ATUAQQISSAAGASSAQ 46
Jehovap nuannaarluta pinertusaarsinnaaqqulluta qanoq ikiortaraatigut
‘Jehovap qilanaaraa ilissinnik saammaassinissani, nikuikkumaarpoq nallittorumallusi.’ – ES 30:18.
ERINARSUUT 3 Jehova, neriuffigivatsigit nakuussutigalutillu
QILANAARTUUT a
1-2. (a) Apeqqutit suut akissutissarsissavagut? (b) Suup ersersippaa Jehovap ikiorusungaaraatigut?
JEHOVAP ajornartorsiutitta naammagalugit atornissaannut kiffartornermilu nuannaaqqulluta ikiorsinnaavaatigut. Qanoq ikiortarpaatigut? Jehovallu ikiuinera qanoq iluaqutigilluarnerpaasinnaavarput? Apeqqutit taakku allaaserisami matumani akissutissarsissavagut. Taakkuali samminnginneranni apeqqut una sammeqqaariartigu: Jehovap ilumut ikiorusuppaatigut?
2 Oqaaseq apustilip Paulusip hebræerinut allakkamini atugaa iluaqutigalugu akissutissarsisinnaavarput. Paulusi ima allappoq: “Jehova ikiortigigakku annilaangassanngilanga. Inuup qanoq iliorfigisinnaagaminga?” (Hebr 13:6) Biibilimik qinerlerfissiami allassimavoq versimi oqaaseq ‘ikiorti’ atorneqarmat ikioqqusumik ikiuipallanniarluni iliuuseqartumut innersuussutaasoq. Takorlooriaruk Jehova ajornartorsiortumik ikiuipallanniarluni iliuuseqapallattoq. Isumaqataassagunarputit Jehovap uagutsinnik ikiuerusungaarnera allaatigineqarluartoq. Jehovap ikiormatigut nuannaarneq attatiinnarlugu ajornartorsiutigut naammagalugit atorsinnaavagut.
3. Nuannaarneq attatiinnarlugu ajornartorsiutitta naammaginissaannut pingasutigut Jehovap qanoq ikiortarpaatigut?
3 Nuannaarneq attatiinnarlugu ajornartorsiutitta naammagalugit atornissaannut Jehovap qanoq ikiortarpaatigut? Tamanna paasiumallugu Esajap allagai sammilaariartigit. Siulittuutimmi Esajap isumassarsisitaalluni allatai arlallit nalitsinni Guutip kiffaanut atuupput. Aamma Esajap oqaatsit paasiuminartut atorlugit Jehova allaatigisarpaa. Esajap allagaani kapitali 30 assersuutigeriartigu. Kapitalimi tassani Jehovap kiffaminik ikiuisarnera Esajap nuannersumik assersuusiorluni allaatigaa. Allappoq Jehovap ikiortaraatigut (1) qinnutitta tusarnaaqqissaartarnerisigut akisarnerisigullu, (2) uagutsinnik ilitsersuinermigut aamma (3) ajunngisaarfigaluta siunissamilu ajunngisaarfigiumaaraatigut. Taakkunatigut pingasutigut qanoq ikiortaraatigut eqqartoriartigu.
JEHOVAP TUSARNAARTARPAATIGUT
4. (a) Jehovap Esajap nalaani juutit qanoq taavai, sunalu akueraa? (b) Jehovap aalajaatsut qanoq neriuutissippai? (Esaja 30:18, 19)
4 Esajap allagaani kapitali 30-p aallartinnerani Jehovap juutit ‘qitornatut naalasseriitsutut ajortuliaminnik ilaartuisutut’ taavai. Aamma ima oqarpoq: “Inuiaapput naalasseriitsut … Naalakkap ajoqersuussutaanik tusarumanngitsut.” (Es 30:1, 9) Inuit tusarumanngimmata Esajap siulittuutigaa Jehovap ajortumik nalaataqarnissaat akuerissagaa. (Es 30:5, 17; Jer 25:8-11) Tamannalu pivoq Babylonnimiunit aallarunneqarmata. Juutilli ilaat Jehovamut aalajaapput, Esajallu oqariartuummik neriuutissippai. Oqarfigai Jehovap akuerissagaa Jerusalemmimut uternissaat. (Esaja 30:18, 19 atuakkit). Taamatorluinnarlu pisoqarpoq. Jehovap Babylonnimit aniguisippai. Aniguisitaaneralli ingerlaannaq pinngilaq. Allassimammat ‘Jehovap saammaassinissani qilanaarigaa’ ersersinneqarpoq aalajaatsut taakkua aniguisitaanissaannut piffissaq ingerlajumaartoq. Israalikkut Babylonnimi ukiut 70-t aallarussaaqqareersut ilaasa Jerusalemmimut uternissaat akuerineqarput. (Es 10:21; Jer 29:10) Tigusaaqqanerminni aliasunnerup pianik qullilisarnerat nunaminnut uteramik nuannaarnerup pianik qullilinernit taarserneqarpoq.
