ATUAQQISSAAGASSAQ 45
Jehovap oqaluussinissatsinnut qanoq ikiortaraatigut
“Paasissavaat akunnerminni pruffiitimik saqqummersoqartoq.” – EZ 2:5.
ERINARSUUT 69 Naalagaaffik pillugu oqaluussisa!
QILANAARTUUT a
1. Suna ilimagisinnaavarput, aammali suna qularinngissinnaavarput?
OQALUUSSINITSINNI malersorneqarnissarput ilimagisinnaavarput. Siunissami malersorneqarneq tamanna sakkortunerulersinnaavoq. (Dan 11:44; Tim 2. 3:12; Saqq 16:21) Qularinngissinnaavarpulli pisariaqartitatsinnik Jehovap ikiorumaaraatigut. Jehovammi kiffaminut suliassiissutigisani, qanorluunniit ajornarpasitsigigaluaraangata, naammassisinnaaqqullugit ikiortuaannarpai. Assersuutitut pruffiitip Ezekielip juutinut Babylonnimut aallarussaaqqasunut oqaluussinerani pisut sammeriartigit.
2. Inuit Ezekielip oqaluussiffigisassai Jehovap qanoq oqaatigai, allaaserisamilu matumani suut sammissavagut? (Ezekieli 2:3-6)
2 Ezekielip inuit oqaluussiffigisassai qanoq ittuuppat? Jehova oqarpoq taakku ‘sorraappaluttunik kiinaqartut, manngertunik uummateqarlutik naalasseriitsuullutillu’. Kapinartulittut ajoqusiisinnaapput skorpionitullu ulorianartigalutik. Taamaattuminguna Jehovap Ezekieli ima oqarfigigaa: “Ersigeqinagit.” (Ezekieli 2:3-6 atuakkit). Ezekielip oqaluussinini naammassisinnaavaa (1) Jehovamit aallartinneqarami, (2) Guutip anersaavanit nakussatsinneqarami aamma (3) Guutip oqaasiinit uppernikkut nakussatsinneqarami. Taakku pingasut Ezekielip qanoq iluaqutigai? Uagullu qanoq iluaqutigisarpagut?
JEHOVAP EZEKIELI AALLARTIPPAA
3. Ezekielip suna nakussatsissutigisimassavaa, aamma sooq Jehovamit annertoqqusersorneqarnissani upperisinnaavaa?
3 Jehovap Ezekieli oqarfigaa: “Aallartissavakkit.” (Ez 2:3, 4) Ezekieli taama oqarfigineqarami nakussatsinneqarsimassaaq. Jehovammi Moorsisi Iisaajalu pruffiitinngortimmagit assingusumik oqarnera Ezekielip eqqaasimassavaa. (Mos 2. 3:10; Es 6:8) Ezekielip aamma nalunngilaa Jehovap pruffiitit taakku marluk imaannaanngitsunik suliassinneqarneranni qanoq ikiorai. Taamaattumik Ezekieli marloriarluni Jehovamit oqarfigineqarami aallartitaassalluni annertoqqusersorneqarnissani upperilluinnarsinnaavaa. Ezekieli arlaleriarluni ima allappoq: “Naalakkap oqaasia uannut pivoq.” (Ez 3:16; 6:1) Ezekielip Jehovamit aallartitaasimanini qularutiginngilluinnarpaa. Tamatuma saniatigut Jehova pruffiitiminik allanik ikiuiuarumalluni neriorsuisimasoq pillugu ataataminit palasiusumit ilinniartinneqarsimassaaq. Assersuutigalugu Jehovap Iisaaq, Jaaku Jeremialu ima oqarfigisimavai: “Najorpakkit!” – Mos 1. 26:24; 28:15; Jer 1:8.
4. Ezekielip oqaatsit tuppallernartut suut nakussatsissutigisimassavai?
4 Ezekielip oqaluussineranut Israalikkut amerlanerit qanoq qisuariassappat? Jehova oqarpoq: “[Israalikkut] naalakkumassanngilaatsit uanga naalakkumannginnaminnga.” (Ez 3:7) Tassa Ezekieli itigartikkamikku Jehova itigartippaat. Jehovap taama oqarfigimmani Ezekielip paasivaa imaanngitsoq pruffiititut suliani iluatsinngitsoortoq. Jehovap Ezekieli neriorsorpaa eqqartuussutini eqquuppata inuit paasilerumaaraat “akunnerminni pruffiitimik saqqummersoqartoq”. (Ez 2:5; 33:33) Qularnanngitsumik oqaatsit tuppallernartut taakku Ezekielip oqaluussinerminik naammassinninnissaminut nakussatsissutigisimassavai.
