1934-mi inun­ngor­punga. Angajoq­qaak­ka, Fred aam­ma Edna Molohan, ukiuni 20-ni Biibilimik Atuaq­qis­saar­tar­tunut (Jehovap Nalunaajaasuinut) ilaareersimap­put. Qujamasuutigeqaara Jehovamut asan­nin­nis­san­nut ilin­niar­tis­simam­man­nga. Taamani Kansasip kujam­mut kip­pasis­sor­taani il­loqarfeeq­qami, Parsonsimi, najugaqar­pugut. Tas­sani ilagiin­niit­tut tamangajam­mik tanitaap­put. Ilaqut­tavut ataatsimeeqataajuaan­narlutil­lu oqaluus­seqataajuaan­nar­put. Arfinin­ngor­nik­kut ualik­kut tamanut oqaluus­sisar­pugut. Ilaan­nik­kut qasusaqaagut, naam­mas­sigaangat­tali ataatama sikumik pitsit­tar­paatigut.

Ilagiin­ni ikit­tun­nguuvugut, isorar­tungaatsiar­tumil­li il­loqarfeeq­qanik narsaatilin­nil­lu oqaluus­sif­figisar­tagaqarluta. Narsaatil­lit Biibililersaarutinut aningaasanik akiliuteqaratik naatitamin­nik, man­nin­nik nutaanik kuk­kukuuaq­qanil­luun­niit tunisar­paatigut. Ataatap Biibililersaarutit akilereer­taramigit nerisas­sat tunis­sutigineqar­tut iluaqutigisar­pavut.

Angajoq­qaak­ka oqaluus­sinermi ator­tak­kamin­nik oqalut­tar­tuuteqar­put. Uangali ator­nis­saanut suli mikival­laar­punga, pulaaq­qiiner­nili Biibilimil­lu atuaq­qis­saaqateqar­nermi angajoq­qaak­ka ikior­tar­pak­ka qatan­ngutip Rutherfordip oqalugiaataa aal­lar­til­lugu.

Ataata højtalerersuarmik biilit­ta, Ford 1936-r­nisap, qaavanut ik­kus­sivoq. Taman­na oqaluus­sinermi iluaqutaaqaaq. Tamatigut nipilersuutinik ap­peq­qaar­tar­pugut inuit us­sagar­tin­niarlugit, taava Biibili tun­ngavigalugu oqalugiaat ap­pit­tar­par­put. Naagaangat inun­nut soqutigin­nit­tunut atuagas­sianik agguaasar­pugut.

Ilaan­ni sapaam­mi il­loqarfeeq­qami Cherryvalemi Kansasimiit­tumi biilit højtaleril­lit naatsiivis­suarmut ataatap inis­sip­pai. Politiinil­li oqarfigineqar­poq biilit naatsiivis­suarmeeq­qusaan­ngitsut. Ataatap biilini aq­qusinermut naatsiivis­suup eq­qaanut inuit tusaal­luarsin­naasaan­nut inis­sip­pai. Taamaat­toqaraangat  ataata angajoralu Jerry ilagalugit pis­sanganar­tuaan­nar­poq.

Taamani angalaarfigisar­tak­kat ilaan­ni inun­nit akerlilersor­neqaqaluta im­mik­kut suliniar­nermi oqaluus­sisar­pugut. Oqareer­nit­tut un­nuak­kut makeriarluta nipaarsaarluta naqitaaq­qat atuagas­siaaq­qal­lu inuit matuisa ataan­nut ilisisar­pugut. Taamaalioreeraangat­ta il­loqarfiup silataani tamat­ta naapit­tar­pugut politiinit tigusaasoqarsiman­ngin­nersoq qulak­keer­niarlugu.

Oqaluus­seriaatsit­ta ilaat al­la pis­sanganar­toq tas­saavoq al­lagar­tarsualisarluta il­loqarfik­kut ingerlaaqatigiin­neq. Eq­qaamavara pif­fis­sat ilaan­ni qatan­ngutit il­loqarfitsin­nukaasut al­lagar­tarsualisarlutik ima al­las­simasumik: “Up­perisarsior­neq napititsiniutaavoq peq­qusersior­tuul­lunilu.” Uagutsin­nit aal­lar­til­lutik kilometerit ataaseq af­farlu il­loqarfik­kut ingerlaar­put uteq­qil­lutil­lu. Qujanar­tumil­lu unitsin­neqan­ngil­lat, inup­pas­suil­li susoqar­neranik as­sut alaper­naaser­put.

