1. Apustilip Paulusip ilagiinni kiffartortut qanoq misigis­suseqarfigai?

 ILAGIINNI kiffartortut pingaarutilinnik suliaqartarput. Qatanngutit aalajaatsut taakku Paulusip pingaartippai. Assersuutigalugu kristumiut Filippimiut allaffigigamigit ilagiinni kiffartortut aamma utoqqaanertat immikkut inuulluaqquai. – Flp 1:1.

2. Qatanngutip Luisimik atillip ilagiinni kiffartor­tuunini qanoq isumaqarfigaa?

² Inuusut­tuugaluarunik utoqqaagaluarunil­luunniit qatanngutit angutit amerlasuut ilagiinni kiffartor­tuunertik nuannaarutigingaarpaat. Assersuutigalugu Devan 18-inik ukioqarluni ilagiinni kiffartor­tunngorpoq, Luisili 50-ileereernermi kingorna ilagiinni kiffartor­tunngorluni. Ilagiinni kiffartor­tuunini qanoq isumaqarfiginerlugu ima oqaluttuaraa: “Uppeqatikka ilagiin­niittut taama kiffartuus­sinnaagakkit nuannaarutigingaarpara! Taakkua asannit­tuliungaarfigisimavaannga, maannalu ilagiinni kiffartornikkut asannit­tuliorfigisin­naavakka.” Ilagiinni kiffartortut allarpassuit aamma taama misigipput.

3. Apeqqutit suut sammissavagut?

³ Angutaaguit imermut morsutsitaasimasoq sulili ilagiinni kiffartor­tunngorsimanak tamanna anguniagarisin­naaviuk? Suna kajumis­sissutigilersin­naaviuk? Aamma piukkun­narsisin­naaqqullutit Biibilimi piumasaqaatit suut eqqortit­tariaqarpigit? Allaaserisami matumani apeqqutit taakku akissutis­sarsissavagut. Siullertulli ilagiinni kiffartortut suliassaat sammeqqaariartigit.

 ILAGIINNI KIFFARTORTUP SUUT SULIARISARPAI?

4. Ilagiinni kiffartortup suut suliarisarpai? (Aamma asseq takuuk).

⁴ Ilagiinni kiffartortoq angutaavoq imermut morsutsitaasimasoq utoqqaanertat ilagiinni suliaannik ikiuuttussatut anersaamik illernartumik toqqarneqarsimasoq. Ilagiinni oqaluus­sisartut oqaluus­siffigisar­tagassaannik Biibililersaarutaateqar­nissaannillu isumagin­nittarput. Ataatsimiit­tarfimmi eqqiaaqataasarlutillu aserfal­latsaaliueqataasarput. Aamma ataatsimiinnerni tikilluaq­qusisarlutillu ikiortitut kiffartortarput, nipilerisuusarlutillu isiginnaagassianik aqutsisarput. Ilagiinni kiffartortut pingaar­nerpaamik anersaakkut ittunik pingaar­titsisuugamik taama suliassin­neqartarput. Jehova asavaat taassumalu najoqqutassiai qutsissut malillugit inuullutik. Aamma uppeqatitik asangaarpaat. (Mat 22:37-39) Qatanngutip angutip qanoq ersersis­sinnaavaa ilagiinni kiffartor­tunngorusulluni?

5. Qatanngutip angutip ilagiinni kiffartor­tunngor­nissani qanoq anguniarsinnaavaa?

⁵ Biibilimi paasitin­neqarpugut qatanngut angut ilagiinni kiffartor­tunngorumalluni piumasaqaatinik sunik eqqortitsisariaqarnersoq. (Tim 1. 3:8-10, 12, 13) Ilagiinni kiffartor­tunngornissat anguniagarigukku piumasaqaatit pineqartut misissoq­qissaakkit sapinngisannillu eqqortin­niarlugit. Taamaalior­tinnalli pingaaruteqarpoq pissutiginiakkat, tassa sooq ilagiinni kiffartor­tunngorusun­nerlutit, eqqarsaatigeq­qissaas­sallugu.

