1. Jehovamut kiffartortut aalajaatsut ilaasa suna qularisin­naavaat?

 TUPPALLERNAQAAQ nalunagu Jehovap innuttani eqimattatut iluaralugit akuerisarigai! Biibilimi allassimavoq ‘innuttani tipaatsuutigigai’. (Tuss 149:4) Ilaasali nikallungagaangamik Jehovap akuerisin­naaneraatik qulariler­tarpaat. Aamma itsaq Jehovamut kiffartortut aalajaatsut arlallit eqqarsaatinik taama ittunik akiugaqarput. – Sam 1. 1:6-10; Job 29:2, 4; Tuss 51:13.

2. Jehovap kikkut akuerai?

² Biibilimi ersersin­neqarpoq inuit naammal­luinnan­ngitsut Jehovamit akuerineqarsinnaasut. Qanoq akuerineqarsin­naagatta? Jiisusimut uppertariaqarpugut imermullu morsutsitaalluta. (Joh 3:16) Taamaalioratta tamanut ersersipparput ajortuliagut peqqissimis­sutigisimallugit Guutillu piumasaa naapertorlugu iliorniarluta neriorsuisimalluta. (ApS 2:38; 3:19) Jehovap imminut ikinngutaaler­niarluta iliuuseqaraangatta nuannaarutigisarpaa. Tunniul­luinnarsimanitsinnik neriorsuuterput eqqortin­niarlugu sapinngisatsinnik iliuuseqarutta qularis­sanngilarput Jehovap ikinngutimisut isigaluta akueris­sagaatigut. – Tuss 25:14.

3. Suut eqqartus­savagut?

³ Taavami sooq ilaat ilaannikkut Guutimit akuerisaanatik misigilersoorsin­naappat? Jehovap akueraluta qanoq ersersittarpaa? Aamma qanoq qulariun­naarsin­naavarput asalluta akuerigaatigut?

 SOOQ ILAAT MISIGIPPAT JEHOVAP AKUERISIN­NAANNGIKKAATIK?

4-5. Naleqan­ngitsutut misigigaluarluta suna qularin­ngissin­naavarput?

⁴ Ilagut meeraanerminniilli naleqan­ngitsutut misigisarsimapput. (Tuss 88:16) Qatanngut angut Adriánimik atilik ima oqarpoq: “Naleqan­ngitsutut misigiuaan­narpunga. Eqqaamavara mikisuullunga Jehovamut qinullunga ilaquttakka paratiisimi inuulissasut, namminerli paratiisimiin­nissannut ajukkuppunga.” Tony, Nalunaajaasuun­ngitsunik angajoqqaalik, ima oqarpoq: “Angajoqqaama oqarfigin­ngisaan­narpaannga asallunga imaluunniit tulluusimaarutigalunga. Taamaattumik misigivunga taakkua iluarisaannik iliuuseqarsin­naananga.”

⁵ Ilaannikkut naleqan­ngitsutut misigigaangatta eqqaamas­savarput Jehovap imminut kajungilersis­simagaatigut. (Joh 6:44) Uummammiugisagut ilisimagamigit ajunngitsortagut nammineq takusin­naanngisagut takusarpai. (Sam 1. 16:7; Nal 2. 6:30) Taamaattumik qularis­sanngilarput Jehovap isaani naleqangaartugut. – Joh 1. 3:19, 20.

6. Apustili Paulusi ajortuliarisimasaminut tunngatillugu qanoq misigiva?

⁶ Ilatta sallusuissut ilinnian­ngikkal­laramikku iliuuserisimasatik pillugit suli pisuusutut misigipput. (Pet 1. 4:3) Allat Jehova aalajaallutik kiffartorfigigaluarlugu sanngiis­sutsiminnik akiugaqarput. Illimmi? Ilaannikkut misigisarpit Jehovap isumakkeerfigisin­naanngikkaatit? Taamaappat tuppallersaatigisinnaavat Jehovamut kiffartortut aalajaatsut allarpassuit taamatut akiugaqarmata. Assersuutigalugu apustili Paulusi kukkussutigisimasani eqqarsaatigigamigit ajorsuataarpoq. (Rom 7:24) Soorunami ajortuliarisimasani peqqissimis­sutigisimavai imermullu morsutsitaalluni. Taamaak­kaluartorli ‘apustilini minnersaasutut’ ‘ajortulior­tartunilu ajornerpaasutut’ imminut taavoq. – Kor 1. 15:9; Tim 1. 1:15.

