1-2. Siun­nersuut Us­satit 4:25-mi atuar­neqarsin­naasoq qanoq maleruarsin­naavar­put? As­sersuuteqarit.

QATAN­NGUTIT­TA misigisimasaat uku takorluuk­kit: Ar­nap utoq­qaap inuunermini aq­qusaarsimasani nuan­nersut eq­qarsaatigai. Naak maan­na unam­miniagas­saqar­nerugaluarluni Jehovamut kif­far­tor­nermini suli tamaviaar­poq. (1 Kor 15:58) Ilaqut­tami ikin­ngutimilu paratiisimi najuleq­qin­nis­saat ul­lut tamaasa qilanaarisar­paa. Ar­naq al­la up­peqatiminit narrujuum­misin­neqarsimavoq, narrutsas­simajuan­ngilarli. (Kol 3:13) Angutip ajor­tuliarisimasani puiorsiman­ngilai, Jehovamul­li aalajaat­tuar­nis­sani maan­na ilungersuutigaa. – Tuss 51:12.

² Kristumiut taak­ku tamarmik inuunermin­ni nalaas­simasatik puiorsiman­ngik­kaluarlugit eq­qarsaatigiuan­ngilaat. Paarlat­tuanik ‘isitik siumuin­naq sam­mitil­lugit’ siunis­saq eq­qarsaatigiuar­paat. – Ussatit 4:25 atuaruk.

3. Sooq siumut isigiuar­tariaqar­pugut?

³ Sooq siumut isigiuar­nis­saq pingaaruteqar­pa? Kinaluun­niit tunum­mut qiviaqat­taar­toq narlumuin­naq ingerlasin­naan­ngilaq. Tamatumun­nga as­singusumik, inuunitsin­ni nalaas­simasavut eq­qarsaatigiuarutsigit Jehovamut kif­far­tor­nitsin­ni siumukarsin­naan­ngilagut. – Luk 9:62.

4. Al­laaserisami matumani suut sam­mineqas­sap­pat?

⁴ Inuunitsin­ni nalaas­simasavut eq­qarsaatigiualerumanagit mianersorfis­sat pingasut al­laaserisami matumani sam­mis­savavut. Taak­ku tas­saap­put: (1) uteq­qianeq, (2) narrutsaq­qajuar­neq, aam­ma (3) im­minut ingasat­tumik eq­qar­tuun­neq. ‘Kingunitsin­niit­tut’ pin­nagit ‘siunitsin­niit­tul­li’ isigiuar­nis­saan­nut  Biibilimi najoq­qutas­siat qanoq iluaqutigisin­naanerlugit paasis­savar­put. – Fil 3:13.

5. Oqaluus­sisar­tup oqaasii 7:10-mi qanoq mianersoq­quneqar­pugut?

⁵ Oqaluussisartup oqaasii 7:10 atuaruk. Inuunitsin­ni nalaas­simasatsin­nik eq­qarsaatigin­nin­neq ajor­tuugami? Naamik, nuan­nersunim­mi eq­qaaman­nis­sin­naaneq Jehovamit tunis­sutaavoq. Taamaat­torli Oqaluus­sisar­tup oqaasii 7:10-mi ima eq­qarsaleq­qunata mianersoq­quneqar­pugut: “Sunaana pis­sutigalugu suut tamarmik itsaq pitsaanerusut?” Taamaat­tumik maan­na atuk­kavut sior­natigut atugarisimasatsin­nut sanil­liun­naveersaar­tariaqar­pavut eq­qarsarluta maan­na suut tamarmik ajor­nerusut. Versi taan­na aam­ma ima nutser­neqarsimavoq: “Ima aperin­ngisaan­narit: ‘Sooruna itsaq ul­lut taama pitsaanerutigisut?’ Taama aperineq silatusaar­nerun­ngilaq.”

