ATUAQQISSAAGASSAQ 45
ERINARSUUT 89 Naalakkuit pilluaqqusaassaatit
Angutit aalajaatsut utoqqaat oqaasii ilinniarfigikkit
‘Utoqqarsuarniippoq ilisimassut, inuunertuunilu ippoq siuneqarneq.’ – JOBI 12:12, tastamantitoĸaĸ 1961-imi naqitigaq.
SAMMISAQ
Jehova Guuti naalakkutsigu maanna pilluaqqussavaatigut siunissamilu naassaanngitsumik inuuneqalersissalluta.
1. Sooq utoqqaat ilinniarfigisinnaavagut?
TAMATTA inuunermi silatusaartumik aalajangigassaqaraangatta siunnersorneqarnissarput pisariaqartittarparput. Ilagiinni utoqqaanertat anersaakkullu inersimalluartut allat siunnersuutaat iluaqutigingaarsinnaavagut. Uagutsinnit utoqqaanerungaatsiaraluarpataluunniit isumaqassanngilagut siunnersuutaat ullumikkut atorsinnaanngitsut. Jehovap kissaatigaa utoqqaanerusut ilinniarfigissagigut. Uagutsinnit sivisunerusumik inuusimagamik ilisimassuseqarnerullutillu misilittagaqarnerupput. – Jobi 12:12, tastamantitoĸaĸ 1961-imi naqitigaq.
2. Allaaserisami matumani suna sammissavarput?
2 Biibilip nalaani utoqqaat aalajaatsut aqqutigalugit Jehovap innuttani qiimmassartarpai siulersorlugillu. Taakkua ilagaat Moorsisi, Daavi apustililu Johannesi. Taakkua inuunerisa nalaat atugaallu assigiinngitsorujussuupput. Tamarmilli utoqqaallutik inuusunnerusunik siunnersuilluarsimapput. Guutimut naalannerup pingaaruteqassusia erseqqissarpaat. Taakkua oqaasii ilinniarfiginiassagatsigit allanneqarnissaat Jehovap isumagaa. Inuusuttuugaluarutta utoqqaagaluaruttaluunniit tamatta siunnersuutaat iluaqutigisinnaavagut. (Rom 15:4; Tim 2. 3:16) Allaaserisami matumani angutit utoqqaat pingasut taakkua oqaasiisa ilaat qanorlu ilinniarfigisinnaagigut sammissavagut.
“INUUGINNASSAATIT”
3. Moorsisip Jehova taassumalu innuttai qanoq kiffartuuppai?
3 Moorsisip inuunini tamaat ilungersorluni Jehova kiffartorfigaa. Pruffiititut, eqqartuussisutut, siulersuisutut allaatiginnittartutullu kiffartorpoq. Moorsisi inuunermi misilittagartuujuvoq! Israalikkut Egyptenimit aniguisinneqarneranni siulersorpai Jehovallu tupinnartuliarpassui takullugit. Jehovamit isumassarsisinneqarluni Biibilimi allakkat siulliit tallimat, Tussiaat 90 immaqalu Tussiaat 91 allappai. Aamma ilimanarpoq Jobimik allakkat allassimassagai.
4. Kikkut Moorsisip siunnersorpai, aamma sooq?
4 Moorsisip 120-inik ukioqarluni toqungajalerlunilu Israalikkut katersortippai takusimasaannik eqqaasinniarlugit. Taakkua ilaasa inuusunnerminni Jehovap Egyptenimi tupinnartuliarpassui Egyptenimiunillu pillaanera takusimavaat. (Mos 2. 7:3, 4) Immap Aappalaartup qeqqatigut panertukkut ingerlapput, kingornalu Jehovap Farao sakkutuuilu suujunnaarsikkai takuaat. (Mos 2. 14:29-31) Inoqajuitsumi Jehovamit illersorneqarlutillu isumassorneqarput. (Mos 5. 8:3, 4) Maannalu nunamut neriorsuutigisamut isingajalerneranni Moorsisip toqunnginnermini naggammik siunnersorusuppai. a
5. Moorsisip naggammik oqaasii qanoq Israalikkunnik neriuuteqalersitsippat? (Mosesimik 5. 30:19, 20)
5 Moorsisi qanoq oqarpa? (Mosesimik 5. 30:19, 20 atuakkit). Israalikkut eqqaasippai nuannersumik siunissaqartut. Jehovamit pilluaqquneqarlutik nunami neriorsuutigisaani sivisuumik inuuginnarsinnaapput. Nunalu taanna alutornangaarpoq naggorissuullunilu! Moorsisip ima allaatigaa: “Tamaaniipput illoqarfissuit kusanartut illit sanaarinngisatit, illorsuit ulikkaartut alutornartunik assigiinngitsorpassuarnik illit katersugarinngisannik, imiisivilianik illit ikuttagarinngisannik, viinnequteqarfinnik olivenequteqarfinnik illit ikkutarinngisannik.” – Mos 5. 6:10, 11.