7. Ajortuliarisimasatsinnut tunngatillugu suna eqqaamas­savarput?

⁷ Ataatatta qilammiusup neriorsorpaatigut peqqissimigutta isumakkeerfiginiarluta. (Tuss 86:5) Taamaattumik ajortuliarisimasagut peqqissimis­sutigigutsigit Jehovap neriorsuutini eqqortik­kumaaraa upperil­luinnarsin­naavarput – isumakkeerfigisimavaatigut. – Kol 2:13.

8-9. Jehova nuannaar­tikkumallugu naammattumik iliuuseqarsinnaanak misigiguit qanoq iliorsinnaavit?

⁸ Tamatta Jehovamut kiffartor­nitsinni sapinngisatsinnik iliuuseqarusuppugut. Ilaalli misigisarput sapinngisartik tamaat Jehova kiffartorfigigaluarlugu naammattumik iliuuseqarsin­naanatik Jehovallu iluarinavian­ngikkaatik. Qatanngut arnaq Amandamik atilik ima oqarpoq: “Sapinngisannik Jehova pillugu iliuuseqaraluarlunga suli annermik iliuuseqar­tariaqarlunga misigivunga. Iliuuserisin­naasakka qaangerlugit iliuuseqar­niarsarisarpunga. Iluatsin­ngitsooraangamalu imminut pakatsisit­tarpunga eqqarsalerlungalu Jehovap aamma pakatsis­sutigigaanga.”

⁹ Iliuuserisin­naasagut naammas­sorinngik­kutsigit misigissuseq tamanna qanoq akiorsin­naavarput? Eqqaamajuk Jehovap artukkatsinnik piumaffigineq ajoraatigut. Sapinngisarput tamaat iliuuseqaraangatta iliuutsigut qujamasuutigisarpai. Jehovamut qamannga pisumik kiffartortut Biibilimi eqqaaneqartut ilinniarfigil­luarsin­naavagut. Assersuutigalugu Paulusi ukiorpassuarni kilometererpassuit angalalluni ilagiinnik pilersitsiniarluni iliuuseqangaarsimavoq. Pissutsilli atugai allanngormata siornatigutullu  iliuuseqarsin­naajunnaarmat Jehovap iluariun­naarpaa? Naamik! Sapinngisaminik iliuuseqar­tuarmat Jehovap pilluaqquaa. (ApS 28:30, 31) Aamma uagut Jehova pillugu iliuuserisin­naasagut allanngorsin­naasarput, Jehovamulli pingaar­nerpaaq tassaavoq pissutiginiagarput. Maanna eqqartoriartigu Jehovap qanoq ersersittaraa asallutalu akueraluta.

JEHOVAP QANOQ ERSERSITTARPAA AKUERALUTIT?

10. Qanoq “tusaasin­naavarput” Jehovap asanerarlutalu akuerisaraatigut? (Johannesi 16:27)

¹⁰ Biibili aqqutigalugu. Jehovap kiffani asallugillu akueralugit paasitis­sallugit nuannarisarpaa. Biibilimi pisuni marlunni Jiisusi toqqaan­nartumik oqarfigaa Erneralugulu asallugu aamma akueralugu. (Mat 3:17; 17:5) Aamma illit Jehovamit taama oqarfigitik­kusuppit? Jehovap nipaa qilammiit tusartan­ngikkaluarlutigu oqaasii Biibili aqqutigalugu “tusarnaar­tarsinnaavagut”. Jiisusip ilinniar­titaminut oqaasii asannipaluttut atuaraangatsigit tusartarparpullusooq Jehovap oqarfigigaatigut akueraluta. (Johannesi 16:27 atuaruk). Jiisusip Ataatami pissusii ilaaqqis­saarpai. Taamaattumik atuaraangatta Jiisusip ilinniartitani naammal­luinnan­ngitsut, kisianni aalajaatsut, asanerarai takorloor­tarsinnaavarput Jehovap taama oqarfigigaatigut. – Joh 15:9, 15.

11. Artornartumik misigisaqarutta sooq isumaqanngila Jehovap akueriun­naarsimagaatigut? (Jaaku 1:12)

¹¹ Iliuutsini aqqutigalugit. Jehovap ikiorusungaarpaatigut, soorlu timikkut pisariaqar­titatsinnik isumassorluta. Immaqa ilaannikkut Jehovap artornar­torsior­nissarput akuerisarpaa, soorlu Juubip artornar­torsiornissaa akuerisimagaa. (Job 1:8-11) Misilin­neqarutta isumaqanngilaq Jehovap akueriun­naarsimagaatigut. Periarfis­sinneqarpugulli takutis­sallugu Jehova qamannga pisumik asallugulu tatigalugu. (Jaaku 1:12 atuaruk). Artornar­torsior­nitsinnilu asanninnera isumassuineralu misigis­savagut aamma pinertusaar­nissamut ikiortaraatigut.

