1. Guutip kif­fai aalajaatsut amerlasuut ajor­ti pis­sutigalugu qanoq misigip­pat?

“UANGAN­NGUAK­KULUK!” (Rom 7:24) Apustilip Paulusip taama nikal­lunganeratut ul­lumik­kut Guutip kif­fai aalajaatsut amerlasuut nikal­lungasar­put. Sooq? Jehovamit iluarisaarusuk­kaluarluta ajor­ti kingor­nus­simavar­put naam­mal­luin­naan­ngitsuul­lutalu. Taamaat­tumik Jehovap iluarisaatut iliun­ngitsooraangat­ta tujormisarsin­naavugut. Al­laat kristumiut ingasat­tumik ajor­tuliorsimasut Jehovamit isumak­keerfigineqan­ngisaan­nas­sal­lutik misigip­put.

2. (a) Tus­siaat 34:23-mit qanoq erser­pa Guutip kif­fai im­minut pisuuterujus­suar­tutut misigisariaqan­ngitsut? (b) Al­laaserisami matumani suna sam­mis­savar­put? (Ungalusaq “ Ilin­niutis­saap­pat, imaluun­niit as­sersuutaap­pat?” takuuk).

² Biibilimi up­per­narsaavigineqar­pugut Jehova qimar­nguf­figigutsigu pil­lar­neqar­tus­satut, imaluun­niit im­minut pisuuterujus­suar­tutut, misigisariaqan­ngitsugut. (Tussiaat 34:23 atuaruk). Jehovamul­li qimar­nguf­fis­sarsior­neq qanoq paasisariaqar­pa? Jehovamit nal­lit­tor­neqarumal­luta isumak­keerfigineqarumal­lutalu susariaqar­pugut? Apeq­qutit taak­ku itsaq Israelimi il­loqarfin­nik qimar­nguf­fiusunik aaq­qis­suus­sap sam­mineratigut akis­sutis­sarsisin­naavavut. Aaq­qis­suus­saq taman­na Inatsisit  tun­ngavigalugit angerutsip atuun­nerata nalaani atuup­poq. Angeruserli taman­na ukiumi 33-mi piinsip ul­luani taarser­neqar­poq. Taamaak­kaluar­toq Jehovameersuuvoq. Taamaat­tumik il­loqarfin­nik qimar­nguf­fiusunik aaq­qis­suus­samit paasisin­naavar­put Jehovap ajor­ti, ajor­tulior­tut peq­qis­simisul­lu qanoq isigigai. Siul­lermik misis­sor­tigu sooq Israelimi il­loqarfeqar­toq qimar­nguf­fiusunik aam­ma aaq­qis­suus­saq taman­na qanoq ator­neqar­tar­toq.

3. Toqutsisoq Israelik­kun­nit qanoq pineqas­sava?

³ Inum­mik toqutsisoqaraangat Jehovap malugin­ngitsoor­neq ajor­paa. Itsaq Israelimi toqutsisoq angum­mit toqutaasup qaniginer­paasaanit, ‘akiniaaniar­tumik’ taaneqar­tumit, toqun­neqas­saaq. (Jos 20:3; 4 Mos 35:19) Taamaalior­nik­kut toqutsisup inuunini akiliutigalugu toqutami pisuus­suteqan­ngitsup inuunerata nalinga akilis­savaa. Toqutsisoq piaar­tumik toqun­neqan­ngip­pat nuna neriorsuutigisaq mingut­tun­ngorsin­naavoq, tas­sa il­ler­narun­naas­saaq. Jehova peq­qusivoq nuna najugarisar­tik inum­mik toqutsinermik­kut ‘il­ler­naatsun­ngor­tis­san­ngik­kaat’. – 4 Mos 35:33, 34.

4. Israelik­kuusoq piaarinani toqutsip­pat qanoq pisoqas­sava?

⁴ Israelik­kuusormi piaarinani inum­mik toqutsiguni? Piaarisiman­ngik­kaluar­toq inuup pisuus­suteqan­ngitsup inuuneranik toqutsinermut akisus­saatitaas­saaq. (1 Mos 9:5) Jehovali oqar­poq toqutsisoor­toq nal­lit­tor­neqarsin­naasoq. Piaarinani toqutsisoq akiniaaniar­tumiit qimaasin­naavoq il­loqarfiit qimar­nguf­fiusut arfinil­lit arlaan­nut. Il­loqarfim­mi qimar­nguf­fiusumiigin­nar­nis­saa akuerineqar­pat toqun­neqas­san­ngilaq. Tas­saniigin­nar­tariaqar­porli palasiunerup toqunis­saata tungaanut. – 4 Mos 35:15, 28.

