1-2. Qanoq eqqunngitsumik pineqar­tarsinnaavugut?

 UILLARNEQ naapertuil­luartumik pineqarumalluni eqqartuus­sisumukaqat­taartoq pillugu Jiisusi assersuusiorpoq. Taamani inuinnaat naapertuil­luanngitsumik pineqar­tarnerat nalingin­naammat Jiisusip ilinniar­titaasa oqaluttuaq tamanna paasilluarsin­naasimassavaat. (Luk 18:1-5) Oqaluttuaq aamma uagutsinnut pingaaruteqarpoq, tamattami arlaatigut eqqunngitsumik pineqar­tarpugut.

² Nalitsinni isummius­sereernerit, inuiaqatigiinni inissisimaffinni naligiin­nginnerit naqisiman­nittarnerillu nalingin­naammata ajortumik pineqaraangatta tupaallaatigineq ajorparput. (Oqal 5:7) Immaqali ilimagin­ngilarput uppeqatitsinniit inussiar­niitsumik pineqar­nissarput. Soorunami qatanngutigut akerlilersuisuun­ngillat, aammali kukkujuitsuun­ngillat. Jiisusi ajortumik pineqaraangami qanoq qisuariar­tarnera ilinniarfigingaarsin­naavarput. Akerlilersuisut ajortumik pigaangatigut naammagit­tarsinnaagutta soormi uppeqatigut naammagit­tarfigisin­naassan­ngilagut? Uppeqatitta allalluunniit ajortumik pigaangatigut Jehova qanoq misigisarpa? Soqutigaatigut?

3. Qanoq nalunngilarput Jehovap kiffami qanoq pineqar­tarnerat soqutigigaa?

³ Jehovap qanoq pineqar­tarnerput soqutigisorujussuuaa, ‘eqqortormi iluaraa’. (Tuss 37:28) Jiisusip neriorsorpaatigut Jehovap piffissaq eqqorlugu kiffami ‘piaarnerpaamik eqqortumik pineqar­nissaat qulakkiissagaa’. (Luk 18:7, 8) Aamma ajortumik pineqar­tarnigut naalliuutigullu tamaasa qanittumi eqqaamaneerutitissavai. – Tuss 72:1, 2.

4. Jehovap qanoq ikiortarpaatigut?

 ⁴ Inuit tamarmik eqqortulior­talernissaat utaqqitillugu eqqunngitsumik pineqar­tarnitta naammagalugu atornissaanut Jehovap ikiortarpaatigut. (Pet 2. 3:13) Eqqunngitsumik pineqar­nitsinni ajornerulersitsiin­nartumik iliuuseqan­nginnis­satsinnik Jehovap ilinniar­tittarpaatigut. Jiisusip maligas­siaanit Jehovap ilinniar­tippaatigut qanoq pitsaanerpaamik qisuariarsin­naasugut. Aamma eqqunngitsumik pineqarnermi qanoq iliornis­satsinnik siunnersor­tarpaatigut.

EQQUNNGITSUMIK PINEQARNERMUT QANOQ QISUARIAR­NERLUTIT MIANERSUUTIGIUK

5. Sooq eqqunngitsumik pineqarnermut qanoq qisuariar­nerluta mianersuutigis­savarput?

⁵ Eqqunngitsumik pineqarnerput anniaatigingaarsin­naavarput. (Mos 5. 28:33, 34) Jehovamut kiffartortut aalajaatsut, soorlu Juubi Habakkukilu, aamma taama misigipput. (Job 6:2, 3; Hab 1:1-3) Taama misigineq pissusis­samisooraluartoq ajortumik qisuarian­nginnissarput mianersuutigisariaqarparput.

6. Absalomimit suna ilinniutigisin­naavarput? (Aamma asseq takuuk).

⁶ Eqqunngitsumik pineqarnermut nammineq akiniaarusulersin­naavugut. Taamaalioruttali ajornerulersitsiin­narsinnaavugut. Kunngip Daavip ernera Absalomi eqqarsaatigiuk. Najani Tamaari affarmik animinit Amnonimit pinngitsaalineqarmat Absalomi kamarujus­suarpoq. Moorsisip inatsisai malillugit Amnoni toqumik pillagas­sinneqar­tussaavoq. (Mos 3. 20:17) Absalomip kamannera paasinaraluartoq nammineerluni toqutsisus­saatitaan­ngikkaluarpoq. – Sam 2. 13:20-23, 28, 29.

