ATUAQQISSAAGASSAQ 48
‘Aallarnigarsi inaarniarsiuk’
“Aallarniiginnarnasi ... [aallarnigarsi] inaarniarsiuk.” – 2 KOR 8:10, 11.
ERINARSUUT 88 Ilinniartinnga aqqutigeqqusannik
QILANAARTUUT *
1. Jehovap susinnaatippaatigut?
JEHOVAP qanoq inuussanerluta nammineq aalajangiisinnaatippaatigut. Aalajangiilluarnissamut ilinniartittarpaatigut iluarisaanillu aalajangiigaangatta piviusunngortinnissaanut ikiortarluta. (Tuss 119:173) Ilisimassuseq Biibilimeersoq aallaavigigutsigu ajunnginnerusunik aalajangiisassaagut. – Hebr 5:14.
2. Aalajangeereerluta suna ajornartissinnaavarput?
2 Silatusaartumik aalajangiigaluarluta aallarnikkatta naammassinissaa ajornartissinnaavarput. Assersuuteqariarta: Qatanngut inuusuttoq Biibili tamaat atuarniarlugu aalajangerpoq. Sapaatit-akunneri siulliit ingerlalluarsinnarluni taamaatippoq. Qatanngut alla pionerinngorniarluni aalajangerpoq, pionerisulli aallartinnissani kinguarteqattaarpaa. Utoqqaanertaqatigiit isumaqatigiillutik aalajangerput ilagiinniittut paarsisutut pulaakulanerusalerniarlugit, qaammaterpassuilli ingerlareersut suli aalajangikkaminnik piviusunngortitsinngillat. Assersuusiarineqartut assigiinngikkaluarlutik assigiissuteqarput. Aalajangikkatik naapertorlugit iliuuseqanngillat. Korinthimi kristumiut siulliit assingusumik unamminiarnartitaqarput. Qanoq ilinniarfigisinnaanerlugit sammeriartigu.
3. Korinthimiut qanoq aalajangiippat, susoqarpali?
3 Ukiup 55-ip nalaani Korinthimiut pingaarutilimmik aalajangiipput. Tusarpaat Jerusalemimi Judæamilu qatanngutit atugarliorlutillu pissakilliortut aamma ilagiit allamiittut ikiuiniarlutik aningaasanik katersuisut. Ajunngisaarusukkamik tukkortuugamillu aalajangerput namminneq aningaasanik katersuiniarlutik, Paulusilu aperaat qanoq iliorsinnaanerlutik. Taassuma 1 Kor 16:1; 2 Kor 8:6) Qaammatialuilli qaangiummata Korinthimiut aalajangiinertik naapertorlugu iliorsimanngitsut Paulusip paasivaa. Tamatuma kingunerisaanik taakkua Jerusalemimut tunissutiginiagaasa ilagiit allat tunissutissaannut ilanngunneqarnissaat ilimanarunnaarpoq. – 2 Kor 9:4, 5.
ilagiit allakkatigut ilitsersorpai Titusilu aningaasanik katersuisussatut toqqarlugu. (4. Korinthimiunut allakkat aappaat 8:7, 10, 11-milu ersersinneqartutut Paulusip ilagiit sumik kaammattorpai?
4 Korinthimiut ajunngitsumik aalajangiipput, Paulusillu upperluartuunerat tukkortoorusunnerallu pillugit nersualaarpai. Taamaattorli aamma aallarnikkamik inaarnissaanut kaammattortariaqarpai. (2 Korinthimiut 8:7, 10, 11 atuakkit). Tamatumani paasivarput allaat kristumiut aalajaatsut aalajangikkamik piviusunngortinnissaat ajornakusoortissinnaagaat.
