ATUAQQISSAAGASSAQ 10
Sooq imermut morsutsinneqassavit?
‘Tamassi imermut morsutsitaagitsi.’ – APS 2:38.
ERINARSUUT 34 Assuarnaallunga inoorusuppunga
QILANAARTUUT a
1-2. Imermut morsutsinneqartoqaraangat susoqartarpa, sunalu sammissavarput?
IMERMUT morsutsitaasussat takorluukkit. Oqalugiaatip nalaani nikueqquneqaramik apeqqutit marluk aalajangersimarpalullutik angerpaat. Ilaqutaasut ikinngutaasullu qungujullutik isiginnaarput. Imermit qaqimmata nuannaangaarnerat takuneqarsinnaavoq ersaattaappalunnerlu tusarsaalluni. Sapaatip-akunneri tamaasa agguaqatigiissillugu inuit 3.000-t sinnerlugit imermut morsutsinneqarlutik Jehovamik Nalunaajaasunngortarput.
2 Illimmi? Imermut morsutsinneqarnissat eqqarsaatigigukku Jehova ‘ujarpat’. (Tuss 14:1, 2) Tamannalu pissutigalugu inunnit amerlanernit allaanerulluinnarputit! Allaaserisaq manna ilinnut, qassinilluunniit ukioqaraluaruit, allataavoq. Aammali imermut morsutsinneqareersimasut Jehovamut kiffartornertik aalajangiusimanerulerusukkamikku allaaserisaq iluaqutigissavaat. Jehovamut kiffartornissamut pissutaasut pingasut sammeriartigit.
ILUMOORNEQ NAAPERTUILLUARNERLU NUANNARAATIT
3. Jehovap kiffaasa sooq ilumoorneq naapertuilluarnerlu nuannaraat? (Tussiaat 19:9; 119:163)
3 Jehovap innuttani peqquai ‘ilumoorneq nuannarissagaat’. (Zak 8:19) Jiisusillu malinnitsini oqarfigai naapertuilluarneq nuannarissagaat. (Mat 5:6) Tamanna isumaqarpoq Jehovap isaani ajunngitsut, eqqortut minguitsullu nuannarissagigut. Illimmi? Naapertuilluarneq ilumoornerlu nuannarivigit? Soorunami. Aamma sallu ajortuliornerlu uumigaatit. (Tussiaat 19:9; 119:163 atuakkit). Salluneq Saatanip pissusiisa ilagaat. (Joh 8:44; 12:31) Jehovap aqqa illernartoq mitaatigitinniartarpaa. Naatsiivimmi Edenimi Jehova salluliuutigalugu oqarporlusooq namminissarsiortuusoq unneqqaserlullunilu inuit ajunngitsumik erliguukkai. (Mos 1. 3:1, 4, 5) Inuit salluliuutit taakku upperalugit Jehova pillugu ajortumik eqqarsalersimapput. Taamaaliortullu ‘ilumoorneq nuannarinnginnamikku’ Saatanimit sunnerneqarlutik ajortulioriaannaasarput. – Rom 1:25-31.
4. Jehovap ilumoortumik nuannarisaqarnini qanoq ersersittarpaa? (Aamma assiliaq takuuk).
4 Jehova ‘Guutiuvoq unneqqarissoq’, tassa ilumoornermik nuannarisaqartoq. (Tuss 31:6) Asannitsini ilumoortoq Biibilimeersoq pillugu ilinniartittarpai. Taamaattumik Saatanip salluliuutaanik upperinnikkunnaarput. Aamma unneqqarissuussasut eqqortuliortuussasullu ilinniartittarmatik nalerisimaarlutillu qamuuna eqqissisimasinnaapput. (Uss 13:5, 6) Illit Biibili misissoqqissaarakku aamma tamanna misigivat. Paasivat Jehovap ilinniartitsissutigisaanik maleruaaneq kikkunnut tamanut, aamma ilinnut, inooriaasiusoq pitsaanerpaaq. (Tuss 77:14) Taamaattumik eqqortuliorusullutillu Jehova pillugu ilumoortoq oqaluttuarerusuppat, Saatanip salluliuutai upperineqarunnaarniassammata. (Mat 6:33) Qanoq taamaaliorsinnaavit?
