1-2. (a) Paulusi Efesossimiunut allakkami sumiippa, aamma sooq taakku allaffigai? (b) Apeqqutit suut sammissavagut?

 ROMAMI illumi parnaarus­saaqqatilluni Paulusip uppeqatini qiimmas­sarusuppai. Tikeraarfigisin­naanngin­namigit allaffigisarpai. Efesossimiut allaffigisaasa ilagaat. Ukiumi 60-imi 61-imiluunniit taakkununnga allappoq. – Ef 1:1; 4:1.

² Ukiut qulit missaat tamatuma siorna Paulusi sivisuumik Efesossimiis­simavoq nutaarsiassat nuannersut pillugit oqaluus­sisarlunilu ilinniar­titsisarluni. (ApS 19:1, 8-10; 20:20, 21) Uppeqatini asangaaramigit Jehovamut aalajaan­nissaannik ikiorusuppai. Kisianni sooq kristumiunut tanitanut taartoq qaamanerlu pillugit allappa? Allataalu kristumiut tamarmik qanoq ilinniarfigisin­naavaat? Taakkua akissutaat sammeriartigit.

TAARTUMIIT QAAMANERMUT

3. Paulusip Efesossimiut assersuusiorluni qanoq allaffigai?

³ Paulusip kristumiut Efesossimiittut ima allaffigai: “Taartumiis­simagaluarpusi, maannali … qaamanermiippusi.” (Ef 5:8) Akerleriit taakku atorlugit Efesossimiut allanngorluin­narsimanerat allaatigaa. Sooq Paulusip Efesossimiut ‘taartumiis­simanerarnerai’ sammeriartigu.

4. Efesossimiut qanoq anersaakkut taarsiorpat?

⁴ Anersaakkut taarsiorneq. Efesossimiut Paulusip allaffigisai ilumoortoq ilikkan­ngikkal­laramikku kristumiun­ngunngik­kallaramillu upperisarsiornermut eqqunngitsumut angakkuar­tarnermullu inussiaataasimapput. Illoqarfimmi Efesossimi guutisiorfeqarpoq Artemissimut pigititamik,  taannalu itsaq inunnit sanaat alutornar­nerpaartaasa arfineq-marluk ilagaat. Inuit tassunga guutipilunnik pallorfigin­nikkiar­tortarput. Artemissimik guutiliat guutisiorfeeraliallu aningaasarpas­suarnik iluanaarutigineqartarput. (ApS 19:23-27) Tamatumalu saniatigut Efesossimiut angakkuartarneq ilisimaneqaatigaat. – ApS 19:19.

5. Efesossimiut qanoq ileqqus­satigut taarsiorpat?

⁵ Ileqqus­satigut taarsiorneq. Efesossimiut atoqatigiinnikkut ingasattumik eqqunngitsuliorneq kanngut­taatsuliornerlu ilisimaneqaatigaat. Isiginnaar­titsivinni allaallu upperisarsiornikkut nalliut­torsiornerni atoqatigiinneq pillugu quiasaarnerit nalingin­naapput. (Ef 5:3) Efesossimiut ilarpassui eqqunngitsuliorneq sungiusimaan­naramikku ‘ilerasus­sinnaajun­naarsimapput’. (Ef 4:17-19) Aamma kristumiut Efesossimiittut suna eqqortuunersoq sunalu eqqunngitsuunersoq ilikkan­ngikkal­laramikku eqqunngitsuliorsorin­nginnamik ilerasunneq ajorput aamma iliuutsitik Guutip qanoq isumaqarfiginerai soqutiginagu. Taamaattumik Paulusi allappoq ‘isumakkut taarsiorlutillu inuunermit Guutip pigisaanit avissaarsimasut’.

6. Sooq Paulusip Efesossimiut allaffigai ‘maanna qaamanermiittut’?

⁶ Efesossimiulli ilaat taartumiigin­nanngillat. Paulusi allappoq maanna ‘Naalagaq ataasioqatigigamikku qaamanermiittut’. (Ef 5:8) Jehovap oqaasii qaammaq­qutigalugit maleruar­talerpaat. (Tuss 119:105) Efesossimiut taakku upperisarsiornermi eqqunngitsumi ileqqulersuutit tunullugillu atoqatigiinnikkut eqqunngitsulius­saarsimapput. Guuti ilaartalersimavaat, sapinngisaminnillu Jehova guutisiorfigaat nuannaar­tillugulu. – Ef 5:1.

