MISIGISALIKKERSAARUT
Eqqunngitsumik pineqarnermi aalajaassinnaavutit
Paul: Pissangaqaagut! Novembarimi 1985-imi Liberiamut Afrikap kitaaniittumut ajoqersuiartortitatut aallariartorpugut. Senegalimut mikkatta Anne oqarpoq: “Akunneq ataasiinnanngorpoq Liberiamut tikinnissatsinnut!” Taava højttalerikkut nalunaaruteqarpoq: “Ilaasut Liberiamut ingerlaqqittussat timmisartumiit nioqquneqarput. Liberiami naalakkersuisut uppitinniarneqarmata Liberiamut ingerlaqqissinnaajunnaarpugut.” Ulluni qulini tulliuttuni Senegalimi ajoqersuiartortitat ilagaagut. Liberiamit nutaarsiassanit paasivarput toqutaasimasorpassuaqartoq aninissarlu inerteqqutigineqalersimasoq – anisimasullu aallaaneqarlutik toqutaasartut.
Anne: Inuttut pissanganartorsiortuunngilagut. Meeraallungali ‘Anninnguaq ernumanikkaamik’ taaneqartarpunga. Aallaat aqqusinikkut ikaarnissannut annilaangasarpunga! Liberiamili suliassinneqarnerput aalajangiusimavarput.
Paul: Annelu marluulluta Tuluit Nunaata kitaani immitsinnut ungasinnata peroriartorpugut. Angajoqqaama Annellu anaanaata pionerinngornissatsinnut kajumissaartuartarpaatigut. Atuarfimmiillu soraarummeeratta pionerinngorpugut. Piffissaq tamaat kiffartornissamut inuunerput atorusukkatsigu angajoqaagut nuannaaqaat. 19-inik ukioqarlunga Betelimi kiffartulerpunga. 1982-imilu katereernitta kingorna Annep kiffartoqatigilerpaanga.
Anne: Beteli nuannareqaarput, kissaatigiuaannarnikuuarpulli oqaluussisartunik pisariaqartitsiffiusumi kiffartorusulluta. Betelimi kiffartoqatitta ilaat ajoqersuiartortitaanikuusut oqaluussisartutut aallartitanngornissatsinnut kajumissuseqarnerulersippaatigut. Kissaaterpullu ukiuni pingasuni unnuit tamaasa qinnutitsinni immikkut eqqaasarparput. Taamaattumik pissangaqaagut 1985-imi Gileadimi klassit 79-issaannut qaaqqusaagatta! Liberiamut Afrikap kitaaniittumut aallartussanngorpugut.
UPPEQATITTA ASANNINNERAT NAKUSSATSISSUTIGAARPUT
Paul: Liberiamut timmisartoqaqqilermat siulleq ilaaffigaarput. Inuit erserrateqaat sulilu unnukkut aneqqusaasoqanngilaq. Ersingaaramik biilit nipiliulillaraangata aqqusinermiittut nilliaatigalutik qimaasarput. Immitsinnut eqqissisarniarluta unnuit tamaasa Tussiaatit atuartarpagut. Nunami ajornartorsiuteqaraluartoq suliassinneqarnerput nuannareqaarput. Ullut tamaasa Anne oqaluussisarpoq,
uangalu Betelimi John Charuk suleqatigisarpara. Ukiorpassuarni Liberiami najugaqartuugami qatanngutillu tamaani najugallit atugaat unamminiagaallu ilisimalluaramigit ilinniarfigeqaara.Anne: Qatanngutit Liberiamiut aalajaannerat asanninnerallu pissutigalugit Liberiamiinnerput ingerlaannaq nuannarilerparput. Ikinngutigilerpagut ilaquttatullu isigilerlugit. Siunnersortarlutalu qiimmassartarpaatigut. Oqaluussisarnerpullu nuannertaqaaq. Pulaakkagut qimaleraangatsigit ugguartaqaat. Inuit aqqusinerni Biibili eqqartortarmassuk uagut ilaaqqutiinnarsinnaasarpugut. Biibilimik misissueqatigut amerlangaaramik tamakkerlugit piffissaqarfiginiarnissaat ajornakusoortarpoq. Ajornartorsiut nuannerluinnartoq!
