ATUAQQISSAAGASSAQ 42
Jehovap atorumallutit sunngortissavaatit?
‘Guuti tassaavoq ilissinni sunniisoq piumassuseqartittarlusi naammassisaqartittarlusilu.’ – FIL 2:13.
ERINARSUUT 2 Jehova ateraat
QILANAARTUUT *
1. Piumasani naammassiumallugu Jehova susinnaava?
JEHOVA piumasani naammassiumallugu pisariaqarnera naapertorlugu sunngorsinnaavorluunniit. Assersuutigalugu tassaalersimavoq Ilinniartitsisoq, Tuppallersaasartoq aamma Iivangkiiliulersaartoq. (Es 48:17; 2 Kor 7:6; Gal 3:8) Taamaattorli piumasani naammassiumallugu inuit atortarpai. (Matt 24:14; 28:19, 20; 2 Kor 1:3, 4) Aamma Jehovap piumasani naammassiumallugu pisariaqartumik ilisimassuseqalersissinnaavaatigut nakussatsillutalu. Tamakku tamarmik Jehovap aqqata isumaanut ilaapput, soorlu ilisimatuut arlallit taama isumaqartut.
2. (a) Sooq Jehovamit atorneqarnerput ilaannikkut qularutigisinnaavarput? (b) Allaaserisami matumani suut sammissavavut?
2 Tamatta Jehovamit atorneqarnissarput kissaatigaarput, ilattali qularisinnaavaat Jehovamit atorneqarlutik. Sooq? Ukiutik, atugarisatik imaluunniit pisinnaasatik pissutigalugit kissaatigisamissut iliuuseqarsinnaannginnamik. Allalli iliuuserisimasatik naammagisimaartarpaat takusinnaanagulu iliuuseqarnerusariaqarlutik. Allaaserisami sammissavarput Jehovap piumasaanik tamatta naammassinneqataasinnaaqqulluta qanoq piginnaanngorsarsinnaagaatigut. Taava Jehovap kiffani, angutit arnallu, Biibilimi eqqaaneqartut qanoq piumassuseqartillugillu naammassisaqartissimagai sammissavavut. Kiisalu, Jehovamit atorneqarusulluta qanoq ersersissinnaaneripput paasissavarput.
JEHOVAP QANOQ PIGINNAANNGORSARAATIGUT
3. Filippimiut 2:13 naapertorlugu Jehovap qanoq iliuuseqarnissamut piumassuseqartissinnaavaatigut?
3 Filippimiut 2:13 atuaruk. * Jehovap iliuuseqarnissamut piumassuseqartissinnaavaatigut. Qanoq taamaaliorsinnaava? Immaqa ilagiinni arlaatigut pisariaqartitsisoqartoq paasivarput. Ilagiinniluunniit allani pisariaqartitsisoqarnera pillugu immikkoortortaqarfimmiit allakkat utoqqaanertat atuarpaat. Tamanna ima imminut aperinissatsinnut killinneqaatigisinnaavarput: ‘Qanoq ikiuutaasinnaavunga?’ Imaluunniit unamminiarnartumik suliassinneqarsimavutit naammassilluarsinnaanerillu qularutigalugu. Biibilimilluunniit atuarninni ima eqqarsarsimasinnaavutit: ‘Biibilimi atuakkakka allanik ikiuinissannut qanoq atorsinnaavakka?’ Jehovap pinngitsaalilluta iliuuseqartinnavianngilaatigut. Takugaangamiulli qanoq iliuuseqarsinnaanerluta eqqarsaatigigipput piumassuseqalersissinnaavaatigut iliuuseqalersilluta.
