqatigisarnerat. (Tim 2. 3:14-17) Aammali allatigut meeqqat Jehova pillugu ilinniarsinnaanerat Biibilimi allaatigineqarpoq. Ussatini ataataasup ernini eqqaasippaa Jehovap pissusii pinngortitami ersarissut eqqumaffigeqqullugit. (Uss 3:19-21) Angajoqqaat pinngortitaq iluaqutigalugu qanoq meeqqaminnik Jehovap pissusii pillugit ilinniartitsisinnaanersut sammissavarput.
PINNGORTITAQ ATORLUGU MEEQQASI QANOQ ILINNIARTISSINNAAVISIGIT?
3. Angajoqqaat meeqqatik qanoq paasitissavaat?
3 Biibilimi allassimavoq Guutip ‘pissusii takussaanngitsut pinngortitaasigut paasineqarsinnaagamik inuit pinngortinneqarneranniilli ersarissut’. (Rom 1:20) Angajoqqaajususi, meeqqassi aneeqatiginissaat nuannaarutigisarunarparsi. Aneeqatigigaangassigit paasitittarsigit pinngortitat qanoq Jehovap pissusii tupinnavissut ersersinneraat. Angajoqqaat Jiisusi qanoq ilinniarfigisinnaaneraat paasiniariartigu.
4. Jiisusi pinngortitaq iluaqutigalugu qanoq ilinniartitsiva? (Lukkarsi 12:24, 27-30)
4 Jiisusip ilinniartitsinermini pinngortitaq qanoq atoraa maluginiariaruk. Ilaanni ilinniartitani oqarfigai tulukkat naasullu liiliat eqqumaffigissagaat. (Lukkarsi 12:24, 27-30 atuakkit). Jiisusip uumasut naasullu suulluunniit eqqaasinnaagaluarpai, ilinniartitamili ilisimalluagaat eqqaavai. Ilinniartitat tulukkat timmisut naasullu narsaammi sikkersut takusimassavaat. Takorloorsinnaaviuk Jiisusip oqaluutigaluni taakku tikkuarai? Taakkulu eqqartoreerlugit qanoq iliorpa? Ataatami qilammiusup qanoq tukkortiginera asanningaarneralu pillugit ilinniartitani sunniuteqarluartumik ilinniartippai. Soorlu tulukkat naasullu isumagisarai Jehovap kiffani aalajaatsut nerisassaqartillugillu atisassaqartissavai.
5. Pinngortitat iluaqutigalugit angajoqqaat meeqqatik Jehova pillugu qanoq ilinniartissinnaavaat?
5 Angajoqqaajususi, Jiisusip ilinniartitseriaasia ilaarsinnaavisiuk? Pinngortitami nuannarisat, soorlu uumasoq naasorluunniit nuannarinerpaasat, pillugu meeqqat oqaluttuussinnaavat. Eqqaamajullu tamanna Jehova pillugu qanoq ersersitsinersoq nassuiassallugu. Taava immaqa meeqqat aperisinnaavat uumasoq imaluunniit naasoq nuannarinerpaasaa pillugu. Soqutigisaa pillugu oqaluttuukkukku ilimanarneruvoq Jehova pillugu ilinniartikkukku tusarnaarnerulissagaatit.
6. Christopherip anaanaa qanoq ilinniarfigisinnaavarput?
6 Taava imaappa angajoqqaat Jehova pillugu ilinniartitsinnginnerminni uumasoq naasorluunniit aalajangersimasoq pillugu piffissangaatsiaq atorlugu misissueqqissaartariaqartut? Naamik, taamaattariaqanngilaq. Jiisusi tulukkat nerisassanik qanoq ujarlertarnersut liiliallu qanorpiaq naajartortarnersut takisuuliorluni nassuiaanngilaq. Imaassinnaavoq meeqqavit pinngortitaq pillugu itinerusumik eqqartuinissani nuannarigaa, ilaannikkulli oqaaseqalaagiinnarnissat apeqqulluunniit ataaseq paasinninnissaanut naammattarpoq. Qatanngutip Christopherimik atillip meeraanermini eqqaamasai maluginiariakkit: “Avatangiisitsinni pinngortitat qujamasuutiginiassagatsigit anaana naatsunnguamik oqaaseqalaartarpoq. Assersuutigalugu qaqqat takusinnaagaangatsigit ima oqarsinnaasarpoq: ‘Takuuk, ikku qaqqarsuit kusanat! Ilaa, Jehova assissaqanngik’!’ Aamma sissamiikkaangatta ima oqarsinnaavoq: ‘Assaa, malissuit sakkortut ilaa! Jehova ilaa pissaaneqaq’!’” Christopher ima oqarpoq: “Taama naatsunnguamik eqqarsalersitsinerit uannut qatanngutinnullu sunniuteqangaarput.”