5. Ilumoortoq Biibilimeersoq naapertuilluarnerlu qanoq illersorsinnaavigit?
5 Inooriaatsikkut ersersissinnaavat ilumoortoq illersorakku Saatanip salluliuutai uppererusunnagit. Aamma ersersissinnaavat Jehova kiffartorfigerusullugu taassumalu isaani eqqortuliorusullutit. Qanoq taamaaliorsinnaavit? Qinunikkut Jehovamut tunniulluinnarnikkut tamannalu kikkunnut tamanut ersersikkumallugu imermut morsutsinneqarnikkut. Aap, naapertuilluarnermik ilumoornermillu nuannarisaqarneq imermut morsutsinneqarnissamut kajumississutaangaarsinnaavoq.
JIISUSI KRISTUSI ASAVAT
6. Tussiaat 45:5 naapertorlugu Jiisusip Kristusip asanissaanut sunik pissutissaqarpugut?
6 Sooq Jiisusi Kristusi asaviuk? Pissutaasut pingaarutillit ilaat Tussiaat 45:5-imi allassimapput. (Atuaruk). Jiisusip ilumoorneq, naapertuilluarneq maniguunnerlu sapiilluni siuarsarlugillu nuannarai. (Mat 11:29; Joh 18:37) Taamaattumik ilumoorneq naapertuilluarnerlu nuannarigukkit soorunami aamma Jiisusi asassavat. Jiisusip maniguunnermik qanoq ilinniartippaatigut?
7. Jiisusip maniguunnera sooq nuannaraajuk?
7 Jiisusi maniguuttuuvoq. Assersuutigalugu imminut pinnani Jehova ataqqinarsisinniartuaannarpaa. (Mak 10:17, 18; Joh 5:19) Maniguunnera eqqarsaatigalugu qanoq misigivit? Asalerunarpat ilaarusullugulu. Jiisusi sooq maniguuttuua? Ataatani ‘ikiuiumatuujusoq’, tassa maniguuttuusoq, asallugulu ilaaqqissaartaramiuk. (Tuss 18:36; Hebr 1:3) Ilaa Jiisusi asanaq!
8. Sooq Jiisusimik kunngeqarnerput nuannaraarput?
8 Jiisusip uagutsinnut kunngiunera nuannaraarput piukkunnarnerpaammat. Jehovammi nammineq ernini ilinniartillugulu kunngiusussatut toqqarpaa. (Es 50:4, 5) Aamma imminut pilliutigeriaannaanera eqqarsaatigiuk. (Joh 13:1) Jiisusi kunngerput asasariaqarparput, ilaa? Jiisusi oqarpoq ilumoortumik asannitsini, tassa ikinngutimisut taasani, naalannermikkut asanninnertik ersersissinnaagaat. (Joh 14:15; 15:14, 15) Jehovap erneranik ikinnguteqarsinnaanerput tupinnangaarami!
9. Jiisusip imermut morsutsinneqarnera malinnittaasalu imermut morsutsinneqarnerat sunik assigiissuteqarpat?
9 Jiisusi peqqusivoq imminik malinnittunngortoq imermut morsutsinneqassasoq. (Mat 28:19, 20) Namminermi imermut morsutsinneqarsimavoq. Jiisusip imermut morsutsinneqarnera malinnittaasalu imermut morsutsinneqarnerat assigiinngissuteqarput. (Ungalusaq “ Jiisusip malinnittaasalu imermut morsutsinneqarneri qanoq assigiinngissuteqartut” takuuk). Aammali assigiissuteqarput. Jiisusip imermut morsutsinneqarnermigut ersersippaa Jehovap piumasaatut iliorusunnini. (Hebr 10:7) Taamatuttaaq Nalunaajaasunngortup imermut morsutsinneqarnermigut ersersippaa Guutimut tunniulluinnarsimalluni. Tassa nammineq piumasani pinnagu Jehovalli piumasaa inuunermini pingaarnerpaatilerpaa. Taamaalilluni maligassani Jiisusi Kristusi malippaa.
10. Jiisusip asanissaanut sunik pissutissaqarpit, tamannalu sunissannut kajumississutigissaviuk?
10 Jiisusi Guutip ernituatut kunngitullu Guutip toqqagaatut upperivat. Nalunngilat Jiisusip Ataatani assigeqqissaaraa maniguuttuusorlu. Aamma atuarnikuuat Jiisusip kaattut nerisikkai, nikallungasut tuppallersarai napparsimasullu ajorunnaarsillugit. (Mat 14:14-21) Aamma nalitsinni ilagiinnik siulersuisuunera misiginikuuat. (Mat 23:10) Paasivallu Guutip kunngeqarfiani kunngiugami siunissami uagut pilluta iliuuseqarnerungaassasoq. Jiisusimik asanninnerit qanoq ersersissinnaaviuk? Ilaarneratigut. (Joh 14:21) Ilaatigut taamaaliorsinnaavutit Jehovamut tunniulluinnarnikkut imermullu morsutsinneqarnikkut.