SOOQ ILAGIINNI KIFFARTOR­TUNNGORUSUPPIT?

6. Uppeqativit ikiornis­saannut suna kajumis­sissutaassava? (Matiusi 20:28; aamma asseq takuuk).

⁶ Maligas­siuiserput Jiisusi eqqarsaatigeriaruk. Taassuma iliuutsimini tamani kajumis­sissutigiuarpaa Ataataminik asanninnini inunnillu asanninnini. Asanninnini kajumis­sissutigalugu maniguulluni allat suliarerusun­ngisaannik suliaqartarpoq. (Matiusi 20:28 atuaruk; Joh 13:5, 14, 15) Illit asanninnerit kajumis­sissutigigukku anguniakkavit angunissaanut Jehovap ikiorumaarpaatit. – Kor 1. 16:14; Pet 1. 5:5.

7. Sooq allanit pingaar­tinneqarusuin­narluni ilagiinni kiffartor­tunngor­niartoqas­sanngila?

⁷ Nunarsuarmi inuit takoqqusaarlutik imminut pingaartittut inoqatiminnit nuannaar­torineqalersarput.  Jehovalli innuttai taamaaliorneq ajorput. Jiisusi ilaarlugu qatanngutip angutip inoqatiminik asannittup imminut qummut isigeqqunanilu allat naalagaaf­figiniarneq ajorpai. Angut allanit pingaar­nerusorisoq ilagiinni kiffartor­tunngor­tinneqas­sagaluaruni suliassat pingaaruteqarpasin­ngitsut, Jehovalli savaataanik isumassuinermi pisariaqartut, taassuma suliarerusun­navianngilai. (Joh 10:12) Inuk makitasooq imminullu pingaar­tippallaartoq Jehovamit pilluaq­quneqar­navianngilaq. – Kor 1. 10:24, 33; 13:4, 5.

8. Jiisusip apustilini qanoq siunnersorpai?

⁸ Allaat Jiisusip qanimut ikinngutai ilaannikkut eqqunngitsumik pissutiginiagaqarlutik aalajangersimasumik suliaqarusuttarput. Eqqarsaatigeriaruk Jiisusip apustiliisa ilaat marluk, Jaaku Johannesilu, qanoq iliornersut. Taakkua Jiisusi kimigiiserfigaat Guutip kunngeqarfiani pingaarutilimmik inissis­sinnaaneraatsik. Jiisusilli kissaataat akuersaanngilaa. Apustilini aqqaneq-marluk tamaasa ima nassuiaappai: “[Kinaluunniit] akorngassinni annerujumasoq ilissinnut kiffaassaaq. Kinaluunniillu akorngassinni qaffasissumik inissisimaf­feqarusuttoq tamanut inussiaataassaaq.” (Mak 10:35-37, 43, 44) Qatanngutit angutit eqqortumik pissutiginiagaqartut, tassa allanik kiffartuus­serusuttut, ilagiinnut iluaqutaangaassapput. – Tes 1. 2:8.

QANOQ KIFFARTUUS­SERUSUN­NERULERSINNAAVIT?

9. Qanoq kiffartuus­serusun­nerulersinnaavit?

⁹ Soorunami Jehova asavat allallu kiffartuuk­kusullugit. Imaassin­naavorli ilagiinni kiffartortutut suliassat suliarinis­saannut piumassuseqarpal­laanngitsutit. Qanoq kiffartuus­serusun­nerulersinnaavit? Qatanngutinnik ikiuinerup nuannaarnartua eqqarsaatigiuk. Jiisusi ima oqarpoq: “Tunisineq tigusinermit pilluar­narneruvoq.” (ApS 20:35) Taamatut oqaannarani Jiisusip najoqqutassiaq tamanna maleruar­tuarpaa. Jiisusitut illit allanik kiffartuus­sinerit nuannaarutigisinnaavat.