12. Dmitrijip misigisimasaa qanoq ilinniarfigisin­naavarput?

¹² Asiami qatanngut angut Dmitrijimik atilik qanoq misigisaqartoq eqqarsaatigiuk. Suliffini annaavaa qaammaterpas­suarnilu suliffit­taarnani. Aalajangerpoq Jehovamik tatigin­ninnini ersersillugu oqaluus­sineruniarluni. Qaammatialuilli ingerlaneranni suli suliffit­taanngilaq.  Taava peqqiil­liulerami innangaan­nalerpoq. Uiulluartutut ataataal­luartutullu misigiun­naarpoq qularilerlugulu Jehovamit iluarisaanerluni. Unnuit ilaanni siniffimmi nalatillugu paniata pappiaqqamik allassimaffimmik allassimasaminik tunivaa. Tassani oqaatsit Esaja 30:15-imiit ima allaqqapput: “Utaqqil­luaannarlusilu tatigigussinga tamanna nakuussutigis­savarsi.” (Testamentitoqaq) Taavalu ataatani ima oqarfigaa: “Ataata, ajoraangavit una allassimaffik eqqaamasassavat.” Dmitrijip paasivaa Jehova ikiortigalugu ilaqutariittut nerisas­saqarlutillu atisaqarlutillu inissaqarlutik. Ima oqarpoq: “Taamaallaat uanga utaqqiin­narlungalu Guutiga tatigalugu ersersit­tuartus­saavara.” Illittaaq assingusumik nalaataqaruit qularis­sanngilat Jehovap isumassoraatit pinertusaar­niassagavillu ikiussagaatit.

13. Kikkut aqqutigalugit Jehovap paasitis­sinnaavaatigut asalluta, aamma qanoq?

¹³ Uppeqatigut aqqutigalugit. Jehovap qatanngutigut aqqutigalugit asallutalu akueraluta paasitit­tarpaatigut. Assersuutigalugu qatanngutigut kajumis­sisissinnaavai piffissaq eqqorlugu qiimmas­saanissaannik. Qatanngutip arnap Asiami najugallip artornar­torsior­nermini tamanna misigaa. Suliffini annaasimavaa peqqiil­liulerlunilu. Taava uia ingasattumik ajortuliorpoq utoqqaaner­tatullu kiffartorun­naarsin­neqarluni. Qatanngut arnaq ima oqarpoq: “Paasisin­naanngilara sooq taamatut pisoqartoq. Eqqarsarpunga arlaatigut immaqa eqqunngitsumik iliuuseqarsimallunga Jehovamillu akuerisaanera annaasimallugu.” Qatanngutitta Jehova qinnuigaa suli akuerigaani paasiteq­qulluni. Jehovap qinnutaa qanoq akivaa? Qatannguterput ima oqarpoq: “Ilagiinni utoqqaanertat oqaloqatigaannga qularun­naarsil­lungalu Jehovap  suli asagaanga.” Kingusin­nerusukkut Jehovamut qinunikkut saaffigin­neqqippoq paasitin­neqaqqik­kusukkami suli asagaani. Ima oqarpoq: “Ulloq taanna qatanngutinnit ilagiin­niittunit allagarsivunga. Oqaasii tuppallernartut atuarakkit misigivunga Jehovap qinnutiga tusarsimagaa.” Aap, Jehovap uppeqatigut aqqutigalugit paasitit­tarpaatigut asallutalu akueraluta. – Tuss 10:17.

14. Jehovap aamma qanoq ersersittarpaa akueraluta?

¹⁴ Jehovap aamma ersersittarpaa akueraluta uppeqatigut aqqutigalugit pisariaqar­titatsinnik siunnersoraangamisigut. Assersuutigalugu kristumiut siulliit nalaanni Jehovap Paulusi isumassarsisillugu allakkanik 14-inik allatsippaa. Allakkamini Paulusi toqqaan­nartumik asannit­tumilli qatanngutiminut siunnersuivoq. Sooq Jehovap Paulusi taamatut allatsippaa? Ataataal­luartuugami Jehovap qitornani asasani perorsaatis­sittarpai. (Uss 3:11, 12) Taamaattumik Biibili tunngavigalugu siunnersor­neqaraangatta takusin­naasarparput Jehovap akuerigaatigut – imaanngitsoq akuerisaanerput annaasimagipput. (Hebr 12:6) Aamma allatigut Jehovap akuersinera misigisarparput?