6. Sooq Guutip Israalikkut inuiannit allanit ajugaaffigineqarnissaat akueraa?
6 Moorsisi Israalikkunnut aamma mianersoqqussuteqarpoq. Nunami alutornartumi inuuginnassagunik Jehovap peqqussutai maleruartariaqarpaat. Jehovap naalanneratigut ‘attavigittuinnarneratigullu’ ‘inuuneq qineqqullugu’ Moorsisip kajumissaarpai. Israalikkulli Jehovamut naalakkunnaarput. Taamaattumik Assyriamiunit, kingusinnerusukkullu Babylonnimiunit, ajugaaffigineqarnissaat aallarunneqarnissaallu Guutip akueraa. – Kng 2. 17:6-8, 13, 14; Nal 2. 36:15-17, 20.
7. Moorsisip oqaasii qanoq ilinniarfigaagut? (Aamma asseq takuuk).
7 Uagutsinnut suna ilinniutissaava? Naalakkutta naassaanngitsumik inuusinnaavugut. Israalikkut nunamut neriorsuutigisamut isingajalersut assigalugit aamma uagut nunarsuaq Guutip neriorsuinermisut paratiisinngortillugu nutaanngortitassaa qanittukkut inuuffigilissavarput. (Es 35:1; Luk 23:43) Taamanikkussamut Diaavulu anersaapiluillu sunniisinnaajunnaarsimassapput. (Saqq 20:2, 3) Jehova pillugu salluliortunik upperisarsiortoqarunnaassaaq. (Saqq 17:16) Inunnik naqissimannittunik naalakkersuisoqarunnaassaaq. (Saqq 19:19, 20) Paratiisimi eqqissineq akornuserneqassanngilaq. (Tuss 37:10, 11) Inuit tamarmik Jehovap inatsisai naapertuilluartut, ataasiussuseqartitsisut eqqisseqatigiissitsisullu naalakkumaarpaat. Taamaattumik inuit tamarmik asaqatigiillutillu tatigeqatigiikkumaarput. (Es 11:9) Assut qilanarnaq, ilaa? Aammami Jehova naalattuarutsigu nunarsuarmi paratiisiusumi ukiuni hundredilikkuutaaginnaanngitsuni naassaanngitsumilli inuusinnaavugut. – Tuss 37:29; Joh 3:16.
8. Oqaluussisartutut aallartitap inuunermik naassaanngitsumik neriuut qanoq iluaqutigaa? (Juudarsi 20, 21)
8 Guutip inuunermik naassaanngitsumik neriorsuutaa eqqarsaatigiuarutsigu qanorluunniit misilinneqaraluarutta Jehova ilumoorfigiuarusussavarput. (Juudarsi 20, 21 atuakkit). Neriorsuutaa iluaqutigalugu inuttut sanngiiffigut akiorsinnaavagut. Oqaluussisartutut aallartitaq ukiorpassuarni Afrikamiittoq sanngiissutiminik akiugaqaqattaartarsimasoq ima oqarpoq: “Nalunngilara Jehovamut naalakkunnaaruma naassaanngitsumik inuusinnaananga. Taamaattumik ajornartorsiutiga akiortuarpara tamannalu pillugu Jehovamut qamannga pisumik qinusarlunga. Ikiuineratigut ajornartorsiutiga qaangerpara.”