5. Esaja 30:19-imi qanoq neriorsoqqissaarneqarpugut?
5 Uagut oqaatsit uku tuppallersaatigisinnaavagut: “Saammaatissavaasi torlulaffigigussinni.” (Es 30:19) Ikioqqulluta qinnuigigutsinni Jehovap tusarnaaqqissaarlutalu qisuariapallannissaa Esajap neriorsuutigaa. Esaja ima nangippoq: “Qinnutisi tusarniariarunigit akissavaasi.” Oqaatsit tuppallernartut taakku Ataatatta imminut ikioqqusunik ikiuerusungaarneranik eqqaasinneqaatigaagut. Tamanna nalunnginnatsigu nuannaarluta pinertusaarnissatsinnut iluaqutaavoq.
6. Esajap oqaasiinit qanoq ersersinneqarpa Jehovap tamatta immikkut qinnutigut tusarnaartarai?
6 Versimi tamatumani qinnutigut pillugit aamma suna ilinniarparput? Jehovap tamatta immikkut qinnutigut tusarnaaqqissaartarai. Sooq taama oqarsinnaavugut? Esajap allagaani kapitali 30-p aallartinneraniit Jehovap innuttani eqimattatut oqaaseqarfigimmagit qasseersiut atorneqartarpoq. Hebræerisulli versi 19-imi ataasersiut “illit” atorneqarpoq, tassa soorlulusooq inuttut ataasiakkaatut oqariartuummik nalunaarfigineqartut. Nutsiinnavillugu Esaja allappoq: ‘Qiaqinak’, ‘saammaatissavaatit’, ‘akissavaatit’. Jehova Ataataagami asannittoq ernerminut panimminulluunniit nikallungasumut oqarnavianngilaq: “Qatanngutittut nukittusariaqarputit.” Inuttut ataasiakkaatut pingaartilluta tamatta immikkut qinnutigut soqutigalugit tusarnaartarpai. – Tuss 116:1; Es 57:15.
Esaja allakkami Jehova ‘noqillaffissaqartissanngikkipput’ qanoq isumaqarpa? (Immikkoortoq 7 takuuk)
7. Esajap Jiisusillu qinujuarnerup pingaaruteqassusia qanoq ersersippaat?
7 Ernumassutigisagut pillugit Jehova saaffigigaangatsinni aallaqqaammut pinertusaarsinnaaqqulluta nakussatsittarpaatigut. Kissaatiginngisatsitullu misilinneqartuarutta pinertusaarsinnaaqqulluta nakussatseqqullutalu Jehova arlaleriarluta qinnuigisarsinnaavarput. Kissaatigaa taamaaliussasugut. Tamanna Esajap oqaasiinit ukunannga erserpoq: “[Jehova] noqillaffissaqartinniaqinasiuk.” (Es 62:7) Tamanna qanoq isumaqarpa? Jehovamut qinnutigut imaaginnavittariaqarput allaat soorlulusooq Jehova eqqissisimaartinngikkipput. Esajap oqaasii Jiisusip qinuneq pillugu Lukkarsi 11:8-10, 13-milu assersuusiaanik eqqaasinneqaatigaagut. Tassani Jiisusip kajumissaarpaatigut ‘kimigiiserluta’ qinussasugut anersaamillu illernartumik tunineqaqqulluta ‘qinujuassasugut’. Aamma silatusaartumik aalajangiisinnaaqqulluta Jehova kimigiiserfigisinnaavarput siulersoqqulluta.