ANNILAANGATILLUTA NAKUSSATSINNEQARTARPUGUT
Paul: Ukiuni sisamani eqqissisimaneqakannereersoq 1989-imi tupannaqisumik naalagaaffiup innuttai imminnut sorsuutilerput. 1990-imi juulip aappaanni naalakkersuisunik uppititsiniaasut Betelip eqqaa tiguarpaat. Qaammatini pingasuni nunanut allanut – allaat ilaquttatsinnut aamma qullersaqarfimmut – attaveerutivippugut. Nunami sumi tamani nakuusertoqarlunilu eqqissiviilliortoqartarpoq, nerisassaaleqisoqarpoq, arnarpassuillu pinngitsaalineqarlutik arneriffigineqartarput. Ukiuni 14-ini tulliuttuni nunami tamarmi taama alianartigisunik pisoqartarpoq.
Anne: Naggueqatigiit ilaat naggueqatiginnigisatik saassuttarpaat toqorartarlugillu. Pikitsitsisut sakkorpassuallit eqqumiitsunillu atisallit illunut tamanut isertarput tigorusutatillu tigusarlugit. Inunnik toqutsineq taakkua ilaannut kukkukuunik toqutsinertut iinnarpoq. Pikitsitsisut aqquserngit assiaqquserlugit nakkutigaat inuillu taakkuninnga qaangiiniarsarisut toquttarlugit. Inuit timaat qaleriiaassorlugit iliorartarpaat, aamma Betelip eqqaani taamaattoqarpoq. Nalunaajaasut aalajaatsut ilaat toqutaapput, ilaatigut ajoqersuiartortitat asanartut marluk.
Pikitsitsisut allanik nagguillit uumissukkatik nassaarigaangamikkit malersorlugillu toquttarpaat. Qatanngutitta inuunertik navianartorsiortillugu uppeqatitik annaanniarlugit toqqorniartarpaat. Aamma ajoqersuiartortitat Betelimilu najugallit taamaaliortarput. Betelimi Nalunaajaasut qimarngusut inini ataaniittuni sinittarput, allallu qulaani ineqatigaagut. Uagut ilaqutariit arfineq-marluusut initsinni ineqatigaagut.
Paul: Ullut tamaasa pikitsitsisut Betelimukartarput inunnik toqqortaqarsimanersugut takuniartarlugu. Aggertoqaraangat qatanngutit marluk ungalunukartarput pikitsitsisut oqaloqatigiartorlugit. Allat marluk igalaakkut isiginnaartarput. Taakku
marluk ungalunukartut talitik saaminniitikkaangatigit paasinarsisarpoq ajortoqanngitsoq. Talitilli tunuminniitikkaangatigit isumaqartarpoq pikitsitsisut kamallutik iserniartut. Taava igalaaniittut marluk uppeqatigut toqqoriartupallattarpaat.Anne: Ullut ilaanni pikitsitsisut kamallutik iserniartut qatanngutitta unitsissinnaajunnaarpaat. Qatanngut arnaq uffarfimmukaatipallappara matulu parnaarlugu. Tassani skaaviup iluata iigaasartaani ineerannguaqarpoq toqqorsiviusinnaasumik. Qatanngut arnaq peqititerluni tassunga toqqorpoq. Pikitsitsisut aallaasilisarlutik malissimavaannga. Kamangaarlutik matukkut kasuttupiloorput. Paulip unissaraluarpai oqarluni: “Nuliara uffarfimmiippoq.” Qatanngutip toqqorfia matunialerakku nipiliortoorpunga ilisivinnullu ilioraarpallallunga. Ilimagaara sulerinersunga pikitsitsisut eqqarsaatigigaat. Annilaanganermik sajuttuinnaavunga. Matup ammannginnerani eqqissisarlunga Jehovamut qinoqqaarpunga. Matu ammarakku eqqissisimallunga ilassivakka. Ilaata ajapilooriarlunga skaaviup tungaannaanukarpoq. Ammaramiuk ilisat sakattaasaannariarlugit ujarleraluarpoq. Nassaannginnami upperinnginngajappaa. Taanna ilanilu ininut allanut qalianullu ujaasiartorput, tassanilu aamma nassaarnatik.