7. Kristumiut Efesossimiittut qanoq assigiis­suteqarfigaagut?

⁷ Uagut aamma Biibilimi ilumoortut ilikkan­ngikkal­laratsigit anersaakkut ileqqus­satigullu taarsiorsimavugut. Immaqa eqqunngitsumik upperisarsiornikkut nalliut­torsioqataasarpugut, immaqaluunniit inuunerlus­simavugut. Eqqortulli eqqunngitsullu pillugit Jehovap najoqqutassiai paasigatsigit allannguivugut. Taassumalu iluarisaatut inooriaaseqarnerput  assigiin­ngitsorpas­suartigut iluaqutigisimavarput. (Es 48:17) Taartulli qimassimasatta ingalas­simajuarnissaa imaannaanngilaq. Qanoq ililluta ingalas­simajuarlugulu ‘qaamanerup qitornaasut inuujuarsin­naavugut’?

TAARTOQ INGALAS­SIMAJUARUK

8. Efesossimiut suut ingalas­simasariaqarpaat? (Efesossimiut 5:3-5)

⁸ Efesossimiut 5:3-5 atuakkit. Ileqqus­satigut taarsiorumanatik kristumiut Efesossimiittut iliuutsit Jehovap iluarinngisai ingalas­simajuar­tariaqarpaat. Iliuutsit taakkua ilagaat atoqatigiinnikkut eqqunngitsuliorneq aamma atoqatigiinneq pillugu quiasaarneq. Paulusip Efesossimiut eqqaasippai ‘Kristusip Guutillu kunngeqarfianni kingornus­sassaqas­sagunik’ iliuutsit taakku ingalas­simalluin­nartariaqaraat.

9. Sooq atoqatigiinnikkut eqqunngitsuliornermik kinguneqar­titsisinnaasut ingalas­simalluin­narnissaat pingaaruteqarpa?

⁹ Aamma uagut ‘taartumut tunngasunik iluaqutaan­ngitsunik’ iliuuseqan­nginnissarput pingaaruteqarpoq. (Ef 5:11) Inuup mingunnartut atoqatigiin­nikkullu eqqunngitsuliornermut tunngasut isiginnaar­tarpagit, tusarnaar­tarpagit taakkulu pillugit oqaluttarpat eqqunngitsuliornissaa ilimanar­nerussaaq. (Mos 1. 3:6; Jaak 1:14, 15) Nunat ilaanni Nalunaajaasut arlallit internetikkut “ikinngutigiilerlutik” allaqatigiit­talerput. Aallaqqaammut taakkua ilarpassuisa anersaakkut ittut eqqartor­tarpaat. Piffissalli ingerlanerani Jehovap iluarinngisai pillugit, pingaartumik atoqatigiinneq pillugu, allaqatigiit­talerput. Kingusin­nerusukkut qatanngutit taakkua ilaat arlallit oqarput mingunnartut pillugit eqqartuisarnerup kingunerisaanik atoqatigiinnikkut eqqunngitsuliorsimallutik.

10. Saatanip qanoq salloqit­tarniarsarivaatigut? (Efesossimiut 5:6)

¹⁰ Saatanip isumaqalersin­niarpaatigut Jehovap atoqatigiinnikkut eqqunngitsuliornertut mingunnar­tutullu isigisai ajortuun­ngitsut. (Pet 2. 2:19) Tamanna tupaallaatigin­ngilarput. Diaavulummi itsarli inuit eqqunngitsumik eqqortumillu immikkoor­tissinnaajun­naarsillugit paatsiveerutsin­niarsarisimavai. (Es 5:20; Kor 2. 4:4) Tupinnanngilaq filmit, TV-kkut aallakaatitassiat nittartakkallu aqqutigalugit Jehovap najoqqutas­siaanut akerliusut siammarsar­neqartarmata. Saatanip salloqit­tarniarluta isumaqalersin­niarpaatigut iliuutsit minguttuut inuunerlunnerlu akuerisaagin­narnatik nuannersuul­lutillu ajortumik kinguneqar­navianngitsut. – Efesossimiut 5:6 atuaruk.

11. Efesossimiut 5:7-imi siunnersuutip maleruar­nissaata pingaaruteqarnera Angelap misigisaanit qanoq erserpa? (Aamma asseq takuuk).

