1. Qanoq silatusaarsin­naavugut? (Timuutiusimut 2. 4:5)

 EQQIS­SIUN­NAARUTIGISATSIN­NIK pisoqaraangat Jehovamik peqatigiis­sor­taanillu ilumoorfigin­nin­ner­put misilin­neqarsin­naavoq. Qanoq tamakku qaangersin­naavagut? Silatusaarluta eqqumal­lutalu upper­nik­kut aalajaat­tariaqar­pugut. (Timuutiusimut 2. 4:5 atuaruk). Eqqis­sisimajuar­tar­nik­kut, eqqarsarluar­tar­nik­kut Jehovallu isigin­nit­taasiatut isigin­nit­taaseqar­niar­nik­kut silatusaarsin­naavugut. Taamaaliorutta eqqarsaatigut misigis­sutsitsin­nit aqun­neqas­san­ngil­lat.

2. Allaaserisami matumani suut sam­mis­savagut?

² Allaaserisap siuliani ilagiit avataanin­ngaan­niit unam­miniar­nar­tut nalaas­sin­naasagut pingasut sam­mivagut. Allaaserisami matumani ilagiit iluanni unam­miniar­nar­tut Jehovamik ilumoorfigin­nin­nitsin­nut misilin­neqaataasin­naasut pingasut eqqar­tus­savagut. (1) Uppeqam­mit ajor­tumik pineqarsimal­luta misigigaangatta, (2) perorsaatis­sin­neqaraangatta aamma (3) peqatigiif­fitsinni allan­nguiner­nut sungiuk­kuminaatsitaqaraangatta. Taamatut nalaataqaraangatta qanoq silatusaarluta Jehova peqatigiis­sor­taalu ilumoorfigiuarsin­naavagut?

3. Uppeqam­mit ajor­tumik pineqarsimal­luta misigigutta qanoq qisuariapiloorsin­naavugut?

³ Uppeqam­mit, immaqa allaat akisus­saafilim­mit soorlu utoq­qaaner­tamit, ajor­tumik pineqarsimal­lutit misiginikuuit? Ilimanar­poq  piaarinani ajual­latsit­toorsimagaatit. (Rom 3:23; Jaak 3:2) Taamaat­torli iliuusii ajual­laatigisimasin­naavatit. Immaqa pisoq eqqarsaatigingaarakku sinis­saarus­simavutit. Allaat immaqa eqqarsarsimavutit: ‘Qatan­ngut angut taama pis­susilersor­pat Guutip peqatigiif­fip­put ilumut peqatigiis­sor­tarivaa?’ Taamator­piaq Saatanip eqqarsalersik­kusup­paatigut. (Kor 2. 2:11) Taama nuan­niitsumik eqqarsarutta Jehovamit peqatigiis­sor­taanillu avis­saarsin­naavugut. Taamaat­tumik qatan­ngutitsin­nit ajor­tumik pineqarsimal­luta misigigutta qanoq silatusaarluta ajoqutigisatsin­nik eqqarsar­naveersaarsin­naavugut?