5. Sooq il­loqarfin­nik qimar­nguf­fiusunik aaq­qis­suus­saq Jehovap ilisarisimal­luar­neruler­nis­saanut iluaqutigisin­naavar­put?

⁵ Il­loqarfin­nik qimar­nguf­fiusunik aaq­qis­suus­saq inuup isumas­sarsiarin­ngilaa. Jehovap aaq­qis­suus­saq taman­na pilersip­paa. Josva ima peq­quaa: ‘Israelik­kut oqarfigik­kit il­loqarfin­nik qimar­nguf­fis­sanik toq­qaas­sasut.’ Il­loqarfiit taak­ku ‘il­ler­nar­titaap­put’.  (Jos 20:1, 2, 7, 8) Jehova aalajanger­poq il­loqarfiit taak­ku im­mik­koor­titaas­sasut. Aaq­qis­suus­saq taman­na Jehova pil­lugu ilin­niarfigingaarsin­naavar­put. As­sersuutigalugu Jehovap nal­lit­tuinera paasil­luar­nerusin­naavar­put ul­lumik­kul­lu taan­na qanoq qimar­nguf­figisin­naagip­put paasisin­naal­lutigu.

6, 7. (a) Utoq­qaaner­tat toqutsisoor­tumik eq­qar­tuus­sinerat nas­suiaruk. (Al­laaserisap aal­laq­qaataani as­siliaq takuuk). (b) Sooq toqutsisoor­tup utoq­qaaner­tanut saaf­figin­nin­nera silatusaar­nerua?

⁶ Israelik­kuusoq inum­mik toqutsisooruni il­loqarfim­mut qimar­nguf­fiusumut qimaasariaqar­poq utoq­qaaner­tal­lu il­loqarfiup isaaf­fiata kil­linganiit­tut ‘qanoq pisoqarsimaneranik nas­suiaal­lugit’. Utoq­qaaner­tal­lu taan­na tikil­luaq­qusariaqar­paat. (Jos 20:4) Kingusin­nerusuk­kut taak­kua il­loqarfim­mut toqutsisoor­nermik pisoqarfiusumut aal­lar­tis­savaat utoq­qaaner­tanit tas­saniit­tunit eq­qar­tuun­neqaq­qul­lugu. (4 Mosesi 35:24, 25 atuakkit). Utoq­qaaner­tat taak­kua pisimasoq piaarinani toqutsiner­tut nalilerunik­ku toqutsisoor­toq taan­na il­loqarfim­mut qimar­nguf­fiusumut uteq­qus­savaat.

⁷ Sooq toqutsisoor­tup utoq­qaaner­tat saaf­figisariaqar­pai? Utoq­qaaner­tat Israelik­kut minguitsuujuar­nis­saat qulak­keer­tariaqar­paat toqutsisoor­torlu Jehovamit nal­lit­tor­neqar­nis­saanut ikior­tariaqarlugu. Biibilimik ilisimatooq al­lap­poq toqutsisoor­toq utoq­qaaner­tanukan­ngik­kuni toqun­neqariaan­naasoq. Nangil­lunilu al­lap­poq taan­na Guutip peq­qusisimaneratut iliun­ngin­nami toqutaanini nam­mineq pisuus­sutigis­sagaa. Toqutsisoor­toq inuugin­narumal­luni ikioq­qusariaqar­poq ikior­neqar­ninilu akuerisariaqarlugu. Il­loqarfiit qimar­nguf­fiusut arlaan­nut qimaan­ngip­pat angut toqutaata qaniginer­paasaa taas­sumin­nga toqutsisin­naatitaavoq.

8, 9. Sooq kristumiu ingasat­tumik ajor­tuliorsimasoq utoq­qaaner­tanut saaf­figin­nit­tariaqar­pa?