¹¹ Saatanip kissaatigaa Jehovamut kiffartortut taassuma najoqqutassiaasa maleruar­nissaannik sapernar­titsisunik peqateqar­tassasut. Tamanna pissutigalugu Paulusip Efesossimiut allaffigai Guutip isaani eqqunngitsuliortartut ‘ilaassan­ngikkaat’. (Ef 5:7) Uagulli Efesossimiunit mianersor­nerusariaqarpugut, aammami internetikkut attaveqaqatigiit­tarfinni ilagisar­takkatta sunnertarmatigut. Angelap, a Asiami najugallip, paasivaa tamanna qanoq navianar­tigisinnaasoq. Oqarpoq: “Eqqarsar­tariaasera arriitsun­nguamik allanngoriar­tuaarpoq. Biibilimillu najoqqutassianik ataqqin­ninngitsunik ‘ikinnguteqarnera’ ippigiun­naarpara. Aamma isumaqalerpunga Jehovap iluarin­ngisaanik inooriaaseqar­nissara ajortuun­ngitsoq.” Qujanartumik Angela utoqqaanertanit asannittunit allannguinis­saminut  ikiorneqarpoq. Ima oqarpoq: “Maanna internetikkut attaveqaqatigiit­tarfiit pinnagit anersaakkut ittut samminerusarpakka.”

12. Eqqortoq eqqunngitsorlu pillugit Jehovap najoqqutassiaasa maleruar­nissaannut suna iluaqutigis­savarput?

¹² Inuppassuit isumaqaraluartut atoqatigiinnikkut eqqunngitsuliorneq ajortuun­ngitsoq uagut nalunngilarput tamanna eqqunngitsuusoq. (Ef 4:19, 20) Pitsaassaaq apeqqutit uku eqqarsaatigigutsigit: ‘Aalajangiusimavara Jehovap najoqqutas­siaanik ataqqin­ninngitsut – soorlu suleqatima, atuaqatima allalluunniit – pisariaqan­ngitsumik peqatigisan­nginnissaat? Sapiillunga Jehovap najoqqutassiai illersorlugillu maleruar­tarpakka, allaat ilaasa tamanna pillugu ajorigaluarpannga?’ Timuutiusimut allakkat aappaat 2:20-22 ersersin­neqarpoq aamma ilagiinni qanimut ikinngutis­sarsior­nitsinni silatusaar­tariaqartugut. Eqqaamas­savarput ilaasa Jehovamut aalajaanis­satsinnut ikiornavian­ngikkaatigut.

‘QAAMANERUP QITORNAASUT INUUGIT’

13. ‘Qaamanerup qitornaasut inuujuarneq’ qanoq isumaqarpa? (Efesossimiut 5:7-9)

¹³ Paulusip kristumiut Efesossimiittut kajumis­saarpai taartup ingalas­simajuarnerata saniatigut ‘qaamanerup qitornaasut inuujuaq­qullugit’. (Efesossimiut 5:7-9 atuakkit). Tamanna qanoq paasisariaqarpa? Isumaqarpoq tamatigut kristumiutut ilumoortutut pissusilersus­sasugut. Taamaalius­sagutta Biibili Biibililersaarutillu atuaqqis­saarlugillu misissor­tassavagut. Ingammik Jiisusip Kristusip, ‘inuit qaammaq­qutaata’, maligassiaata ilinniar­titsissutigisaasalu eqqumaf­figilluar­nissaat pingaaruteqarpoq. – Joh 8:12; Uss 6:23.

14. Anersaaq illernartoq qanoq iluaqutigisin­naavarput?

¹⁴ ‘Qaamanerup qitornaasut’ pissusilersus­sagutta Guutip anersaava illernartoq pisariaqar­tipparput. Inuppassuimmi atoqatigiinnikkut eqqunngitsulior­tarmata minguitsuujuar­nissarput imaannaan­ngitsuuvoq. (Tes 1. 4:3-5, 7, 8) Inuit eqqarsar­taasiannit, isumaliutersuutaannit isiginnit­taasiannillu  Guutip isiginnit­taasianut akerliusunit sunnerneqas­sanngikkutta anersaaq illernartoq pisariaqar­tipparput. Aamma ‘ajunngitsut naapertuil­luartullu suulluunniit’ ineriar­tortinnis­saannut anersaaq illernartoq iluaqutigisin­naavarput. – Ef 5:9.