4. Juuserfi ajor­tumik pineqarami qanoq silatusaarpa, qanorlu ilin­niarfigisin­naavar­put? (Mosesimik 1. 50:19-21)

⁴ Kamaqinak. Juuserfi inuusut­tuaraal­luni qatan­ngutaasa ajor­tumik pivaat. Uumis­sor­paat ilaasa allaat toquk­kusul­lugu. (Mos 1. 37:4, 18-22) Inus­siatut tunivaat. Kingunerisaanik ukiut 13-it mis­saasa ingerlaneranni Juuserfi ajorluin­nar­tunik misilin­neqaqat­taar­poq. Juuserfi eqqarsalersin­naagaluar­poq Jehovap asan­ngik­kaani pisariaqar­titsinermilu nalaani qimas­simagaani. Juuserfili kamalin­ngilaq. Eqqis­sisimajuarluni silatusaar­poq. Qatan­ngutiminut akiniaanis­samut periarfis­saqaraluarluni asan­nin­nermik ersersitsivigalugit isumak­keerfigai. (Mos 1. 45:4, 5) Juuserfi eqqarsarluarami taamaalior­poq. Ajor­nar­torsiutini eqqarsaatiginagit Jehovap piumasaa eqqarsaatigineruaa. (Mosesimik 1. 50:19-21 atuakkit). Qanoq ilin­niarfigisin­naavar­put? Ajor­tumik pineqaruit Jehova kamaan­nagu eqqarsalis­san­ngilatit qimas­simagaatit. Qanorli piner­tusaar­nis­samut ikioraatit eqqarsaatigeq­qis­saaruk. Allanit ajor­tumik pineqaruit naam­mal­luin­nan­ngis­sutaat asan­nin­nermik matoor­niar­tak­kit. – Pet 1. 4:8.

5. Miqueas misigigami ajor­tumik pineqarsimal­luni qanoq silatusaarpa?

⁵ Utoq­qaaner­tap Miqueasimik atil­lip Amerika Kujal­lermiup misigisaa eqqarsaatigiuk. b Qatan­ngutinit akisus­saaf­filin­nit ajor­tumik pineqarsimanini ima oqalut­tuaraa: “Taama artorsaatis­sin­neqarsiman­ngisaan­nar­punga. Annilaangaqaanga. Unnuak­kut sinis­saarut­tar­punga, qanorlu iliuuseqarsin­naan­ngitsutut misigigama qiasar­punga.” Miqueasilli silatusaarluni misigis­sutsini aqun­niarsarivai. Qinukulasar­poq, anersaamik iller­nar­tumik piner­tusaar­nis­samullu nukis­samik tuneq­qul­luni Jehova qin­nuigisar­paa. Aamma Biibililersaarutitsinni iluaqutigisin­naasaminik misis­suisar­poq. Qanoq ilin­niarfigisin­naavar­put? Misigiguit qatan­ngum­mit angum­mit arnamil­luun­niit ajor­tumik pineqarlutit eqqis­sisimajuarlutillu misigis­sutsitit nikal­lor­nar­tut aqun­niarsarik­kit. Immaqa naluat suut pis­sutigalugit qatan­ngut taama oqar­nersoq iliuuseqar­nersorluun­niit. Taamaat­tumik qatan­ngutip taas­suma isigin­nit­taasia paasisin­naaq­qul­lugu Jehovamut qinunik­kut ikioq­qugit. Taamaalior­nerit uppeqativit ajor­tumik siuner­taqarani kuk­kusoorsimaneranik isum­mer­nis­samut isumak­keerfiginis­saanullu iluaqutigisin­naavat. (Uss 19:11) Eqqaamajuk Jehovap atuk­katit ilisimagai piner­tusaaq­qul­lutillu pisariaqar­titan­nik nakus­satsis­sagaatit. – Nal 2. 16:9; Oqal 5:7.

6. Sooq pingaaruteqarpa paasis­sal­lugu Jehovap asagamisigut perorsaatis­sit­taraatigut? (Hebræerit 12:5, 6, 11)

⁶ Perorsaatis­sin­neqar­neq misigis­sutsik­kut anner­narsin­naavoq. Anner­nar­tuali kisiat isiginiarutsigu isumaqalersin­naavugut perorsaatis­sin­neqar­ner­put naaper­tuil­luar­tuunanilu naleq­qun­nanilu sak­kor­tual­laar­toq. Taava  pingaaruteqarluin­nar­toq paasin­ngitsuus­savar­put, tassa Jehovap asagamisigut perorsaatis­sit­taraatigut. (Hebræerit 12:5, 6, 11 atuakkit). Misigis­sutsitsin­nillu aqun­neqarutta Saatanip saas­sus­sinis­saa periarfis­sis­savar­put. Taas­sumami kis­saatigaa perorsaatis­sin­neqar­ner­put akueris­san­ngik­kip­put, ajor­nerusumillu Jehovamit ilagiin­niillu ungasil­lis­sasugut. Perorsaatis­sin­neqarsimaguit qanoq silatusaarsin­naavit?