AAMMA ALLATIGUT JEHOVAP ERSERSITTARPAA AKUERALUTA

15. Jehovap kikkut anersaaminik illernartumik tunisarpai, tamannalu sooq qiimmaal­lannarpa?

¹⁵ Jehovap akuerisani anersaamik illernartumik tunisarpai. (Mat 12:18) Apeqqut una eqqarsaatigisin­naavarput: ‘Pissuserineqartussat anersaap inerititaasa ilaat ersersis­simavakka?’ Assersuutigalugu Jehova ilisarisimalereerlugu naammagit­tarnerulersimavit? Oqartoqarsinnaavoq inuuninni anersaap inerititaanik ersersitsinissat pikkorif­figinerujar­tortillugu Jehovamit akuerisaanerit ersarin­nerulertartoq. – Ungalusaq  ‘Anersaap inerititai tassaapput …’ takuuk.

16. Jehovap kikkut oqaluus­sinissamut atorpai, tamannalu illit qanoq misigilis­sutigaajuk? (Tessaluunikamiunut 1. 2:4)

¹⁶ Jehovap akuerisani pingaarutilimmik suliassippai, tassa nutaarsiassat nuannersut pillugit oqaluus­seqquai. (Tessaluunikamiunut 1. 2:4 atuaruk). Qatanngutip arnap Jocelynimik atillip nutaarsiassanik nuannersunik oqaluus­sisarnini iluaqutigivaa. Ullaat ilaanni Jocelyn iterpoq nikallungalluni. Ima oqarpoq: “Tunnius­sassaqartutut misigin­ngilanga. Pioneriuvungali ullorlu taanna  oqaluus­sisussaagama Jehovamut qinoriarlunga anivunga.” Ullaap tungaa taanna Jocelynip Mary, arnaq inussiarnersoq Biibilimik ilinniar­tinneqarusuttoq, naapippaa. Qaammatialuit qaangiummata Mary oqaluttuarpoq Guutimut ikioqqulluni qinorut­torluni Jocelyn matukkut kasuttorsimasoq. Misigisaq taanna eqqarsaatigalugu Jocelyn ima oqarpoq: “Soorlulusooq Jehovap ima oqarfigigaanga: ‘Akuerisaraakkit!’” Soorunamili oqaluus­siffigisatta ilaannaat tusarnaarumasarput. Qularis­sanngilarpulli nutaarsiassat nuannersut ingerlateq­qikkumallugit sapinngisatsinnik iliuuseqarnerput Jehovap nuannaarutigisaraa.

17. Vickyp utertitsissut pillugu oqaasii qanoq ilinniarfigaagit? (Tussiaat 5:13)

¹⁷ Jehovap utertitsissut akuerisaminut iluaqutigitittarpaa. (Tim 1. 2:5, 6) Taavami allaat utertitsissummik upperin­nillutalu imermut morsutsitaareeraluarluta misigigutta Jehovap suli akuerin­ngikkaatigut? Eqqaamas­savarput misigis­sutsigut tatiginar­tuaannan­ngimmata, Jehovali tatiginar­tuaannarpoq! Utertitsissummik upperinnittut naapertuil­luartutut isigai, pilluaq­quniarlugillu neriorsorpai. (Tussiaat 5:13 atuaruk; Rom 3:26) Qatanngut arnaq Vickymik atilik utertitsis­sutitut pilliutip eqqarsaatigeq­qissaarnera iluaqutigisimallugu pingaarutilimmik paasisaqarsimavoq. Ima oqarpoq: “Jehovap assigiin­ngitsutigut uannik asanninnini ersersillugu sivisuumik naammagit­tarfigisimavaanga. Uangali soorlulusooq ima oqarfigisariga: ‘Illit asanninnerit uannut anngussin­naanngilaq. Ernerpit pilliutaata ajortuliakka matussusersin­naanngilai.’” Utertitsis­sutitut pilliut tunissutitut eqqarsaatigileramiuk misigilerpoq Jehovap asagaani. Aamma uagut utertitsissut eqqarsaatigeq­qissaarutsigu misigilissaagut Jehovap akueralutalu asagaatigut.

18. Ataatarput qilammiusoq asajuarutsigu suna qularis­sanngilarput?

¹⁸ Siunnersuutit sammeriikkagut maleruar­niaraluarlutigit ilaannikkut nikallungalersin­naavugut qularilerlugulu Jehovap akuerineraatigut. Taama misigilissaguit eqqaamassavat Jehovap asannitsigiuakkani akuerigai. (Jaak 1:12) Taamaattumik Jehovamut ikinngutaanerit nakussatsittuaruk maluginiar­tarlugulu qanoq ersersit­tarneraa akuerigaatit. Qularis­sanngilat Jehovap ‘tamatta immikkut ungasin­ngikkaatigut’. – ApS 17:27.