“ILUATSITSILLUARTARUMAARPUTIT”
9. Daavi inuunermini qanoq ajornartorsiorsimava?
9 Daavi kunngiuvoq ilisimaneqarluartoq. Aamma nipilersortartuuvoq, tussiaasiortuuvoq, sorsuttartuuvoq pruffiitiullunilu. Inuunermini ajornartorsiuterpassuit nalaappai. Kunngip Saulip sinngalluni toqunniarmani ukiorpaalunni qimaasutut inuusariaqarpoq. Kunnginngoreerluni ernerminit Absalomimit kunngiussutsiminik arsaarniarneqarami qimaaqqittariaqarpoq. Ajornartorsiortaraluarluni kukkusaraluarlunilu Daavi inuunini tamaat Guutimut ilumoorfiginnippoq. Jehovap ima allaatigaa: “Daavi angutaavoq uummatima iluarisaa.” Aap, Daavip siunnersuutai soorunami tusarnaarusuppagut! – ApS 13:22; Kng 1. 15:5.
10. Sooq Daavi ernerminut kingoraartigisassaminut, Saalumuumut, siunnersuuteqarpa?
10 Daavip ernerminut kingoraartigisassaminut, Saalumuumut, siunnersuutaa assersuutigisigu. Israalikkut Jehova guutisiorfiginiassammassuk angut inuusuttoq taanna guutisiorfiliornissaanut Jehovamit toqqarneqarpoq. (Nal 1. 22:5) Tamannali imaannaanngitsuuvoq. Daavip qanoq siunnersorpaa? Paasiniariartigu.
11. Kunnginik allakkat siulliit 2:2, 3 naapertorlugit Daavip qanoq Saalumuut siunnersorpaa, oqaasiilu qanoq eqquuppat? (Aamma asseq takuuk).
11 Daavi qanoq oqarpa? (Kunnginik 1. 2:2, 3 atuakkit). Daavip ernini oqarfigaa Jehovamut naalakkuni iluatsitsilluassasoq. Ukiorpassuarni Saalumuut Jehovamit ajunngitsorpassuarnik tunineqartarlunilu ikiorneqarpoq. (Nal 1. 29:23-25) Guutisiorfik alutornangaartoq sanavaa Biibilimilu allakkanik arlalinnik allaqataalluni. Ilisimassutsini pisuujuninilu tusaamaneqaatigai. (Kng 1. 5:14) Daavilli Saalumuut nassuiaappaa Jehovamut naalakkuni aatsaat ingerlalluassasoq. Ajoraluartumik Saalumuut utoqqaligami guutipilussiortunngorpoq. Jehovamit iluarisaajunnaarami ilisimassuseqarunnaarpoq, taamaalillunilu innuttani naapertuilluartumik naalakkersorsinnaajunnaarpai. – Kng 1. 11:9, 10; 12:4.
12. Daavip oqaasii qanoq ilinniarfigaagut?
12 Uagutsinnut suna ilinniutissaava? Naalakkutta inuunermi ingerlalluassaagut. (Tuss 1:1-3) Soorunami Jehovap neriorsunngilaatigut Saalumuutulli pisuujullutalu tusaamasaassasugut. Guuterpulli naalakkutsigu silatusaartumik aalajangiinissatsinnut ilisimassuseqalersissavaatigut. (Uss 2:6, 7; Jaak 1:5) Suliffimmut, ilinniarnermut, aliikkutassanut aningaasanullu tunngatillugu najoqqutassiai iluaqutigisinnaavagut. Siunnersuutai maleruarutsigit ataavartumik ajoqusiisinnaasunut illersorneqarumaarpugut. (Uss 2:10, 11) Ikinngutaalluartunik ikinnguteqassaagut, ilaqutariittullu pilluarsinnaavugut.
