1. Jehovap peqatigiis­sortaanut ilaagatta suut nuannaarutigisin­naavagut?

 ULLUNI kingullerni makkunani ajornakusoortuni Jehovap peqatigiis­sortaanut ilaanerput nuannaarutigingaarparput. Pissutsit ajorsigalut­tuinnaraluartut Jehovap isumassuisunik anersaakkut qatannguteqar­tippaatigut. (Tuss 133:1) Ilaqutariittut ataqatigiil­luarnis­satsinnut ikiortarpaatigut. (Ef 5:33–6:1) Aamma qamuuna eqqissisimanias­sagatta ilisimas­susermik tunivaatigut.

2. Qanoq iliortariaqarpugut, aamma sooq?

² Jehovamulli aalajaalluta kiffartor­tuassagutta ilungersor­tariaqarpugut. Sooq? Allat oqaaserisaat iliuuserisaallu ajuallaatigisin­naagatsigit. Aamma nammineq kukkussutigut, ingammik kukkussutigeq­qattaarutsigit, nikallungas­sutigisin­naagatsigit. Jehovamut kiffartor­nitsinni tunniutiin­nassanngilagut (1) uppeqatitsinnit ajuallatsin­neqaraangatta, (2) aappatsinnit pakatsisin­neqaraangatta, aamma (3) kukkussuteqarnerput pissutigalugu imminut pakatsisik­kaangatta. Allaaserisami matumani taakku pingasut sammissavagut. Aamma Biibilimi maligas­saalluartut qanoq ilinniarfigisin­naallugit eqqartus­savarput.

UPPEQAMMIT AJUALLATSIN­NEQARNERMI JEHOVAMUT AALAJAATTUARIT

3. Suut misilin­neqaatigisin­naavagut?

³ Misilin­neqaataasinnaasoq. Uppeqatitta ilaat paamitsas­sutigisatsinnik pissuseqarsin­naapput. Ilaasa pakatsisis­sinnaavaatigut imaluunniit inussiar­niiffigaluta. Aamma utoqqaanertat kukkusin­naapput. Tamakku pissutigalugit ilaasa qulariler­tarpaat Guutip peqatigiis­sortaaniin­nerlutik. Uppeqatiminnik kiffartoqateqarun­naarlutik imaassinnaavoq imminnik ajuallatsitsisimasut  ilagisarun­naaraat allaallu ilaat ataatsimiigias­saarlutik. (Sef 3:9) Tamannali silatusaarnerua? Biibilimi maligas­saalluartoq assingusumik nalaataqartoq qanoq ilinniarfigisin­naaneripput sammissavarput.

4. Paulusimut suut misilin­neqaataappat?

⁴ Biibilimi maligas­saalluartoq. Paulusip nalunngilaa kristumioqatini kukkusartut. Assersuutigalugu ilagiinnut ilanngummat Jerusalemmimi kristumiut ilaasa naliler­nerluppaat upperinagulu. (ApS 9:26) Kingusin­nerusukkut ilaasa tusaamanerlugaalersin­niarlugu oqaatis­suaatigaat. (Kor 2. 10:10) Utoqqaanertaq allat naakkius­sutigisin­naasaannik aalajangertoq Paulusip takuaa. (Gal 2:11, 12) Paulusilu qanimut suleqatiminit, Makkorsimit, pakatsisin­neqangaarpoq. (ApS 15:37, 38) Paulusi isummersin­naagaluarpoq ajuallatsitsisut taakku ilagisarun­naarniarlugit. Qatanngutinili ajunngitsumik isiginnit­taaseqarfigigamigit Jehovamut aalajaalluni kiffartor­tuarpoq. Paulusip suna iluaqutigaa?

