1-2. Imermut morsutsitaareernerup kingorna inuuneq qanoq pitsaanerulertarpa?

 IMERMUT morsutsitaasimagatta Jehovallu ilaqutaariis­sortaanut ilanngus­simagatta nuannaangaarpugut. Jehovamimmi qanimut ikinnguteqarneq ataqqinaatigaarput. Tussiaasiortoq Daavi Jehovamut ima oqartoq isumaqatigaarput: “Pilluarpoq illit najortigiumallugu qinikkat ineqartitallu silarliutinni.” – Tuss 65:5.

² Imaanngilaq Jehovap kinaluunniit ilaqutariis­sortaminut ilaalersittaraa. Allaaserisap siuliani sammisatsitut Jehovap imminut qanimut attaveqarusun­nerminnik ersersitsisut qanillisittarpai. (Jaak 4:8) Jehovamut tunniul­luinnaravit imermullu morsutsin­neqaravit taanna immikkuul­larissumik attaveqarfigilerpat. Qularis­sanngilallu ‘pilluaatissanik killeqan­ngitsunik kueraaf­figissagaatit’. – Mal 3:10; Jer 17:7, 8.

3. Jehovamut tunniul­luinnarsimal­lutillu imermut morsutsitaasimasut pimoorus­sassaminnik sumik akisussaaf­feqarpat? (Oqaluus­sisartup oqaasii 5:3, 4)

³ Imermut morsutsin­neqarneq Jehovamut kiffartornermi aallarniutaaginnarpoq. Ussernar­torsioraluarlutit uppernikkullu misilin­neqaraluarlutit tunniul­luinnarnermik neriorsuutit eqqortit­tuarusussavat. (Oqaluus­sisartup oqaasii 5:3, 4  atuakkit). Kristumiuugavit sapinngisannik Jiisusi ilaartarpat peqqussutaalu maleruarlugit. (Mat 28:19, 20; Pet 1. 2:21) Taamaalior­nissannut allaaserisaq una iluaqutigissavat.

MISILIN­NEQARNERMI USSERNAR­TORSIOR­NERMILU JIISUSI MALITTUARUK

4. ‘Qisummik naalliutsitsiviliamik’ nammakkiussineq qanoq paasisariaqarpa? (Lukkarsi 9:23)

⁴ Imaanngilaq imermut morsutsitaareeruit ajornar­torsiutaarutis­sasutit. Jiisusimi oqarpoq ilinniartitami “qisummik naalliutsitsiviliaq” nammakkiutissagaat ullullu tamaasa nammattuassagaat. (Lukkarsi 9:23 atuaruk). Jiisusilli malinnitsini naalliut­tuassasut pivaa? Naamerluinnaq. Ersersin­niarpaa pilluaq­quneqar­taraluarlutik aamma ajornar­torsior­tassasut. Ajornar­torsiutillu ilaat anigoruminaas­sinnaapput. – Tim 2. 3:12.

5. Pilliuteqartut pillugit Jiisusi qanoq neriorsuiva?

⁵ Imaassinnaavoq ilaquttannit akerlilersor­neqarsimasutit imaluunniit aningaasaateqar­niarnissaq pigissaar­niarnerluunniit pinnagu Guutip kunngeqarfia salliuk­kumallugu pilliuteqarsimasutit. (Mat 6:33) Taamaaliorsimaguit qularis­sanngilat Jehovap imminut pilluni iliuuserisimasatit tamaasa maluginiarsimagai. (Hebr 6:10) Jiisusip oqaasiisa ukua ilumoornerat misigisimagunarpat: “Kinaluunniit uanga pillunga nutaarsiassallu nuannersut pillugit illuminik, qatanngutiminik, anaanaminik, ataataminik, meeqqaminik narsaatiminil­luunniit qimatsisoq maanna malersor­neqarnermi saniatigut illunik, qatanngutinik, anaananik, meeqqanik narsaatinillu 100-riaammik siunissamilu inuunermik naassaan­ngitsumik pissarsissaaq.” (Mak 10:29, 30) Aap, pilluaq­qussutitit pilliutigisimasannit annerungaarput. – Tuss 37:4.

