1, 2. (a) Jiisusip Guutip inatsisai qanoq isumaqarfigai? (b) Al­lak­kanik ilisimasut farisiiaril­lu Inatsisit kuk­kusumik qanoq ator­paat?

JIISUSIP Mosesip inatsisai nuan­narai. Taman­na tupaal­laatigin­ngilar­put, taak­kuami Jiisusip inuunerani pingaar­ner­paasumit Ataataanit Jehovameersuup­put. Tus­siaat 40:9-mi Jiisusi Guutip inatsisaanik nuan­narisaqangaarumaar­toq ima siulit­tuutigineqar­poq: “Guuti, piumasat malil­lugu ilior­nis­saq tas­sa kajungerisara; inatsisitit uanga ilun­ni ip­put.” Jiisusip oqaatsimigut iliuutsimigul­lu Guutip inatsisaasa naam­mal­luin­nar­tuunerat, iluaqutaanerat naam­mas­siumaar­neral­lu up­per­narsar­paa. – Matt 5:17-19.

² Al­lak­kanik ilisimasut farisiiaril­lu Jehovap inatsisai kuk­kusumik, ingasat­tajaar­pasilersil­lugit, atoraat takugamiuk Jiisusi aliasus­simas­saaq. Ima oqarfigai: “Myntit dildil­lu kumaasal­lu pis­sarsias­si qulingi tun­niut­tar­pasi,” tas­sa Inatsisit an­nikin­ner­paar­taat maleruaq­qis­saar­niar­paat. Taman­na ajorami? Jiisusi ima nas­suiaavoq: “Sumigin­nar­tar­pasili inatsisini pingaar­nerutitat: naaper­tuil­luar­neq nal­lit­tuinerlu ilumoorsuserlu.” (Matt 23:23) Farisiiarit Inatsisit siuner­taat paasin­ngilaat, isumaqar­pul­lu inun­nit al­lanit pitsaanerul­lutik. Jiisusil­li nalun­ngilaa  Inatsisit pilersin­neqar­neran­nut tun­ngaviusoq taak­kulu tamarmik im­mik­kut Jehova pil­lugu qanoq ersersitsisut.

3. Al­laaserisami matumani suna sam­mis­savar­put?

³ Kristumiut Mosesip inatsisaanik maleruaasus­saan­ngil­lat. (Rom 7:6) Taavami sooq Jehovap Inatsisit Oqaatsiminut, Biibilimut, ilan­ngutitip­pai? “Inatsisini pingaar­nerutitat”, tas­sa najoq­qutas­siat Inatsisinut tun­ngaviusut, paasil­lugil­lu maleruas­sagivut kis­saatigigamiuk. As­sersuutigalugu il­loqarfin­nik qimar­nguf­fiusunik aaq­qis­suus­sap tun­ngaviata najoq­qutas­siar­taa qanoq ilin­niarfigisin­naavar­put? Al­laaserisami matuma siuliani toqutsisoortup qanoq ilior­nis­saanik misis­suinitsin­ni paasisaqar­pugut. Al­laaserisami matumani il­loqarfin­nit qimar­nguf­fiusunit misis­suinitsin­ni Jehova pil­lugu taas­sumalu pis­susii qanoq ilaarsin­naagivut paasisaqas­saagut. Il­loqarfiit qimar­nguf­fiusut pil­lugit apeq­qutit pingasut uku akis­sutis­sarsis­savavut: Jehovap nal­lit­tuineranik qanoq ersersitsip­pat? Guutip inuunermut isigin­nit­taasia pil­lugu qanoq paasisaqar­pugut? Aam­ma taas­suma naaper­tuil­luaq­qis­saar­neranik qanoq ersersitsip­pat? Taak­kunani pingasuni Ataatat qilam­miusoq qanoq ilaarsin­naanerlugu paasiniarsariuk. – Efesosimiut 5:1 atuaruk.

4, 5. (a) Toqutsisoor­toq il­loqarfim­mut qimar­nguf­fiusumut qimaapal­las­sin­naaq­qul­lugu qanoq ilior­toqar­pa, aam­ma sooq? (b) Tamatuman­nga Jehova pil­lugu suna paasivar­put?