4. Jehovap qanoq naammassisaqartissinnaavaatigut?
4 Jehovap aamma naammassisaqartissinnaavaatigut. (Es 40:29) Anersaani illernartoq aqqutigalugu pikkoriffigeriikkavut pitsaanerulersissinnaavai. (2 Mos 35:30-35) Peqatigiissortani aqqutigalugit Jehovap iliuuserisassatta suliarinissaanut ilinniartissinnaavaatigut. Suliannut tunngatillugu nalornissuteqaruit ikioqqusinnaavutit. Aamma qaqugukkulluunniit Ataatarput qilammiusoq tukkortoq ‘pissaanermik asseqanngitsumik’ qinnuigisinnaavat. (2 Kor 4:7; Luk 11:13) Biibilimi angutinik arnanillu Jehovap piginnaanngorsarsimasaanik assersuutissarpassuaqarpoq. Taakkua ilaat sammitillugit eqqarsaatigiuk aamma illit Jehovap qanoq piumassuseqartillutillu naammassisaqartissinnaagaatit.
JEHOVAP ANGUTIT SUNNGORNISSAANNUT IKIORAI
5. Mosesi qanga aniguisitsisussatut atorneqarsinnaalerpa, tamatumanilu Jehova pillugu suna ilikkarparput?
5 Jehovap Mosesi Israelikkunnik anigusitsisunngortippaa. Kisiannili qanga atorsinnaalerpaa? ‘Egyptenimiut ilisimassusiannik tamanik ajoqersorneqareernermi’ kingorna Mosesi piareersimasutut misigimmat? (ApS 7:22-25) Naamik, Jehovap Mosesi maniguunnissamik saamasuunissamillu ilusilersoreeramiuk aatsaat atorpaa. (ApS 7:30, 34-36) Mosesi Egyptenimi pissaaneqarnerpaamut sassarsinnaaqqullugu sapiissuseqartippaa. (2 Mos 9:13-19) Jehova pillugu suna ilikkarparput? Imminik ilaarsiniartut tatiginnittullu atortarpai. – Fil 4:13.
6. Jehovap Barzillaji aqqutigalugu Daavimik ikiuineranit suna ilikkarparput?
6 Ukiorpassuit qaangiummata Jehovap Barzillaji aqqutigalugu kunngi Daavi, ernerminit Absalomimit qimaasoq, ikiorpaa. Daavi sakkutuuilu ‘kaapput qasullutillu imerusullutik’. Barzillajip utoqqanngorsimasup allat ilagalugit Daavi taassumalu ilagisai pilersorniarlugit inuunertik navianartorsiortippaat. Barzillaji isumminngilaq utoqqalinini pissutigalugu Jehovamit atorneqarsinnaajunnaarluni. Guutilli kiffaanik pisariaqartitsisunik tukkorluni ikiuivoq. (2 Sam 17:27-29) Suna ilikkarparput? Qassinilluunniit ukioqaraluarutta Jehovap uppeqatitsinnik pisariaqartitsisunik, sumiiffitsinniittunik nunamiluunniit allamiittunik, ikiuinermut atorsinnaavaatigut. (Uss 3:27, 28; 19:17) Toqqaannartumilluunniit ikiuisinnaanngikkaluarutta immaqa pisariaqartitsiffiusunut aningaasatigut nunarsuaq tamakkerlugu suliniarnermut tapeeqataasinnaavugut. – 2 Kor 8:14, 15; 9:11.
7. Jehovap Simmiuut qanoq atorpaa, aamma sooq tamanna qiimmaallaatigaarput?
7 Jehovap Simmiuut, angut utoqqaq aalajaatsoq Jerusalemimiittoq, neriorsorsimavaa toqutinnani Missiarsi takussagaa. Neriorsuut tamanna Simmiuup qiimmaallaatigisimassavaa, ukiorpassuarnimi Missiarsi utaqqisimavaa. Uppernini pinertusaarninilu pillugit pilluaqquneqarpoq. Taamaalluni “anersaamit kajumilersinneqarluni naalaffimmukarpoq” Jiisusilu naalungiarsuusoq takullugu. Jehovallu meeraq taanna Kristusinngortussaq pillugu Simmiuut siulittuisippaa. (Luk 2:25-35) Jiisusip nunami kiffartornerata aallartinnera sioqqukkunarlugu Simmiuut toquvoq, taamaakkaluartoq Jehovamit atorneqarnini qujamasuutigaa. Siunissamilu nuannersorpassuarnik misigisaqarumaarpoq! Silarsuartaassami angutip taassuma aalajaatsup Jiisusip naalakkersuinerata nunami inunnut tamanut qanoq pilluaqqussutaanera misigiumaarpaa. (1 Mos 22:18) Aamma uagut Jehovap qanorluunniit pisinnaatitaaffileraluarpatigut qujamasuppugut.