JEHOVAP AALLARTIPPAATIGUT
Ezekielitut imaassinnaavoq tusarusunngitsut akerlilersuisullu naapittarigut, ilisimavarpulli Jehovap najoraatigut (Immikkoortut 5-6 takukkit)
5. Esaja 44:8 naapertorlugu suna sapiissuseqalissutigaarput?
5 Uagut aamma Jehovamit oqaluusseqquneqarluta aallartitaanerput sapiissuseqalissutigaarput. Jehovap ilisimannitsimitut taammatigut ataqqinaatigaarput. (Es 43:10) Soorlu Ezekieli oqarfigigaa ‘ersigisaqassanngitsoq’, Jehovap oqarfigaatigut: “Ersigeqinasigit.” Sooq akerlilersortitta ersiginissaannut pissutissaqanngilagut? Ezekielitut Jehovamit aallartitaallutalu tapersersorneqaratta. – Esaja 44:8 atuaruk.
6. (a) Jehovap ikiorumalluta qanoq neriorsorpaatigut? (b) Suna tuppallersaatigalugulu nakussatsissutigaarput?
6 Jehovap ikiorumalluta neriorsorpaatigut. Assersuutigalugu Jehova ima oqannginnermini: “Ilisimannitsigaassi”, ima oqarpoq: “Imertigut ingerlaguit ilagissavakkit, kuussuartigut ingerlaguit sarfaanneqassanngilatit. Innikkut ingerlaguit uutissanngilaatit, naaralaarneratalu ikuallatsissanngilaatit.” (Es 43:2) Oqaluussitilluta ilaannikkut akornutaasut kuussuartut ittut misilinneqaatillu innertut ittut nalaassinnaasarpagut. Jehovalli ikiuineratigut oqaluussiuarsinnaavugut. (Es 41:13) Soorlu Ezekielip nalaani inuit amerlanersaasa tusarliussaq tusarusunngikkaat, nalitsinni aamma taamaappoq. Eqqaamassavarput tusaarusunnginnerat isumaqanngimmat oqaluussisartutut iluatsinngitsoortugut. Aalajaalluta oqariartuutaa oqaluussissutigiuarutsigu Jehovap iluarigaatigut tuppallersaatigalugulu nakussatsissutigisinnaavarput. Apustili Paulusi allappoq inuit ‘tamarmik immikkut sulinertik naapertorlugu akissarsisinneqassasut’. (Kor 1. 3:8; 4:1, 2) Qatanngut arnaq ukiorpassuarni pioneriusoq ima oqarpoq: “Jehovap ilungersuutigut pillugit akissarsisittaraatigut nalunagu nuannaarutigaara.”
EZEKIELI GUUTIP ANERSAAVANIT NAKUSSATSINNEQARPOQ
Ezekielip takorluuisitaalluni qamutit qilammiittut takusani Jehovap ikiuineratigut oqaluussinissamut nakussatsissutigai (Immikkoortoq 7 takuuk)
7. Ezekielip takorluuisitaalluni takusimasami eqqarsaatigisarnera qanoq sunnerneqaatigisimassavaa? (Saqqaani assiliaq takuuk).
7 Ezekielip takuaa Guutip anersaava qanoq pissaaneqartigisoq. Takorluuisitaalluni takuaa pinngortitat anersaajusut anersaamit illernartumit ikiorneqartut qamutillu angisuut qilammiittut assakaasui anersaamit illernartumit ingerlanneqartartut. (Ez 1:20, 21) Ezekieli sua? Ima allappoq: ‘Takugakku pallorpunga.’ Takusani tupigutsaatigingaarpai. (Ez 1:28) Kingusinnerusukkut Ezekielip takorluugaq tupinnaqisoq eqqarsaatigigaangamiuk Guutip anersaavata ikiuineratigut oqaluussinissamut nakussatsissutigisimassavaa.