Ilaqutariil­luta Texasimut ataatsimeersuariarluta angalasar­pugut. Ataata qimut­tuitsoqarfim­mi sulisarmat akeqan­ngitsumik ilaal­luta ataatsimeersuariar­tarlutalu ilaqut­tavut tikeraar­tar­pavut. Angaga Fred Wismar nulialu Eulalie il­loqarfim­mi Templemi Texasimiit­tumi najugaqar­put. Angam­ma 1900-kkut aal­lar­tilaar­tut inuusut­tuul­luni sal­lusuis­sut ilik­kar­paa. Kuisip­poq ilik­kak­kanilu pil­lugit ilaqut­tani, ilaatigut anaanaga, oqaluus­sif­figalugit. Angaga Fred ilagiin­nik nak­kutil­liisuugami qatan­ngutinit Texasimeersunit ilisarisimaneqarluar­poq. Inus­siar­nersuuvoq, nuan­naar­tuul­luni aal­lus­sil­luar­tuul­lunilu uan­nul­lu maligas­saal­luar­tuul­luni.

1941-mi St. Louisimut, Mis­sourimiit­tumut ul­luni arlalin­ni ataatsimeersuarfiusus­samut aal­lar­pugut. Qatan­ngutip Rutherfordip oqalugiaataanut “Kongens Bør­n”-inut tusar­naarluaq­qul­luta meeq­qat tamarmiul­luta oqalut­tarfiup saavanut ingeq­quneqar­pugut. Oqalugiaataata naaler­nerani inuusut­tut 15.000-t tupaal­latsin­neqangaatsiar­put. Qatan­ngutip Rutherfordip ikior­taasalu tamat­ta im­mik­kut atuak­kamik nutaarluin­narmik Børn-imik taaguutilim­mik tunivaatigut.

Apriilimi 1943-mi Cof­feyvil­lemi Kansasimiit­tumi ataatsimeersuar­neq najuuf­figaar­put ima qulequtalik: “Opfordring til virksomhed.” Tas­sani ilagiit tamarmik Teokratiimik Ilin­niarfeqalis­sasut nalunaarutigineqar­poq atuagas­siaaq­qamil­lu 52-inik ilin­niagas­sar­talim­mik tunisil­luta. Ukiumi tas­sani ilagiitsin­ni Teokratiimik Ilin­niarfim­mi siul­ler­paamik pisas­sin­neqar­punga. Aam­ma marluk al­lat ilagalugit tasin­nguami nil­ler­tumi kuisik­kama ataatsimeersuar­neq taman­na uan­nut im­mik­korluin­naq it­tuuvoq.

1951-imi ilin­niar­ner­tuun­ngor­niarfim­mi naam­mas­sigama aalajanger­tariaqaler­punga inuunera qanoq ator­niar­nerlugu. Qatan­ngutiga Jerry Betelimi kif­far­tor­tuunikuuvoq. Uangat­taaq Betelimi kif­far­torusuk­kama qin­nuteqar­punga. Erininarserian­ngitsoq Betelimut qaaq­qusaavunga marsil­lu qulingan­ni 1952-imi aal­lar­til­lunga. Eq­qorluin­nar­tumik aalajangiisimavunga taman­nami tamak­kiisumik Guutimut kif­far­tor­nin­nut iluaqutigaara.

Atuagas­siat Biibililersaarutil­lu al­lat naqiter­neqar­neran­ni ikiuuk­kusul­lunga naqiterivim­mi sulinis­sara kis­saatigigaluar­para. Taamaat­toqan­ngilarli. Saqisutut kingor­nalu igaf­fim­mi suliler­punga. Suliak­ka nuan­naraak­ka ilik­kagaqarfigeqalugil­lu. Kingoraar­taal­luta sulisarat­ta nalunaaqut­tap-akun­ner­paaluini sulin­ngif­feqar­nin­ni Betelimi atuagaateqarfim­miikulasar­punga atuaq­qis­saar­tarlungalu. Taman­na up­per­nin­nut nakus­satsis­sutigaara Jehovalu ikin­ngutitut qanin­nerulerlugu. Jehovamut kif­far­torlunga sapin­ngisamik sivisuner­paamik Betelimiin­niarlunga aalajangiusimaneruler­para. Jerryp Beteli 1949-mi qimap­paa Patricialu katil­lugu, Brooklynil­li qanit­tuani najugaqaramik Betelimi suli nutaajutil­lunga ikiorlungalu qiim­mas­sar­tar­paan­nga.