5. Apeqqutit suut akissutissarsissavavut?
5 Korinthimiut assigalugit aalajangikkatta piviusunngortinnissaat ajornakusoortissinnaavarput. Naammalluinnanngitsuugattami kinguartitsisoortarpugut. Aamma naatsorsuutiginngisamik pisoqarnera pissutigalugu aalajangikkatsitut iliornissarput ajornakusuulersinnaavoq. (Jaak 4:13, 14; Rom 7:18) Aalajangersimasarput allanngortissanerlugu qanoq paasiniarsinnaavarput? Qanorlu aallarnikkatta naammassinissaa qulakkeersinnaavarput?
AALAJANGIINNGINNERMI
6. Aalajangikkavut sooq allanngortittariaqarsinnaavavut?
6 Aalajangikkatta pingaarutillit ilaat allanngortikkusunnavianngilavut. Assersuutigalugu Jehovamut kiffartortuarnissarput aappatsinnullu ilumoorfiginnittuarnissarput aalajangiusimavavut. (Matt 16:24; 19:6) Aalajangikkavulli allat allanngortittariaqarsinnaavavut. Sooq? Pissutsit allanngortarmata. Ajunnginnerpaamik aalajangeeqqulluta suut iluaqutigisinnaavavut?
7. Suna qinnutigisariaqarparput, aamma sooq?
7 Ilisimassuseq qinnutigiuk. Jehovap Jaaku isumassarsisillugu ima allatsippaa: ‘Ilisimassutsimigut inorsartumik ilaqarussi taassuma qinnutigissavaa ilisimassuseq Guutimit naammalluinnartunik tamanut tunisisartumit.’ (Jaak 1:5) Tamatta arlaatigut ‘ilisimassutsikkut inorsartarpugut’. Taamaattumik aalajangiinialeraangavit aalajangikkallu allanngortissanerlugu naliliinialeraangavit Jehovamut ikioqqusarit. Taava taassuma silatusaartumik aalajangiinissannut ikiussavaatit.
8. Aalajangiinnginnitsinni qanoq paasissutissarsiortariaqarpugut?
8 Peqqissaartumik paasissutissarsiorit. Biibilimik misissuigit, Biibililersaarutit Siulersuisoqatigiit saqqummersitaat atuakkit inuillu tatigisatit oqaloqatigalugit. (Uss 20:18) Allamik suliffittaassanerlutit, allamut nuussanerlutit Jehovamullu kiffartorninni iluaqutigisinnaasannik qanoq ilinniagaqassanerlutit aalajangiinnginninni paasissutissarsiornissat pingaaruteqarluinnarpoq.
9. Unneqqarissuunerput qanoq iluaqutigissavarput?
9 Pissutiginiakkatit paasiniakkit. Jehovap pissutiginiakkavut pingaartippai. (Uss 16:2) Sutigut tamatigut unneqqarissuunissarput kissaatigaa. Taamaattumik aalajangiinialeraangatta pissutiginiakkatsinnut tunngatillugu imminut allanullu unneqqarikkusuppugut. Taamaanngikkuttami aalajangikkatta aalajangiusimanissaa ajornartissinnaavarput. Assersuutigalugu qatanngut inuusuttoq pionerinngorpoq. Piffissalli ingerlanerani pionerisut nalunaaquttap-akunneri piumasaqaataasut angujuminaatsilerpai. Allaat oqaluussisarnini nuannarerpiarunnaarpaa. Imaassinnaavoq eqqarsarsimasoq pingaarnertut Jehovamik nuannaartitserusunnini pissutigalugu pionerinngorluni. Ilumoortumilli allamik pissuteqarpa? Angajoqqaani allalluunniit nuannaartikkumallugit pionerinngorpa?
10. Allannguinissamut suut pisariaqarpat?
10 Biibilimik atuaqqissaartartoq pujortartarunnaarnissaminik aalajangertoq takorlooruk. Sapaatit-akunnialunni ilungersorluni pujortarnaveersaareerluni pujortaqqittoorpoq. Jehovamulli asanninnini taassumanngalu iluarisaarusunnini kajumississutigalugit kiisami pujortartarunnaarpoq. – Kol 1:10; 3:23.