7. Pinngortitap eqqarsaatiginissaanik meeqqatit qanoq ilinniartissinnaavigit?
7 Meeqqatit peroriartortillugit pinngortitaq Jehovalu pillugit ilinniarsinnaasamik eqqarsaatiginerunissaannut ikiorsinnaavatit. Jehovap pinngortitaasa ilaat ataaseq eqqartoriarlugu meeqqat aperisinnaavat: “Jehova pillugu suna ilikkarpiuk?” Immaqa nuannaarutigalugulu tupaallaatigissavat meeqqatit qanoq eqqarsartarnersut. – Mat 21:16.
QAQUGUKKUT PINNGORTITAQ ATORLUGU MEEQQASI ILINNIARTITTARSINNAAVISIGIT?
8. Itsaq Israalimi angajoqqaat aqqusinermi angalaaraangamik qanoq periarfissaqartarpat?
8 Israalimi angajoqqaat aqqusinermi angalaaraangamik meeqqatik Jehovap peqqussutaanik ilinniartittassagaat peqquneqarput. (Mos 5. 11:19) Israalimi nunaannarmi aqqusinikkut angalaaraangata uumasut, timmissat naasullu assigiinngitsorpassuit takuneqarsinnaasarput. Taamaattumik angalagaangamik Jehovap pinngortitai pillugit meeqqatik oqaluttuunnissaannut periarfissarpassuaqarput. Aamma ilissi angajoqqaajususi, pinngortitaq iluaqutigalugu meeqqasi ilinniartissinnaavasi. Angajoqqaat ilaat qanoq taamaaliorsimanersut sammeriartigu.
9. Punitha Katjalu qanoq ilinniarfigisinnaavigit?
9 Anaanaasoq Punithamik atilik Indiami illoqarfissuarmi najugalik ima oqarpoq: “Nunaqarfinni ilaquttagut tikeraaraangatsigit Jehovap tupinnaqisumik pinngortitai pillugit meeqqatsinnik ilinniartitsinissamut periarfissatut isigisarparput. Misigivunga illoqarfik inunnik ulikkaartoq angallaffiusorlu qimakkaangatsigu meeqqakka pinngortitaq pillugu paasisaqarnerusartut.” Angajoqqaajususi, sumiiffimmi alianaangaartumi meeqqasi ilagigussigit tamanna puiunngisaannassagunarpaat. Katja Moldovameersoq ima oqarpoq: “Eqqaamanerusama ilagaat meeraaninni angajoqqaakka ilagalugit nunaannarmiissimanerput. Angajoqqaakka qujassutissaqarfigaakka mikisuullungali Jehovap pinngortitaasa maluginiarnissaannik pissusiilu nuannersut pinngortitaasigut takuneqarsinnaanerannik ilinniartissimammannga.”
10. Angajoqqaat illoqarfissuarmit angalanissamut periarfissaqanngikkunik qanoq iliorsinnaappat? (Ungalusaq “ Angajoqqaanut iluaqutissat” takuuk)
10 Illoqarfissuaq qimallugu angalaarnissamut periarfissaqanngikkussi qanoq iliorsinnaavisi? Amol, aamma Indiami najugalik, ima oqarpoq: “Sumiiffitsinni angajoqqaat akunnerpassuit sulisariaqarput, nunaannarmullu angalaneq akisoorujussuusarpoq. Naatsiiviliamili aamma qaliami aneerasaartarfimmi Jehovap pinngortitai takuneqarsinnaammata pissusii eqqartorneqarsinnaapput.” Aamma illit sumiiffinni pinngortitat meeqqannut takutissinnaasatit eqqumaffigisinnaavatit. (Tuss 104:24) Timmissat, uumasuaqqat, naasut allarpassuillu maluginiarsinnaagunarpatit. Karina Tysklandimeersoq ima oqarpoq: “Anaanama naasut nuannareqai. Meeraallunga pisuttuaqatigiikkaangatta naasut kusanartut takugaangamigit tikkuartuuttarpaanga.” Angajoqqaajususi, aamma pinngortitaq pillugu videut atuagassiallu peqatigiissortat saqqummersitaat meeqqassinnik ilinniartitsinermi iluaqutigisinnaavasi. Aap, sumiluunniit najugaqaraluarussi Guutip pinngortitaasa maluginiarnissaannut meeqqasi ikiorsinnaavasi. Jehovap pissusiisa ilaat meeqqannut maluginiartissinnaasatit maanna sammeriartigit.