⁸ Ul­lumik­kut kristumiu ingasat­tumik ajor­tuliorsimaguni Jehovamut at­taveqarluaq­qilersin­naajumal­luni utoq­qaaner­tanut saaf­figin­nit­tariaqar­poq. Sooq taman­na pingaaruteqar­pa? Siul­ler­tut, utoq­qaaner­tat ingasat­tumik ajor­tulior­tumik eq­qar­tuus­sisin­naaneran­nik aaq­qis­suus­saq Jehovamit pilersitaavoq. (Jaak 5:14-16) Aap­paat­tut, utoq­qaaner­tat ajor­tuliorsimasoq peq­qis­simisoq Guutimit iluarineqaq­qiler­nis­saanut ajor­tulioq­qin­ngin­nis­saanul­lu ikiorsin­naavaat. (Gal 6:1; Hebr 12:11) Pingajuat­tut, utoq­qaaner­tat ajor­tuliorsimasunik peq­qis­simisunik aliasut­tunik tup­pal­lersaasin­naasutut isumagin­nis­sin­naasutul­lu oqar­tus­saas­susiligaal­lutil­lu ilin­niar­tin­neqar­put. Jehovap utoq­qaaner­tat taamaat­tut ‘sialus­suarmut oq­qif­fim­mik’ taavai. (Es 32:1, 2) Aaq­qis­suus­saq taman­na Guutip uagutsin­nik nal­lit­tueriaasiisa ilagaat.

⁹ Guutip kif­faasa ilar­pas­sui utoq­qaaner­tanit ikior­neqareeraangamik misigisar­put oqilial­lal­lutik. As­sersuutigalugu qatan­ngut angut Daniel ingasat­tumik ajor­tuliorsimavoq, qaam­matinili arlalin­ni utoq­qaaner­tanut saaf­figin­nin­ngilaq. Ima oqar­poq: “Pif­fis­sarujus­suaq qaangiutereermat isumaqar­punga utoq­qaaner­tat ikiorsin­naan­ngik­kaan­nga.” Paasisaanis­sanili an­nilaangatigiuarsimavaa, Jehovamul­lu qinugaangami utoq­qatsis­sutis­sarsior­niaq­qaar­tarluni. Kiisami ikioq­qul­luni utoq­qaaner­tat  saaf­figai. Kingumut qiviarluni ima oqar­poq: “Soorunami saaf­figinis­saat an­nilaan­ngatigaara. Oqaloqatigereerak­kil­li misigivunga soorlu oqimaatsorujus­suaq tuin­niit peer­toq.” Daniel ilerasuuteqarani Jehovamut qinusin­naan­ngoq­qip­poq. Jehovamut at­taveqarluar­poq qanit­tuk­kul­lu ilagiin­ni kif­far­tor­tun­ngorluni.

10. Piaarinani toqutsisoq isumak­keerfigineqarumal­luni susariaqar­pa?

¹⁰ Piaarinani toqutsisoq isumak­keerfigineqas­saguni il­loqarfiit qimar­nguf­fiusut arlaan­nut qimaasariaqarpoq. (Josva 20:4 atuaruk). Inuugin­nas­saguni il­loqarfim­mut qimar­nguf­fiusumut aal­lapal­lat­tariaqar­poq palasiunerul­lu toqunis­saata tungaanut tas­saniit­tariaqarluni. Qimaasup sor­pas­suit im­miniigin­nar­tariaqar­pai. Sulif­fini angerlarsimaf­finilu najoruminar­toq qimat­tariaqar­pai sumul­luun­niil­lu angalasin­naajun­naarluni. * (4 Mos 35:25) Taman­nali im­minut akilersin­naavoq. Il­loqarfim­mit qimar­nguf­fiusumit aniguni ersersis­savaa inum­mik toqutsinini soqutiginagu inuuninilu navianar­torsior­tilis­sal­lugu.

11. Kristumiu peq­qis­simisoq Guutip nal­lit­tuineranut qujamasungaar­nerminik qanoq ersersitsisin­naava?

¹¹ Ul­lumik­kut ajor­tulior­toq peq­qis­simisoq aam­ma aalajangersimasunik iliuuseqar­tariaqar­poq. Ajor­tuliorun­naar­nis­saa naam­maan­ngilaq, aam­ma iliuutsit suul­luun­niit ingasat­tumik ajor­tuliulersitsisin­naasut iliuuserinaveersaar­tariaqar­pai. Apustilip Paulusip Korinthimi kristumiu peq­qis­simisoq qanoq ilior­toq ima al­laatigaa: “Guutip piumasaanik aliasun­nerup tamatumar­piaap ilungersor­neq qanoq atsigisoq pilersip­paa akor­nas­sin­ni – al­laam­mi utoq­qatser­neq, uumitsan­neq, ersineq, erinineq, tamaviaar­neq pil­laanerlu [kuk­kunermil­lu aaq­qiineq, NW].” (2 Kor 7:10, 11) Ajor­tulior­tarun­naar­niarluta sapin­ngisatsin­nik iliorut­ta Jehovamut ersersis­savar­put taas­sumun­nga at­taveqar­ner­put pimoorul­lutigu nal­lit­tuineralu taamaat­tus­saan­nar­tut isiginagu.