11. Sooq aalajangersimasumik anguniagaqartariaqarpit?
11 Aalajangersimasumik anguniagaqarit. Aalajangersimasumik anguniagaqaruit aalajangikkavit piviusunngortinnissaa ajornannginnerussaaq. Assersuutigalugu immaqa aalajangerputit Biibili atuarnerusalerniarlugu. Aalajangersimasumilli pilersaaruteqanngikkuit angorusutat angunngitsoorsinnaavat. * Aamma imaassinnaavoq utoqqaanertat aalajangertut akulikinnerusumik paarsisutut pulaartalerniarlutik. Piffissarli ingerlavoq, aalajangigartillu suli piviusunngortinngilaat. Iluatsissagunik imminut ima aperisinnaapput: “Qatanngutit qiimmassarneqarnissaminnik pisariaqartitsisut kikkuunerat paasereerparput? Pulaarnissarput ullulereerparput?”
12. Sunissaq pisariaqalersinnaava, aamma sooq?
12 Piviusorsiortuugit. Amerlasuunik iliuuseqarusuttarpugut, piffissarli, aningaasat nukivullu eqqarsaatigalugit tamaasa iliuuserisinnaanngilavut. Taamaattumik piviusorsiortuullutillu ingasaassinianngitsuugit. Pisariaqaraangat aalajangersimasat angusinnaanngisat allanngortittariaqarsinnaavat. (Oqal 3:1, 6) Taavami misissuereerlutit aalajangikkat allanngortikkukku misigalutillu maanna piviusunngortissinnaallugu? Aallarnikkavit inaarnissaanut iliuuserisassat iluaqutigisinnaasatit tallimat sammeriartigit.
AALAJANGEEREERNERMI
13. Aalajangikkavit piviusunngortinnissaanut qanoq nukissaqalersinnaavit?
13 Nukissaqarnissat qinnutigiuk. Guutip aalajangikkannik piviusunngortitseqqullutit ‘naammassisaqartissinnaavaatit’. (Fil 2:13) Taamaattumik nukissannik pisariaqartitannik tuneqqullutit anersaaq illernartoq Jehovamut qinnutigiuk. Misigigaluaruit qinnutit suli akineqanngitsoq qinujuarit. Jiisusimi ima oqarpoq: “Qinujuaannaritsi, [anersaamik illernartumik] tunineqassaasi taava.” – Luk 11:9, 13, NW.
14. Aalajangikkavit naammassinissaanut Ussatit 21:5-imi najoqqutassiaq qanoq iluaqutigisinnaaviuk?
14 Pilersaarusiorit. (Ussatit 21:5 atuaruk). Suliaq aallartitat naammassiumallugu pilersaarusiortariaqarputit pilersaarusiallu maleruarlugu. Aalajangikkanut tunngatillugu tamanna aamma ilumoorpoq. Aalajangikkat piviusunngortissinnaaqqullugu suliassatit allattukkit. Suliaq annertullunilu pisariuppat naammassiumallugu iliuuserisassartai immikkoortiterlugit pisariillisaagit. Taamaalillutit suliat minnerit naammassigaangakkit angusassanni sumut killinnersutit ersarissumik takusinnaassavat. Paulusip Korinthimiut siunnersorpai aatsaat tikikkuni katersuinialeqqunagit sapaatip-akunnerata “ulluisa siullianni” tunissutinik immikkoortitsisassasut. (1 Kor 16:2) Suliat pisariusut sulianut minnernut agguataarukkit naammassinissaat ajornannginnerussapput.
15. Pilersaarusioreernermi qanoq iliortoqarsinnaava?
15 Pilersaarusiatit allattorukkit naammassinissaat ajornannginnerussaaq. (1 Kor 14:40) Assersuutigalugu utoqqaanertaqatigiit aalajangikkaminnik allattuisussamik toqqaaqquneqartarput. Utoqqaanertap taassuma allattortarpai kina sumik suliassinneqarsimanersoq qaqugulu suliaminik naammassisaqartussaanersoq. Utoqqaanertat taamaaliortut aalajangikkaminnik piviusunngortitsinissaat ilimanarnerusarpoq. (1 Kor 9:26) Aamma illit inuuninni taamaaliorsinnaavutit. Assersuutigalugu ullormut suliassatit naammasseqqullugit tulleriiaarnissaat allattorsinnaavatit. Taamaaliornikkut aallartitat naammassiinnarnagu piffissami sivikinnerusumi suliaqarnerussaatit.