6. Sior­natigut atugarisimasatsin­nik eq­qarsaatigin­nit­tuar­neq sooq silatusaar­nerun­ngila? As­sersuuteqarit.

⁶ Sior­natigut atugarisimasatsin­nik eq­qarsaatigin­nit­tuar­neq sooq silatusaar­nerun­ngila? Nuan­niitsor­tai puiorlugit nuan­nersor­tai kisiisa eq­qaamalersoorsin­naagatsigit. Itsaq Israelik­kut as­sersuutigisin­naavavut. Egyptenimiit aniguereerlutik qanoq atugarliorsimatiginer­tik puiorlugu nerisas­sat mamar­tut eq­qaamaneruaat. Qanoq oqar­nersut maluginiaruk: “Takorloor­naqaat Egyptenimiik­kal­larat­ta aalisagar­tugarisar­tak­kavut akeqan­ngitsumik pis­sarsiarisar­tak­kavut. Takorloor­naqaat agurkit, melonit, porrit uanitsul­lu.” (4 Mos 11:5) Ilumul­li “akeqan­ngitsumik” tamak­kunin­nga nerisarsimap­pat? Naamik, akisunaar­paat! Taamanimi naal­liul­lutik Egyptenimi inus­siaap­put. (2 Mos 1:13, 14; 3:6-9) Atugarliuutigisimasatik puiupal­lal­lugit Egyptenimi inuuner­tik maqaasiler­paat. Sooruna? Jehovap ajun­ngitsuliai pingaar­tin­ngin­namik­kit. Taman­nalu Jehovap nuan­narin­ngil­luin­nar­paa. – 4 Mos 11:10.

7. Qatan­ngutip ar­nap uteq­qianaveersaar­nis­saminut suna iluaqutigaa?

⁷ Qanoq uteq­qianaveersaarsin­naavugut? Qatan­ngut ar­naq ilin­niarfigisin­naavar­put. Taan­na  1945-mi Betelimi Brooklynimiit­tumi kif­far­tuler­poq. Ukiualuit qaangium­mata Betelimi kif­far­toqatiminik uinip­poq, ukior­pas­suar­nilu kif­far­toqatigiip­put. 1976-imili uia nap­parsimaler­poq. Uiata paasigamiuk toqus­si qanil­lisoq nuliani ima oqarfigaa: “Aap­pariil­luar­nikooqaagut. Inup­pas­suit taamatut misigisaqar­nikuun­ngil­lat.” Imalu kajumis­saar­paa: “Misigisimasavut nuan­nersut puior­navian­ngilatit, eq­qarsaatigival­laar­niaqinagil­li. Pif­fis­sap ingerlanerani aliasup­pal­laarun­naarumaar­putit. Nikal­lor­niaqinak, im­minul­lu nal­liginiaqinak. Jehovamul­li kif­far­tor­nitsin­ni misigisimasavut nuan­nersut qujamasuutigisak­kit. ... Nuan­nersunim­mi eq­qaaman­nis­sin­naaneq Jehovamit tunis­sutaavoq.” Siun­nersuutitsialaangaarami, ilaa?

8. Qatan­ngutit­ta uimi siun­nersuutaa qanoq iluaqutigaa?

⁸ Qatan­ngutit­ta uimi siun­nersuutaa maleruar­paa. 92-inik ukioqarluni toqunis­sami tungaanut Jehovamut aalajaal­luni kif­far­tor­poq. Toqus­si ukiualun­nik sioq­qul­lugu ima oqar­poq: “Ukiut 63-it pif­fis­saq tamaat kif­far­toreerlunga oqarsin­naavunga ilumut pil­luarlunga inuusimal­lunga.” Sooq? Ima nas­suiaavoq: “Jehovap in­nut­taanut ilaagat­ta pil­luarsin­naavugut, nalun­ngilar­pum­mi Pin­ngor­titsiser­put, Guuti ilumoor­tutuaq Jehova, qatan­ngutigiis­suar­tut tamat­ta nunarsuarmi paratiisiusumi naas­saan­ngitsumik kif­far­torfigiumaarlutigu.” * Siunis­samik eq­qarsaatigin­nit­tuar­nis­samut maligas­saal­luangaarami!