12. Kristumiup Jehovamit nal­lit­tor­neqar­tuarumal­luni suut ingalas­simasariaqar­pai?

¹² Kristumiup Jehovamit nal­lit­tor­neqar­tuarumal­luni suut ingalas­simasariaqar­pai? Ajor­tuliulis­sutigisin­naasani suul­luun­niit, al­laat nuan­narisani, ingalas­simariaan­naasariaqar­pai. (Matt 18:8, 9) As­sersuutigalugu ikin­ngutitit Jehovap iluarin­ngisaatut iliuler­nis­san­nut sun­niisar­pata taak­ku ilagisarun­naas­savigit? Imigas­saq aqus­sin­naan­ngik­kuk­ku pis­sutsit sumiif­fiil­lu imigas­sar­tor­pal­laar­nis­samut us­ser­nar­torsior­titsisin­naasut ingalas­simas­savigit? Atoqatigiin­nermik pileris­susipiloqar­neq akior­niaruk­ku filmit, nit­tar­tak­kat iliuutsil­luun­niit mingut­tunik eq­qarsaateqalersitsisin­naasut ingalas­simas­savigit? Eq­qaamajuk Jehovap inatsisai maleruarumal­lugit sumil­luun­niit pil­liuteqar­ner­put im­minut akilersin­naasoq. Jehovamit qiman­neqar­neq tujorminar­ner­paajuvoq. Jehovamil­lu ‘soraajuitsumik ilumoorfigineqar­neq’ misigisaavoq nalis­saqan­ngitsoq. – Es 54:7, 8.

13. Nas­suiaruk sooq toqutsisoor­toq il­loqarfim­mi qimar­nguf­fiusumi toq­qis­sisimal­luni pil­luarlunilu inuusin­naasoq.

¹³ Toqutsisoor­toq il­loqarfim­mut qimar­nguf­fiusumut piguni il­lersor­neqas­saaq.  Jehova il­loqarfiit taak­ku pil­lugit ima oqar­poq: ‘Piaarinatik toqutsisimasut taak­kunun­nga qimar­nguf­fis­sarsiorsin­naap­put.’ (Jos 20:2, 3) Toqutsisoor­tup eq­qar­tuun­neqarsimasup eq­qar­tuus­sisunut sas­sar­tin­neqaq­qin­nis­saa Jehovap piumasarin­ngilaa. Aam­ma akiniaaniar­toq il­loqarfim­mut qimar­nguf­fiusumut iseq­qusaan­ngilaq. Toqutsisoor­toq il­loqarfim­mi qimar­nguf­fiusumiitil­lugu Jehovap il­lersus­savaa. Parnaarussivimmiinngilaq. Al­lanik ikiuisin­naal­lunilu sulisin­naal­lunilu eq­qis­sil­luni Jehova kif­far­torfigisin­naavaa. Aap, pil­luarluni nalerisimaarlunilu inuusin­naavoq!

14. Kristumiup peq­qis­simisup suna qularutigisariaqan­ngilaa?

¹⁴ Guutip in­nut­taasa ilaat ingasat­tumik ajor­tuliorsimasut naak peq­qis­simisimagaluarlutik suli ilerasuuteqar­tar­put. Al­laal­lu ilaat misigisar­put ajor­tuliatik Jehovap puiun­ngisaan­nas­sagai. Taamatut misigiguit eq­qaamas­savat Jehova isumak­keerfigin­nivil­luni isumak­keerfigin­nit­tar­tuusoq. Taamaat­tumik ilerasut­tuar­tariaqan­ngilatit. Danielip eq­qaaneqareersup taman­na paasivaa. Utoq­qaaner­tanit naq­qin­neqarlunilu ilerasuuteqan­ngin­nis­samut ikior­neqareerami as­sut oqilial­lal­luni misigivoq. Imalu oqar­poq: “Ilerasuuteqar­tuar­tariaqan­ngilanga. Ajor­tuliaq isumak­keer­neqarami isumak­keer­neqaq­qit­tariaqan­ngilaq. Jehovap naner­tuutigisatit peer­pai ungasis­sumul­lu pisil­lugit. Taak­ku misigeq­qin­ngisaan­nas­savatit.” Toqutsisoor­tup il­loqarfim­mi qimar­nguf­fiusumiit­tup akiniaaniar­toq an­nilaangagisariaqan­ngilaa. Tamatumun­nga as­singusumik Jehovap isumak­keerfigereer­patigut  an­nilaangagisariaqan­ngilar­put ajor­tuliar­put qaqileq­qis­sagaa taman­naluun­niit pil­lugu pil­las­sagaatigut. – Tussiaat 103:8-12 atuakkit.