Betelimut pinim­ma kingunin­ngua qatan­ngutit Betelimi kif­far­tor­tunik oqalugiar­tar­tus­sarsior­put. Qatan­ngutit al­latsit­tut ilagiin­nut ilaatigut Brooklynimit 320 kilometerisut ungasitsigisumiit­tunut tikeraar­tus­san­ngorlugit suliak­ker­neqar­put. Tikeraarfigisamin­ni tamanut am­masumik oqalugiar­tus­saap­put ilagiil­lu oqaluus­seqatigalugit. Qatan­ngutinut taak­kunun­nga uanga ilaavunga.  Pis­sangal­lunga ilagiin­nut tikeraar­punga tamanul­lu am­masumik akun­nermik ataatsimik oqalugiaateqarlunga. Qimut­tuitsorlunga ilagiit tikeraar­tar­pak­ka. 1954-imi ukiuk­kut sapaat ualiugaa puiun­ngisaan­nar­para. New Yorkimut utis­sal­lunga qimut­tuitsunut ikivunga un­nuler­nerani Betelimut apuutis­sangal­lunga. Aal­larlutalu anorersuar­torsuan­ngor­poq apisorsuan­ngorlunilu. Qimut­tuitsuni kal­lerup-in­nera qamit­toor­poq. Aatsaal­lu ataasin­ngor­nerup ul­laas­saani tal­limanut New Yorkimut tikip­punga. Brooklynimut kiisami apuuk­kama ingerlaan­naq igaf­filiar­punga suliar­torlunga. Inor­tuilaar­punga un­nuarlu tamaat sinin­neqan­ngin­nama qasoqaanga. Ilagiit kif­far­torfigisimasak­ka qatan­nguter­pas­suil­lu angutit ar­nal­lu naapis­simasak­ka uan­nut nuan­naarutaangaar­nerat pil­liutigisimasan­nit tamanit naleqar­nerungaar­poq.

Ukiuni siul­ler­ni Betelimiin­nin­ni sapaatit-akun­neri tamaasa radiok­kut aal­lakaatitsivitsin­ni WBBR-ik­kut Biibilimik atuaq­qis­saar­nermik aal­lakaatit­tak­kamut ilan­ngup­punga. Aal­lakaatitsivik Columbia Heights 124-mi quleriit al­ler­paap tul­liani inis­sisimavoq. Qatan­ngut Alexander H. Macmil­lan, ukior­pas­suar­ni Betelimi kif­far­torsimasoq aal­lakaatitas­sianut taak­kunun­nga peqataak­kajut­tar­poq. “Qatan­ngut Mac”-imik taasar­par­put. Uagutsin­nut inuusut­tunut Betelimi kif­far­tor­tunut naak unam­miniar­nar­tor­pas­suit nalaat­taraluarlugit aalajaat­tuarmat maligas­saal­luar­poq.

1958-imi nutaamik sulias­sin­neqar­punga, Ilin­niarfim­mi Gileadimi soraarum­meer­tut qanimut sul­lit­taler­pak­ka. Qatan­ngutit angutit ar­nal­lu aal­lus­sil­luar­tut taak­ku visum­mis­saat pis­sarsiariniar­tar­pak­ka angalanis­saal­lu aaq­qis­suut­tarlugu. Tim­misar­tumik angalaniar­neq taamanik­kut akisoorujus­suuvoq ajoqersuiar­tor­tital­lu Afrikamut Asiamul­lu angalaniar­tut amerlanerit umiarsuarmut as­sar­tuum­mut ilaal­lutik angalasariaqar­tar­put. Ukiualuil­li qaangium­mata tim­misar­tumik angalaniar­neq akikin­nerulermat ajoqersuiar­tor­titat nuuf­fis­samin­nut tim­misar­tumik angalasaler­put.