9. Mosesimik al­lak­kat pingajui 19:18-imi peq­qus­sutigineqar­tutut isumak­keerfigin­nin­nis­sar­put ingam­mik qaquguk­kut saper­nar­tis­sin­naavar­put?

⁹ 3 Mosesi 19:18 atuaruk. Up­peqatitsin­nit, ikin­ngutigil­luak­katsin­nit ilaqut­tatsin­nil­luun­niit ajual­latsin­neqarut­ta isumak­keerfigin­nin­nis­sar­put saper­nar­nerutis­sin­naavar­put. As­sersuutigalugu, qatan­ngut ar­naq up­peqatiminit aningaasanik til­lis­simanerar­neqar­poq.  Kingusin­nerusuk­kut up­peqataata taas­suma kuk­kul­luni un­nerluutigin­nis­simanini pil­lugu utoq­qatserfigaa. Qatan­ngutil­li un­nerluutigineqar­nini kamaatigalugulu eq­qarsaatigiuar­paa. Il­lit taamatut misiginikuuit? Im­maqa taamator­piaq misigisaqar­nikuun­ngik­kaluarluta narrutsaq­qanitsin­ni isumak­keerfigin­nin­nis­saq saper­nar­tis­simasin­naavar­put.

10. Narrutsaq­qagaangat­ta suna eq­qarsaatigisin­naavar­put?

¹⁰ Narrutsaq­qagaangat­ta suna eq­qarsaatigisin­naavar­put? Eq­qaamajuar­tariaqar­par­put Jehovap suut tamaasa takusin­naagai, al­laat naaper­tuil­luan­ngitsumik pineqar­tar­nivut. (Hebr 4:13) An­nikil­lioraangat­ta misigin­neqatigisar­paatigut. (Es 63:9) Neriorsuivorlu naaper­tuil­luan­ngitsulior­nerit kingunerisaan­nik an­nikil­liuutivut tamaasa peerumaarlugit. – Saqq 21:3, 4.

11. Isumak­keerfigin­nin­ner­put qanoq iluaqutigisar­par­put?

¹¹ Eq­qaamas­savar­put­taaq al­lanik isumak­keerfigin­nik­kaangat­ta nam­mineq iluaqutigisarip­put. Qatan­ngutit­ta eq­qaaneqareersup taman­na paasiler­paa. Qatan­ngut im­minerminik til­lin­neraasoq isumak­keerfigisin­naaler­paa kamaak­kun­naarlugulu. Paasivaa al­lat isumak­keerfigigaangatsigit aam­ma Jehovap isumak­keerfigisaraatigut. (Mat­t. 6:14) Nalun­ngilaa qatan­ngutimi kuk­kusumik iliorfigisimagaani, isumak­keerfiginiarluguli aalajanger­poq. Tamatuma kingunerisaanik qatan­nguter­put nuan­naar­neruler­poq Jehovamul­lu kif­far­tor­nini aal­lul­luarsin­naalerlugu.

12. Johan­nesip al­lagai siul­liit 3:19, 20-lu qanoq ilin­niarfigaavut?

¹² 1 Johannesi 3:19, 20 atuakkit. Ilaan­nik­kut im­minut eq­qar­tuuteq­qajaasar­pugut. As­sersuutigalugu qatan­ngutit ilaat sal­lusuis­sut nalugal­laramik­ku iliuuserisimasatik al­lal­lu kuisereer­nermik kingor­na kuk­kus­sutigisimasatik pil­lugit im­min­nut eq­qar­tuuteq­qajaasar­put. Amerlasuut taamatut misigisar­put. (Rom 3:23) Eq­qor­tuliorusuk­kaluarluta “tamat­ta amerlasuunik kuk­kus­suteqar­tar­pugut.” (Jaak 3:2; Rom 7:21-23) Kuk­kusimatil­luta ilerasun­neq nuan­nersuun­ngik­kaluar­toq taman­na iluaqutigisin­naavar­put. Qanoq? Al­lan­nguinis­satsin­nut kajumis­sis­sutigisin­naasaratsigu kuk­kus­sutigisimasat­talu kuk­kus­sutigeq­qin­ngin­nis­saa aalajangiusimaneruler­tarlugu. – Hebr 12:12, 13.