5. Sooq Paulusip qatanngutini qanimut attaveqarfigiuarpai? (Kolossimiut 3:13, 14) (Aamma assiliaq takuuk).

⁵ Paulusip uppeqatini asavai. Asanninnini pissutigalugu qatanngutimi pissusaat nuannersut, imaanngitsoq kukkussutaat, isiginiarneruai. Paulusi asannikkami isumakkeerfigin­nittarpoq, aamma taamaalius­sasugut allappoq. (Kolossimiut 3:13, 14 atuakkit). Makkorsimut tunngatillugu isumakkeerfigin­ninnera eqqarsaatigiuk. Oqaluus­sisartutut angalanermini siullermi Makkorsimit qimanneqaraluarluni Paulusi ajuallas­simajuanngilaq. Kingusin­nerusukkut ilagiinnut Kolossimiunut asannittumik allakkamini Makkorsi nersualaarlugu suleqatimisut tuppallersaataangaartutut allaatigaa. (Kol 4:10, 11) Romami parnaarus­saaqqatilluni Paulusip kissaatigaa Makkorsip ikioriar­tussagaani. (Tim 2. 4:11) Ersarippoq Paulusip qatanngutini isumakkeerfigigai qanimullu attavigiuarlugit. Paulusi qanoq ilinniarfigisin­naavarput?

6-7. Uppeqatigut kukkusaraluartut qanoq asannit­tuliorfigiuarsin­naavagut? (Johannesimit 1. 4:7)

⁶ Ilinniagassartaa. Jehovap kissaatigaa qatanngutigiittut asaqatigiit­tuassasugut. (Johannesimit 1. 4:7 atuaruk). Uppeqatitta kristumiutut pissuserineqartussat ersersin­ngitsoorpatigit isummis­sanngilagut ajuallatsin­niarluta taama pissusilersortut, Biibilimimi najoqqutassiat uagutsitulli maleruarusuppaat. (Uss 12:18) Guutip kiffani aalajaatsut kukkusaraluartut asavai. Kukkusaraluartugut ikinngutaajuarpoq kamassimajuaan­narnanilu. (Tuss 103:9) Jehovap uagutsinnik  isumakkeerfigin­ninnera qujamasuutigeqaarput, allallu isumakkeerfiginerisigut ilaarusupparput. – Ef 4:32–5:1.

⁷ Eqqaamajuk naggatissaq qanilliar­tortillugu qatanngutigut qanimut attavigiuar­tariaqarigut. Malersugaaneruler­nissarput ilimagisin­naavarput, immaqalu allaat uppernerput pissutigalugu parnaarus­saassalluta. Taamatut pisoqarpat qatanngutigut aatsaat taama pisariaqar­titsigis­savagut. (Uss 17:17) Utoqqaanertaq Spaniami najugalik, Josef a, qanoq misigisaqartoq maluginiaruk. Uppeqatinilu sakkutuujorusun­nginnamik parnaarus­saapput. Ima oqarpoq: “Parnaarus­sivimmi kisimiif­fissaqarneq ajoratta immitsinnut paamitsaat­tarpugut. Kamageqatigiit­tuarlutali ilumoorluta isumakkeerfigeqatigiit­tariaqarpugut. Tamanna iluaqutigalugu ataasioqatigiis­sinnaavugut, parnaarus­sanullu allanut Jehovamut kiffartor­tuunngitsunut illersorluta. Taamaallunga talikkut aqqunarama qerattaq­quserneqar­tariaqarpunga. Taamaattumik iliuuserisin­naasakka killeqalerput. Qatanngutimali ilaata atisakka errortarpai allatigullu aamma ikiortarlunga. Pisariaqar­titsiffinni asanninneq misigaara.” Ilaa, maanna qatanngutittalu akunnitsinni ajornar­torsiutit aaqqittar­nissaannut pissutis­saqarluarpugut!