13. Carmenip inuunermini ingerlalluarnissamut suna iluaqutigaa?
13 Carmen, qatanngut arnaq Mozambiquemi najugalik, isumaqarpoq inuunermi ingerlalluassaguni qaffasinnerusumik ilinniagaqartariaqarluni. Universitetimi ilinniartunngorpoq illuliortaaseq ilinniarniarlugu. Ima allappoq: “Ilikkakkakka nuannaraakka. Piffissarujussuarli nukippassuillu atortariaqarpakka. Ullaammiit 7:30-miit unnukkut arferngup tungaanut ilinniarfimmiittarpunga. Ataatsimiigianngitsoortalerpunga, anersaakkullu sanngiillivunga. Paasivara naalakkat marluk inussiaataaffiginiarsaralugit.” (Mat 6:24) Tamanna pillugu qinuvoq Biibililersaarutinillu misissuilluni. Ima nangippoq: “Utoqqaanertanit anaanamillu siunnersorneqarluarpunga. Aalajangerpunga universitetimi ilinniarnera unitsinniarlugu piffissarlu tamaat Jehovamut kiffartortunngorniarlunga. Isumaqarpunga pitsaanerpaamik aalajangersimallunga, peqqissimissuteqarsimanngilangalu.”
14. Moorsisip Daavillu pingaarnertut suna oqariartuutigaat?
14 Moorsisip Daavillu Jehova asavaat, nalunngilaallu naalanneq pingaaruteqarluinnartoq. Taamaattumik allanik siunnersuipput Jehovamut ilumoorfiginninnikkut maligassiuinertik maleruaqqullugu. Aammali mianersoqqusipput naalakkunnaartut Jehovamit iluarisaajunnaassasut pilluaqquneqartarunnaassasullu. Taakkua siunnersuutaat nalitsinni pingaaruteqangaarput. Ukiut hundredilikkuutaat Daavip inuusimanerata kingorna Jehovamut kiffartortup allap naalannerup pingaaruteqassusia erseqqissarpaa.
“ALLANIT TAMANIT NUANNERNERPAAVOQ”
15. Apustili Johannesi qanoq misigisaqarpa?
15 Johannesi Jiisusimut qanimut ikinngutaavoq apustiliullunilu. (Mat 10:2; Joh 19:26) Jiisusi kiffartornerani ilagisarpaa, tupinnartuliai takusarpai artornartorsiorneranilu najorlugu. Jiisusip toqutaanera takuaa makititaaneratalu kingorna takullugu. Kristumiut siulliit ikittunnguit amerliartornerat takuaa. Aap, allaat nutaarsiassat nuannersut ‘inunnut tamanut oqaluussissutigineqarnerat’ angumeraa. – Kol 1:23.
16. Kikkut Johannesip allagai iluaqutigaat?
16 Johannesip utoqqarsuulluni Guutip oqaasianik allaqataanini immikkut pisinnaatitaaffigaa. “Jiisusimit Kristusimit saqqummersitat” alutornartut allappai. (Saqq 1:1) Iivangkiiliut ilaat allappaa. Aamma allakkat Guutimit isumassarsiarititaasut pingasut allappai. Allakkat pingajui uppeqatiminut Gaajusimut, anersaakkut ernermisut isigisaanut, allataavoq. (Joh 3. 1) Tamatuma nalaani Johannesip anersaakkut qitornamisut isigisai amerlasimassapput. Utoqqaap aalajaatsup taassuma allatai manna tikillugu Jiisusip malinnittaanut tamanut qiimmaallaataapput.
17. Johannesimit allakkat pingajui 4 naapertorlugu suna nuannaarutaava?
17 Johannesi qanoq allappa? (Johannesimit 3. 4 atuaruk). Johannesi allappoq Guutimut naalanneq nuannaarutaasartoq. Johannesip allakkami pingajui allammagit kristumiut ilaat eqqunngitsunik avissaartuutaasunik ilinniartitsipput. Taamaattorli suli ‘ilumoortoq malillugu inuusoqarpoq’. Taakku Jehovamut naalapput ‘inassutaanillu maleruaajuarlutik’. (Joh 2. 4, 6) Kristumiut aalajaatsut taakku Johannesimuinnaanngitsoq aammali Jehovamut nuannaarutaapput. – Uss 27:11.