8. Barnabap atorneqarsimaneratut Jehovap qanoq atorsinnaavaatigut?
8 Kristumiut siulliit nalaanni angut Josefimik atilik tukkortoq Jehovamit atorneqarnissaminik periarfissiivoq. (ApS 4:36, 37) Allanik tuppallersaallaqqinnera pissutigigunarlugu apustilit Barnabamik, “Tuppallersaatip erneranik” isumaqartumik, taasarpaat. Assersuutigalugu Saulusip kristumiunngornerata kingorna ilagiinnik malersuisutut tusaamaneqarnera pissutigalugu qatannguterpassuit taanna orninnissaat annilaangatigaat. Barnaballi Saulusi tuppallersarlugulu ikiorpaa taassuma qujamasuutigeqisaanik. (ApS 9:21, 26-28) Kingusinnerusukkut Jerusalemimi utoqqaanertat paasivaat qatanngutit ungasissumiittut, Antiokiami Syriamiittut, qiimmassarneqarnissaminnik pisariaqartitsisut. Kina qiimmassaajartortippaat? Barnaba! Toqqaalluarpullu, Barnabammi tamaasa “nakimaatsumik uummateqarlutik Naalagaq attavigeqqullugu” qiimmassarpai. (ApS 11:22-24) Aamma nalitsinni Jehovap uppeqatitsinnut tuppallersaasunngortissinnaavaatigut. Assersuutigalugu toqukkut asasaminnik annaasaqarsimasunut tuppallersaanissamut atorsinnaavaatigut. Aamma napparsimasumik isumatsaqqasumilluunniit qiimmaallaataasumik pulaarnissamut sianernissamullu killissinnaavaatigut. Barnabap atorneqarsimaneratut illit Jehovamit atorneqarusuppit? – 1 Th 5:14.
9. Vasilijip anersaakkut paarsisuulluartunngornissaanut Jehovamit ikiorneqarnera qanoq ilinniarfigisinnaavarput?
9 Jehovap qatanngut angut Vasilijimik atilik anersaakkut paarsisuulluartunngornissaanut ikiorpaa. Vasilij 26-nik ukioqarluni utoqqaanertanngorami misigivoq ilagiinniittunik, ingammik qatanngutinik ajornartorsiungaartunik, anersaakkut ikiuinissaminut misilittagaqarpiarnani. Utoqqaanertalli misilittagaqarluartut aamma Naalagaaffimmut Kiffartornermik Ilinniarfik aqqutigalugit iluaqutaasumik ilinniartinneqarpoq. Vasilijip pimoorussilluni utoqqaanertaalluarnissani sulissutigaa. Assersuutigalugu iliuuserisinnaasani annikitsunnguit allattorpai. Angusaqaraangami ernumanini qaangeriartuaartarpaa. Maanna ima oqarpoq: “Siornatigut ernumassutiga maannakkut nuannaarutigingaarpara. Qatanngutit arlaat ilagiinniittoq tuppallersarniarlugu allassimaffinnik naleqquttunik nassaarniaraangama Jehovap ikiuisarnera iluarisimaaqaara.” Ilissi qatanngutaasusi angutit, Vasilijitut Jehovamit atorneqarnissamut piumassuseqarussi
ilagiinni akisussaaffeqarnerulernissassinnik Jehovap periarfississinnaavaasi.JEHOVAP ARNAT SUNNGORNISSAANNUT IKIORAI