10. Jiisusip kajumilluni allanik kiffartuus­serusunnini qanoq takutippaa? (Makkorsi 6:31-34)

¹⁰ Jiisusip kajumilluni ikiuerusus­suseqarnini qanoq takutikkaa eqqarsaatigeriaruk. (Makkorsi 6:31-34 atuakkit). Ilaanni Jiisusi apustilinilu qasugamik qasuersaalaar­niarlutik sumiiffimmut avinngarusimasumukarput. Inupparpassuilli Jiisusimit ilinniar­tinneqarusullutik taakkunannga siulliullutik apuupput. Jiisusip naaggaarsimasin­naagaluarpai, tassami apustilinilu ‘allaat nerinis­saminnut piffissaqan­nginnamik’. Imaluunniit ilinniar­tilaagin­nariarlugit ingerlaq­qusimasin­naagaluarpai. Jiisusilli asanninnini kajumis­sissutigigamiuk ‘amerlasuunik ilinniar­tilerpai’. Ualinis­saatalu tungaanut ilinniartippai. (Mak 6:35) Imaanngilaq taamaalior­tariaqarami, kisianni nalligigamigit taamaaliorpoq. Asagamigit ilinniar­tikkusuppai. Tassa Jiisusip allanik ikiuinini pilluaatigaa.

11. Jiisusip tusarnaartini qanoq ikiorpai? (Aamma asseq takuuk).

¹¹ Jiisusip inupparpassuit ilinniar­tiinnarnagit aamma timikkut pisariaqar­titaannik isumassorpai. Tupinnar­tuliornikkut nerisas­saqartippai ilinniar­titanilu tusarnaartunut agguaas­sitillugit. (Mak 6:41) Taamaalior­nermigut ilinniartitani allanik kiffartuus­sinissamik ilinniartippai. Aamma taakkununnga takutippaa taamatut ikiuineq – soorlu ilagiinni kiffartortut ikiuisarnerat – qanoq pingaaruteqar­tigisoq. Jiisusi inuit tamarmik naammatsin­nissaasa tungaanut tupinnar­tuliornikkut nerisas­saqartitsisoq suleqatigalugu apustilit qanoq nuannaar­tigisimassasut takorlooruk!  (Mak 6:42) Soorunami imminut tunulliulluni iliuusia taannaan­naanngilaq. Nunarsuarmiitilluni inuunini tamaat inuit kiffartuuppai. (Mat 4:23; 8:16) Jiisusip maniguulluni allanik ilinniar­titsinini isumagin­ninninilu nalerisimaarutigisarpaa nuannaarutigalugulu. Illittaaq ilagiinni kiffartor­tunngoruit kajumillutit kiffartuus­sinissat nuannaarutigingaassavat.

12. Sooq arlaannarpul­luunniit eqqarsas­sanngila ilagiit iluaqutigisin­naasaannik ikiuisin­naanani?

¹² Nikalloqinak misigiguit pikkorif­feqarpal­laarnak. Pinngitsoornak ilagiinni iluaqutaasin­naasunik pikkorif­feqarsimassaatit. Korintimiunut allakkat siulliit 12:12-30 Paulusip allatai eqqarsaatigikkit, ilinnullu qanoq attuumas­suteqarnersut paasilluarsin­naaqqullugu Jehova qinnuigiuk. Paulusip oqaasiinit ersarippoq illit, Jehovap kiffai allat assigalugit, ilagiinni pisariaqar­tinneqarlutillu pingaaruteqartutit. Ilagiinni kiffartortunut piumasaqaatit ilaat eqqortis­sinnaan­ngikkal­larukkit nikalloqinak. Sapinngisannik Jehovamut kiffartorninni iliuuseqartuarit uppeqatitillu ikiortarlugit. Qularis­sanngilat utoqqaanertat maluginias­sagaatsit ilinnullu tulluartunik suliassit­tassagaatsit. – Rom 12:4-8.

