1-2. Utoqqaanertap suut suliarisarpai?

 ILAGIINNI kiffartor­tuuguit ilimanarpoq utoqqaanertanut piumasaqaatit ilarpassuinik eqqortitsilereersimasutit. Uppeqatitit kiffartuun­nerujumallugit utoqqaanertatut kiffartor­nissannik anguniagaqarusuppit? – Tim 1. 3:1.

² Utoqqaanertap suut suliarisarpai? Oqaluus­sisarnermigut maligas­saalluarpoq, aallussilluni qatanngutiminik ilinniar­titsisarlunilu anersaakkut paarsisuuvoq, aamma oqaatsimigut iliuutsimigullu ilagiinnik nakussatsitsisarpoq. Paasinarpoq utoqqaanertat tamaviaartut Biibilimi ‘tunissutaasutut’ taaneqarmata. – Ef 4:8.

3. Qatanngut angut utoqqaaner­tanngussaguni susariaqarpa? (Timuutiusimut 1. 3:1-7; Tittusi 1:5-9)

³ Ilagiinni utoqqaaner­tanngussaguit susariaqarpit? Paaseqqaassavat nalingin­naasumik suliffis­sarsiornertut inngimmat. Suliffinni naliginnaavoq sulisitsisup sulisorerusutani ujartuk­kaminik aalajangersimasunik piginnaasaqarpat sulisussatut akuerisaraa. Utoqqaaner­tanngor­nissalli sulissutigigukku piginnaasaqarnerit, soorlu oqaluus­sillaqqinnerit ilinniar­titsillaq­qinnerillu, naamman­ngillat. Utoqqaanertanut piumasaqaatit Biibilimi allassimasut eqqortit­tariaqarpatit. (Timuutiusimut 1. 3:1-7; Tittusi 1:5-9 atuakkit). Allaaserisami matumani piumasaqaatit taakkua ilaat pingaarutillit sammissavagut. Qatanngut angut qanoq ajunngitsumik tusaamaneqalersin­naanersoq, qanoq angerlarsimaf­fimmini ittuulluarsin­naanersoq qanorlu kajumilluni ilagiinni kiffartuus­silluarsin­naanersoq eqqartus­savarput.

 AJUNNGITSUMIK ILISIMANEQARNEQ

4. ‘Isornaatsumik inuuneq’ qanoq isumaqarpa?

⁴ Utoqqaaner­tanngor­nissannut piukkun­narsissaguit ‘isornaatsumik inuussaatit’, tassa pissuserinnerit pissutigalugu ilagiin­niittunit ajunngitsumik ilisimaneqassaatit. Aamma ‘ilagiit avataan­niittunit ajunngitsumik tusaamaneqassaatit’. Ilimanarpoq upperisat pillugu Nalunaajaasuun­ngitsut isornar­torsius­sagaatsit, kisianni unneqqarinnerpit pissuserin­nerpillu apeqquser­nissaannut pissutis­saqarnavian­ngillat. (Dan 6:5, 6) Manna eqqarsaatigeriaruk: ‘Ilagiin­niittunit aamma ilagiit avataan­niittunit ajunngitsumik tusaamaneqarpunga?’

5. ‘Ajunngitsuliornermik nuannarisaqarnerit’ qanoq ersersis­sinnaaviuk?

⁵ ‘Ajunngitsuliornermik nuannarisaqar­tuuguit’ tamatigut inoqativit ajunngitsortaat maluginiar­tarpatit taakkulu pillugit nersualaar­tarlugit. Aamma piumaffigineqan­ngikkaluaraangavil­luunniit kajumillutit allanut ajunngitsulior­tarputit. (Tes 1. 2:8) Sooq utoqqaanertat taamatut isiginnit­taaseqar­nissaat pingaaruteqarpa? Uppeqatitik anersaakkut isumassor­niarlugit arlaatigullu kiffartuun­niarlugit kajumillutik piffissangaatsiaq atortarmassuk. (Pet 1. 5:1-3) Allanik ikiuineq tamaviaar­narsinnaagaluartoq tamatigut nuannaarutigisarpaat. – ApS 20:35.