⁴ Jehova il­loqarfin­nik qimar­nguf­fiusar­tus­sanik or­nik­kuminar­tunil­lu arfinilin­nik im­mik­koor­titseq­qusivoq. Israelik­kut peq­quai il­loqarfin­nik Jordanip kitaani pingasunik kangianilu pingasunik toq­qaas­sasut. Sooq? Toqutsisoor­tunit il­loqarfiit taak­kua arlaat tikipal­lan­neqarsin­naaq­qul­lugu. (4 Mos 35:11-14) Taak­kunun­nga aq­quser­ngit aq­qutigiuminarsar­neqar­tar­put. (5 Mos 19:3) Juutit ileq­qutoqaat naaper­torlugu toqutsisoor­tut il­loqarfin­nut qimar­nguf­fiusunukar­tut ikior­niarlugit aq­quser­ngit nalunaaqutsersor­neqarsimap­put. Israelimi qimar­nguf­fiusar­tunik il­loqarfeqarmat Israelik­kuusoq toqutsisoor­toq il­lersor­neqarumal­luni nunamut al­lamut, guutipilus­sior­nis­samut us­ser­nar­torsiorfiusin­naasumut, aal­lar­tariaqan­ngilaq.

⁵ Una eq­qarsaatigiuk: Jehova peq­qusivoq toqutsisoq toqun­neqas­sasoq. Aam­mali  toqutsisoor­tup nal­lit­tor­neqarlunilu il­lersor­neqar­nis­saa qulak­keer­paa. Biibilimik ilisimatuut ilaat oqar­poq taamatut atugaqar­tut tamarmik sus­sanerlutik sumun­nas­sanerlutil­lu nalun­ngil­luaraat. Jehova eq­qar­tuus­sisutut kif­faminik pil­laarusuin­nar­tutut naak­kit­taatsuun­ngilaq. Akerlianil­li ‘naak­kin­ningaar­tuuvoq’. – Ef 2:4.

6. Farisiiarit Jehova nal­lit­tuisoq ilaar­paat? Nas­suiaruk.

⁶ Farisiiaril­li al­lanik nal­lit­tuerusus­suseqan­ngil­lat. As­sersuutigalugu juutit ileq­qutoqaat naaper­torlugit farisiiarit inoqatimik kuk­kus­sut sisamas­saanik kuk­kus­sutigeq­qip­pas­suk isumak­keerfigerusut­tan­ngilaat. Tamatuma eq­qun­ngitsuunera ersersin­niarlugu Jiisusip farisiiari ilan­ngaaserisup saniani Guutimut qinusoq as­sersuutigaa. Farisiiari ima oqar­poq: “Guuti, qutsavigaak­kit inut­tut al­latut in­ngin­nama – ujajaasutut, iluaatsutut, al­lasior­tutut uumatul­luun­niit ilan­ngaaserisutut.” Jiisusip suna pivaa? Farisiiarit ‘al­lanik asis­suip­put’ nal­lit­tuisariaqan­ngis­soralutil­lu. – Luk 18:9-14.

7, 8. (a) Jehova nal­lit­tuisoq qanoq ilaarsin­naaviuk? (b) Sooq al­lanik isumak­keerfigin­nis­sagut­ta maniguut­tariaqar­pugut?

⁷ Jehova ilaaruk farisiiarit ilaar­nagit. Nal­lit­tuisarit. (Kolossemiut 3:13 atuaruk). Ilin­nit isumak­keerfigitik­kumasut am­maf­figik­kit. (Luk 17:3, 4) Im­minut ima aperigit: ‘Al­lat isumak­keerfigeriaan­naasar­pak­ka, aam­ma arlaleriarujus­suarlutik ajual­latsit­taraluaraan­nga? Uan­nik mamiatsatsitsisut ajual­latsitsisul­luun­niit eq­qis­seqatigerusungaar­tar­pak­ka?’