6. Sooq ‘timip piumasaanik ajortunik pileris­suseqarneq’ akiortuar­tariaqarpiuk?

⁶ Imermut morsutsitaareernerpit kingorna ‘timip piumasaanik ajortunik pileris­suseqarneq’ akiortuar­tariaqarpat. (Joh 1. 2:16) Sulimi naammal­luinnan­ngitsuuvutit. Immaqa ilaannikkut apustilitut Paulusitut ima allattutut misigisarunarputit: “Guutip inatsisai qamuuna nuannareqaakka, inatsisilli allat timinniittut inatsisinut isumanniittunut akiuuttarlutillu ajortip inatsisaanut timinniittunut tiguagaatit­tarpaannga.” (Rom 7:22, 23) Immaqa ajortulioq­qajaasarnerit nikallus­sutigisarpat. Jehovamulli tunniul­luinnarnermik neriorsuutit eqqarsaatigisarukku ussernartut nakkaan­narfigin­nginnis­saannut nakussatsin­neqassaatit. Qanoq?

7. Jehovamut tunniul­luinnarnerit taassumunnga aalajaat­tuarnissannut qanoq iluaqutigissaviuk?

⁷ Jehovamut tunniul­luinnaravit kissaatit anguniakkallu Jehovap iluarinngisai tunullius­simavatit. (Mat 16:24) Taamaattumik misilin­neqaruit nalornis­sutigisariaqanngilat sussanerlutit. Periarfissammi tamaasa matusimavatillusooq ataaseq minillugu – tassa Jehovamut aalajaal­luinnarnissaq. Jehovap nuannaar­tinnissaa aalajangiusimal­luinnarpat. Juubitulli misigissaatit. Ingasattumik misilin­neqaraluarluni ima oqarpoq: “Iluassusera aalajangiusimavara iperassanagulu.” – Job 27:5, 6.

8. Tunniul­luinnarnermik neriorsuutivit eqqarsaatiginera ussernar­torsiornermi qanoq iluaqutigissaviuk?

⁸ Jehovamut tunniul­luinnarnermik neriorsuutivit eqqarsaatiginera ussernartut suulluunniit nakkaan­narfigin­nginnis­saannut nakussatsis­sutigissavat. Assersuutigalugu allap aapparisaa qaninniarujoorfigiler­navianngilat. Jehovamummi neriorsuereersimavutit taamaalior­niarnak. Naleqqutin­ngitsumik  misigis­suseqarun­naarniarneq ilungersunarsinnaavoq. Taamaattumik misigis­sutsinik naleqqutin­ngitsunik ineriar­tortitsin­ngikkuit imminut artukker­navianngilatit. ‘Ajortut aqqutaat ingerlaviginavianngilat.’ – Uss 4:14, 15.

9. Tunniul­luinnarnermik neriorsuutivit eqqarsaatiginera Jehovamut kiffartorninnik sallius­siuarniarninnut qanoq iluaqutigissaviuk?

⁹ Ataatsimiigiar­tarninnut akornutaasumik suliffit­taarnissamik neqeroorfigineqaruit qanoq iliussavit? Qanoq iliornissat nalornis­sutiginavianngilat. Aalajangiinerlunnerit eqqortulior­nissamik sapernar­titsisarput, Jehovamulli kiffartorninnut akornutaasumik suliffit­taarniarnak aalajangereersimagavit illit tamanna ajornar­torsiutiginavianngilat. Jiisusip maligassiaa eqqarsaatigisinnaavat. Taassuma Ataatani nuannaar­tikkusut­tuaannarpaa. Jiisusi ilaarlugu Guutip tunniul­luinnarfigisimasavit iluarin­ngisaasa suulluunniit ingerlaannaq itigartit­tarnissaat aalajangiusimal­luinnaruk. – Mat 4:10; Joh 8:29.

10. Imermut morsutsitaareernerup kingorna Jiisusip malittuar­nissaanut Jehovap qanoq ikiussavaatit?

¹⁰ Ussernar­torsiorninni misilin­neqarninnilu Jiisusip malittuarnissaa aalajangiusimal­luinnarlugu ersersis­sinnaavat. Qularis­sanngilallu Jehovap ikiorumaaraatit. Biibilimi ima allassimavoq: “[Guuti] aalajaappoq, artukkas­sinnillu usserneqar­nissarsi akuerinavianngilaa, usserneqar­nissinnili pinertusaarsin­naaqqullusi ikiussavaasi.” – Kor 1. 10:13.