13. Sooq im­minut ingasat­tumik eq­qar­tuun­naveersaar­tariaqar­pugut?

¹³ Aam­mali im­minut ingasat­tumik eq­qar­tuus­sin­naasar­pugut. Kuk­kus­sutigisimasar­put peq­qis­simis­sutigereeraluarlugu Jehoval­lu isumak­keerfigereeraluaraatigut im­minut eq­qar­tuuteq­qajaasin­naasar­pugut. Taman­na ajor­tumik sun­niuteqar­tar­poq. (Tuss 31:11; 38:4, 5) Sooq? Qatan­ngut ar­naq kuk­kus­sutigisimasaminik ilerasuuteqar­tuar­toq eq­qarsaatigeriaruk. Ima oqar­poq: “Misigivunga isumak­keerfigineqarsin­naananga taamaat­tumil­lu Jehovamut kif­far­tor­nin­ni ilungersor­tariaqar­nanga.” Qatan­ngutit­ta taamatut misiginera amerlanersat­ta paasisin­naan­nguatsiar­paat. Taamaat­tumik im­minut ingasat­tumik eq­qar­tuup­pal­laaleq­qunata mianersor­tariaqar­pugut. Eq­qarsaatigiuk Jehovap ilagin­naan­nan­ngik­kaluaraatit tun­niutiin­naruit Saatani qanoq nuan­naar­tigis­sasoq. – 2 Korinthimiut 2:5-7, 11 naleq­qiuguk.

14. Qanoq nalun­ngis­sin­naavar­put Jehovap ilagin­naan­narsiman­ngik­kaatigut?

¹⁴ Taamaak­kaluar­torli suli ima eq­qarsalersoorsin­naavugut: ‘Qanoq nalun­ngis­sin­naavara Jehovap ilagin­naan­narsiman­ngik­kaanga?’ Taamatut aperineq Jehovamit isumak­keerfigineqarsin­naanermut ersiutaavoq. Napasuliaq  Alapernaarsuiffik-mi ima al­las­simasoqar­poq: “Imaas­sin­naavoq ileq­qupalaat pigiliutiin­narsimasavut pis­sutigalugit amerlasoor­pas­suariarluta naak­kiut­tar­tugut. ... Tun­niutiin­naqinal­li. Eq­qarsaqinak Jehovap isumak­keerfigisin­naan­ngisaanik ajor­tuliorsimal­lutit. Saatanip taamator­piaq eq­qarsar­tik­kusup­paatit. Isumatsaq­qanip­pit ersersip­paa ajun­ngitsuusutit Jehoval­lu isumak­keerfigisin­naagaatit. Maniguut­tuarit, aam­ma isumak­keerfigeq­qul­lutit ilerasuutaaruteq­qul­lutil­lu Guuti qin­nuigiuaruk. San­ngiif­fiit aalajangersimasoq arlaleriarlutit naak­kiuf­figisimagaluaruk­kuluun­niit meeq­qap ajor­nar­torsior­tup ataataminut ikioq­qusar­neratut ikioq­qusarit. Taava Jehovap ajun­ngingaas­sutsini pis­sutigalugu ikius­savaatit.” *

15-16. Qatan­ngutit ilaasa Jehovamit ilagin­naan­nar­neqarsiman­ngin­ner­tik qanoq up­perilersimavaat?

¹⁵ Qatan­nguter­pas­suat­ta Jehovamit ilagin­naan­nar­neqarsiman­ngin­ner­tik tup­pal­lersaatigisar­paat. As­sersuutigalugu ukiualuit matuma sior­na qatan­ngutip angutip misigisalik­kersaarut Napasuliaq Alapernaarsuiffik-mi saq­qum­mersin­neqar­toq kil­litsis­sutigaa. Al­laaserisami qatan­ngut ar­naq oqalut­tuar­poq misiginikuusani ajor­tut pis­sutigalugit Jehovamit asaneqarsin­naanini up­periuminaatsis­simal­lugu. Aam­ma Nalunaajaasun­ngoreeraluarluni ukior­pas­suar­ni taamatut misigisar­poq. Uter­titsis­sul­li eq­qarsaatigeq­qis­saaramiuk paasiler­paa ilumut Jehovap asagaani. *