⁸ Isumak­keerfigin­nis­sagut­ta maniguut­tariaqar­pugut. Farisiiarit al­lanit ajun­ngin­nerusorigamik isumak­keerfigin­nik­kumaneq ajor­put. Kristumiul­li maniguul­lutik al­lat im­min­nit ‘an­nerutil­lugit’ isumak­keerfigeriaan­naasar­paat. (Fil 2:3) Im­minut ima aperisin­naavugut: ‘Jehova ilaarlugu maniguut­tuuvunga?’ Maniguuk­kut­ta al­lat isumak­keerfigitik­kumasut merserin­ngin­nerus­savaatigut isumak­keerfigeriaan­naanerus­savavul­lu. Nal­lit­tuipal­lat­tar­tuugit ajual­lajanaveersaarlutil­lu. – Oqal 7:8, 9.

9. Jehovap Israelik­kut inuunerup il­ler­nar­tuuneranik paasitin­niarlugit qanoq ikior­pai?

⁹ Il­loqarfiit qimar­nguf­fiusut pilersin­neqar­neran­nut pis­sutaasut ilagaat Israelik­kut aam­mut pisuutitaanis­samut il­lersor­niarlugit. (5 Mos 19:10) Jehovap inuuneq nuan­naraa inum­mil­lu pisuus­suteqan­ngitsumik toqutsineq uumigalugu. (Uss 6:16, 17) Guutiugami naaper­tuil­luar­toq il­ler­nar­torlu toqutsisoor­nerugaluar­pal­luun­niit sumigin­narsin­naan­ngilaa. Toqutsisoor­toq nal­lit­tor­neqarsin­naagaluarluni qanoq pisoqarsimaneranik utoq­qaaner­tanut nas­suiaaq­qaar­tariaqar­poq. Utoq­qaaner­tat naliler­pas­suk pineqar­toq  piaarinani toqutsisimasoq taan­na il­loqarfim­mi qimar­nguf­fiusumiit­tariaqar­poq palasiunerup toqunis­saata tungaanut. Imaas­sin­naavoq toqutsisoor­toq inuunermi sin­nerani il­loqarfim­mi qimar­nguf­fiusumiit­tariaqar­toq. Aaq­qis­suus­sineq taman­na Israelik­kun­nut erseq­qis­saataavoq inuunerup il­ler­nar­tuuneranik. Inuunermik Tunisisoq ataq­qiumal­lugu al­lat inuuneran­nik sapin­ngisamin­nik navianar­torsior­titsinaveersaar­tariaqar­put.

10. Jiisusi naaper­torlugu al­lak­kanik ilisimasut farisiiaril­lu inoqatimik inuuneran­nik pingaar­titsinatik qanoq ersersip­paat?

¹⁰ Al­lak­kanik ilisimasut farisiiaril­lu Jehovatut in­natik al­lat inuuneran­nik pingaar­titsin­ngil­lat. Jiisusip ima oqarfigai: “Ilisimasas­sanut matuersaat peersimavarsi. Ilis­siluun­niit isersiman­ngilasi iser­niaraluar­tul­lu akor­nusersimal­lugit.” (Luk 11:52) Qanoq paasisariaqar­pa? Taak­kua Guutip oqaasia pil­lugu inuit nas­suiaal­lugil­lu naas­saan­ngitsumik inuusin­naaq­qul­lugit ikior­tus­saagaluar­paat. Taamaalior­natik inuit Jiisusimik ‘inuunerup naalagaaneranik’ malin­nik­kumasut akor­nuser­tar­paat. (ApS 3:15) Inuit piuneerus­saanis­samut siulersor­paat. Makitasuujul­lutil­lu nam­minis­sarsior­put inuil­lu inuuneran­nik soqutigin­nin­natik. Ila naak­kit­taal­lutil­lu asan­niuis­susiat!

11. (a) Apustilip Paulusip inuunermut Jehovatut isigin­nit­taaseqarluni qanoq ersersip­paa? (b) Oqaluus­sinermi Paulusitut qanoq aal­lus­sil­luarsin­naavugut?