1961-imi ataatsimeersuar­nis­samut nunanit tamalaanit peqataaf­figineqar­tus­samut USA-miit Europamut angalanis­samik 1960-imi aaq­qis­suus­sisaler­punga. Hamborgimi Tysklandimiit­tumi ataatsimeersuar­nerit ilaan­nut tim­misar­torlunga peqataajar­tor­punga. Ataatsimeersuareer­nerup kingor­na qatan­ngutit Betelimi kif­far­tor­tut pingasut al­lat ilagalugit biilinik at­tar­toriarluta Italiamukar­pugut, Romamilu im­mik­koor­tor­taqarfik alak­karlutigu. Taava Frankrigimukar­pugut tas­san­ngaan­niil­lu Pyrenæerit qaq­qai aq­qusaarlugit Spaniamut, suliatsin­nik iner­teq­qutaaf­fiusumut, ingerlaq­qil­luta. Qatan­ngutit Barcelonamiit­tut Biibililersaarutinik tunis­sutis­satut poor­tuk­katsin­nik tunivavut. Naapisimaaratsigit nuan­neqaaq. Taava Amsterdamimut biilerluta ingerlaq­qip­pugut New Yorkimul­lu tim­misar­tumik uterluta.

1962-imi qatan­ngutit ar­nat angutil­lu 583-iusut, nunarsuarmi sumi tamani 1963-imi ataatsimeersuar­ner­nut im­mik­kut it­tunut nunanit tamalaaneersunit peqataaf­figineqar­tus­sanut, angalanis­saat aaq­qis­suut­tus­san­ngor­para. Peqataatitat Europami, Asiami  aam­ma Maneras­suup kujataatungaani ataatsimeersuar­nerit najuuf­figisus­saavaat, kingor­nalu Honolulumut Hawaiimiit­tumut naggataatigul­lu Pasadenamut Califor­niamiit­tumut ingerlaq­qis­sal­lutik. Aam­ma nunat Biibilimi eq­qaaneqar­tut takor­nariarlugit Libanoni Jordanilu angalaf­figisus­saavaat. Tim­misar­tumik angalanis­sat akun­nit­tarfiit visum­mil­lu pisariaqar­tut al­laf­fitsin­nit aaq­qis­suun­neqar­put.

Ukioq 1963 uan­nut im­mik­kuul­laris­suuvoq. Juunip 29-an­ni Lila Rogers Mis­sourimeersoq, 1960-imi Betelimiilersoq, katip­para. Katik­kat­ta sapaatip-akun­nera qaangium­mat ataatsimeersuariat ilagalugit Lilalu nunarsuaq kaajal­lal­lugu angalaqataavugut, ilaatigut Grækenlandi, Egypteni aam­ma Libanoni tikeraar­pavut. Taava sivikitsumik tim­misar­torluta Jordaniliar­pugut, naak suliar­put tas­sani iner­teq­qutaagaluar­toq, Jehoval­lu Nalunaajaasuisa visum­mis­saat pisor­tanit akueriumaneqar­tan­ngik­kaluar­tut. Taamaat­tumik tikik­kut­ta qanoq pisoqas­sanersoq ilisiman­ngilar­put. Takorlooriaruk qanoq nuan­naar­tigalutalu tupaal­latsigisugut tim­misar­toqarfiup isaariaani qatan­ngutit angutit ar­nal­lu eqimat­tat takugatsigit “Jehovap Nalunaajaasui tikil­luaritsi”-mik al­las­simasumik al­lagar­tarsualisar­tut. Nunat Biibilimi eq­qaaneqar­tut, Aaperaap, Iisaap Jaakul­lu nunagisimasaat, aam­ma Jiisusip apustilil­lu oqaluus­sif­figisimasaat, taavalu kristumiut “nunarsuup isua tikil­lugu” oqaluus­sinermik aal­lar­tif­figisimasaat tikeraarlugit tupin­naqaaq. – ApS 13:47.

Ukiuni 55-ini Lila suliatsin­ni tamani aalajaal­luni sanin­niit­tuarsimavoq. Spania Por­tugalilu, suliat­ta iner­teq­qutaanerata nalaani, arlaleriarluta tikeraarfigisar­pavut. Qatan­ngutivut qiim­mas­sarsin­naasar­pavut aam­ma Biibililersaarutinik al­lanil­lu pisariaqar­titaan­nik nas­saat­tarlugit. Al­laat qatan­ngutivut Cádizimi Spaniamiit­tumi par­naarus­sivim­miit­tut pulaarsin­naasimavavut. Nuan­naarutigingaar­para oqalugiaam­mik qiim­mas­sarsin­naagak­kit.