13. Ilagiinni kiffartortunut piumasaqaatit amerlanerit kikkut eqqortit­tussaavaat?

¹³ Aamma manna eqqarsaatigeriaruk: Ilagiinni kiffartortunut piumasaqaatit Biibilimi eqqaaneqartut amerlanerit kristumiut tamarmik eqqortit­tussaavaat. Tamatta Jehovamut qanimut attaveqar­nissarput, kajumilluta tunisisar­nissarput Jehovallu iluarisaanik iliuuseqar­tuarnissarput sulissutigisus­saavagut. Taamaattumik ilimanarpoq ilagiinni kiffartor­tunngornermi pisariaqartut amerlanerit pissuserilereersimas­sagitit. Ilagiinnili kiffartor­tunngornissat qanoq sulissutigisin­naaviuk?

QANOQ SULISSUTIGISINNAAGIT

14. ‘Pimoorus­sisuuneq’ qanoq isumaqarpa? (Timuutiusimut 1. 3:8-10, 12)

¹⁴ Maanna piumasaqaatit ilaat sammeriartigit. (Timuutiusimut 1. 3:8-10, 12 atuakkit). Ilagiinni kiffartortoq ‘pimoorus­sisuussaaq’. Tassa akisussaaf­fimminik pingaar­titsisuussaaq, aamma pissuserit­tuullunilu ileqqorit­tuussaaq. Soorunami aamma nuannisarfis­saqartarpoq illarfis­saqartarlunilu. (Oqal 3:1, 4) Akisussaaf­fitilli tamaasa pimoorul­luinnas­savatit. Suliassin­neqarnerit pimoorut­tarukku ilagiin­niittut paasiar­tulissavaat tatiginar­tuusutit ataqqinerulis­sallutillu.

15. ‘Ilumoor­tuusaar­tuunnginneq’ aamma ‘iluanaar­niapilut­tuunnginneq’ qanoq isumaqarpat?

 ¹⁵ ‘Ilumoor­tuusaar­tuunngitsoq’ unneqqarillunilu tatiginartuuvoq. Oqaatsini eqqortittarpai sallulior­tarnanilu. (Uss 17:20) ‘Iluanaar­niapilut­tuunngitsoq’ niuernikkut aningaasatigullu unneqqarissuuvoq. Aamma uppeqatini aningaasatigut iluanaar­niapiluf­figinavianngilai.

16. (a) ‘Viinnisorpal­laartan­nginneq’ qanoq isumaqarpa? (b) ‘Minguitsumik nalunngeqatigin­nissuteqarneq’ qanoq isumaqarpa?

¹⁶ ‘Viinnisorpal­laartan­ngitsoq’ imigassar­tornermi ingasaas­sinaveersaar­tuusarpoq, imigassar­torpallaar­tutullu ilisimaneqartarani. ‘Minguitsumik nalunngeqatigin­nissuteqartoq’ Jehovap najoqqutassiai malillugit inuuvoq. Naammal­luinnan­ngitsuugaluarluta Jehovamut attaveqarluar­nitsigut qamuuna eqqissineq misigisin­naavarput.

17. Qatanngut angut ‘piukkun­narnersoq takuniarlugu misilin­neqaqqaassasoq’ qanoq isumaqarpa? (Timuutiusimut 1. 3:10; aamma asseq takuuk).

¹⁷ Qatanngut angut ‘piukkun­narnersoq takuniarlugu misilin­neqaqqaassaaq’, tassa akisussaaffimmik tunineqar­nermini tatiginar­tuunera uppernarsar­neqassaaq. Taamaattumik utoqqaanertanit suliassin­neqaruit taakkua siunnersuutaat peqatigiis­sortatsinnillu ilitsersuutit naapertorlugit suliarisakkit. Suliassavit qanoq suliarineqarnissaa qaqugulu naammas­sinissaa paasilluaq­qaartakkit. Eqiasuillutit suliassannik naammas­sinnikkaangavit ilagiin­niittut siumukarnerit maluginiassavaat. Utoqqaaner­taasusi, qatanngutit angutit ilinniar­tinnissaat eqqumaf­figisarsiuk. (Timuutiusimut 1. 3:10 atuaruk). Ilagiissinni imermut morsutsitaasimasunik nukappiaraqarpa inuusut­tuaraqarluniluunniit? Taakku namminneq Biibilimik atuaqqis­saartarpat ataatsimiin­nernullu piareersarluar­tarlutik? Ataatsimiinnerni akisarpat oqaluus­seqataasarlutillu? Taamaalior­tarpata ukiuinut naleqquttunik suliassit­tarsigit. Taamaalillutik inuusut­tuaqqat taakku ‘piukkun­narnersut takuniarlugu misilin­neqarsin­naapput’. Taavalu inuusut­tuaraajun­naariar­tornerminni piumasaqaatinik eqqortitsereeramik ilagiinni kiffartor­tunngoriaan­naassapput.