8-9. (a) Ezekieli Jehovamit nikueqquneqarmat qanoq pisoqarpa? (b) Ezekieli inuit imaannaanngitsut oqaluussiffiginissaannut Jehovap qanoq nakussatsippaa?
8 Jehovap Ezekieli ima peqquaa: “Illit inuk, nikuigit oqaluffigissagakkit!” Taama peqquneqarami Guutillu anersaavanit ikiorneqarami Ezekieli nikuinnissaminut nakussatsinneqarpoq. Ima allappoq: “Anersaap pulavaanga nikuitillungalu.” (Ez 2:1, 2) Kingusinnerusukkut aamma kiffartornini tamaat Ezekieli Guutip ‘assaanit’ – tassa anersaavanit illernartumit – siulersorneqarpoq. (Ez 3:22; 8:1; 33:22; 37:1; 40:1) Inunnut ‘manngertunik qaaqartunut manngertunillu uummateqartunut’ oqaluussinissamut Guutip anersaavata Ezekieli nakussatsippaa. (Ez 3:7) Jehovap Ezekieli oqarfigaa: “Illit kiinnat taakkua kiinaattut illillu qaat taakkua qaavisut manngertigilersippakka. Qaat diamantitut manngertigilersippara ammaamit manngernerulersillugu. Ersigeqinagit, kiinaallu annilaarutigeqinagit.” (Ez 3:8, 9) Soorlulusooq Jehovap Ezekieli oqarfigigaa: ‘Inuit uteriissusiat pissutigalugu nikalloqinak. Uanga nakussatsissavakkit.’
9 Tamatuma kingorna Ezekieli oqaluussiffissaminut Guutip anersaavanit aallarussaalluni takorluuisitaavoq. Ezekieli allappoq Jehovap ‘pissaanerata tikikkaani’. Ezekielip tusarliussassani paasilluarumallugu pigiliulluinnarumallugulu sapaatip-akunnera atorpaa. (Ez 3:14, 15, Testamentitoqaq) Taava Jehovap qooqqumukaqqummani ‘anersaamit pulaneqarpoq’. (Ez 3:23, 24) Ezekieli oqaluussinissaminut piareerpoq.
GUUTIP ANERSAAVANIT NAKUSSATSINNEQARPUGUT
Ezekielip oqaluussinissamut suna iluaqutigaa, uagullu suna iluaqutigaarput? (Immikkoortoq 10 takuuk)
10. Oqaluussisinnaajumalluta qanoq ikiorneqartariaqarpugut, aamma sooq?
10 Oqaluussisinnaajumalluta qanoq ikiorneqartariaqarpugut? Tamanna akiumallugu Ezekielimut qanoq pisoqartoq eqqarsaatigeriaruk. Oqaluussilluni aallartinnginnerani Guutip anersaavata pisariaqartitaanik nakussatsippaa. Uagut Ezekielitut aatsaat Guutip anersaavanit ikiorneqarutta oqaluussisinnaavugut. Sooq taamaappa? Saatanip oqaluussinitsinnik unitsitsiniaalluni sorsuffigimmatigut. (Saqq 12:17) Inuppassuit isumaqarput Saatani pissaaneqangaarmat ajugaaffigisinnaanngikkipput. Oqaluussinitsigulli ajugaaffigisarparput! (Saqq 12:9-11) Qanoq? Oqaluusseqataagaangatta ersersittarparput Saatanip sioorasaarutaanit qunulersinneqarneq ajorluta. Oqaluussigaangatta Saatani ajorsartarpoq. Akerlilersorneqaraluarluta oqaluussiuarsinnaagatta qanoq isummersinnaavugut? Anersaamit illernartumit nakussatsinneqarlutalu Jehovamit iluarisaasugut ersarippoq. – Mat 5:10-12; Pet 1. 4:14.