TAARSIORNERMI QAAMMAQQUT
Paul: Qaammatialunni naammattunik nerisassaqanngilagut. Anersaakkulli nerisassat inuuniutigaagut. Betelimi ullaakkut Biibilimik eqqartuineq kisiat “ullaakkorsiutigisarparput”. Ullup ingerlaneranut qamuuna nukittoqqutigisaratsigu qujamasuutigingaartarparput.
Nerisassaarullutalu imissaarukkaluarutta Betelilu qimattariaqalissagutsigu ilimanarpoq qatanngutit toqqortagut toqutaassagaluartut. Jehovalli pisariaqartitatsinnik isumassorpaatigut eqqissisimatillutalu. Jehovap pisariaqartitatsinnik piffissaq eqqorlugu tupinnaannartumik tunisarpaatigut.
Silarsuarmi taarsioraluttuinartumi sallusuissut qaammariartuinnarpoq. Uppeqaterpassuagut inuunerminnik annaassiniarlutik arlaleriarlutik qimaasariaqartarput. Uppernertilli nakussatsinniartuartarpaat ajornartorsiuteqaraluarlutillu eqqissisimaniaannartarlutik. Ilaat oqartarput annikilliornartussarsuarmut piareersaatigalugu. Utoqqaanertat qatanngutillu angutit inuusunnerusut sapinngisaminnik uppeqatitik nakussatsinniartuarpaat. Qatanngutit angutit arnallu qimaasut ataqatigiillutik ikioqatigiittarput, tikitaminnilu tamani oqaluussisarlutik. Orpigarpassuit akornanni ataatsimiittarfiliortarput. Pissutsini taama ittuni qatanngutit ataatsimiinnerit oqaluussinerillu neriuuteqalissutigalugillu qiimmassaatigingaartarpaat. Ikiuutissanik agguaassinermi qatanngutit atisat pinnagit taskit oqaluussinermi atortussat apeqqutiginerusarpaat. Tamannalu killitsinnaqaaq! Inuppassuit sorsunnermik eqqugaasut nutaarsiassat nuannersut tusarusungaarpaat. Tupigusuutigaat Nalunaajaasut qanoq nuannaartigalutillu isumalluartigisut, taarsiornermi Mat 5:14-16) Qatanngutit aallussilluartut pissutigalugit allaat pikitsitsiniat peqqarniitsut ilaat Nalunaajaasunngorput.
qaammaqqutaasutut illutik. (QATANNGUTIGUT QIMATTARIAQALERAANGATSIGIT JEHOVAP NAKUSSATSITTARPAATIGUT
Paul: Liberia pingasoriarluta sivikitsumik marloriarlutalu ukioq ilivitsoq qimattariaqarsimavarput. Qatanngutigut qimattariaqaleraangatsigit misigissutsigut qatanngutip arnap eqqoqqissaartumik oqaatigai: “Gileadimi ilinniartinneqarpugut nunami ornitatsinni qatanngutigut qamannga pisumik asaqqullugit. Taamaaliorpugullu. Taamaattumik pissutsini imaannaanngitsuni qatanngutitta qimannissaat artornartaqaaq!” Qujanartumilli nunani qanittuniikkallartilluta qatanngutigut Liberiamiut oqaluussinermillu suliaqarnerat tapersersorsinnaavagut.
Anne: 1996-imi maajimi pappialat pingaarutillit nassarlugit sisamaalluta immikkoortortaqarfimmiit biilerluta isumannaannerusumut 16 kilometerisut isorartutigisumut aallarnialeruttorluta eqqarput pikitsitsisut anguaat. Saassussisut silaannarmut issuttaqattaarput unitsillutalu. Pingasuulluta biilinit nusulluta anisippaatigut, Paulilu suli biiliniitillugu biilit qimarnguppaat. Tupaqqaqaluta kiserngoruppugut. Sivitsunngitsorli Paulip qaamigut aanaarluni pisulluni ornippaatigut. Aallaqqaammut isumaqaraluarpugut aallaatissimasoq, taamaattoqarsimappalli pisussinnaanavianngikkaluarpoq. Saassussisut ilaata sakkortuumik biilinit anisissimavaa. Qujanartumilli kililaaginnarsimavoq.