JEHOVAP ‘PISSUSII TAKUSSAANNGITSUT ERSARIPPUT’
11. Angajoqqaat meeqqatik Jehovap asanninneranik maluginiaanissaannik qanoq ikiorsinnaavaat?
11 Meeqqatit Jehovap asanninneranik paasinninnissaannut ikiorumallugit uumasorpassuit piaqqaminnik qajassuussisarnerat eqqaasinnaavat. (Mat 23:37) Pinngortitat assigiinngitsorpassuit kusanarluinnartut nuannaarutigisinnaasagut aamma eqqaasinnaavatit. Karina, siusinnerusukkut eqqaaneqartoq, ima oqarpoq: “Pisuttuaraangatta anaanap kajumissaartarpaanga uneriarlunga naasut tamaasa immikkuullarissuunerat taavalu kusanarluinnartuunerisa Jehovap asanninneranik ersersitsineri maluginiartassagikka. Ukiorpassuit qaangiukkaluartut naasut assigiinngissusaat, ilusii qalipaataallu suli maluginiaqqissaartarpakka. Eqqaasinneqartarpunga Jehovap uagutsinnik asanningaarneranik.”
12. Angajoqqaat meeqqatik Guutip ilisimassusianik paasinninnissaannut qanoq ikiorsinnaavaat? (Tussiaat 139:14) (Aamma asseq takuuk).
12 Meeqqatit Guutip ilisimassusianik paasinneqqullugit ikiukkit. Jehova uagutsinnit ilisimassuseqarnerungaarpoq. (Rom 11:33) Assersuutigalugu erngit nuianngortarnerat nuissallu ingerlaarneranni allamut ingerlaariaasiat eqqartorsinnaavat. (Job 38:37) Aamma inuup timaata sananeqaatai assissaqanngilluinnartut eqqaasinnaavatit. (Tussiaat 139:14 atuaruk). Ataataasoq Vladimirimik atilik taamaaliorsimasoq ima oqarpoq: “Taamaalluni ernerput cykelinit uppippoq amiiakalatserlunilu. Ullualuit qaangiummata amiiakalatsernera mamippoq. Nuliaralu nassuiaapparput timerput imminut aaqqissinnaanngortillugu Jehovap pinngortissimagaatigut eqqaallugulu inuit pilersissimasaanit taamatut aaqqittoqarsinnaanngitsoq. Assersuutigalugu biili aporsimaguni nammineq aaqqissinnaanngilaq. Taamaalilluni ernitta paasivaa Jehova ilisimassuseqartoq.”
13. Angajoqqaat meeqqatik Guutip pissaanera pillugu paasinninnissaannut qanoq ikiorsinnaavaat? (Esaja 40:26)
13 Jehovap qilammut qiviaqquaatigut eqqarsaatigeqqullugulu assissaqanngitsumik pissaaneqarami allaat ulloriarpassuit inissaminniitissinnaallugit. (Esaja 40:26 atuaruk). Meeqqatit qilammut qiviaqqusinnaavatit eqqarsaatigeqqullugulu suut takuneraat. Qatanngut arnaq Taiwanimeersoq meeraanini pillugu ima oqaluttuarpoq: “Taamaalluni anaanalu asimi tammaaqatigiippugut, unnuakkullu illoqarfiup qulliinit qaamaneqanngimmat ulloriarpassuit takusinnaavagut. Taamani peqatinnit tatineqarpunga eqqarsaatigalugulu Jehova aalajaallunga kiffartorfigisinnaanerlugu. Anaanap kajumissaarpaanga eqqarsaatigeqqullugu Jehovap pissaanini atorlugu ulloriarpassuit pinngortissimagai eqqaamaqqullugulu pissaaneq taanna atorlugu misilinneqaatit suulluunniit anigorsinnaaqqullugit ikiorsinnaagaanga. Asimi pinngortitarsuup isiginnaareernerata kingorna Jehovap ilisarisimanerulernissaa killinneqaatigaara kiffartorfiginissaalu aalajangiusimanerulerlugu.”
14. Pinngortitaq iluaqutigalugu angajoqqaat meeqqatik qanoq paasitissinnaavaat Jehova Guutiusoq pilluartoq?
14 Jehovap pinngortitaasigut nuannaartuunera ersersinneqaannarani aamma quiasaarnermik nuannarisaqarnera erserpoq. Uumasut amerlanersaat, soorlu timmissat aalisakkallu, pinnguartartut ilisimatuunit maluginiarneqarsimavoq. (Job 40:20) Uumasoq pinnguarpasittoq meeqqavit illaatiginikuuaat? Immaqa qitsuup nuersagassiaq pinnguarigaa imaluunniit qimmiaqqat paasuusaartut takusimavaat. Tulliani meeqqavit uumasut arlaat illaatigippassuk eqqaasissinnaavatit Guuti pilluartoq kiffartuukkipput! – Tim 1. 1:11.