6. Qanoq ilaatigut ‘inoroorsaar­toqarsinnaava’? (Hebræerit 13:2, 16; aamma asseq takuuk).

⁶ ‘Inoroorsaar­tuuguit’ allat, aamma qanimut ikinngutigin­ngikkaluarlugit, ajunngitsuliorfigisarpatit. (Pet 1. 4:9) Qinerlerfissiami inuk inoroorsartuusoq ima allaatigineqarpoq: “Angerlarsimaffiata matua – aamma uummataa – takornartanut ammajuaannarpoq.” Manna eqqarsaatigeriaruk: ‘Ilagiinni tikeraartunut inussiar­nersutut ilisimaneqarpunga?’ (Hebræerit 13:2, 16 atuakkit). Inoroorsaartuusup inuit kikkuugaluar­tulluunniit inussiar­nisaarfigisarpai. Assersuutigalugu pigissaar­tuunngitsut, oqalugiariar­torlutik tikeraartartut allallu sapinngisaminnik uppeqatiminnik qiimmas­saaniarlutik kiffartortut – soorlu nakkutilliisut angalasartut – ajunngitsuliorfigisarpai. – Mos 1. 18:2-8; Uss 3:27; Luk 14:13, 14; ApS 16:15; Rom 12:13.

7. Utoqqaanertap aningaaserituujun­nginnini qanoq ersersittarpaa?

⁷ ‘Aningaaserituujun­ngikkuit’ aningaasat pigisallu pingaar­nerpaatinneq ajorpatit. Pisuujugaluaruit  piitsuugaluaruil­luunniit Jehovamut kiffartornerit tamatigut pingaar­nerpaatissavat. (Mat 6:33) Piffissat, nukitit aningaasaatitillu Jehovamut kiffartorninnut, ilaquttannik isumassuininnut ilagiinnilu kiffartuus­sininnut atortarpatit. (Mat 6:24; Joh 1. 2:15-17) Manna eqqarsaatigeriaruk: ‘Aningaasanut qanoq isiginnit­taaseqarpunga? Pigisat pisariaqartut naammagisarpakka? Imaluunniit aningaasarsior­nissara amerlanerusunillu pigisaqar­neruler­nissara eqqarsaatigiuaan­nartarpakka?’ – Tim 1. 6:6, 17-19.

8. ‘Ileqquminik aqutsisinnaaneq’ aamma ‘imminut aqussinnaaneq’ qanoq isumaqarpat?

⁸ ‘Ileqqunnik aqutsisin­naaguit’ ‘imminullu aqussin­naaguit’ inuuninni sutigut tamatigut oqimaaqatigiis­saarilluar­tarputit. Assersuutigalugu nerival­laarneq imerpal­laarnerlu ajorputit. Atisalersoriaatsinnut nujalereriaatsinnullu tunngatillugu aamma aliikkutas­sarsiornermi silatusaartumik aalajangiisarputit. Jehovamut kiffartun­ngitsut ileqqui kristumiunut naleqqutin­ngitsut ilaarneq ajorpatit. (Luk 21:34; Jaak 4:4) Inussiar­niitsumik pineqaraluaruil­luunniit kamaammernak eqqissisimaan­nartarputit. Utoqqaanertaq ‘imerajut­tuunngilaq’. Aamma aalakuun­ngikkaluarluni imerpal­laartartutut ilisimaneqar­navianngilaq. Manna eqqarsaatigeriaruk: ‘Inooriaatsinnit erserpa imminut aqussin­naasunga?’

9. ‘Isumakkut peqqissuuneq’ aamma ‘peqqissaartuuneq’ qanoq isumaqarpa?

⁹ ‘Isumakkut peqqissuuguit’ Biibilimi najoqqutassiat inuunermi qanoq atorneqarsin­naanersut eqqarsaatigeq­qissaar­tarpatit. Taamaat­tuugavit paasisimasaqarlutillu naliliil­luarsin­naassuseqar­tarputit. Inerniliipallannak paasissutissanik pisariaqartunik paasiniaaq­qaartarputit. (Uss 18:13) Tamatuma kingunerisaanik Jehovap eqqarsar­taasianut naapertuuttumik aalajangiisarputit. ‘Peqqissaartuusoq’ aaqqissuus­sillaqqillunilu piffissamik eqqortitsil­luartuusarpoq. Tatiginartutut ilitsersuutinillu maleruaasutut ilisimaneqarputit. Pissuserineqartussat tamakku ineriar­tortikkukkit ajunngitsumik tusaamaneqalissaatit. Maanna utoqqaanertanut ilaqutariinni ittuusunut piumasaqaatit sammeriartigit.

ANGERLARSIMAFFIMMI ITTUULLUARNEQ

10. Angutip qanoq ‘illuminiittut ajunngitsumik aqussinnaavai’?

¹⁰ Nuliaqaruit utoqqaaner­tanngor­titaanis­sannullu piukkun­narserusullutit aamma nuliat meeqqatillu maligas­saalluassapput. Pingaaruteqarpoq ‘illunniittut ajunngitsumik aqussin­naassagitit’. Ittuusutut akisussaaf­feqarnerit pimoorullugulu uiulluartutut ataataal­luartutullu asannittutut ilisimaneqassaatit. Guutisior­nissinnilu sutigut tamatigut siulersuisuussaatit. Sooq tamanna taama pingaaruteqartigaa? Paulusip tamanna ima erseqqissarpaa: “Illuminiittummi aqussin­naanngik­kunigit qanoq ililluni Guutip ilagiiviniittut isumassorsin­naassagamigit?” – Tim 1. 3:5.