AAPPARMIT PAKATSISIN­NEQARNERMI AALAJAATTUARIT

8. Aappariit qanoq nalaataqartarpat?

⁸ Misilin­neqaataasinnaasoq. Aappariit tamarmik ajornar­torsiortarput. Biibilimi paatsuugas­saanngitsumik allassimavoq ‘katittut ajornar­torsiuteqar­tarumaartut’. (Kor 1. 7:28) Sooq taamaappa? Inuit naammal­luinnan­ngitsut aappariiler­tarmata. Pissusilersoriaasii assigiin­ngitsuusin­naapput, aamma assigiingitsunik nuannarin­ngisaqarlutillu nuannarisaqarsin­naapput. Aappariit kulturii tunuliaqutaallu assigiin­ngitsuusin­naapput. Imaassinnaavoq katinngin­nerminni aappaasup malugisiman­ngisaanik aappaa pissuseqarluniluunniit ileqqoqartoq. Piffissallu ingerlanerani taakku ajornar­torsior­titsilersin­naapput. Allaat aamma namminneq kukkussuteqaraluarlutik aappartik pisuutis­sinnaavaat. Ajornar­torsiutimillu aaqqinnissaat sulissutiginagu immaqa isumaqalersin­naapput averuser­nissartik avinnis­sartilluunniit aaqqiis­sutaasoq. Aaqqiis­sutaavali? b Arnaq uiminit ajornar­torsior­tinneqaraluarluni Jehovamut aalajaat­tuartoq Biibilimi eqqaaneqartoq ilinniarfigisin­naavarput.

9. Abigajili qanoq ajornar­torsiorpa?

⁹ Biibilimi maligas­saalluartoq. Abigajilip Nabali uigaa, Biibilimilu allassimavoq taanna ‘peqqarniitsuullunilu inupiluusoq’. (Sam 1. 25:3) Inooqatigalugu imaannaan­ngitsuusimassaaq. Uigiunnaar­nissaanut Abigajili periarfis­saqarpa? Aap. Daavi Israalimi kunngiusussaq angutitaalu Nabalimit narrunarsar­neqaramik pilersaarutigigaluarpaat Nabali toqunniarlugu. (Sam 1. 25:9-13) Abigajili qimaasimasin­naagaluarpoq taamaalilluni Daavip Nabalimik toqutsinissaa iluatsitsisillugu. Kisianni taamaaliornani Daavi kimigiiserfigaa Nabali inuugin­nartissagaa. (Sam 1. 25:23-27) Sooq taamaaliorpa?

10. Abigajilip uini qimanngimmagu suna pissutaagunarpa?

¹⁰ Abigajilip Jehova asavaa aappariin­nermullu najoqqutassiai ataqqillugit. Adami nuliassaanik  tunigamiuk Guuti qanoq oqartoq Abigajilip nalusimanavianngilaa. (Mos 1. 2:24) Nalunngilaa Jehovap aappariinneq illernartutut isigigaa. Abigajilip Guuti nuannaar­tikkusuppaa, taamaat­tumillu inoqutini, aamma uini, annaanniarlugit qanorluunniit iliuuseqarusus­simassaaq. Daavip Nabali toqunngin­niassammagu iliuuseqapallappoq. Nammineq kukkussutigin­ngisani pillugu utoqqatser­nissani nangaas­sutiginngilaa. Jehovap arnaq taanna namminis­sarsioranilu sapiitsoq asasimassavaa. Uiusut nuliaasullu Abigajili qanoq ilinniarfigisin­naavaat?

11. (a) Jehovap aappariit sumik piumaffigai? (Efesossimiut 5:33) (b) Carmenip ilungersornera qanoq ilinniarfigaajuk? (Aamma asseq takuuk).

¹¹ Ilinniagassartaa. Jehovap uiusoq nuliaasorlu aappariit­tuassasut kissaatigaa, aamma aappaasoq inooqatigiuminaak­kaluartoq. Aappariit ajornar­torsiutitik aaqqinniarlugit asaqatigiil­lutillu ataqqeqatigiittut takugaangamigit Guutip nuannaarutigisarsimassavaa. (Efesossimiut 5:33 atuaruk). Carmen maligas­saalluarpoq. Katereerlutik ukiut arfinillit qaangiuttut Carmenip Jehovap Nalunaajaasui Biibilimik misissueqatigisalerpai kingusin­nerusukkullu imermut morsutsitaavoq. Carmen oqarpoq uimi tamanna iluarin­ngilluinnaraa. Jehovamut kiffartornermut piffissaq annertooq atortarmagu uiata kamaatigaa. Carmen oqarpoq: “Nikanarsar­tarpaanga qimanniarlungalu sioorasaar­tarlunga.” Taamaak­kaluartorli Carmen tunniutiin­nanngilaq. Ukiuni 50-ini sapinngisaminik uini asallugulu ataqqivaa. Ima nangippoq: “Uima misigissusii ukiut ingerlanerini paasiniar­nerullugillu periaaserillunga oqalunnissara ilikkariar­torpara. Jehovap isaani katissimaneq illernar­tuummat sapinngisara tamaat aappariit­tuarnissarput sulissutigaara. Jehova asagakku uiga aappariuarusuppara.” c Aappariin­nissinni ajornar­torsiulerussi qularis­sanngilat Jehovap annertoq­qusersorlutillu tunniutiin­nanngin­nissannut ikiussagaatit.