7. Eqqunngitsut takusani tussiaasiortup qanoq sunnerneqaatigai?

⁷ Ajortuliortut ingerlaannaq pillarneqan­ngikkaangata eqqortuliornerup iluaqutissartai apeqquser­toorsin­naavagut. Maluginiaruk tussiaasiortut ilaat qanoq misiginersoq. Inunnut eqqortuliorusuttunut ajortumik pinnittartut iluatap­pasinnerat maluginiarpaa. Ima allappoq: ‘Tassa taama ipput iluaatsut, isumakuluuteqan­ngittuaannarput.’ (Tuss 73:12) Naapertuil­luanngitsuliorneq aliatsaatigingaaramiuk Jehovamut kiffartornerup iluaqutissartai apeqquserpai ima allalluni: “Taava eqqarsarpunga paasiniarumallugu. Uanga isinni tamanna eqqunngitsuuvoq.” (Tuss 73:14, 16) Ima  nassuerpoq: ‘Naakkiuteq­qajaasimavunga, isikkakka quaaqqajaasimapput.’ (Tuss 73:2) Qatanngutitsinnut Albertomik taasinnaasatsinnut taama assingusumik pisoqarpoq.

8. Naapertuil­luanngitsumik pineqarneq qatanngummut qanoq sunniuteqarpa?

⁸ Ilagiinnut aningaasanik tunissutigineqartunik tillittutut Alberto eqqunngitsumik unnerluutigineqarpoq. Kingunerisaanik utoqqaaner­taajunnaarsin­neqarpoq ilagiin­niittullu ilaannit ataqqineqarun­naarluni. Ima oqaluttuarpoq: “Narrutsappunga, kamappunga pakatsil­lungalu.” Ajuallannermik ataatsimiigiar­tarunnaarpoq ukiunilu tallimani unittooq­qalluni. Misigisamit tamatumannga ersersin­neqarpoq ajortumik pineqarnermi kamannerput aqunngik­kutsigu qanoq kingunerlus­sinnaasoq.

EQQUNNGITSUMIK PINEQARNERMI JIISUSI ILAARUK

9. Jiisusi eqqunngitsumik qanoq pineqartarpa? (Aamma asseq takuuk).

⁹ Eqqunngitsumik pineqarnerup naammagalugu atornissaanut tunngatillugu Jiisusi maligas­siuilluarpoq. Ilaquttaminit allanillu qanoq pineqar­tarnersoq eqqarsaatigiuk. Ilaquttaminit uppinngitsunit silanngajaar­nerarneqarpoq, upperisarsiornikkut siuttunit anersaapilunnik  suleqateqartutut unnerluutigineqarpoq, Romamiullu sakkutuuinit illaruaatigineqarpoq, unatarneqarpoq toqunneqarlunilu. (Mak 3:21, 22; 14:55; 15:16-20, 35-37) Taama naapertuil­luanngitsigisumik Jiisusi pineqaraluarluni akiniaan­ngisaannarpoq. Maligas­siaanit suna ilinniarsin­naavarput?

10. Naapertuil­luanngitsumik pineqarnermi Jiisusi qanoq iliorpa? (Petrusimit 1. 2:21-23)

¹⁰ Petrusimit 1. 2:21-23 atuakkit. a Naapertuil­luanngitsumik pineqar­nitsinni sunissatsinnik Jiisusip pitsaanerpaamik maligas­sippaatigut. Qaqugukkut nipangersimaan­nassanerluni qaqugukkullu oqaaseqas­sanerluni naluneq ajorpaa. (Mat 26:62-64) Salluliuutigineqaraangami oqaaseqar­tuaannanngilaq. (Mat 11:19) Oqaaseqaraangamilu imminut akerlilersuisut akillugit ajuallan­nartunik oqaaseqarfigineq ajorpai sioorasaar­nagillu. ‘Naapertuil­luartumik Eqqartuus­sisartumut neriukkami’ Jiisusi imminut aqussinnaavoq. Nalunngilaa naapertuil­luanngitsumik pineqarnini Jehovap takugaa. Upperaalu Jehovap piffissaq eqqorlugu naapertuil­luanngitsuliornerit iliuuseqarfigiumaarai.