Ungasinngitsuani sakkutuut lastbiiliat inunnik ersisunik ulikkaartoq aallarnialerpoq. Silataani inussatsinnik ataqqarluta ilaavugut. Sukkalisaarluni aallarmat katataangajavippugut. Aquttoq suaaraluarparput uneqqullugu, annilaangangaaramili unikkusunngilaq. Tupinnaannartumik nakkarnatalu apuuppugut. Ataniarsimangaarattali sajuttuinnaavugut nukigullu sannerlutik.
Paul: Immitsinnut qiviaratta atisagut alittorsimallutillu ippassimaqaat. Upperisinnaanngingajapparpullu suli uumagatta. Narsaammi qulimiguullip aallaaneqartarsimalluni putunik ulikkaartup eqqaani unnuivugut. Aqaguani tassunga ilaalluta Sierra Leonemukarpugut. Suli ajorata Sierra Leonemut apuukkatta qujamasoqaagut. Qatanngutigulli Liberiamiittut ernumageqaagut.
PIAREERSIMAFFIGINNGISANNIK ATUGAQALERNINNI NAKUSSATSINNEQARPUNGA
Anne: Betelimut Freetownimiittumut ajorata apuuppugut qatanngutitsinnillu isumagilluarneqarluta. Uangali misigisimasatsinnut ajortumik utersaaqqajaavunga. Ullukkut ersillungalu sillimajuaannartarpunga eqqarsarluarsinnaanangalu. Putsup iluaniittutut misigisimajuaannarpunga. Unnuakkut nillertumik kiagullunga uulillungalu itertarpunga, soorlulusooq ajorluinnartumik pisoqassasoq. Anersaarneq ajulertarpunga. Taamaasigaangama Paulip pakkusimaartarpaanga qinoqatigalungalu. Sajukkunnaarnissama tungaanut erinarsuutitsinnik erinarsortarpugut. Misigisarpunga silaarutilerlunga ajoqersuiartortitatullu kiffartorunnaartariaqarlunga.
Taava qanoq pisoqartoq puiunngisaannassavara. Sapaatip-akunnerani tamatumani atuagassiat marluk pivagut. Aappaani, Vågn op! juunip 8-at 1996-imoortumi, allaaserisami annilaanganermik nalaanneqaraanni qanoq iliortoqarsinnaanersoq sammineqarpoq. a Paasilerpara annilaangarujussuarnermik nalaataqarsimallunga. Atuagassiap aappaani, Vagttårnet maajip 15-iat 1996-imoortumi, allaaserisaqarpoq qulequtalimmik “Hvor får de deres styrke fra?” Allaaserisami pakkaluaq sulummigut innarlersimasoq assitarineqarpoq, eqqaaneqarporlu pakkaluaq innarlersimagaluarluni timmisinnaasoq nerisassarsiorlunilu. Taamatuttaaq uagut misigissutsikkut innarlersimagaluarluta Jehovap anersaava iluaqutigalugu allanik ikiuisinnaavugut. Allaaserisat taakku iluaqutigeqaakka, Jehovammi piffissaq eqqorlugu pisariaqartitannik nakussatsippaanga. (Mat 24:45) Tamatuminnga misissuinera allaaserisallu katersukkakka iluaqutigeqaakka. Piffissap ingerlanerani ingasattumik ernumasarunnaariartorpunga.
ALLANNGUINISSAMUT NAKUSSATSINNEQARPUGUT
Paul: Liberiamut tamatigut utersinnaagaangatta nuannaartaqaagut. 2004-p naalernerani ukiuni 20-ngajanni aallartitatut suliassinneqarnitsinni kiffartoreersimavugut. Taamani sorsuuttoqarunnaareersimavoq. Betelimilu sanaartornissamik pilersaarusiuleruttorput. Uagulli allamik suliassinneqariasaarpugut.