IMMINUT PAKATSISINNERMI JEHOVA KIFFARTORFIGIUARUK

12. Ingasattumik ajortuliorsimagutta qanoq unamminiagaqarsin­naavugut?

¹² Misilin­neqaataasinnaasoq. Ingasattumik ajortuliorutta immaqa nikallorujus­suarsin­naavugut. Biibilimi allassimavoq ajortuliatta uummaterput artorsaateqangaar­tissinnaagaat. (Tuss 51:19) Qatanngutip Ronimik atillip ukiorpassuarni ilagiinni kiffartor­tunngor­nissani anguniagarisimavaa. Ingasat­tumilli ajortuliorpoq taamaalilluni Jehova  ilumuun­ngitsuliorfigalugu. Ima oqarpoq: “Ajuuillunga ilerasuuteqaqaanga. Manittor­tuinnan­ngorlunga qiallunga Jehova qinnuigaara. Eqqaamavara eqqarsarlunga Guutip qinnutikka tusarumanavian­ngikkai. Qanormi taamaaliussava? Pakatsisingaarsimavarami.” Ingasattumik ajortuliorsimagutta misigisin­naavugut immitsinnut artukkerluta, eqqarsalerlutalu Jehovap imminiigin­narsimagaatigut. (Tuss 38:5) Taamatut misigisimaguit angutip Biibilimi eqqaaneqartup ingasattumik ajortulioraluarluni Jehovamut kiffartor­tuartup eqqarsaatiginissaa iluaqutigisinnaavat.

13. Petrusi ingasattumik qanoq ajortuliorpa, tamannalu sioqqullugu suut kukkussutigai?

¹³ Biibilimi maligas­saalluartoq. Jiisusi aqagumut toqusussaasoq apustili Petrusi kukkusaqat­taarujus­suariarluni ingasattumik ajortuliorpoq. Siullermik Petrusi imminut tatigival­laarpoq, oqarataarami apustilit tamarmik Jiisusi qimakkaluarpassuk nammineq qimanniarnagu. (Mak 14:27-29) Taava naatsiivimmi Getsiimanimi Petrusi eqqumaan­nanngitsooqat­taarpoq. (Mak 14:32, 37-41) Taava Jiisusi panalisartunit anaatalisar­tunillu tigusariniar­neqarmat Petrusip qimappaa. (Mak 14:50) Ajornerpaasumillu, Petrusip Jiisusi pingasoriarluni nalunerarpaa, allaat misiarpoq ilumuuin­nerarluni. (Mak 14:66-71) Ingasattumik ajortuliorsimanini paasigamiuk Petrusi qanoq qisuariarpa? Ilerasungaarami imminut aqussin­naajunnaarluni qissaserpoq. (Mak 14:72) Takorlooriaruk akunnerit arlaqan­ngitsut qaangiummata ikinngutini Jiisusi toqutaammat Petrusi qamuuna qanoq anniaateqar­tigisimassasoq. Naleqan­ngitsutut misigisimassaaq!