10. Abigajili sua, qanorlu ilinniarfigaajuk?
10 Daavi angutitaalu kunngimit Saulimit malersorneqarput ikiorneqartariaqarlutillu. Daavip sakkutuuisa angut pisooq Israelimiu Nabalimik atilik aperivaat nerisassannguanik tunniussinnaasaanik peqarnersoq. Taamatut qinnuigisinnaallugu misigipput Nabalip savaatai inoqajuitsumiitillutik illersorsimagamikkit. Nabalilli namminissarsiorluni tunerusunngilai. Daavi kamangaalerpoq pilersaarusiulerlunilu Nabali inoqutaalu angutit tamaasa toqunniarlugit. (1 Sam 25:3-13, 22) Nabalilli nulia pinnersoq, Abigajili, naliliisinnaassuseqarluarpoq. Sapiissuseqarluni Daavip isigaasa saavanut pallorpoq kimigiiserfigalugulu toqutsisutut pisuutitaassutigisinnaasaminik akiniaaqqunagu. Periaaserilluni Daavi siunnersorpaa Jehovamut pisoq isumagiteqqullugu. Abigajilip maniguulluni oqaasii iliuutsimigullu silatusaarnera Daavip killitsissutigai. Paasivaa Jehovap Abigajili aallartissimagaa. (1 Sam 25:23-28, 32-34) Abigajili Jehovamit atorneqaatigisinnaasaminik pissuseqalersimavoq. Taassumatut periaaserinnermikkut naliliisinnaanermikkullu qatanngutit arnat Jehovamit atorneqarsinnaapput ilaqutariinnut ilagiinniittunullu ineriartuutaasumik. – Uss 24:3; Tit 2:3-5.
11. Shallumip panii suppat, nalitsinnilu kikkut taakkuninnga ilaarsippat?
11 Ukiorpassuit qaangiuttut Jerusalemip qarmarsui iluarsartuunneqarmata Shallumip panii Jehovap iluarsartuusseqataatippai. (Neh 2:20; 3:12) Ataatartik naalagartaagaluartoq Shallumip panii suliamut navianartorsiorfiusinnaasumut kajumillutik suleqataapput. (Neh 4:9-12) Tekoamiut akimanertaannit sulerusunngitsunit allaanerussusii! (Neh 3:5) Takorloorsinnaaviuk suliaq ullut 52-it ingerlanerinnaanni naammassineqarmat Shallumip paniisa nuannaarnerat? (Neh 6:15) Nalitsinni qatanngutit arnat piumassusillit suliamut illernartumut immikkuullarissumut, tassa Jehovamut pigititaasunik sanaartornermut aserfallatsaaliuinermullu, ikiueqataasarnertik nuannaarutigisarpaat. Pikkorinnerat, kajuminnerat aamma ilumoorfiginninnerat suliap ingerlalluarneqarnissaanut pingaaruteqarluinnarput.
12. Tabithap atorneqarsimaneratut Jehovap qanoq atorsinnaavaatigut?
12 Tabitha pingaartumik uillarnernut ‘ajunngitsuliungaarnissaanut piitsunullu tunissutinik amerlasuunik tunisisarnissaanut’ Jehovap piumassuseqalersippaa. (ApS 9:36) Tabitha toqummat amerlasuut aliasupput, tassami tukkortuulluarsimavoq asannittuullunilu. Paasinarpoq apustilip Petrusip toqusunit makitimmagu nuannaangaartut. (ApS 9:39-41) Tabitha qanoq ilinniarfigaarput? Inuusuttuugaluarutta utoqqaagaluaruttaluunniit, angutaagutta arnaaguttaluunniit qatanngutivut iluaqutaasumik ikiorsinnaavavut. – Hebr 13:16.
13. Qatanngut arnaq ittuutooq Ruthimik atilik Jehovamit qanoq atorneqarpa, qanorlu oqarpa?
13 Qatanngut arnaq ittuutooq Ruthimik atilik ajoqersuiartortitanngornissani kissaatigisimavaa. Meeraalluni illumiit illumut naqitaaqqanik agguaassipallattarpoq. Suliaq tamanna nuannareqaa. Oqaloqateqarniarnerli allallu Guutip naalagaaffia pillugu oqaluttuunnissaat unamminiarnartippaa. Ittuutugaluarluni 18-inik ukioqarluni pionerinngorpoq. 1946-mi Ilinniarfimmi Gileadimi ilinniarpoq kingusinnerusukkullu Hawaiimi aamma Japanimi kiffartorluni. Nunani
taakkunani nutaarsiassap nuannersup siaruarternissaanut Jehovap atorluarsimavaa. Ruth ukiut 80-ingajaat oqaluussisimanermini ima oqarpoq: “Jehovap nakussatsittuarsimavaanga. Ittuutujunnaarnissannut ikiorsimavaanga. Upperilluinnarpara Jehovap kinaluunniit imminik tatiginnittoq atorsinnaagaa.”JEHOVAMIT ATORNEQARNISSAMUT PIUMASSUSEQARIT