JEHOVA GUUTI ASAVAT
11. Imermut morsutsinneqarnissamut suna pissutaava pingaarnerpaaq, aamma sooq taamaappa?
11 Imermut morsutsinneqarnissamut suna pissutaava pingaarnerpaaq? Guutip peqqussutaa annerpaaq Jiisusip ima oqaatigaa: “[Jehova] Guutit uummatit tamakkerlugu, tarnit tamakkerlugu, isumat tamakkerlugu nukitillu tamakkerlugit asassavat.” (Mak 12:30) Illit aamma Jehova taama asatigiviuk?
12. Sooq Jehova asaviuk? (Aamma assiliaq takuuk).
12 Jehovap asanissaanut pissutissarpassuaqarpugut. Assersuutigalugu Jehova tassaavoq “inuunerup puilaffia” aamma tunissutit ajunngitsut naammalluinnartullu tamarmik taassumanngaanneersuupput. (Tuss 36:10; Jaak 1:17) Tassa nuannarisatit tamarmik Jehovamit Guutimit asannillunilu tukkortuusumit tunissutaapput.
13. Sooq utertitsissut tunissutaava nuannernerpaaq?
13 Jehovap tunissutigisimasaa nuannernerpaaq tassaavoq utertitsissut. Sooq taama oqarsinnaavugut? Eqqarsaatigiuk Jehova Jiisusilu qanoq qanitariitsigisut. Ukiuni milliardilinni najortigiissimagamik Jiisusi ima oqarpoq: “Ataatap asavaanga” aamma ‘Ataataq asavara’. (Joh 10:17; 14:31; Uss 8:22, 23, 30) Taamaattumik takorlooruk Jehovap ernermi anniarluni toqunera takugamiuk qanoq aliasutsigisimassasoq. Jehova inunnik asanningaartuuvoq. Aamma illit asagamisit naassaanngitsumillu inuuneqalersikkusukkamisit ernini pilliutitut tunissutigaa. (Joh 3:16; Gal 2:20) Jehovap asanissaanut pissutaasunik pingaarnerusoqanngilaq!
14. Inuuninni anguniagarisinnaasannit allanit suna pitsaanerpaava?
14 Jehova ilisarisimanerujartortillugu asanerulerpat. Soorunami qaninnerujartortuarusuppat. Taamaaliorsinnaavutillu. Jehovammi kajumissaarpaatit uummatini nuannaartissagit. (Uss 23:15, 16) Tamannalu inuuninni anguniagarisinnaasannit allanit pitsaanerpaavoq. Jehovap uummataa qanoq nuannaartissinnaaviuk? Oqaatsikkut iliuutsikkullu. Inooriaatsinnit ersissaaq Jehova ilumut asanerit. – Joh 1. 5:3.
15. Jehova asallugu qanoq ersersissinnaaviuk?
15 Jehova asallugu qanoq ersersissinnaaviuk? Guutimut ilumoortumut immikkut ittumik qinullutit tunniulluinnarnikkut tamannalu kikkunnut tamanut takutikkumallugu imermut morsutsinneqarnikkut. (Tuss 40:9) Imermut morsutsinneqarnerit inuuninni iliuuserisinnaasannit nuannernerpaallunilu pingaarnerpaavoq. Ullormi taanna aallarnerfigalugu imminut pinnak Jehova inuuninni pingaarnerpaatilerpat. (Rom 14:8; Pet 1. 4:1, 2) Aalajangiineq pimoorussassaarpasingaarami! Taamaapporlu. Taamaalioruilli pitsaanerpaamik inooriaaseqalersinnaavutit. Qanoq?
16. Johannesimit allakkat siulliit 2:25 naapertorlugu Jehovap kiffani sumik tunissavai?
16 Jehova tukkortuunerpaavoq. Tunissutigisinnaasatsinnit Jehova tunissuteqarnerungaartarpoq. (Mak 10:29, 30) Allaat inuit ajortut akornanniitilluta inuunermik soqutiginartumik, pilluarnartumik nalerisimaarnartumillu tunisimavaatigut. Tamannalu tunissutit ilaannaraat. Imermut morsutsinneqaruit Ataatat asasat kiffartorfigiuarsinnaalissavat. Piffissap ingerlanerani Jehovalu asaqatigiinnerulissaasi. Jehovallu naassaanngitsuuneratut illit naassaanngitsumik inuussaatit. – Johannesimit 1. 2:25 atuaruk.