18. Johannesip oqaasii qanoq ilinniarfigaagut?
18 Uagutsinnut suna ilinniutissaava? Jehovamut aalajaanneq nuannaarutaasarpoq. (Joh 1. 5:3) Assersuutigalugu nuannaarpugut Jehova nuannaartittaratsigu. Ussernartut itigartikkaangatsigit eqqortulioraangattalu Jehova nuannaartarpoq. (Uss 23:15) Inngilit qilammiittut aamma tamanna nuannaarutigaat. (Luk 15:10) Aamma uppeqatigut aalajaatsut, ingammik misilinneqarnermi ussernartorsiornermilu aalajaattuartut, takugaangatsigit nuannaartarpugut. (Tes 2. 1:4) Saatanillu silarsuaa ajortoq peeruppat Jehovamut ilumoorfiginnittuarsimanerput nuannaarutigissavarput.
19. Qatanngut arnaq Rachel Biibilimik ilinniartitsineq pillugu qanoq oqarpa? (Aamma asseq takuuk).
19 Ilumoortoq pillugu allanut ilinniartitsineq immikkut nuannaarutigaarput. Rachel, Kunngiitsuuffimmi Dominicami najugalik, isumaqarpoq Guuterput Jehova pillugu allanut ilinniartitsineq immikkut pisinnaatitaaffiusoq nuanningaartoq. Inuit arlallit Jehovamut kiffartortunngornissaannut ikiorsimavai. Ima oqarpoq: “Ilinniartitama Jehovamik asannilernerat, tatiginnilluinnarnerat Jehovalu nuannaartikkumallugu inuunerminnik allannguisimanerat takullugu qanoq nuannaarutiginnitsiginera nassuiaruminaatsippara. Allanut ilinniartitsineq ilungersornaraluartoq pilliuteqarnaraluartorlu nuannaarutigingaarpara.”
ANGUTIT AALAJAATSUT UTOQQAAT OQAASII ILUAQUTIGIKKIT
20. Sutigut Moorsisitut, Daavitut Johannesitullu ippugut?
20 Moorsisip, Daavip Johannesillu inuunerisa nalaat atugaallu uagut nalitsinnit atukkatsinnillu allaanerupput. Aammali arlalitsigut assigiissuteqarpput. Taakku Guuti ilumoortoq kiffartorfigaat, uaguttaaq taamaaliorpugut. Taakkutut Jehova qinnuigisarparput, tatigisarparput siunnersortigisarlugulu. Angutit itsaq inuusimasut taakku assigalugit upperilluinnarparput Jehova naalatsiminik akissarsisitsisartoq.
21. Moorsisip, Daavip Johannesillu siunnersuutaannik maleruaagutta Jehovap qanoq akissarsisissavaatigut?
21 Angutit utoqqaat taakkua oqaasii Jehovap peqqussutaanut naalannikkut maleruartigit. Taamaaliorutta inuunermi ingerlalluassaagut. Taava ‘sivisuumik inuujumaarpugut’ – aap, allaat naassaanngitsumik! (Mos 5. 30:20) Aamma Ataatatta qilammiusup asasatta uummataanik nuannaartitsineq nuannaarutigissavarput. Taassumalu takorloorsinnaasatsinnit annerungaartumik akissarsisissavaatigut. – Ef 3:20.
ERINARSUUT 129 Pinertusaartuarta
a Israalikkut Immami Aappalaartumi Jehovap tupinnartuliaanik takunnissimasut amerlanersaasa nuna neriorsuutigisaq takunngilaat. (Mos 4. 14:22, 23) Jehova aalajangerpoq Israalikkuusut 20-nik ukiullit utoqqaanerusullu inoqajuitsumi toqussasut. (Mos 4. 14:29) Israalikkuusulli inuusunnerusut amerlasuut aamma Josva, Kalebi Levikkullu kuussuaq Jordani ikaarlugu nunamut neriorsuutigisamut iserput. – Mos 5. 1:24-40.
b ASSIMI MALUGISASSAT: Saamerleq: Daavip ernini Saalumuut naggammik siunnersorpaa. Talerperleq: Pionerinut ilinniarfimmi ilinniartut Jehovap ilisimassusia iluaqutigaat.