14. Kolossemiut 1:29 naapertorlugu Jehovamit atorneqassagutta qanoq iliortariaqarpugut?
14 Oqaluttuarisaanerup ingerlanerani Jehovap kiffani assigiinngitsutigut atorsimavai. Illit atorumallutit sunngortissavaatit? Apeqqutaavoq qanoq ilungersortigerusunnersutit. (Kolossemiut 1:29 atuaruk). Jehovamit atorneqarnissat piareersimaffigigukku taassuma piumasani naammassiniarlugu tassaalersissinnaavaatit oqaluussisartoq aallussilluartoq, ilinniartitsillaqqissoq, tuppallersaalluartartoq, sulisoq pikkorissoq aamma ikinngut tapersersuilluartoq, qanorluunniillu pisariaqartumik iliuuseqartissinnaavaatit.
15. Timotheusimut allakkat siulliit 4:12, 15-ilu naapertorlugit qatanngutit angutit inuusuttut Jehova sumik kimigiiserfigisariaqarpaat?
15 Ilissimi, inuusuttut kuisimasut inersimasunngulersusi? Angutinik piumassuseqarluarlutik ilagiinnik kiffartortutut akisussaaffeqarusuttunik assut pisariaqartitsisoqarpoq. Ilagiippassuarni utoqqaanertat ilagiinnik kiffartortunit amerlanerusarput. Qatanngutit angutit, ilissi ilagiinni akisussaaffeqarnerulernissarsi anguniagarisinnaavisiuk? Qatanngutit angutit ilaasa oqaluussisartuunertik naammagisarpaat. Illit taamatut misigiguit ilagiinni kiffartortunngornissamut piumassuseqaqqullutit kiffartorninnilu sapinngisamik naammassisaqaqqullutit Jehova kimigiiserfigiuk. (Oqal 12:1) Pisariaqartippatsigit! – 1 Timotheusi 4:12, 15 atuakkit.
16. Jehova qanoq qinnuigissavarput, aamma sooq?
16 Jehovap piumasani naammassiumallugu pisariaqarnera naapertorlugu sunngortissinnaavaatilluunniit. Taamaattumik suliassiissutaata suliarinissaanut piumassuseqaqqullutit aamma naammassisaqaqqullutit qinnuigisaruk. Inuusuttuugaluaruit utoqqaagaluaruilluunniit piffissat, nukitit piginnaanitillu Jehovamut ataqqinaataasumik atukkit. (Oqal 9:10) Ernumaneq ajukkunnerlu pissutigalugit Jehovamut kiffartorninni periarfissat pingaarutillit maangaannartinngisaannakkit. Pissutsit atukkavut qanorluunniit ikkaluarpata tamatta Ataatarput asannittoq ataqqinarsisissinnaavarput. Tamanna ilisimallugu nuanningaarami!
ERINARSUUT 38 Nakussatsissavaatit
^ imm. 5 Jehovamut kiffartorninni iliuuseqarnerorusukkaluarpit? Taassumannga atorneqarsinnaanerlutit eqqarsaatigisarpiuk? Imaluunniit misigivit Jehovap piumasaatut iliornissannut tunngatillugu iliuuseqarnerusariaqarnak? Jehovap siunertani naammassiumallugu pisariaqarnera naapertorlugu sunngortissinnaavaatilluunniit. Taamaaliorsinnaaqqullutit qanoq piumassuseqartillutillu naammassisaqartissinnaagaatit allaaserisami sammineqassaaq.
^ imm. 3 Kristumioqatiminut allakkaluartoq Paulusip allagai Jehovap kiffaanut tamanut atuupput.