11-12. Sooq utoqqaaner­tanngorusuttup meeraasa qanoq pissusilersornerat pingaaruteqarpa? (Aamma asseq takuuk).

¹¹ Suli 18-inik ukioqalin­ngitsunik meeraqaruit taakku “pimoorus­silluin­nartuul­lutillu kajumillutik naalattassapput”. Asannittumik perorsarlugillu ilinniar­tittassavatit. Soorunami pinnguar­tarsinnaapput pequersin­naasassal­lutillu. Ilinnilli ilinniar­tinneqarluaramik naalattuupput, ataqqin­nittuupput pissuseris­saartuul­lutillu. Aamma Jehovamut attaveqarluar­nissaannut, Biibilimi najoqqutassianik maleruaanis­saannut imermullu morsutsitaanis­saminnik anguniagaqar­nissaannut sapinngisat tamaat ikiussavatit.

¹² Utoqqaanertap “meerai uppertuussapput nuannaapilunnermik pikitsitsinermillu unnerluutigineqan­ngitsut.” Meeraq uppertuusoq  suli angajoq­qaaminiittoq ingasattumik ajortuliorpat tamanna ataataata piukkun­narsinissaanut qanoq sunniuteqassava? Meeqqaminik perorsaanerminik ilinniar­titsinerminilu pimoorussinani sumigin­naasimappat ilimanarpoq utoqqaanertatut kiffartorsin­naassan­ngitsoq. – Vagttårnet oktobarip 15-iat 1996-imoortoq, qupp. 21, imm. 6-7 takukkit.

ILAGIINNIK KIFFARTUUSSINEQ

13. Qanoq ersersis­sinnaaviuk ‘uteriitsuunak’ aamma ‘piumasaannartut iliorneq ajortutit’?

¹³ Qatanngutit angutit Kristusitut pissusillit ilagiinnut iluaqutaangaarput. Angut ‘uteriitsuun­ngitsoq’ eqqissisitsisarpoq, allanut tusarnaaq­qissaar­tarlunilu taakkua isumaannik paasiniaasarpoq. Takorlooriaruk utoqqaaner­tanngoreersutit. Taava utoqqaaner­taqatigiit ataatsimiin­neranni amerlanerus­suteqartut isumaqatigiillutik aalajangigaat Biibilip inatsisaanut najoqqutas­siaanul­luunniit akerliun­ngitsoq tapersersorusussaviuk? ‘Piumasaan­narmisut iliorneq ajortoq’ allat isumaannik inissaqar­titsisarpoq arlalinnillu siunnersor­teqarneq pingaar­tillugu. (Mos 1. 13:8, 9; Uss 15:22) Utoqqaanertaq “oqallik­kumatuujus­sanngilaq”, aamma “kamajasuujus­sanngilaq”. Tassa saamallutit allanik ataqqin­nittuussaatit. Eqqisseqatigiis­sitsisuuguit eqqisseqatigiinnissaq angujumallugu siulliullutit iliuuseqar­tassaatit, aamma ilaatigut pissutsini ilungersunarsin­naasuni. (Jaak 3:17, 18) Inussiar­nersumik asannip­palaartumillu oqaaseqarnerit allaat akerlilersuisut saamaneruler­nissaannik kinguneqarsinnaavoq. – Eqq 8:1-3; Uss 20:3; 25:15; Mat 5:23, 24.

14. Angutip ‘uppilerlaajun­nginnera’ aamma ‘ilumoorfigin­nittuunera’ qanoq isumaqarpa?

¹⁴ Qatanngut angut utoqqaaner­tanngor­tinneqartoq “uppilerlaajus­sanngilaq”. Imaanngilaq ukiorpassuarni Nalunaajaasuusimasariaqartutit, anersaakkulli inersimal­luartun­ngornissannut piffissaqar­tariaqarputit. Utoqqaaner­tanngor­tinneqan­nginninni qanorluunniit ilagiinni suliassin­neqaraluarlutit Jiisusi ilaarlugu maniguullutit kajumil­lutillu kiffartor­tuassaatit. Aamma amerlanerusunik suliassin­neqarnissavit tungaanut Jehova  naammagit­tarlutit utaqqissavat. (Mat 20:23; Flp 2:5-8) Aalajaallutit Jehovap iluarisaatut inooriaaseqarnikkut aamma peqatigiis­sortaanit ilitsersuutinik maleruaanikkut ersersis­sinnaavat ‘ilumoorfigin­nittuullutit’. – Tim 1. 4:15.