ILAQUTARIITTUT JEHOVAP PINNGORTITAI NUANNAARUTIGISIGIT
15. Angajoqqaat meeqqamik eqqarsaataannik qanoq paasiniaasinnaappat? (Ussatit 20:5) (Aamma asseq takuuk).
15 Ilaannikkut meeqqatik ajornartorsiutiminnik nalaattakkaminnik eqqartuitinnissaat angajoqqaat sapernartissinnaavaat. Atukkatit taamaappata meeqqatit qanoq eqqarsaateqartarnersut paasiniarsinnaavat. (Ussatit 20:5 atuaruk). Angajoqqaat ilaasa meeqqatik asimeeqatigigaangamikkit oqaloqatiginissaat sapernartinnginnerusarpaat. Meeqqammi angajoqqaallu akornusersorneqarneq ajormata. Ataataasup Masahikomik atillip Taiwanimeersup pissutaasoq alla ima eqqaavaa: “Meeqqagut silameeqatigigaangatsigit, qaqqani sissamiluunniit pisuttuaraangatta, qasukkarsimanerusarput. Taamaalillutik ammasumik oqaluttuarnissartik ajornannginnerutittarpaat, qanorlu eqqarsaatersornersut paasinerusarpagut. Katja, siusinnerusukkut eqqaaneqartoq, ima oqarpoq: “Atuareernerma kingorna anaanap naatsiivimmut alianaalluinnartumukaqatigisarpaanga. Tassani eqqissisimanartumi atuarfinni susoqarsimanersoq imaluunniit suut ernumassutiginerlugit oqaluttuunnissaanut ajornannginnerutittarpara.”
16. Ilaqutariit Jehovap pinngortitai eqqissisimaarnissaminnut qanoq iluaqutigisinnaavaat?
16 Jehovap pinngortitai aamma ilaqutariit eqqissisimaarnissaannut, nuannaaqatigiinnissaannut ilaqutariittullu ataqatigiillualersitsinissamut iluaqutaapput. Biibilimi allassimavoq ‘illarfissaqartartoq pisseqattaarfissaqartarlunilu’. (Oqal 3:1, 4, tastamantitoĸaĸ) Jehova nunarsuarmi sumiiffinnik alianaalluinnartunik nuannaarfiusinnaasunik pilersitsisimavoq. Ilaqutariippassuit asimiinnissartik nuannaarutigisarpaat. Meeqqat ilaasa silami arpallutillu pinnguartarnertik nuannaarutigisarpaat, ilaasa uumasut isiginnaarlugit imaluunniit kuunni, tatsini sissamiluunniit nalunnissartik nuannarisarpaat. Pinngortitarsuaq Jehovallu piliai avatangiiseralugit nuannaarutiginissaannut periarfissarpassuaqarpugut!
17. Sooq angajoqqaat meeqqatik Guutip pinngortitaasa nuannaarutiginissaannik ikiortariaqarpaat?
17 Paratiisissami angajoqqaat meeqqallu Jehovap pinngortitai tamakkiisumik nuannaarutigissavaat. Taamanikkussamut uumasut ersiginavianngilagut, uumasullu ersiginavianngilaatigut. (Es 11:6-9) Jehovap pinngortitai naassaanngitsumik nuannaarutigissavagut. (Tuss 22:27) Kisianni angajoqqaajususi, pinngortitap nuannaarutiginissaanut meeqqasi ikiulereersinnaavasi. Meeqqasi Jehovap pinngortitai atorlugit ilinniartikkussigit kunngip Daavip Jehovamut oqaasii uku isumaqatigissagunarpaat: ‘Naammassisatit assissaqanngillat.’ – Tuss 86:8.
ERINARSUUT 79 Ajoqersortigit aalajaaqqullugit
a Qatannguterpassuatta angajoqqaatillu kristumiut pinngortitami nuannisaaqatigiittarsimanertik eqqaamasarpaat. Angajoqqaaminnit pinngortitami Jehova pillugu ilinniartinneqartarsimanertik puiunngisaannarpaat. Illit meeraqaruit Guutip pissusii pillugit ilinniartitsininni pinngortitaq qanoq atorsinnaaviuk? Allaaserisami matumani tamanna eqqartussavarput.