7. (a) Assilis­sani takutin­neqar­tutut Petrusi perorsaatis­sin­neqar­nerminik akuersereer­nermi kingorna qanoq Jehovamit ator­neqarluarpa? (b) Petrusi qanoq ilin­niarfigaajuk?

⁷ Perorsaatissinneqarnerit akueriuk pisariaqartumillu allannguillutit. Jiisusip ataasiaan­narani apustilit allat najuutsil­lugit Petrusi naq­qip­paa. (Mak 8:33; Luk 22:31-34) Tamanna Petrusip peq­qusiileqilis­sutigisin­naagaluarlugu Jiisusi ilumoorfigiuar­paa. Perorsaatis­sin­neqar­nini akueralugulu kuk­kus­sutini ilin­niutigai. Petrusi ilumoorfigin­nik­kami Jehovamit akis­sarsisin­neqarluni ilagiinni pingaarutilin­nik pisin­naatitaaf­filer­neqar­poq. (Joh 21:15-17; ApS 10:24-33; Pet 1. 1:1) Petrusi qanoq ilin­niarfigisin­naavar­put? Perorsaatis­sin­neqar­nermi peq­qusiileqiner­put eqqarsaatigival­laar­nagu perorsaatis­sin­neqar­ner­put akuerigutsigu pisariaqar­tunillu allan­nguil­luta nam­mineq iluaqutigiin­nar­nagu aamma allat iluaqutigis­savaat. Taamaaliorutta Jehovamut qatan­ngutitsin­nullu iluaqutaal­luar­nerulis­saagut.

8-9. Ber­nardo perorsaatis­sin­neqareerami aal­laq­qaam­mut qanoq misigiva, qanorli eqqor­tumik isigin­nit­taaseqalerpa?

⁸ Mozambiquemi qatan­ngutip angutip, Ber­nardop, misigisaa eqqarsaatigiuk. Utoq­qaaner­taajun­naarsin­neqarami aal­laq­qaam­mut misigis­sutsini pil­lugit ima oqalut­tuar­poq: “Perorsaatis­sin­neqar­nera nuan­narin­ngin­nakku ajual­lap­punga.” Ilagiin­niit­tunit allanit qanoq isumaqarfigineqas­sanerluni isumakuluutigaa. Ima oqar­poq: “Aatsaat qaam­matialuit qaangium­mata perorsaatis­sin­neqar­nin­nut eqqor­tumik isigin­nit­taaseqalerlungalu Jehova peqatigiis­sor­taalu tatigeq­qiler­pakka.” Ber­nardo qanoq eqqor­tumik isigin­nit­taaseqalerpa?

⁹ Ber­nardop eqqarsar­tariaatsini allan­ngor­tip­paa. Ima nas­suiaavoq: “Utoq­qaaner­tatut kif­far­toral­larama allat Jehovap perorsaatis­siineranut eqqor­tumik isigin­nit­taaseqaleq­qul­lugit  Hebræerit 12:7 ator­tar­para. Maanna imminut aperivunga: ‘Kik­kut allas­simaf­fik taanna malit­tariaqar­paat?’ Jehovap kif­faasa tamarmik – aamma uanga.” Taava Ber­nardo aamma allamik iliuuseqarluni Jehovamik peqatigiis­sor­taanillu tatigin­neq­qiler­poq. Biibilimik atuar­nerusaler­poq atuak­kamilu eqqarsaatigeq­qis­saar­nis­saat pif­fis­saqarfiginerulerlugu. Suli qatan­ngutimi qanoq isumaqarfigineraanni isumakuluutigigaluarlugu oqaluus­seqatigisar­pai ataatsimiin­ner­nilu akisarluni. Pif­fis­sap ingerlanerani Ber­nardo utoq­qaaner­tan­ngoq­qip­poq. Illit Ber­nardotut perorsaatis­sin­neqarsimaguit peq­qusiileqinerit eqqarsaatigival­laar­nagu perorsaatis­sin­neqar­nerit akueriuk pisariaqar­tunillu allan­nguil­lutit. (Uss 8:33; 22:4) Taamaalioruit qularin­ngis­sin­naavat Jehovap imminik peqatigiis­sor­taminillu ilumoorfigin­nin­nerit pil­lugu akis­sarsisis­sagaatit.