JEHOVAP ILITSERSORTARPAATIGUT
8. Esaja 30:20, 21-milu allassimasut itsaq qanoq eqquuppat?
8 Esaja 30:20, 21 atuakkit. Babylonnimiut sakkutuuisa Jerusalemmi ukioq ataaseq affarlu ungoqqammassuk inuit ima annikilliortigaat allaat naalliuutaat nerisassatut imertullu nalinginnaatigilerlutik. Versi 20, 21-lu naapertorlugit Jehovap juutit neriorsorpai allamik isumataarpata allannguillutillu annaatissallugit. Esajap Jehova ‘ajoqersortimik’ ‘ilitsersortimillu’ taagamiuk juutit neriorsorpai Jehovap iluarisamisut imminik guutisiornissaannik ilinniartissagai. Oqaatsit taakku eqquupput juutit aallarussaaqqanerminniit iperagaammata. Jehovap ersersippaa taakkununnga ilitsersortaalluni, taassumalu siulersuineratigut guutisiorneq minguitsoq pilerseqqippaat. Nalitsinni Jehova ilitsersortigigatsigu nuannaarutigeqaarput.
9. Jehovap uagutsinnik ilitsersueriaasiisa ilaat suua?
9 Versini taakkunani Esaja assersuusiorluni oqarpoq ilinniartuusugut marlutsigut Jehovamit ilinniartinneqartut. Siullertut, Esaja allappoq: “Nammineq isinnik ilitsersortit takussavat.” Assersuummi Esaja oqarpoq ilitsersorti ilinniartitami saavanni nikorfasoq. Guutimit ilinniartinneqarnerput ataqqinaatitut isigaarput. Jehovap qanoq ilitsersortarpaatigut? Peqatigiissortani aqqutigalugit. Jehovap peqatigiissortaanit paasiuminartunik ilitsersorneqartarnerput qujamasuutigeqaarput! Ataatsimiinnerit, ataatsimeersuarnerit, Biibililersaarutit, JW Broadcasting® allarpassuillu aqqutigalugit ilitsersorneqartarnerput piffissani unamminiarnartuni nuannaarluta pinertusaarnissatsinnut iluaqutigaarput.
10. Qanoq ‘tunutsinniit oqaaseq’ tusartarparput?
10 Jehovap ilitsersueriaasia alla Esajap ima eqqaavaa: “Nammineq siutinnik tusassavat tununnit oqaaseq.” Pruffiitip Jehova ilinniartitami tunuatigut ingerlasutut sukkoornissaannillu ilitsersuisutut allaatigaa. Nalitsinni Guutip nipaa tunutsinniit tusartarparput. Qanoq? Guutip oqaasii isumassarsiarititaasut itsaq, kingumut qiviassagaanni qangarsuaq, Biibilimut allatsinneqarput. Taamaattumik Biibili atuaraangatsigu tassa soorlulusooq Guutip nipaa tunutsinniit tusarnaartaripput. – Es 51:4.
11. Nuannaarluta pinertusaarsinnaaqqulluta qanoq iliortariaqarpugut, aamma sooq?
11 Jehovap peqatigiissortani Oqaatsinilu aqqutigalugit ilitsersuinera qanoq iluaqutigilluarnerpaasinnaavarput? Maluginiaruk Esaja marlunnik eqqaasaqartoq. Siullertut: “Aajuna aqqusineq”. Aappaattullu: “Taanna ingerlavigissavarsi”. (Es 30:21) Naammanngilaq aqqusineq ilisimaannassallugu, ingerlavigisariaqarparput. Jehovap oqaasia aamma inussiap aalajaallunilu silatuup nassuiaatai aqqutigalugit Jehovap qanoq piumasaqarfigineraatigut ilinniartarparput. Aamma ilikkakkatsinnik qanoq maleruaasinnaanerluta ilinniartarparput. Jehovamut kiffartornermi nuannaarnerput attatiinnarlugu pinertusaarsinnaaqqulluta taakku marluk iliuuserisariaqarpagut. Ilinniarutta ilikkakkatsinnillu maleruaagutta aatsaat qularinngissinnaavarput Jehovap akissarsisissagaatigut.