¹¹ Jehova qanoq ilaarsin­naavar­put al­lak­kanil­lu ilisimasut farisiiaril­lu as­siginaveersaarlugit? Inuunermik ataq­qin­nil­lutalu pingaar­titsinitsigut. Apustili Paulusi sapin­ngisamik inun­nut amerlaner­paanut oqaluus­sigami ima al­las­sin­naavoq: ‘Kial­luun­niit aavanut pisuus­suteqan­ngilanga.’ (Apustilit Suliaat 20:26, 27 atuakkit). Pisuus­suteqan­ngik­kumaan­narluni Jehovamil­luun­niit peq­quneqar­nini piin­narlugu oqaluus­siva? Naamik. Inuit asavai. Inuunerat pingaar­tip­paa naas­saan­ngitsumil­lu inuuler­nis­saat kis­saatigalugu. (1 Kor 9:19-23) Jehovap inuunermut isigin­nit­taasiatut aam­ma uagut isigin­nit­taaseqar­tariaqar­pugut. Inuit tamarmik inuugin­narsin­naaq­qul­lugit al­lamik isumataar­nis­saat kis­saatigaa. (2 Petr 3:9) Jehova ilaarumal­lugu inuit asasariaqar­pavut. Nal­lit­tuineq aal­lus­sil­luarluta oqaluus­sinis­samut kajumis­sis­sutigis­savar­put taamaalior­ner­pul­lu nuan­naarutigalugu.

12. Sooq isuman­naatsuuneq Guutip in­nut­taanut pingaaruteqar­pa?

¹² Inuuneq Jehovatut isigin­nit­taaseqarfigiumal­lugu aam­ma isuman­naatsuunermut eq­qor­tumik isigin­nit­taaseqar­tariaqar­pugut. Pal­lorfigin­nit­tarfik sanagutsigu aserfal­latsaaliorutsigulu tas­sun­narut­taluun­niit isuman­naatsumik sulil­lutalu angalasariaqar­pugut. Inuit, isuman­naal­lisaaneq peq­qis­suunerlu naam­mas­siniaapal­lan­nermit aningaasanil­lu sipaar­niar­nermit pingaar­nerujuaan­nar­put. Guuter­put tamatigut eq­qor­tulior­tar­poq, taan­nalu as­sigerusup­par­put. Ingam­mik utoq­qaaner­tat navianar­torsior­toqalin­ngin­nis­saa eq­qumaf­figisariaqar­paat. (Uss 22:3) Utoq­qaaner­tap isuman­naal­lisaatit pil­lugit eq­qaasip­patit tusar­naaruk. (Gal 6:1) Inuunermut Jehovatut isigin­nit­taaseqarit “aam­mut pisuutitaaneq ilin­niileq­qunagu”.

13, 14. Israelik­kut utoq­qaaner­taasa Jehova naaper­tuil­luar­tuusoq qanoq ilaarsin­naavaat?

¹³ Jehovap Israelik­kut utoq­qaaner­taat peq­quai naaper­tuil­luar­tuunini ilaas­sagaat.  Siul­lermik, utoq­qaaner­tat pisunut tun­ngasut tamaasa paasiniar­tariaqar­paat. Taava toqutsisoq nal­lit­tor­neqas­sanersoq naliler­nialerunik­ku taas­suma pis­sutigisaa, isigin­nit­taasia sior­natigul­lu iliuuserisimasai eq­qarsaatigeq­qis­saar­tariaqar­paat. Utoq­qaaner­tat paasisariaqar­paat toqutsisup toqutani uumigineraa toquk­kusus­simaneraalu. (4 Mosesi 35:20-24 atuakkit). Ilisiman­nit­toqar­pat aatsaat ilisiman­nit­tut ikin­ner­paamik marluk un­nerluut taperser­pas­suk toqutsisoq eq­qar­tuun­neqarsin­naavoq. – 4 Mos 35:30.