17. Jehovap piginngisaanik sumik tunissuteqarfigisinnaaviuk?
17 Tunniulluinnaruit imermullu morsutsinneqaruit naleqangaartumik Ataatat tunissuteqarfigissavat. Nuannarisatit tamarmik Jehovamit tunissutaapput. Qujamasuutiginninnerillu ersersikkumallugu soorunami illit aamma Jehovamut tunissuteqarusupputit. Jehovap suut tamaasa pigai. Taamaakkaluartoq piginngisaanik tunissuteqarfigisinnaavat, tassa uummatit tamakkerlugu kiffartorninnik. (Job 1:8; Uss 27:11; Rom 11:35, 36) Tamatumanngalu pitsaanerusumik inooriaaseqanngilaq. Aap, erseqqippoq Jehovamik asanninneq imermut morsutsinneqarnissamut pissutaasoq pingaarnerpaaq.
IMERMUT MORSUTSINNEQARNISSAMUT PIAREERSIMAVIT?
18. Apeqqutit suut eqqarsaatigisinnaavigit?
18 Apeqqut una qanoq akissaviuk: “Imermut morsutsinneqassavit?” Illit kisivit tamanna akisinnaagakku nangaassuteqarnerlutit eqqarsaatigiuk. (ApS 8:36) Sammisatta pingasut eqqarsaatigeqqissaarnissaat iluaqutigissavat. Siullertut, ilumoorneq naapertuilluarnerlu nuannarivatit. Imminut ima aperigit: ‘Inuit tamarmik ilumoortumik oqaluttalernissaat eqqortuliortalernissaallu qilanaaraakka?’ Aappaattut, Jiisusi Kristusi asavat. Imminut ima aperigit: ‘Guutip ernera kunngigerusuppara ilaarusullugulu?’ Kiisalu pingaartut, Jehova Guuti asavat. Imminut ima aperigit: ‘Jehovap guutisiorfigineratigut uummataa nuannaartikkusuppara?’ Apeqqutit taakku tamaasa angerukkit taava imermut morsutsinneqarusuppit? – ApS 16:33.
19. Sooq imermut morsutsinneqarnissat nangaassutigissanngiliuk? Assersuuteqarit. (Johannesi 4:34)
19 Imermut morsutsinneqarnissat nangaassutigigukku Jiisusip assersuusiaata eqqarsaatiginissaa iluaqutigissavat. (Johannesi 4:34 atuaruk). Jiisusip Ataatami piumasaatut iliorneq nerisassanut assersuuppaa. Sooq taama assersuusiorpa? Soorlu nerisassat iluaqutigisarigut, taamatuttaaq Jehovap peqqussutaasa maleruarnerat iluaqutigisarparput. Jehovap ilinnut piumasaa ilaatigut suua? Imermut morsutsinneqarnissat kissaatigaa. (ApS 2:38) Upperilluinnarsinnaavat imermut morsutsinneqarnissat iluaqutigissallugu, Jehovammi ajoqutigisinnaasatsinnik peqqunavianngilaatigut. Mamarunartunik nerinissat nangaassutigineq ajorukku taava sooq imermut morsutsinneqarnissat nangaassutigissaviuk?
20. Allaaserisami tulliuttumi suna sammissavarput?
20 Sooq ilaasa imermut morsutsinneqarnissartik nangaassutigisarpaat? Amerlasuut piareersimannginnerartarput. Aammami tunniulluinnarnissannik imermullu morsutsinneqarnissannik aalajangiineq inuuninni pingaaruteqarnerpaavoq. Taamaattumik eqqarsaatigilluagassaavoq. Aamma imaannaanngitsuummat imaaliallaannaq piareersimalernavianngilatit. Ilumoorlutilli imermut morsutsinneqarnissat kissaatigigukku piareersarumallutit susinnaavit? Tamanna allaaserisami tulliuttumi sammissavarput.
ERINARSUUT 28 Jehovamik ikinnguteqarneq
a Biibilimik ilinniartitat tamarmik imermut morsutsinneqarnissaat pingaaruteqarpoq. Imermulli morsutsinneqarnissamut suna kajumississutaassava? Asanninneq. Kikkulli asasariaqarpagut suullu nuannarisariaqarlugit? Apeqqutit taakku allaaserisami matumani sammissavagut. Aamma eqqartussavarput imermut morsutsinneqartut kristumiutut inuuneq qanoq ittoq qilanaarisinnaagaat.