11. Oqaasissagut qanoq ililluta aqunniarsin­naavagut? (Aamma assit takuuk).

¹¹ Eqqunngitsumik pineqarnermi oqaasissatta aqunnerisigut Jiisusi ilaarsin­naavarput. Eqqunngitsumik pinninnerit ilaat annikin­nerupput iliuuseqarfigineqar­tariaqan­ngitsut. Ilaannilu ajornerulersitsiin­narniarnata nipangersimaan­nartariaqarsin­naavugut. (Oqal 3:7; Jaak 1:19, 20) Ilaannikkulli eqqunngitsumik pinninnermik takusaqarutta imaluunniit ilumoortoq illersor­niarlugu oqaaseqar­tariaqarsin­naavugut. (ApS  6:1, 2) Oqaaseqar­niarlutali aalajangerutta sapinngisatsinnik eqqissisimallutalu ataqqin­nittuussaagut. – Pet 1. 3:15. b

12. ‘Naapertuil­luartumik Eqqartuus­sisartumut’ qanoq neriussin­naavugut?

¹² ‘Naapertuil­luartumik Eqqartuus­sisartumut’ isumagisas­sanngor­titsinikkut Jiisusi aamma ilaarsin­naavarput. Allat uagut pilluta eqqunngitsumik isummerpata ajortumil­luunniit pippatigut Jehovap susoqarnersoq nalunngikkaa tuppallersaatigisin­naavarput. Jehovap pisunik aaqqiiumaarnera upperigutsigu eqqunngitsumik pineqar­nitsinni isumalluarsin­naassaagut. Jehovamut isumagisas­sanngor­titsinikkut kamannermik uumigin­ninnermillu iperaasin­naavugut. Kamattuarneq qisuariapiloornermik, nuannaarun­naarnermik Jehovamullu attaveqarnermut ajoqusiinermik kinguneqarsinnaavoq. – Tuss 37:8.

13. Eqqunngitsumik pineqarnermi naammagit­tarnissamut suna iluaqutigisin­naavarput?

¹³ Soorunami kukkunata Jiisusip maligassiaa maleqqis­saarsin­naanngilarput. Ilaannikkummi peqqissimis­sutigisatsinnik oqaaseqar­toorlutalu iliuuseqar­toortarpugut. (Jaak 3:2) Eqqunngitsumilli pineqarnitta ilaat misigis­sutsikkut timikkullu anniaatigiuarsin­naavagut. Taama eqqugaasimaguit aqqusaakkannik Jehovap takunninnera tuppallersaatigisinnaavat. Aamma Jiisusip eqqunngitsumik pineqarnermi naalliuuteqarsimasup misigis­sutsitit paasisinnaavai. (Hebr 4:15, 16) Jiisusip maligassiaata saniatigut Jehovap aamma eqqunngitsumik pineqar­nitsinni naammagit­tarnissamut iluaqutis­satsinnik siunnersorpaatigut. Romamiunut allakkani allassimaffiit marluk iluaqutigisin­naasagut maanna sammeriartigit.

‘KAMANNISSAQ GUUTIMUT ISUMAGITISSIUK’

14. ‘Kamannissap Guutimut isumagitinnera’ qanoq paasisariaqarpa? (Romamiut 12:19)

¹⁴ Romamiut 12:19 atuaruk. Apustilip Paulusip kristumiut peqquai ‘kamannissaq Guutimut isumagitissagaat’. Taamaaliorsin­naavugut Jehovap nammineq qaqugu qanorlu aaqqiinissaanut inissaqar­titsinitsigut. Qatanngut Johnimik atilik naapertuil­luanngitsumik pineqarami oqarpoq: “Kamassara ajortuliun­nginniassagama aquttariaqarsimavara, imaannaan­ngilarli. Jehovap utaqqinissaanut Romamiut 12:19 iluaqutigaara.”