¹⁴ Utoq­qaaner­tat qanor­piaq pisoqarsimanera paasereerunik­ku inuttaa, iliuuserisimasai kisiisa pin­nagit, eq­qarsaatigisariaqar­paat. Takuneqariaan­naasut piin­nar­nagit pisumut pis­sutiviusut paasiumal­lugit ilisimas­suseqar­tariaqar­put. Pingaar­ner­paamik Jehovap anersaava il­ler­nar­toq pisariaqar­tip­paat taas­suma ilisimas­susia, nal­lit­tuinera naaper­tuil­luar­tuuneralu ilaarsin­naajumal­lugit. – 2 Mos 34:6, 7.

15. Jiisusip ajor­tulior­tunut isigin­nit­taasia farisiiarit isigin­nit­taasian­nit qanoq al­laanerua?

¹⁵ Farisiiarit naak­kin­nit­tumik eq­qar­tuus­sin­ngil­lat. Ajor­tuliorsimasup iliuuserisimasaa isiginiar­neruaat, inut­tut qanoq it­tuunera pin­nagu. Farisiiarit ilaasa Jiisusi Mat­thæusip angerlarsimaf­fiani nerisoq takugamik­ku ajoqersuk­kat ima aperaat: “Sooq ajoqersuisus­si ilan­ngaaserisut ajor­tulior­tul­lu nereqatigai?” Jiisusip ima akivai: “Peq­qis­sut nakorsamik pisariaqan­ngil­lat, nap­parsimasul­li. Oqaatsit uku qanoq isumaqar­nersut ilin­niariar­torsiuk: ‘Piumasaraara nal­lit­tuineq, pil­liutit toqutas­sat pin­nagit.’ Tikiutin­ngilangami iluar­tut qaaq­qujar­torlugit, ajor­tulior­tul­li.” (Matt 9:9-13) Jiisusip ajor­tulior­tut utoq­qatsis­sutis­sarsiuun­nagit al­lamik isumataar­nis­saat kis­saatigaa. Taman­na oqaluus­sinermini tusarlius­saata pingaar­nerit ilagaat. (Matt 4:17) Jiisusip paasivaa “ilan­ngaaserisut ajor­tulior­tul­lu” ilaat al­lan­ngorusut­tut. Neriniaan­nan­ngil­lat Jiisusiuna malik­kaat. (Mark 2:15) Ajoraluar­tumik farisiiarit amerlanersaasa Jiisusitut inun­nut isigin­nit­taaseqan­ngil­lat. Inuit al­lan­ngorsin­naasorin­ngilaat ajor­tulior­tutul­lu neriuutis­saqan­ngitsutut isigalugit. Jehovamit, naaper­tuil­luar­tuusumit naak­kin­nit­tuusumil­lu, al­laanerul­luin­nas­susii!

16. Eq­qar­tuus­sisin­naanermut ataatsimiititaliap suna naliler­nias­savaa?

¹⁶ Ul­lumik­kut utoq­qaaner­taasut Jehova, ‘eq­qor­tumik iluarisaqar­toq’, ilaar­tariaqar­paat. (Tuss 37:28) Siul­lermik, ajor­tulior­toqarsimanersoq ‘paasiniarluas­savaat misis­suil­lutik’. Ajor­tulior­toqarsimap­pat maleruagas­sat Biibilimeersut tun­ngavigalugit qanoq ilius­sanerlutik aalajangis­savaat. (5 Mos 13:13-15) Eq­qar­tuus­sisin­naanermut ataatsimiititaliamut ilaagunik inuk ingasat­tumik ajor­tulior­toq peq­qis­simisimanersoq eq­qarsaatigeq­qis­saareerlugu naliler­tariaqar­paat. Taamaalior­nis­saq oqitsuujuaan­nan­ngilaq. Peq­qis­simisimaguni iliuuserisimasaminut isigin­nit­taasianit uum­mam­miuinil­lu ersis­saaq. (Saq­q 3:3) Ajor­tulior­toq nal­lit­tor­neqas­saguni peq­qis­simisariaqar­poq. *

17, 18. Utoq­qaaner­tat qanoq nalun­ngis­sin­naavaat inuk ilumut peq­qis­simisimanersoq? (Al­laaserisap aal­laq­qaataani as­seq takuuk).