¹⁶ Misigisalik­kersaarut taan­na qatan­ngutip angutip qanoq iluaqutigaa? Ima al­lap­poq: “Inuusut­tuul­lunga por­nografiimut uerinikuugama isigin­naar­tarun­naar­nis­saa sorsuutigaara. Ungasin­ngitsuk­kut nak­karfigeq­qip­para. Utoq­qaaner­tanik oqaloqateqar­punga, taak­kualu ikior­paan­nga paasitil­lunga Guutip asagaanga isumak­keerfigerusuk­kaangalu. Aam­ma ajor­nar­torsiutima qaanger­nis­saanut iliuuseqar­punga. Ilaan­nik­kul­li naleqan­ngitsutut misigisar­punga, eq­qarsarlunga Jehovap asasin­naanavian­ngik­kaanga. Misigisalik­kersaarul­li iluaqutigeqaara. Maan­na paasivara Guutimit  isumak­keerfigineqarsin­naananga eq­qarsaraangama oqar­tar­tungalusooq Jiisusip pil­liutaa ajor­tin­nik matus­susiisin­naan­ngitsoq. Al­laaserisaq taan­na toq­qor­para naleqan­ngitsutut misigileraangama atuariaan­naasar­nias­sagak­ku eq­qarsaatigeq­qis­saarlugulu.”

17. Sooq apustili Paulusi im­minut ingasat­tumik eq­qar­tuutin­ngila?

¹⁷ Apustili Paulusi as­singusumik misigisaqarsimavoq. Kristumiun­ngun­ngik­kal­larami ingasat­tumik ajor­tulior­tarsimavoq. Paulusip tamak­kua eq­qaamavai, eq­qarsaatigiuar­tan­ngilaali. (1 Tim 1:12-15) Up­peraa uter­titsis­sut Guutip tunis­sutaa iluaqutigalugu ajor­timinik isumak­keerfigineqarsin­naal­luni. (Gal 2:20) Taamaasil­luni im­minut ingasat­tumik eq­qar­tuutin­ngilaq, Jehovamul­li pitsaaner­paamik tun­nius­sinis­sani pingaar­ner­paatip­paa.

18. Al­laaserisami matumani suut paasivavut?

¹⁸ Mianersorfis­sat pingasut al­laaserisami matumani sam­minerini suut paasivavut? (1) Nuan­nersunik eq­qaaman­nis­sin­naaneq Jehovamit tunis­sutaavoq. Qanorluun­niil­li nuan­ner­tigisumik inuuneqarsimagaluarut­ta silarsuar­taas­sami inuuner­put nuan­ner­nerungaas­saaq. (2) Narrujuum­misin­neqarsin­naavugut, isumak­keerfigin­nik­kut­tali Jehovamut kif­far­tor­ner­put aal­lun­nerusin­naas­savar­put. (3) Im­minut ingasat­tumik eq­qar­tuuk­kut­ta nuan­naarun­naarsin­naavugut. Taamaat­tumik Paulusi ilaarlugu Jehovamit isumak­keerfigineqarsimaner­put up­perisariaqar­par­put.

19. Siunis­saq pil­lugu Biibilimi qanoq neriorsor­neqar­pugut?

¹⁹ Naas­saan­ngitsumik inuuler­nis­saq neriuutigaar­put. Silarsuas­sami nutaami nikal­lor­nar­tunik eq­qaamasaqar­tas­san­ngilagut, Biibilimimi ima neriorsor­neqar­pugut: “Pereersut eq­qaamaneerutis­sap­put.” (Es 65:17) Taamanik­kus­samut ilavut utoq­qalisimasut inuusus­seq­qis­sap­put. (Job 33:25) Taamaat­tumik pisimasut eq­qarsaatigiuar­nagit paratiisimi inuusin­naajumal­luta ilungersor­tuarisa!