JEHOVAP AJUNNGISAARFIGISARPAATIGUT
12. Jehovap kiffani qanoq pilluaqquai? (Esaja 30:23-26)
12 Esaja 30:23-26 atuakkit. Siulittuut taanna juutit Babylonnimi aallarussaaqqareerlutik Israalimut utermata qanoq eqquuppa? Jehovap timikkut anersaakkullu ittunik assigiinngitsorpassuarnik tunivai. Jehovap inuussutissanik naammattorsuarnik tunivai. Pingaarnertulli, imminut qanilleqqullugit iluarisamisullu guutisioqqilerniassammata pisariaqartitaannik tunivai. Guutip innuttai pilluaqqussutissanik aatsaat taama annertutigisunik Guutimit pilluaqquneqarput. Versi 26-mi ersersinneqarpoq Jehovap sakkortunerusumik qaammarsaanermigut oqaatsiminik paasinninnissaannik ikiorai. (Es 60:2) Jehovap pilluaqqusinermigut kiffani uummammik iluunngaannit qiimmattarlutik kiffartortuarniassammata qamuuna nakussatsippai. – Es 65:14.
13. Guutip iluarisaatut guutisioqqilernissamik siulittuut nalitsinni qanoq eqquussimava?
13 Guutip iluarisaatut guutisiornermik pilersitseqqinniarneq pillugu siulittuut uagutsinnut attuumassuteqarpa? Aap, ilaana! Qanoq? 1919-imiilli Babylonnersuarmit, tassa upperisarsiornernit eqqunngitsunit tamanit, tigusaaqqasut inuit millionilippassuit aniguisimapput. Nunamit neriorsuutigisamit pitsaanerungaartumut, anersaakkut paratiisimut, siulersorneqarsimapput. (Es 51:3; 66:8) Anersaakkut paratiisi suugami?
14. Anersaakkut paratiisi suua, kikkullu tassaniippat? (Nassuiaat takuuk).
14 1919-imiilli tanitat anersaakkut paratiisimi najugaqarnertik nuannaarutigisimavaat. b Nunarsuarmi inuunissamik neriugisallit, ‘savat allat’, anersaakkut nuna taanna aamma iserfigisimavaat Jehovamillu pilluaqqussuterpassuit nuannaarutigalugit. – Joh 10:16; Es 25:6; 65:13.
15. Anersaakkut paratiisi sumiippa?
15 Anersaakkut paratiisi nalitsinni sumiippa? Nunarsuaq tamakkerlugu Jehovamik guutisiortoqarmat anersaakkut paratiisi najugaqarfigisaat nunani tamalaaniippoq. Tassa nunami sumiluunniit najugaqaraluarutta guutisiorneq ilumoortoq tapersersortuarutsigu anersaakkut paratiisimiissinnaavugut.
Tamatta immikkut qanoq anersaakkut paratiisi alutornarnerulersissinnaavarput? (Immikkoortut 16-17 takukkit)
16. Anersaakkut paratiisip kusanarnera qanoq isiginiarnerusinnaavarput?
16 Anersaakkut paratiisimiittuarumalluta nunarsuaq tamakkerlugu ilagiit qujamasuutigiuartariaqarpagut. Qanoq taamaaliorsinnaavugut? Qatanngutitta kukkussutaat pinnagit pissusii nuannersut isiginiarnerussavagut. (Joh 17:20, 21) Sooq tamanna taama pingaaruteqartigaa? Assersuusioriarta. Takorlooruk naatsiivik assigiinngitsunik orpeqartoq. Taamatuttaaq nalitsinni ilagiinni assigiinngitsorpassuarnik inoqarpoq orpinnut assersuunneqartunik. (Es 44:4; 61:3) Qulakkeertariaqarparput “orpippassuit” kusanassusiisa isiginiarnerunissaat, imaanngitsoq “orpiit” ataasiakkaat uagutsinnut qaninnerusut ajoqutaasa isiginiarnerunissaat. Nunarsuaq tamakkerlugu ilagiit ataasiussuseqarnerata kusanartortaa isiginiarnerussavarput, nammineq naammalluinnanngissuserput allalluunniit naammalluinnanngissutaat takussunartuusinnaasut isiginiarnerorusunngilagut.