10. Israalik­kut nalaanni allan­nguineq suna angutit ilaasa ilumoorfigin­nin­neran­nut misilin­neqaataasimasin­naava?

¹⁰ Peqatigiif­fitsinni allan­nguinerit ilumoorfigin­nin­nitsin­nut misilin­neqaataasin­naap­put. Mianersun­ngik­kutta allaat taakku pis­sutigalugit Jehovamut aalajaak­kun­naarsin­naavugut. Israalik­kut nalaanni pis­sutsit qanoq allan­ngor­tut eqqarsaatigeriaruk. Inatsisinik Moorsisik­kut Jehovamit tunineqar­nerat sioq­qul­lugu ilaqutariinni ittuusut palasit suliarisas­saat suliarisar­paat. Pil­liivilior­tar­put ilaqut­tatillu sin­nerlugit Jehovamut pil­liuteqar­tarlutik. (Mos 1. 8:20, 21; 12:7; 26:25; 35:1, 6, 7; Job 1:5) Moorsisilli inatsisai atuutilersin­neqarmata ilaqutariinni ittuusut taama akisus­saaf­feqarun­naar­put. Aaron­nip ilaqutaaneersut palasitut pil­liisar­tus­satut Jehovap toq­qar­pai. Taamanimiilli ilaqutariinni ittuusoq Aaron­nip kinguaarin­ngisaa palasitut suliaqaleruni toqumik pil­lar­neqarsin­naavoq. c (Mos 3. 17:3-6, 8, 9) Allan­nguisoqarmat Korap, Datanip Abiramip angutillu qul­lersaasut 250-it Moorsisimut Aaron­nimullu pikitsitsineran­nut pis­sutaaqataasimanerpa? (Mos 4. 16:1-3) Tamanna qulak­keerlugu ilisiman­ngik­kaluarlugu nalun­ngilar­put Korap taas­sumun­ngalu ilan­ngut­tut Jehova ilumoorfigin­ngik­kaat. Peqatigiif­fitsinni allan­nguinerit ilumoorfigin­nin­nin­nut misilin­neqaataap­pata susin­naavit?