15. Utoqqaanertaq oqalugial­laqqissuusariaqarpa? Nassuiaruk.

¹⁵ Biibilimi allassimavoq utoqqaanertaq ‘ilinniar­titsinissamut piukkun­nartuussasoq’. Tamanna isumaqarpa oqalugial­laqqissuusariaqartutit? Naamik. Utoqqaaner­taalluartut amerlasuut oqalugial­laqqinngik­kaluarlutik oqaluus­sinermi qatanngutinillu siunnersuinermi ilinniar­titsilluartarput. (Aamma takukkit Korintimiunut 1. 12:28, 29 aamma Efesossimiut 4:11). Ilinniar­titsillaq­qinneruler­nissalli sulissutigiuassavat. Qanoq taamaaliorsinnaavit?

16. Qanoq ilinniar­titsillaq­qinnerulersinnaavit? (Aamma asseq takuuk).

¹⁶ Utoqqaanertaq “Guutip oqaasianik tutsuiginartumik aalajangiusiman­nilluin­nassaaq”. Ilinniar­titsillaq­qissuussaguit tamatigut Guutip oqaasia tunngavigalugu siunnersuil­lutillu ilinniar­titsisassaatit. Biibili Biibililersaarutigullu misissoq­qissaartakkit. (Uss 15:28; 16:23) Allassimaffiit Biibililersaarutitsinni qanoq nassuiar­neqartarnersut maluginiaq­qissaartaruk eqqortumik atorsin­naaqqullugit. Ilinniar­titsigaangavit tusarnaartivit uummataat sapinngisannik killinniartakkit. Aamma utoqqaanertanut misilit­tagaqartunut siunnersoq­qusinnaavutit. (Tim 1. 5:17) Utoqqaanertaq uppeqatiminik ‘qiimmas­saasinnaasariaqarpoq’, aammali ilaannikkut siunnersuisariaqartarpoq allaallu ‘oqaaqqis­saarisin­naasariaqarluni’. Tamatigulli inussiar­nersuussaaq. Ilinniar­titsiserput Jiisusi ilaarlugu saamasuul­lutillu asannit­tuuguit Biibililu tunngavigisarukku ilinniar­titsillaq­qissuussaatit. – Mat 11:28-30; Tim 2. 2:24.

ANERSAAKKUT SIUMUKARTUARIT

17. (a) Ilagiinni kiffartortut utoqqaaner­tanngor­niarnerminni suut iluaqutigisin­naavaat? (b) Utoqqaanertat kikkut utoqqaaner­tanngor­tinneqarsin­naanersut eqqartor­tillugu suna eqqaamassavaat? (Ungalusaq “ Nalilersuinissinni anneruniajuitsuugitsi” takuuk).

¹⁷ Ilagiinni kiffartortut utoqqaanertanut piumasaqaatit misissoreerlugit ilaat immaqa  ajukkullutik misigisin­naapput qaqugumul­luunniit utoqqaaner­tanngorsin­naanaviarnatik. Eqqaamajulli Jehovap peqatigiis­sortaasalu naatsorsuutigin­ngikkaat kukkujuitsuus­sasutit. (Jaak 3:2) Jehovallu anersaavata asseqan­ngitsup piumasaqaatinik eqqortitsinissannut ikiussavaatit. (Flp 2:13) Piumasaqaatit ilaat aalajangersimasoq sulissutigerusuppiuk? Tamanna pillugu Jehovamut ikioqqugit. Sulissutigerusutat nammineq misissoq­qissaaruk, aamma utoqqaanertat ilaat aperiuk inuttut qanoq piukkun­narnerulersin­naanerlutit.

18. Ilagiinni kiffartortut tamarmik qanoq kajumis­saarneqarpat?

¹⁸ Pitsaassaaq ilagiinni tamatta, aamma utoqqaaner­taareersut, allaaserisami eqqartuk­katsinni pissuserineqartussat nuannersut ineriar­tortillugillu sulissutigiuarutsigit. (Flp 3:16) Illit ilagiinni kiffartortuuit? Taava anersaakkut siumukartuarit! Jehova qinnuigiuk ilinniar­teqqullutit ilusilersoq­qullutillu, taamaalillutit taassumunnga ilagiinnullu iluaqutaal­luarnerulissaatit. (Es 64:7) Qularis­sanngilat Jehovap utoqqaaner­tanngor­nissannut piukkun­narsiniarlutit ilungersornerit pilluaq­qussagaa.