15. Anersaaq illernartoq qanoq pisinnaavarput? (Efesossimiut 5:19, 20)

¹⁵ Anersaamik illernartumik tunineqar­nissarput qinnutigisin­naavarput. Jiisusi oqarpoq Jehovap “imminut qinusut anersaamik illernartumik” tunissagai. (Luk 11:13) Aamma ataatsimiinnerni ataatsimoorluta Jehova unnersiutigigaangatsigu anersaamik illernartumik tunineqar­tarpugut. (Efesossimiut 5:19, 20 atuakkit). Guutip anersaavata illernartup sunniuteqarluar­neratigut Guutip iluarisaanik inooriaaseqarsin­naavugut.

16. Silatusaartumik aalajangiinis­satsinnut suna iluaqutigis­savarput? (Efesossimiut 5:10, 17)

¹⁶ Pingaarutilinnik aalajangigas­saqaraangatta paasiniar­tassavarput “Jehovap piumasaa suunersoq”, taavalu tamatumunnga naapertuuttumik iliuuseqarluta. (Efesossimiut 5:10, 17 atuakkit). Guuti qanoq isumaqarnersoq soqutigigatsigu Biibilimi najoqqutassiat uagut atukkatsinnut naleqquttut paasiniar­tarpagut. Najoqqutassiaalu maleruarutsigit aalajangiil­luarnerusin­naassaagut.

17. Qanoq piffissarput pitsaanerpaamik atorsin­naavarput? (Efesossimiut 5:15, 16) (Aamma asseq takuuk).

¹⁷ Paulusip kristumiut Efesossimiittut allaffigai piffissartik pitsaanerpaamik atussagaat. (Efesossimiut 5:15, 16 atuakkit). Ajortup, tassa akeqqatta Saatanip, kissaatigaa Jehovamut kiffartor­nitsinnut piffissaarun­niassagatta inuit pingaar­titaannik ulapputeqas­sasugut. (Joh 1. 5:19, q.a.i.) Kristumiup Jehovamut kiffartor­nermini iliuuserisin­naasani pinnagit pigisaqar­niarneq, ilinniagaqar­niarneq suliffiniluunniit pingaar­nerpaatit­toorsinnaavaa. Taamaaliussaguni ersersissavaa  inuit Jehovamut kiffartor­tuunngitsut eqqarsar­tariaasiinik ilaarsisalersimalluni. Soorunami taakku pingasut eqqaaneqartut imminni ajortuun­ngillat, inuunitsinnili pingaar­nerpaatis­sanngilagut. ‘Qaamanerup qitornaasut’ inuussagutta ‘piffissarput pitsaanerpaamik atussavarput’ pingaaruteqar­nerpaat aallullugit.

18. Piffissani pitsaanerusumik atorniarlugu Donald qanoq iliorpa?

¹⁸ Jehovamut kiffartornermi iliuuseqar­nerusin­naanermut periarfissatit eqqumaf­figikkit. Donald Sydafrikami najugalik taamaaliorpoq. Ima oqarpoq: “Pissutsit atukkakka eqqarsaatigeriarlugit qamannga pisumik Jehovamut ikioqquvunga taassumunnga kiffartornermi iliuuseqar­neruniassagama. Oqaluus­sinissamut piffissaqar­nerorusukkama allamik suliffit­taarnissara Jehovamut qinnutigaara. Taava ikiuineratigut tulluartumik suliffit­taarpunga. Nuliaralu piffissaq tamaat kiffartulerpugut.”

19. Qanoq ililluta ‘qaamanerup qitornaasut inuujuarsin­naavugut’?

¹⁹ Efesossimiut Jehovamut aalajaat­tuarnis­saminnut Paulusip allagai iluaqutigil­luarsimassavaat. Siunnersuutillu Jehovameersut taakku aamma uagut iluaqutigisin­naavagut. Eqqaaneqareersutut aliikkutassanik peqatigisar­takkanillu toqqaal­luarnis­satsinnut iluaqutigisin­naavagut. Aamma Efesossimiunut allakkat Biibilimik misissuiuar­nitsigut Guutip oqaasiata qaammaq­qutiginissaanut kajumis­sissutigisin­naavagut. Aamma paasivarput anersaap illernartup pingaaruteqarnera, ajunngitsunimmi pissuserineqar­tussanik ineriar­tortitsinissamut iluaqutigisaratsigu. Paulusip allatai maleruarutsigit Jehovap eqqarsar­tariaasianut naapertuuttumik silatusaartumik aalajangiisin­naassaagut. Tamakku iliuuserisarutsigit taartoq ingalas­simajuarlugulu qaamanermiit­tuarsin­naavugut!