JIISUSI QANOQ MALITTUARSINNAAGIT

11. Jiisusip malittuar­nissaanut suna pingaaruteqarpa? (Aamma asseq takuuk).

¹¹ Jiisusi aallussil­luartuuvoq Jehovamullu qinunikkut qanimut attaveqar­tuarluni. (Luk 6:12) Jiisusitulli Jehovamut qanillis­sutigisin­naasannik iliuuseqartarit. Biibilimi ima allassimavoq:  “[Qanoq] siumukar­tigisimanerput apeqqutaatinnagu toraakkatsinnut tassunga torersumik ingerlajuarta.” (Flp 3:16) Qatanngutit kiffartor­neruniarlutik iliuuseqarsimasut misigisalik­kersaarutaat tusarsimas­savatit. Immaqa Kristumiunut Oqaluus­sisartunut Ilinniarfimmi ilinniarsimapput pisariaqar­titsiffiunerusumul­luunniit nuullutik. Taamatut anguniagaqarsin­naaguit nangaas­sutigeqinagu. Jehovap innuttai kiffartor­nerujumallutik iliuuseqarusuttarput. (ApS 16:9) Massakkummi taama periarfis­saqanngikkuit? Pisinnaasunut naleqqiullutit ajukkuttutut misiginak, eqqaamajuk pingaaruteqar­nerpaaq tassaammat pinertusaarnissat. (Mat 10:22) Illit piginnaasannut pissutsinullu atukkannut naapertuuttumik sapinngisannik iliuuseqaruit Jehova nuannaar­tissavat. Tamanna imermut morsutsitaareernerup kingorna Jiisusip malittuar­nissaanut pingaaruteqarpoq. – Tuss 26:1.

12-13. Jehovamut kiffartornermi aallussil­luarpiarun­naaruit susinnaavit? (Korintimiunut 1. 9:16, 17) (Aamma ungalusaq “ Arpattuarit” takuuk).

¹² Qinnutinni oqaatsitit eqqarsaatiginagit uteqattaagin­nartalersimagukkit oqaluus­sinerluunniit nuannaarutigiun­naarsimagukku susinnaavit? Imaluunniit Biibilimik atuarnerit pissarsiaqarfigil­luarunnaarsimagukku susinnaavit? Isummis­sanngilatit Jehovap anersaavanit ikiorneqarun­naarlutit. Naammal­luinnan­ngitsuugatta misigis­sutsigut allanngorartarput. Aallussil­luarpiarun­naaruit apustilip Paulusip maligassiaa eqqarsaatigiuk. Paulusip Jiisusi sapinngisaminik ilaarniarsarigaluarlugu nalunngilaa ilaannikkut piumassuseqarpal­laartar­naviarnani. (Korintimiunut 1. 9:16, 17 atuakkit). Ima oqarpoq: “[Kajuminnanga] taamaalioraluaruma suli nakkutil­liisuutitatut akisussaaf­feqarpunga.”  Tassa qanorluunniit misigigaluaruni Paulusip kiffartor­tuarnissani aalajangiusimavaa.

¹³ Illittaaq qanorluunniit misigigaluaruit Jehovamut kiffartor­tuarnissat aalajangiusimajuk. Paulusitulli misigis­sutsitit maliinnarnagit aalajangiisarit. Eqqortumik iliortuaruit piffissap ingerlanerani kajumis­suseqar­nerulissaatit. Biibilimik misissueq­qissaartarneq, qinusarneq ataatsimiigiartarneq oqaluus­sisarnerlu imermut morsutsitaareernerup kingorna Jiisusip malittuar­nissaanut iluaqutigis­savatit. Eqqortulior­tuarnerit aamma uppeqatinnut kajumis­sissutaassaaq. – Tes 1. 5:11.

‘IMMINUT MISILIT­TUARLUTILLU MISISSORTUARIT’

14. Suna misissor­tassaviuk, aamma sooq? (Korintimiunut 2. 13:5)

¹⁴ Imermut morsutsitaareernerpit kingorna imminut misissor­tarnissat pingaaruteqarpoq. (Korintimiunut 2. 13:5 atuaruk). Ataatsimiigiar­tarnerlutit, oqaluus­sisarnerlutit aamma ullut tamaasa qinusar­nerlutit, Biibilimik atuartar­nerlutit misissueq­qissaar­tarnerlutillu eqqarsaatigisaruk. Taakku qanoq pissarsiaqarluarfiginerusin­naanerlugit eqqarsaatigiuk. Assersuutigalugu apeqqutit uku eqqarsaatigikkit: ‘Biibilimi ilinniar­titsissutigineqartut tunngaviusut allanut nassuiarsin­naavakka? Oqaluus­sisarnera qanoq ilillunga nuannaarutiginerulersin­naavara? Aalajangersimasut pillugit qinusarpunga, qinnutikkalu Jehovamik tatigin­ninninnik ersersitsisarpat? Ataatsimiigiar­tarpunga? Ataatsimiinnerni tusarnaar­tarnera peqataasarneralu qanoq pitsaanerulersis­sinnaavakka?’