11. Kehatik­kut qanoq ilin­niarfigisin­naavagut?

¹¹ Peqatigiiffitsinni allannguisoqaraangat tapersersuisarit. Inoqajuitsumi angalanerminni Kehatik­kut naggueqatigiin­nit Levikun­neersut immik­kut ittumik sulias­sin­neqar­put. Israalik­kut tam­maarsimaf­fim­mut allamukaraangata Kehatik­kut ilaasa angerutsip illerfia inuit sior­nanni ingerlat­tar­tus­saavaat. (Mos 4. 3:29, 31; 10:33; Jos 3:2-4) Tamanna immik­kut pisin­naatitaaf­fiuvoq! Nunamili neriorsuutigisami najugaqalermata pis­sutsit allan­ngor­put. Angerutsip illerfia nuun­neqaqat­taarun­naar­poq. Saalumuup kun­ngiunerata nalaani Kehatik­kut ilaat erinarsor­tar­tus­satut, isaaf­fin­nik paarsisus­satut toq­qorsivin­nillu paarsisus­satut sulias­sin­neqar­put. (Nal 1. 6:16-18; 26:1, 24) Sior­natigut immik­kut ittumik sulias­sin­neqarsimaner­tik pis­sutigalugu maanna naam­magit­taal­lior­neran­nik imaluun­niit nuimanerusumik sulias­sin­neqarusun­neran­nik allas­simasoqan­ngilaq. Qanoq ilin­niarfigisin­naavagut? Jehovap peqatigiis­sor­taani allan­nguinerit, sulias­sin­neqar­nin­nut sun­niuteqas­sagaluar­pataluun­niit, uum­matit tamak­kerlugu tapersersor­tak­kit. Qanorluun­niit sulias­sin­neqaraluaruit nuan­naarutigisaruk.  Eqqaamajuk imaan­ngitsoq sulias­sin­neqar­nerit pil­lugu Jehovap asagaatit. Jehovap naalan­nerit sulias­sin­neqar­ner­nit sunil­luun­niit pingaar­tin­neruaa. – Sam 1. 15:22.

12. Zaina Betelimi kif­far­torun­naarsin­neqarami qanoq misigiva?

¹² Qatan­ngutip arnap, Zainap, Kangiani Qiterlermi najugal­lip allamik sulias­sin­neqarami kif­far­tuutigisani nuan­naarutigisani annaavaa. Ukiut 23-t sin­nerlugit Betelimi kif­far­toreerluni specialpionerin­ngor­tin­neqar­poq. Ima oqar­poq: “Allamik sulias­sin­neqar­nera tupaal­laatigeqaara. Atorsin­naan­ngitsutut misigivunga eqqarsaatigiuarlugulu arlaatigut ajor­tuliorsimanerlunga.” Ajoraluar­tumik qatan­ngutit ilagiin­niit­tut ilaasa anniaataa ilasaan­narlugu ima oqarfigisar­paat: “Pik­koris­suugaluaruit Betelimiigin­narsimas­sagaluar­putit.” Pif­fis­sap ilaa Zaina ima nikal­lungasar­tigaaq unnuit tamaasa qiasarluni. Imali oqar­poq: “Peqatigiis­sor­tat tatigiuar­pakka Jehovallu asan­nin­nera qularutigin­ngisaan­narlugu.” Zaina qanoq silatusaar­tuarpa?

13. Zainap qanoq misigis­sutsini nuan­niitsut qaangersin­naasimavai?

¹³ Zainap misigis­sutsini nuan­niitsut qaangersin­naasimavai. Qanoq? Biibililersaarutitsinni allaaserisat misigisaminut assingusunik sam­misaqar­tut atuar­tar­pai. Allaaserisaq “Nikal­lunganeq anigor­neqarsin­naavoq”, Napasuliaq Alapernaarsuiffik marsip aal­laq­qaataat 2001-imoor­tumiit­toq, iluaqutigeqaa. Allaaserisami Biibilimik allat­toq Mak­korsi nutaamik sulias­sin­neqarami assingusumik ilungersuuteqarsimagunar­toq sam­mineqar­poq. Zaina ima nangip­poq: “Mak­korsip maligas­siaa nikal­lungajun­naar­nis­san­nut nakorsaatitul­lusooq uan­nut ippoq.” Zaina aamma ikin­ngutiminut qanit­tumik attaveqar­tuar­poq. Immik­koor­niar­nani imminut nal­ligilin­ngilaq. Paasivaa Jehovap peqatigiis­sor­tai anersaamit iller­nar­tumit siulersor­neqarlutik aalajangiisar­tut qatan­ngutillu angutit siulersuisut soqutigingaaraanni. Aam­mali paasivaa Jehovap sulias­siis­sutigisaasa naam­mas­sineqar­nis­saat Jehovap peqatigiis­sor­taanut pingaaruteqar­ner­paajusoq.