Tamanna uagutsinnut oqitsuinnaanngilaq. Qatanngutigut Liberiamiittut asangaakkagut qimakkusunngikkaluaqaagut. Misigereerparput ilaquttagut qimallugit Gileadimut ilinniariartoratta Jehovap qanoq ikioraatigut. Taamaattumik allamik suliassinneqarnerput akueraarput. Ghanamut, Liberiap ungasinngisaanut, aallartussanngorpugut.
Anne: Liberia qimakkatsigu qulligut kuuginnavipput. Tupaallaatigisatsinnik Frankip, qatanngutip utoqqaap silatuup, oqarfigaatigut: “Puigorniartigut!” Ima nassuiaavoq: “Soorunami puigornavianngilatsigut, kisianni suliassamut nutaamut tunniulluinnartariaqarpusi. Qatanngutit tassaniittut sullinneqarnissaat Jehovap piumasaraa.” Taassuma oqaasii iluaqutigeqaagut nunami ilisarisimasaqarfigerpianngisatsinni nutaanik ikinngutitaarnissatsinnut piareerpugut.
Paul: Ingerlaannangajalli Ghanami anersaakkut ilaquttagut nuannaringaalerpagut. Tassani Nalunaajaasorpassuaqarpoq. Ikinngutitaagut anersaakkut aalajaallutillu upperluartut ilinniarfigeqaagut. Ukiuni 13-ini Ghanami kiffartoreerluta tupaallaatigisatsinnik allamik suliassinneqaqqippugut. Afrikap kangiani immikkoortortaqarfimmi Kenyamiittumi kiffartoqquneqarpugut. Soorunami qatanngutit Ghanamiittut Liberiamiittullu maqaaseqaagut, erniinnarli Kenyami nutaanik ikinngutitaartulerpugut. Kenyami Ghanamitulli Liberiamisullu oqaluussinermi suliassarpassuaqarpoq.
KINGUMUT QIVIARNEQ
Anne: Ukiut ingerlaneranni sajorujussuartarlungalu ersisorujussuusarpunga. Navianartorsiorfiusumi ilungersornartorsiorfiusumilu misigisaqarsimaneq timikkut misigissutsikkullu kingunipiloqartitsisinnaavoq. Tamakkununnga tupinnartuliornikkut illersugaanngilagut. Allaat ullumikkut seqqortaartunik akersuuttunillu tusaagaangama naarluummertarpunga assakkalu malugiunnaartarlugit. Ilikkarparali Jehovap nakussatsinniarluta ikiuinera, soorlu qatanngutitta tapersersuinerat, pinngitsoorsinnaanagu. Misigisarparalu atuaqqissaartarneq, qinusarneq, ataatsimiigiartarneq oqaluussisarnerlu aallutiinnarutsigit suliassinneqarnitsinni tunniutiinnannginnissatsinnut Jehovap ikiorsinnaagaatigut.
Paul: Aperineqartarpugut aallartitaasimanerput nuannarineripput. Nunat kusanartorsuusinnaapput navianartuusinnaallutilli. Nuna najugaqarfipput pingaarnerpaajunngilaq. Uppeqatigulli, anersaakkut ilaquttagut, asangaarpagut. Assigiinngitsunik tunuliaqutaqaraluarluta tamatta Jehova assigiimmik misigissuseqarfigaarput. Isumaqaraluarpugut uagut taakku qiimmassariartorlugit aallartitaasugut, taakkuali uagut nakussatsippaatigut.
Jehovap nunarsuaq tamakkerlugu anersaakkut ilaqutaqartimmatigut tupinnartuliaavoq. Sumi tamaani uppeqateqarpugut. Ilagiinnut ilaajuartilluta ilaqutaqarlutalu angerlarsimaffeqarpugut. Qularinngilarput Jehova tatigiuarutsigu pisiariaqartitatsinnik nakussatsikkumaaraatigut. – Flp 4:13.
a Ima qulequtalik: “Panikanfald – hvad kan man gøre?”