18. ‘Isornaatsumik inuuneq’ qanoq isumaqarpa?

¹⁸ ‘Isornaatsumik inuuguit’ kinaluunniit ingasattumik eqqunngitsulior­nerarlutit ilinnik isornar­torsiuinis­saminut pissutis­saqarnavianngilaq. Soorunami eqqunngitsumik unnerluutigisaasin­naavugut.  Jiisusi eqqunngitsumik unnerluutigineqarpoq, siulittuivorlu malinnitsini aamma taamatut pineqarumaartut. (Joh 15:20) Jiisusili ilaarlugu minguitsumik inooriaaseqarlutit eqqortulior­tuarniaruit ilagiinni iluarineqassaatit. – Mat 11:19.

19. Qanoq paasisariaqarpa allassimammat ‘arnamut ataatsimut uiussasoq’?

¹⁹ ‘Arnamut ataatsimut uiussaaq.’ Jehovap aappariinneq siullerpaaq pilersikkamiuk angut ataaseq arnarlu ataaseq pivai. Katissimanermilu tamanna malittarisassaavoq. (Mat 19:3-9) Angut kristumiu atoqatigiinnikkut eqqunngitsuliun­ngisaan­nassaaq. (Hebr 13:4) Allasiun­nginnissarli pineqaan­nanngilaq. Nuliani ilumoorfigissavaa arnanullu allanut qaninniarujoorfigin­nissanani. – Job 31:1.

20. Qatanngutip angutip ilaquttani anersaakkut qanoq isumagil­luarsinnaavai?

²⁰ “Meeqqaminik illuminiit­tunillu aqutsil­luarsin­naassaaq.” Angerlarsimaffimmi ittuuguit akisussaaffitit pimoorutis­savatit. Ilaqutariittut Biibilimik misissueqatigiin­nissinnik isumagin­nittuusarit. Pisinnaanerit naapertorlugu nuliat meeqqatillu oqaluus­seqatigikulakkit. Meeqqatit namminneq Jehovamut attaveqarluar­neruler­nissaannik ikiukkit. (Ef 6:4) Angutip ilaquttaminik isumagin­nittuusup uppernarsartarpaa ilagiin­niittunik isumagin­nissinnaanini. – Aamma takuuk Timuutiusimut 1. 3:5.

21. Qatanngutaasutit angut, suli ilagiinni kiffartor­tunngorsiman­ngikkuit susinnaavit?

²¹ Qatanngutaasutit angut, suli ilagiinni kiffartor­tunngorsiman­ngikkuit allaaserisami matumani siunnersuutit eqqarsaatigeq­qissaakkit qanorlu iliornissannik Jehovamut qinunikkut ikioqqullutit. Ilagiinni kiffartortunut piumasaqaatit misissoq­qissaakkit eqqortin­nissaallu sulissutigalugit. Jehovamik uppeqatinnillu asanninnerit eqqarsaatigiuk. Asanninnerit nakussatsikkukku kiffartuus­serusun­nerulissaatit. (Pet 1. 4:8, 10) Anersaakkut ilaquttannik ikiuinerup nuannaarnartua misigiuk. Qanortoq ilagiinni kiffartor­tunngor­nissannik sulissutigin­ninnerit Jehovap pilluaqquliuk! – Flp 2:13.