1963-imiit Afrikami, Australiami, Amerika Kujal­lermi qiterlermilu, Europami, Kangia Ungal­lermi, Hawaiimi, New Zealandimi Puer­to Ricomilu ataatsimeersuariar­tut angalanis­saat aaq­qis­suut­tarsimavak­ka. Lilalu ataatsimeersuar­nerit puiunaatsor­pas­suit najuuf­figisar­nikuuavut, soorlu 1989-imi Warszawami Polenimiik­kat­ta. Tas­sani qatan­nguter­pas­suit Ruslandimeersut najuup­put. Taman­na taak­kunun­nga ataatsimeersuar­neruvoq siul­ler­paaq! Aam­ma qatan­ngutit ar­nat angutil­lu up­perisar­tik pis­sutigalugu ukior­pas­suar­ni Sovjetunionimi par­naarus­saaq­qasimasut naapip­pavut.

Nuan­naarutiginer­paasam­ma ilagaat Betelimi najugal­lit nunarsuarmilu tamani ajoqersuiar­tor­titat tikeraas­sal­lugit qiim­mas­sas­sal­lugil­lu. Taamatut angalanitsin­ni kingul­lermi Korea Kujal­leq tikeraar­par­put. Tas­sani qatan­ngutivut Suwonimi par­naarus­saaq­qasut 50-it pulaar­pavut. Tamarmik isumal­luaqaat kil­lilersor­neqaratil­lu Jehovamik kif­far­tor­nis­sar­tik qilanaaralugu. Taak­kunun­nga pulaar­ner­put qiim­mas­saatigeqaar­put! – Rom 1:11, 12.

Ukior­pas­suit ingerlaneran­ni Jehovap in­nut­tani qanoq pil­luaq­qusarai takusar­para. 1943-mi  kuisik­kama oqaluus­sisar­tut 100.000-t mis­saan­niip­put. Ul­lumik­kut nunani 240-ni Jehovamut kif­far­tor­tut 8.000.000-init amerlanerulersimap­put. Gileadimit ajoqersuiar­tor­titat suliarujus­suat siuariar­nermut pis­sutaaqataavoq. Ajoqersuiar­tor­titar­pas­suit taak­ku qanimut suleqatigisin­naagak­kit oqaluus­sif­figisas­saan­nul­lu apuun­nis­saan­nik ikiorsin­naagak­kit nalerisimaarutigeqaara.

Qujamasuutigeqaara suli inuusut­tuutil­lunga Jehovamut kif­far­tor­niarlunga aalajangersimagama Betelimul­lu qin­nuteqarsimagama. Ukiuni taak­kunani Jehovap pil­luaq­qungaarsimavaanga. Betelimi kif­far­tor­nit­ta saniatigut ukiut 50-it sin­nerlugit Brooklynimi ilagiit as­sigiin­ngitsut peqatigalugit oqaluus­sisar­ner­put Lilalu nuan­naarutigisaqaar­put, ilumoor­tunil­lu ikin­ngutitaar­torsimavugut.

Betelimi Lila tapersersor­tigalugu ul­lumimut al­laat kif­far­tor­punga. Naak maan­nak­kut 84-inik ukioqaleraluarlunga nuan­naarutigisar­para im­mik­koor­tor­taqarfin­nut at­tavigin­nit­tar­tutut suliaqar­titaasin­naagama.

Jehovap peqatigiif­fianut tupin­nangaar­tumut ilaal­luni pil­luaq­qus­sutaangaar­poq. Malaki 3:18-imi oqaatsit imaat­tut eq­quup­put: “Taava kingumut im­mik­koor­tis­sin­naan­ngus­savarsi iluar­toq iluan­ngitsumit, tas­sa Guutimik kif­far­tuus­sisoq kif­far­tuus­sisuun­ngitsumit.” Ul­lut tamaasa takusin­naavar­put Saatanip silarsuaa ajorsiar­tor­toq inuil­lu neriuuteqaratil­lu pil­luan­ngitsut. Jehovamil­li asan­nit­tut kif­far­tor­tul­lu naak ul­lut atugarliungaarfiugaluar­tut pil­luarlutik siunis­samilu neriuuteqarlutik inuup­put. Ilumul­limi tusagas­samik nuan­nersumik al­lanut tusarlius­sisin­naaneq pisin­naatitaaf­fiuvoq nalis­saqan­ngitsoq. (Matt 24:14) Guutip naalagaaf­fiata er­niin­naq silarsuatoqaq paratiisimik taarsis­savaa. Erininas­susia! Taamanik­kus­samut kinaluun­niit peq­qil­luin­narlunilu naas­saan­ngitsumik pil­luangaas­saaq.