17. Tamatta immikkut qanoq ilagiinni ataasiussuseqarnerulersitsisinnaavugut?
17 Tamatta immikkut qanoq ilagiit ataasiussuseqartuarnissaannut ikiuutaasinnaavugut? Allanik eqqisseqateqarniarnikkut. (Mat 5:9; ) Ilagiinni allanik eqqisseqatigiissitsigaangatta anersaakkut paratiisi alutornarnerulersittarparput. Eqqaamassavarput kinaluunniit anersaakkut paratiisimiittoq Jehovap guutisiornermut minguitsumut kajungilersissimagaa. ( Rom 12:18Joh 6:44) Jehovap kiffani asasani ilungersuutigalugu eqqisseqatigiinnerulerlutillu ataasiussuseqarnerulersitsisut takugaangamiuk qanoq nuannaarutigisartigigaa takorlooruk. – Es 26:3; Hagg 2:7.
18. Suut eqqarsaatigeqqissaartassavagut, aamma sooq?
18 Jehovap kiffani ajunngitsorpassuarnik tunisarpai. Tamakku qanoq iluaqutigilluarsinnaavagut? Guutip oqaasiani Biibililersaarutitsinnilu atuakkatta eqqarsaatigeqqissaartarnerisigut. Misissuineq eqqarsaatiginneqqissaarnerlu kristumiutut pissuserineqartussat ersersinnissaannut iluaqutigissavagut, taamaalillutalu ilagiinni ‘qatanngutigiittut asaqatigiillutalu qamannga pisumik misigissuseqarfigeqatigiissaagut’. (Rom 12:10) Jehovap maanna qanoq ajunngisaarfigisaraatigut eqqarsaatigeqqissaarutsigu taassumunnga attaveqarnerput nakussatsissavarput. Siunissamilu pilluaqqussutissartaasa eqqarsaatigeqqissaarnerisigut kiffartorfigiuarnissaa takorlooruminarnerulersissavarput. Tamakku tamarmik Jehovamut kiffartornitsinni nuannaarnerulersitsissapput.
PINERTUSAARNISSARPUT AALAJANGIUSIMAVARPUT
19. (a) Esaja 30:18 naapertorlugu suna qularutiginngissinnaavarput? (b) Nuannaarluta pinertusaarsinnaaqqulluta suut iluaqutigissavagut?
19 Jehova illersorluta “nikuikkumaarpoq” silarsuarmik ajortumik suujunnaarsitsinermigut. (Es 30:18) Saatanip silarsuaata ullormik ataatsimik sivisunerusumik pisariaqanngitsumik piunissaa Jehovap ‘Guutiusup naapertuilluartup’ akuerinavianngikkaa qularinngilarput. (Es 25:9) Ullup aniguisitaaffissap nalliunnissaata tungaanut Jehova peqatigalugu naammagittarluta utaqqissaagut. Tamatumalu nalliutinnginnerani qinusinnaatitaaneq, Guutip oqaasianik atuaqqissaarneq maleruaanerlu aamma ajunngisaarfigineqarnitsinnik eqqarsaatiginneqqissaarneq pingaartittuassavagut. Taamaaliorutta Jehovap kiffartornitsinni nuannaarluta pinertusaarsinnaaqqulluta ikiussavaatigut.
ERINARSUUT 148 Jehova Annatsitsisoq
a Allaaserisami matumani Jehovap kiffani ajornartorsiornerminni nuannaarlutik pinertusaarsinnaaqqullugit pingasutigut qanoq ikiortarnerai sammissavarput. Esajap allagaani kapitali 30 iluaqutigalugu qanoq ikiuisarneranik paasisaqarnerussaagut. Kapitalip tamatuma samminerani Jehovamut qinusarnerup, oqaasianik atuaqqissaartarnerup pilluaqqussutillu maanna misigisatta siunissamilu misigiumaakkatta eqqarsaatigeqqissaartarnerisa pingaaruteqarnerannik eqqaasinneqassaagut.
b NASSUIAAT: ‘Anersaakkut paratiisimiittarpugut’ ataasiussuseqarluta Jehovamik guutisioraangatta. Anersaakkut inuussutissarpassuarnik salluliuutitaqanngitsunik tunineqartarpugut Guutillu kunngeqarfia pillugu nutaarsiassat nuannersut oqaluussissutiginerisigut nuannersumik suliaqarluarluta. Jehovamut qanimut attaveqarpugut qatanngutigullu eqqisseqatigalugit, taakkualu inuunitsinni nuannaarluta pinertusaarsinnaaqqulluta ikiortarpaatigut. Jehovap iluarisaatut guutisiulernikkut sapinngisamillu ilaarneratigut anersaakkut paratiisimiilertarpugut.