15-16. Ussernartut nakkaan­narfigin­nginnissaat pillugu Robert qanoq ilinniarfigaajuk?

¹⁵ Aamma pingaaruteqarpoq suna sanngiis­sutiginerlugu paasissallugu. Qatanngut Robertimik atilik tamatuma pingaaruteqar­neranik ersersitsisumik misigisaqarpoq. Ima oqaluttuarpoq: “20-t missaannik ukioqarlunga ullup affaa sulisarpunga. Taamaallunga sulereerlunga suleqatima arnap angerlarsimaf­fimminut qaaqquaanga. Oqarfigaanga kisimiilluta ‘nuannisaqatigiis­sasugut’. Aallaqqaammut ilungersorpiarnanga utoqqatsis­sutissarsiorpunga. Naggataatigulli naameerpunga pissutaasorlu nassuiarlugu.” Robertip ussernartoq nakkarfigin­nginnamiuk nersualaagassaavoq. Taamaattorli pisimasoq kingusin­nerusukkut eqqarsaatigileramiuk paasivaa pitsaanerusumik qisuariarsimasin­naagaluarluni. Ima oqarpoq: “Juuserfip Potifarip nulianit usserniar­neqarami ingerlaannaq itigartitsineratut itigartis­simasus­saagaluarpara.  (Mos 1. 39:7-9) Tupaallaatigaara naameer­nissara qanoq ajornakusoor­tissimatiginerlugu. Pisimasoq tamanna pissutigalugu paasilerpara Jehovamik ikinnguteqarnera nukittorsar­tariaqarlugu.”

¹⁶ Robertip imminut misissorsimaneratut illit imminut misissortaruit iluaqutigisinnaavat. Ussernartoq akioraluarlugu naameer­niarusaarsimanerlutit eqqarsaatigisinnaavat. Sulissutis­saqaruit nikalloqinak. Taamatut sanngiis­suteqarnerit eqqumaf­figigakku nuannaarutigiuk. Jehovamut ikioqqusarit, najoqqutas­siaasalu qutsissut maleruar­nissaannik aalajangiusiman­ninnerit nakussatsik­kumallugu iliuuseqarit. – Tuss 139:23, 24.

17. Robertip Jehovap atia qanoq ataqqinarsisippaa?

¹⁷ Robertip misigisaa aamma allamik ilinniarfigisin­naavarput. Nangilluni ima oqarpoq: “Suleqatima qaaqqusinera itigartereerakku ima oqarfigaanga: ‘Nakkaan­nanngilatit!’ Aperaara suna pineraa. Sunaaffa ikinngutaasa ilaat Nalunaajaasuunikoq oqarsimasoq Nalunaajaasut inuusuttut tamarmik marloqiusamik inooriaaseqartut eqqunngitsulior­nissaminnullu periarfis­saqaraangamik nakkaan­nartartut. Suleqatima ikinngutini oqarfigisimavaa ilumoornera paasiniarlugu uanga misilin­niarlunga. Qujanartumik Jehovap atia ataqqinarsisikkakku!”

18. Imermut morsutsitaareernerup kingorna sunissat aalajangiusimaviuk? (Aamma ungalusaq “ Allaaserisat marluk nuannaarutigisin­naasatit” takuuk).

¹⁸ Jehovamut tunniul­luinnaravit imermullu morsutsitaagavit ersersippat qanorluunniit pisoqas­sagaluarpat taassuma atia illernarsisik­kusullugu. Qularis­sanngilallu misilin­neqarnerit ussernartullu akiukkatit Jehovap ilisimagai. Aalajaak­kumallutit ilungersoravit pilluaq­qussavaatit anersaanilu illernartoq atorlugu nakussatsillutit. (Luk 11:11-13) Imermut morsutsitaareernerpit kingorna Jehovap ikiuineratigut Jiisusi malittuarsinnaavat.