16. Aalajangikkavit piviusunngortinnissaanut suna pisariaqarpa, tamannalu Romamiut 12:11-mi qanoq erserpa?
16 Ilungersorit. Pilersaarusiaq maleruaqqullugu aallartitallu naammasseqqullugu ilungersornissaq pisariaqarpoq. (Romamiut 12:11 atuaruk). Paulusip Timotheusi kajumissaarpaa imminut nakkutigeqqullugu ilinniartitsillaqqinnerulernissanilu sulissutigeqqullugu. Siunnersuut tamanna aamma anersaakkut anguniagassanut allanut atorsinnaavoq. – 1 Tim 4:13, 16.
17. Efesosimiut 5:15, 16-imilu (NW) allassimasut aalajangikkatta piviusunngortinnissaanut qanoq iluaqutigisinnaavavut?
17 Piffissaq silatusaarlutit atoruk. (Efesosimiut 5:15, 16, NW atuakkit). * Qaqugu aalajangikkat naammassissanerlugu piffissaliigit allanngortinnagulu. Iliuuseqarnissamut piffissaq eqqoqqinnaartoq utaqqeqinagu, suliaqanngitsooqinaatit. (Oqal 11:4) Pingaarnerusut piffissaqarfigalugillu nukissaqarfiginiassagakkit pingaannginnerusut allamut saasaatiginaveersaakkit. (Fil 1:10) Ajornanngippat akornusersornikinnerpaaffiusumik piffissaliigit. Allat paasitikkit eqqarsaatiginneqqissaarnissamut piffissaqarnissat pisariaqartillugu. Immaqa mobilit qamissinnaavat aamma e-mailit internetikkullu attaveqaqatigiittarfiit takunngikkallarlugit.
18-19. Ajornaraluarpalluunniit aalajangikkavit naammassinissaanut suna iluaqutigisinnaaviuk?
18 Kingunissai eqqarsaatigikkit. Aalajangikkavit kinguneqarluarnissaa angalanermi apuuffissamut assersuunneqarsinnaavoq. Apuuffissaq angorusukkukku angalaannassaatit, aamma allakkoortariaqalissagaluaruit. Tamatumunnga assingusumik aalajangikkatta kingunissai nuannersut eqqarsaatiginerugutsigit ajornaraluarpalluunniit tunniutiinnapallassangilagut. – Gal 6:9.
19 Ajunngitsunik aalajangiinissaq sapernarsinnaavoq taakkuninngalu piviusunngortitsinissaq unamminiarnarluni. Jehovalli ikiuineratigut aallarnikkavit naammassinissaanut pisariaqartumik ilisimassuseqarlutillu nukissaqarsinnaavutit.
ERINARSUUT 54 “Aajuna aqqusineq”
^ imm. 5 Aalajangersimasavit ilaat peqqissimissutigaagit? Ajunngitsumilluunniit aalajangiinissat tamatumalu piviusunngortinnissaa ilaannikkut ajornartittarpiuk? Unamminiarnartut taakkua qaangernissaannut aallarnikkavillu naammassinissaanut allaaserisaq iluaqutigissavat.
^ imm. 11 Biibilimik atuarnissamut pilersaarusiorninni “Biibilimik atuarnissamut pilersaarut” jw.org®-imiittoq iluaqutigisinnaavat.
^ imm. 17 Efesosimiut 5:15, 16, NW: “Taamaattumik eqqumaffigeqqissaarsiuk silatuutut, sianiitsutuunngitsoq, inooriaaseqarnissarsi piffissassinnik atorluaanissigut, ullummi ajortuupput.”