15, 16. Jiisusip uter­titsis­sutitut akilium­mik akiliinera uagutsin­nul­lu palasiunera qanoq Guutip nal­lit­tuineranik up­perin­nin­nerulis­sutigaajuk?

¹⁵ Uagut Israelik­kun­nit pis­sutis­saqarluar­neruvugut Jehovap nal­lit­tuineranik up­perin­nin­nis­satsin­nik. Paulusi aliasul­luni Jehovamut naalal­luin­narsin­naanani al­lareerlugu ima nangip­poq: “Guutili qujanarsili Jiisusi-Kristusik­kut Naalak­katsigut!” (Rom 7:25) Suna pivaa? Paulusi pileris­susipiloqar­nerminik akiugaqaraluarluni ajor­tuliorsimagaluarlunilu peq­qis­simisimavoq. Taamaat­tumik Jiisusip uter­titsis­sutitut pil­liutaa aq­qutigalugu Jehovamit isumak­keerfigineqar­nini up­peril­luin­nar­paa. Jiisusip uter­titsis­sutitut akiliut akilereermagu ilerasuuteqar­natalu qamuuna eq­qis­sisimasin­naavugut. (Hebr 9:13, 14) Palasiunit­ta Jiisusip naas­saan­ngitsumik inuusup qin­nus­sinermigut “naam­mal­luin­nar­tumik an­naas­sin­naavai aq­qutigaluni Guutimut pisut”. (Hebr 7:24, 25) Itsaq palasiunerup Israelik­kut Jehovamit isumak­keerfigineqar­nis­samin­nik qularin­nin­ngin­nis­saan­nut ikior­pai. Jiisusi palasiunerigatsigu ‘nal­lit­tor­neqar­nit­ta pif­fis­sarlu eq­qorlugu ikior­neqaatis­satsin­nik saam­maan­neqar­nit­ta’ up­peril­luin­nar­nis­saan­nut pis­sutis­saqarluar­neruvugut. – Hebr 4:15, 16.

¹⁶ Tas­sa Jehova qimar­nguf­figiumal­lugu Jiisusip pil­liutaa up­perisariaqar­par­put. Inuit tamarmik uter­titsis­sum­mik iluaqutigin­nis­sin­naaneran­nik paasin­nin­neq naam­man­ngilaq. Up­perisariaqar­pat uter­titsis­sut ilinnut iluaqutaasoq. (Gal 2:20, 21) Up­perisariaqar­pat Jehovap uter­titsis­sut tun­ngavigalugu illit ajor­tuliatit isumak­keerai. Up­perisariaqar­pat uter­titsis­sut iluaqutigalugu illit naas­saan­ngitsumik inuuler­nis­sat neriuutigisin­naagit. Jiisusip pil­liutaa tas­saavoq Jehovap ilinnut tunis­sutaa!

17. Sooq Jehova qimar­nguf­figerusup­piuk?

¹⁷ Il­loqarfiit qimar­nguf­fiusut Jehovap nal­lit­tuineranik paasin­nin­nis­satsin­nut iluaqutaap­put. Aaq­qis­suus­saq Guutimeersoq taman­na ilin­niarfigalugu paasivar­put inuuneq il­ler­nar­tuusoq. Aam­ma paasivar­put utoq­qaaner­tat qanoq ikiorsin­naagaatigut, ilumoorluni peq­qis­simineq qanoq paasisariaqar­toq, qanorlu up­peril­luin­narsin­naagip­put Jehovap isumak­keerfigigaatigut. Jehova qimar­nguf­figaajuk? Al­lamimi toq­qis­sivis­saqan­ngilaq! (Tuss 91:1, 2) Al­laaserisami tul­liut­tumi paasis­savar­put il­loqarfiit qimar­nguf­fiusut Jehovamik, naaper­tuil­luar­ner­paajusumik nal­lit­tuiner­paajusumil­lu, ilaarsinis­satsin­nut qanoq iluaqutigisin­naagivut.