14. Vlado allan­nguutinut sunut ajor­nakusoor­titsiva, sunali iluaqutigaa?

¹⁴ Vladop, 73-inik ukiul­lip Sloveniami utoq­qaaner­taasup, ilagiit ilaaf­figisani ilagiillu allat ataatsimuulersin­neqarmata ataatsimiit­tarfitsillu matuneqarmat ajor­nakusoor­teqaa. Ima  oqar­poq: “Paasisin­naan­ngilara ataatsimiit­tarfik kusanaqisoq matuneqarmat. Ungasin­ngitsuk­kut ataatsimiit­tarfip­put iluarsaat­tuun­neqaq­qam­mermat ajual­laatigeqaara. Sanasuuvunga, pequtillu ilaat sananikuuakka. Ilagiillu ataatsimuulersin­neqarmata oqaluus­sisar­tut utoq­qanerusugut allan­nguisariaqaler­nitsin­nik imaan­naan­ngitsorsiorsimavugut.” Vladop tapersersuinis­saminut suna iluaqutigisimavaa? Ima nas­suiaavoq: “Jehovap peqatigiis­sor­taasa allan­nguinerinut naleq­qus­sar­neq ajun­ngitsumik kinguneqar­tuaan­nar­poq. Siunis­sami allan­nguutinut annerusunut piareersaataavoq.” Illit ilagiit ataatsimuulersin­neqar­nerat imaluun­niit allamik sulias­sin­neqar­nerit pis­sutigalugu ajor­nakusoor­titsivit? Qularis­san­ngilat Jehovap misigis­sutsitit paasigai. Allan­nguinerit taamaat­tut tapersersoraangak­kit Jehova peqatigiis­sor­taalu ilumoorfigiuaruk­kit iluaqutigingaas­savat. – Tuss 18:26.

15. Ilagiit iluanni unam­miniar­nar­tunik nalaataqar­nermi qanoq silatusaarsin­naavugut?

¹⁵ Naggatis­saq qanil­liar­tor­til­lugu ilagiit iluanni unam­miniar­nar­tunik nalaataqar­nis­sar­put ilimagisin­naavar­put. Tamanna Jehovamik ilumoorfigin­nin­nitsin­nut misilin­neqaataasin­naam­mat silatusaar­tariaqar­pugut. Uppeqam­mit ajor­tumik pineqarsimal­lutit misigiguit kamaqinak. Perorsaatis­sin­neqaruit peq­qusiileqinerit eqqarsaatigival­laar­nagu perorsaatis­sin­neqar­nerit akueriuk pisariaqar­tunillu allan­nguil­lutit. Jehovallu peqatigiis­sor­taani ilin­nut sun­niuteqar­tunik allan­nguisoqaraangat allan­nguinerit akuerisak­kit ilitsersuutillu maleruarlugit.

16. Qanoq Jehova peqatigiis­sor­taalu tatigiuarsin­naavigit?

¹⁶ Ilumoorfigin­nin­ner­pit misilin­neqar­nerani Jehova peqatigiis­sor­taalu tatigiuarsin­naavatit. Taamaaliorumal­lutilli silatusaar­tariaqar­putit, tassa eqqis­sisimajuar­tar­nik­kut, eqqarsarluar­tar­nik­kut Jehovallu isigin­nit­taasiatut isigin­nit­taaseqar­niar­nik­kut. Biibilimi eqqaaneqar­tut assingusumik nalaataqarsimasut pil­lugit misis­suisarit maligas­siaan­nillu eqqarsaatigin­neq­qis­saarlutit. Ikioq­qul­lutit Jehova qin­nuigisaruk. Ilagiin­nit immik­koor­niaqinak. Taava qanorluun­niit pisoqas­sagaluar­pat Saatanip Jehovamit peqatigiis­sor­taanillu avis­saar­tis­sin­naas­san­ngilaatit. – Jaak 4:7.