14. Petrusip Jehovamut kiffartor­tuarnis­saminut suna iluaqutigaa? (Assiliaq takuuk).

¹⁴ Petrusi Jehovamut kiffartor­tuarnis­saminut arlaqartunik pissutis­saqarpoq. Immikkoor­nialernani anersaakkut qatanngutini ornippai. Qularnan­ngitsumillu taakkunannga tuppallersar­neqarpoq. (Luk 24:33) Taava Jiisusi makititaasimasoq Petrusimut takutippoq, qularnan­ngitsumik taanna tuppallersarumallugu. (Luk 24:34; Kor 1. 15:5) Kingusin­nerusukkut kukkussutai pillugit Petrusi avoqqaarinagu Jiisusip ikinngutini oqarfigaa annertunerusumik akisussaaf­feqalerumaartoq. (Joh 21:15-17) Petrusip nalunngik­kaluarlugu ingasattumik ajortuliorsimalluni tunniutiin­narnani eqqortulior­nissani sulissutigiuarpaa. Sooq? Qularutigin­nginnamiuk naalakkami Jiisusip suli asagaani. Aamma Petrusi anersaakkut qatanngutiminit tapersersor­neqartuarpoq. Petrusi qanoq ilinniarfigisin­naavarput?

15. Jehovap suna qularutigis­sanngikkipput kissaatigaa? (Tussiaat 86:5; Romamiut 8:38, 39) (Aamma asseq takuuk).

 ¹⁵ Ilinniagassartaa. Jehovap kissaatigaa qularis­sanngikkipput asallutalu isumakkeerfigerusuk­kaatigut. (Tussiaat 86:5; Romamiut 8:38, 39 atuakkit). Ajortulioraangatta ilerasut­tarpugut. Tamanna pissusis­samisoorpoq taamaat­tussaallunilu. Isumaqas­sanngilagulli Jehovap asajunnaaraatigut isumakkeerfigisin­naanngik­kaatigullu. Ingerlaannarli ikiortis­sarsior­tariaqarpugut. Ron eqqaaneqareersoq ima oqarpoq: “Imminut tatigival­laarlunga isumaqarama ussernartoq nammineerlunga akiorsin­naallugu ajortuliorninnik kinguneqarpoq.” Paasivaa utoqqaanertat oqaloqatigisariaqarlugit. Ima oqarpoq: “Taama iliuuseqarama Jehovap asanninnera taakku aqqutigalugit misigaara. Aamma misigivunga utoqqaanertanit asaneqarlunga. Taakkualu paasitip­paannga Jehovap qimassiman­ngikkaanga.” Uaguttaaq ajortuliagut peqqissimis­sutigigutsigit, pisariaqar­titatsinnik ikiortis­sarsiorutta kukkussutigisimasattalu kukkussutigeq­qinngin­nissaat sulissutigigutsigu qularis­sanngilarput Jehovap asangaarlutalu isumakkeerfigis­sagaatigut. (Joh 1. 1:8, 9) Jehovap asanninnera isumakkeerfigin­nikkumaneralu qularin­ngikkutsigu ajortulioreeraluarluta Jehova kiffartorfigiun­naarnavian­ngilarput.

16. Sooq Jehovamut kiffartor­tuarnissat aalajangiusimaviuk?

¹⁶ Ulluni kingullerni makkunani ajornakusoortuni kiffartor­nitsinni ilungersuutigut Jehovap pingaar­tingaarpai. Nammineq kukkussutigut allalluunniit kukkussutaat pakatsis­sutigigaluarutsigit Jehovap ikiuineratigut tunniutiin­narnata kiffartor­tuarsin­naavugut. Qatanngutitsinnit ajuallatsin­neqarutta taakku isumakkeerfigalugillu asajuarsin­naavagut. Aappariin­nitsinni ajornar­torsiutit pilersinnaasut sapinngisarput tamaat aaqqinniarlugit iliuuseqar­nitsigut ersersis­sinnaavarput Guuti qanoq asatigalugu aappariin­nermullu najoqqutassiai ataqqillugit. Ajortuliorutta Jehovamut ikioqqusin­naavugut tatigalugulu asallutalu isumakkeerfigerusus­sagaatigut, taamaalillutalu kiffartorfigiuarsin­naavarput. Qularis­sanngilarput ‘ajunngitsuliorneq qatsutin­ngikkutsigu’ Jehovap pilluaq­qujumaaraatigut. – Gal 6:9.