15. Sooq Jehovap aaqqiinissaanut utaqqineq pitsaanerua?

¹⁵ Jehovap aaqqiinissaanut utaqqineq iluaqutigisarparput. Ajornar­torsiummik aaqqiiniarnerup ajornartua misigin­nginnias­sagatsigu Jehovap ikiussavaatigut. Oqarporlusooq: “Ajornar­torsiut uannut tunniuguk, isumagiumaarpara.” Jehovap ‘pillaanissamik’ neriorsuutaa akuerigutsigu iperaasin­naavugut nalunagu Jehovap pitsaanerpaamik isumagiumaaraa. Tamanna Johnip, eqqaaneqareersup, iluaqutigaa. Oqarpoq: “Jehova utaqqiin­narukku uannit isumagil­luarnerussavaa.”

‘AJUNNGITSOQ ATORLUGU AJORTOQ AJUGAAF­FIGIUARUK’

16-17. ‘Ajunngitsoq atorlugu ajortup ajugaaf­figinissaanut’ qinnussineq qanoq iluaqutigisin­naavarput? (Romamiut 12:21)

¹⁶ Romamiut 12:21 atuaruk. Paulusip ‘ajunngitsoq atorlugu ajortoq ajugaaf­figeqqullugu’ kristumiut peqquai. Qaqqami oqalugiaammi Jiisusi oqarpoq: “Ilissinnut akeraasut asajuarsigit ilissinnillu malersuisut qinnuttuarlugit.” (Mat 5:44) Namminerlu taamaaliorpoq. Romamiut sakkutuuinit kikiattugaagami  Jiisusip anniangaarnera eqqarsaatigisimas­savarput. Ataqqinas­susiiagaasutut naapertuil­luanngitsumillu pineqar­nermini anniangaarnera takorluuin­narsinnaavarput.

¹⁷ Jiisusi naalliuutiminit ajugaaf­figineqanngilaq. Sakkutuut pillarneqar­nissaat pinnagu ima qinnuppai: “Ataata, qanoq iliornertik nalummassuk isumakkeerfigikkit.” (Luk 23:34) Uagutsinnik ajortumik pinnittut qinnukkutsigit kamakkun­naamisin­naavugut taakkununngalu misigis­sutsigut sakkortual­laarunnaarsin­naallutik.

18. Albertop Johnillu eqqunngitsumik pineqarnermik naammagalugu atornissaanut qinuneq qanoq iluaqutigaat?

¹⁸ Qatanngutitta marluk, allaaserisami eqqaaneqareersut, naapertuil­luanngitsumik pineqarnermik naammagalugu atornissaanut qinnussineq iluaqutigaat. Alberto ima oqaluttuarpoq: “Qatanngutit uannik eqqunngitsumik pinnissimasut qinnuppakka. Pisimasoq pillugu kamakkun­naaqqullunga Jehova qinnuigisarpara.” Qujanartumik Alberto Jehovamut aalajaalluni kiffartoq­qilerpoq. John oqaluttuarpoq: “Qatanngut uannik ajuallatsitsisimasoq qinnuttaqat­taartarpara. Isornar­torsiueq­qajaajun­naarnissannut qinnutit taamaattut iluaqutigaakka. Isumakkut eqqissis­sutigaara.”

19. Naggatissap tungaanut susariaqarpugut? (Petrusimit 1. 3:8, 9)

¹⁹ Naluarput naggatissap tungaanut qanoq nuannin­ngitsumik pineqar­tarumaar­nerluta. Qanorluunniit pisoqas­sagaluarpat Jehovamut ikioqqulluta qinujuaannarta! Aamma Jiisusip ajortumik pineqarnermi qisuariarnera ilaartuarlugulu Biibilimi najoqqutassiat maleruar­tuartigit. Taamaaliorutta Jehovap pilluaq­qussagaatigut qularis­sanngilarput. – Petrusimit 1. 3:8, 9 atuakkit.