¹⁷ Jehovap Jiisusil­lu inuk qanor­piaq eq­qarsar­nersoq misiginersorlu nalun­ngilaat, uum­mam­miui takusin­naagamik­kit. Utoq­qaaner­tal­li taamaas­sin­naan­ngil­lat. Taamaat­tumik utoq­qaaner­taaguit inuk  pineqar­toq ilumut peq­qis­simisimanersoq qanoq nalun­ngis­sin­naaviuk? Siul­lermik, ilisimas­suseq naliliisin­naanerlu qin­nutigik­kit. (1 Kng 3:9) Aap­pas­saanik, Guutip oqaasia Biibililersaarutil­lu inus­siap aalajaal­lunilu silatuup pilersitai iluaqutigalugit ‘aliasun­nerup Guutip piumasaata’, tas­sa ilumoorluni peq­qis­siminerup, aam­ma ‘aliasun­nerup silarsuup piata’ as­sigiin­ngis­sutaat paasiniaruk. (2 Kor 7:10, 11) Peq­qis­simisimasut peq­qis­simisiman­ngitsul­lu Biibilimi qanoq al­laatigineqar­tut maluginiaruk pineqar­tul­lu misigis­susii, eq­qarsaataat iliuusiilu misis­sorlugit.

¹⁸ Pingajus­saanik, inut­taa, iliuuserisimasai piin­nar­nagit, eq­qarsaatigiuk. Sooq taamaat­tuua? Sooq taama aalajangersimava? Sunik unam­miniagaqar­pa, pisin­naasaalu qanoq kil­leqar­pat? Biibilimi Jiisusi, ilagiin­nut kristumiunut niaquusoq, ima siulit­tuutigineqar­poq: “Eq­qar­tuus­sis­san­ngilaq isimi isigisaat najoq­qutariin­narlugu, aalajangiis­sananilu siutimi tusagaat maliin­narlugu. Nikanar­tut eq­qar­tuutis­savai eq­qor­tumik pineqar­til­lugit, nunamilu ikior­tarial­lit naaper­tuil­luar­tumik iliorfigalugit.” (Es 11:3, 4) Utoq­qaaner­taasusi, Jiisusip ilagiin­nik siulersuk­kaminik isumagin­neq­qul­lusi toq­qar­paasi, ikius­savaasilu naaper­tuil­luar­tumik naak­kin­nit­tumil­lu eq­qar­tuus­sinis­samut. (Matt 18:18-20) Qujamasungaar­pugut utoq­qaaner­taqarmat uagutsin­nik isumagin­nit­tunik! Qujamasuutigaar­put­taaq naaper­tuil­luar­tumik naak­kin­nit­tumil­lu ersersitsivigeqatigiin­nis­satsin­nut ikior­tarmatigut.

19. Il­loqarfiit qimar­nguf­fiusut ilin­niutis­sar­taa sorleq maleruar­niar­piuk?

¹⁹ Mosesip inatsisai ‘ilisimas­sutsip sal­lusuis­sutsil­lu ersiutaan­nik’ imaqar­put. Jehova taas­sumalu najoq­qutas­siai pil­lugit inatsisinit taak­kunan­nga paasisaqar­pugut. (Rom 2:20) Il­loqarfiit qimar­nguf­fiusut utoq­qaaner­tat ‘ilumoor­tumik eq­qar­tuus­sinis­samut’ ilin­niutigaat, tamat­talu ‘ajun­ngitsuliorfigeqatigiin­nis­samut naak­kit­tarfigeqatigiin­nis­samul­lu’ ilin­niutigaavut. (Zak 7:9) Inatsisinik taak­kunin­nga maleruaq­qusiun­naaraluarluni Jehova al­lan­ngorsiman­ngilaq. Naaper­tuil­luar­neq nal­lit­tuinerlu suli pingaar­tingaar­pai. Guutip taama it­tup pal­lorfiginera im­mik­kut pisin­naatitaaf­fiuvoq. Taas­suma pis­susii nuan­nersut ilaar­tigit qimar­nguf­figalugulu!