11. Guutip anersaavanit qanoq ikiorneqarsinnaavugut, tamatumanngalu pissatsinneqartuarumalluta susariaqarpugut?
11 Jehovap Ezekieli pisariaqartitaanik qanoq nakussatsikkaa eqqarsaatigigutsigu aamma suna paasissavarput? Oqaluussinitsinni ajornartorsiutigisinnaasatta suulluunniit qaangernissaannut Guutip anersaavata nakussatsissinnaagaatigut. (Kor 2. 4:7-9) Taavami Guutip anersaavanik pissatsinneqartuarnissarput qanoq qulakkeersinnaavarput? Qinnutigiuartariaqarparput qularutiginagu Jehovap qinnutigut tusarumaarai. Jiisusip ilinniartitani ilinniartippai ‘qinujuassasut, ujarlertuassasut kasuttortuassallutillu’. Taava Jehovap ‘imminut qinusut anersaamik illernartumik tunerusussavai’. – Luk 11:9, 13; ApS 1:14; 2:4.
EZEKIELI GUUTIP OQAASIINIT NAKUSSATSINNEQARPOQ
12. Mappersagaq suminngaanneerpa, sunillu imaqarpa? (Ezekieli 2:9–3:3)
12 Ezekielip Guutip anersaava oqaluussinissamut sapiissuseqalissutigaa, aammali Guutip oqaasii uppernikkut nakussatsissutigai. Takorluuisitaalluni Ezekielip assak mappersakkamik tigummiartoq takuaa. (Ezekieli 2:9–3:3 atuakkit). Mappersagaq suminngaanneerpa? Sunik imaqarpa? Ezekielip qanoq iluaqutigaa? Tamanna sammeriartigu. Mappersagaq Guutip issiavissaarsuanit pivoq. Ilimanarpoq inngilit sisamat Ezekielip siusinnerusukkut takusimasaasa ilaat aqqutigalugu Jehovap mappersagaq tunniukkaa. (Ez 1:8; 10:7, 20) Mappersagaq Guutip oqaasiinik – tassa eqqartuussummik tusarliussamik imaqangaatsiartumik Ezekielip Babylonnimi aallarussaaqqasunut naalasseriitsunut nalunaarutigisassaanik – imaqarpoq. (Ez 2:7) Tusarliussaq taanna mappersakkami mumigiinnik allanneqarsimavoq.
13. Jehovap Ezekieli qanoq peqquaa, aamma sooq mappersagaq ‘mamarpa’?
13 Jehovap pruffiitini peqquaa mappersagaq iissagaa ‘naaminullu immiullugu’. Ezekielip naalalluni mappersagaq tamaat iivaa. Takorruukkap ilaa tamanna qanoq isumaqarpa? Ezekielip tusarliussassani tamaat paasilluinnartariaqarpaa. Pigiliulluinnartussaavaa oqaluussiniassagami misigissutsiminut sunniuteqartillugu. Taava ilimaginngisamik pisoqarpoq. Ezekielip mappersagaq ‘tungusunnitsuutitut mamartigisoq’ paasivaa. (Ez 3:3) Tassa Jehova sinnerlugu tusarliussamik ingerlatitseqqiineq Ezekielip nuannersutut isigimmagu tungusunnitsuummik mamarsarnertut ippoq. (Tuss 19:9-12) Jehovap pruffiitinngortimmani qujamasuppoq.
14. Suliassinneqarnermisut iliornissamut Ezekielip suna piareersaatigaa?
14 Kingusinnerusukkut Jehovap Ezekieli ima oqarfigaa: “Tusarnaaqqissaarlutit ilinnut oqaatigisakka tamaasa uummammiuliunniakkit.” (Ez 3:10) Jehovap Ezekieli taama peqqummagu mappersakkami allassimasut puiukkiuteqquai eqqarsaatigeqqissaaqqullugillu. Ezekieli taamaaliornermigut uppernikkut nakussatsippoq. Aamma mappersakkami pikkunartumik tusarliussaqarpoq Ezekielip inunnut ingerlateqqitassaanik. (Ez 3:11) Guutip tusarliussaa paasilluarlugulu upperigamiuk naammassinissaata tungaanut oqaluussisinnaalerpoq. – Tuss 19:15.
GUUTIP OQAASIINIT UPPERNIKKUT NAKUSSATSINNEQARPUGUT
15. Pinertusaassagutta suut ‘uummammiuliuttariaqarpagut’?
15 Oqaluussinermi pinertusaassagutta Guutip oqaasiinit uppernikkut nakussatsinneqartariaqarpugut. Guutip uagutsinnut oqaatigisai tamaasa ‘uummammiuliuttariaqarpagut’. Nalitsinni Jehovap oqaatsini allatsitani, Biibili, aqqutigalugu oqaluuttarpaatigut. Guutip oqaasiata eqqarsaatitsinnut, misigissutsitsinnut iliuuseqarnissamullu pissutiginiakkatsinnut sunniuteqartuarnissaa qanoq qulakkeersinnaavarput?
16. Guutip oqaasia qanoq uummammiuliussinnaavarput?
16 Nerigaangatta nerisagut aqajaqqumi uunneqaraangata timikkut nakussatsittarpugut, taamatuttaaq Biibilip atuaqqissaarneratigut eqqarsaatigeqqissaarneratigullu anersaakkut nakussatsittarpugut. Ezekielip misigisaa ilinniarfigaarput. Jehovap kissaatigaa oqaatsini ‘naatsinnut immiutissagipput’, tassa paasilluassagipput. Qinunikkut, atuarnikkut eqqarsaatiginneqqissaarnikkullu taamaaliorsinnaavugut. Siullermik, Guutip eqqarsaataanit pigiliussinissamut uummaterput piareersaqqullugu Jehovamut qinusarpugut. Taava Biibilip immikkoortuanik atuareerluta atuakkagut eqqarsaatigeqqissaarumallugit unillatsiartarpugut. Taamaaliorneq qanoq kinguneqassava? Eqqarsaatiginneqqissaarnissap piffissaqarfigineratigut Guutip oqaasia paasilluarnerussavarput uppernikkullu nakussatsilluta.
17. Sooq Biibilimi atuakkatta eqqarsaatigeqqissaarnissaat pingaaruteqarluinnarpa?
17 Sooq Biibilip atuarnissaa eqqarsaatigeqqissaarnissaalu pingaaruteqarluinnarpa? Maanna Guutip kunngeqarfianik tusarliussap oqaluussissutiginissaanut ungasinngitsukkullu eqqartuussutinik tusarliussissagunaratta pisariaqartitatsinnik nukittorsaataassammat. Aamma Jehovap pissusii nuannersut eqqarsaatigeqqissaaraangatsigit taassumunnga attaveqarluarnerulertarpugut. Tamatumalu kingunerisaanik tungusunnitsutut nuannersumik qamannga eqqissineq nalerisimaarnerlu nuannaarutigissavarput. – Tuss 119:103.
PINERTUSSAARNISSAMUT KAJUMISSISINNEQARPUGUT
18. Inuit oqaluussiffigisartakkatta suna paasissavaat, aamma sooq?
18 Ezekieli assiginagu pruffiitiunngilagut. Tusarliussassarli Jehovap oqaasianeersoq pillugu taassuma iluarisaatut suliap naammassinissaata tungaanut oqaluussiuarnissarput aalajangiusimavarput. Eqqartuussiffissaq nalliuppat inuit oqaluussiffigisartakkagut pissutissaqassanngillat oqarnissaminnut mianersoqquneqarsimanatik Guutillu soqutiginngikkaatik. (Ez 3:19; 18:23) Paasissavaalli tusarliussaq oqaluussissutigisarput Guutimeersuusoq.
19. Oqaluussinitta naammassinissaanut suut nakussatsissutigissavagut?
19 Oqaluussinitta naammassinissaanut suna nakussatsissutigissavarput? Ezekielip nakussatsissutigisimasai pingasut iluaqutigisinnaavagut. Jehovamit aallartitaanerput nalunnginnatsigu, Guutip anersaavanit illernartumit aamma Guutip oqaasianit uppernikkut nakussatsinneqartaratta oqaluussiuarpugut. Jehovap ikiuineratigut oqaluussisinnaavugut ‘naggatissamullu pinertusaarsinnaalluta’. – Mat 24:13.
ERINARSUUT 61 Sapiillusi oqaluussiuaritsi!
a Allaaserisami matumani pruffiitip Ezekielip oqaluussinissaminut pingasut suut iluaqutigisimanerai sammissavagut. Jehovap pruffiitiminik ikiuinera sammitillugu Jehovap uagut oqaluussinitsinni ikiussagaatigut qularinnginnerulissavarput.