ATUAQQISSAAGASSAQ 43
Jehovap peqatigiissortani siulersorpai
“Inuit pissaaneratigut pinnani inuillu nakuussusiatigut pinnani uanga anersaakkut pissaaq, oqarpoq Katersaarsuit Naalagaat!” – ZAK 4:6.
ERINARSUUT 21 Guutip naalagaaffia salliutsigu
QILANAARTUUT *
1. Kristumiut tamarmik sujuartariaqarpat?
IMERMUT morsutsinneqareerpit? Taamaappat Jehovamik upperinninnerit peqatigiissortaanilu kiffartorusussuseqarnerit takutissimassavat. * Soorunami Jehovamik upperinninnerit ineriartortittuartariaqarpat. Aamma Jehovap ullumikkut peqatigiissortaminik atuisarneranik upperinninnerit nakussatsittuartariaqarpat.
2-3. Jehovap peqatigiissortani ullumikkut qanoq siulersorpai? Assersuuteqarit.
2 Ullumikkut Jehovap peqatigiissortani kinaassutsiminut, siunertaminut najoqqutassiaminullu naapertuuttumik siulersortarpai. Jehovap pissusii pingasut peqatigiissortaatigut malunnartut sammeriartigit.
3 Siullertut, ‘Guuti kinaassusersiortuunngilaq’. (ApS 10:34) Jehovap asanninnini kajumississutigalugu ernini tunniuppaa ‘inuit tamarmik utertitaassutissaattut’. (1 Tim 2:6; Joh 3:16) Jehovap innuttani tusarusuttunut tamanut nutaarsiassamik nuannersumik oqaluussitippai, inuit amerlanerpaat utertitsissummik iluaqutiginnissinnaaqqullugit. Aappaattut, Jehova aaqqissugaalluarnermut eqqissinermullu Guutiuvoq. (1 Kor 14:33, 40) Taamaattumik taassuminnga pallorfiginnittut aaqqissugaalluartumik eqqissisimasumillu kiffartussasut ilimagissavarput. Pingajuattut, Jehova tassaavoq Ajoqersuisorsuaq. (Es 30:20, 21) Taamaattumik peqatigiissortaasa taassuma oqaasia isumassarsiarititaasoq, ilagiinni tamanullu oqaluussinermi, ilinniartitsissutigisarpaat. Jehovap pissusii pingasut taakku kristumiut siulliit ilagiivini qanoq erserpat? Nalitsinnimi qanoq erserpat? Jehovallu peqatigiissortaani illit kiffartorninni anersaaq illernartoq qanoq iluaqutigisinnaaviuk?
GUUTI KINAASSUSERSIORTUUNNGILAQ
4. Apustilit Suliaat 1:8 naapertorlugu Jiisusip ajoqersukkani soqquai, sunalu ikiortigissavaat?
4 Kristumiut siulliit nalaanni. Jiisusip tusarliussaa inunnut tamanut neriuutissiivoq. (Luk 4:43) Ajoqersukkani peqquai suliani ingerlateqqillugu ‘nunarsuup isua tikillugu’ oqaluussissasut. (Apustilit Suliaat 1:8 atuaruk). Soorunami taamaaliorsinnaassagunik ikiorneqartariaqarput. Anersaaq illernartoq, tassa ikiorti Jiisusip neriorsuutigisaa, pisariaqartippaat. – Joh 14:26; Zak 4:6.
5-6. Jiisusip ajoqersugaasa anersaaq illernartoq qanoq iluaqutigaat?
5 Ukiumi 33-mi piinsip ulluani Jiisusip ajoqersugai anersaamik illernartumik tunineqarput. Anersaaq illernartoq iluaqutigalugu ingerlaannaq oqaluussilerput, sivitsunngitsorlu inuit tuusintilikkuutaat nutaarsiassamik nuannersumik ilassinnipput. (ApS 2:41; 4:4) Akerlilersuisoqalermat ajoqersukkat siooraneq oqaluussiunnaassutiginagu Guutimut ikioqqupput. Ima qinupput: ‘Kiffatit pisinnaatikkit oqaatsit siooranngivillutik oqaatigeqqullugu.’ Taava anersaamik illernartumik ikiorneqarlutik ‘Guutip oqaasia nalunaajaatigaat siooranatik’. – ApS 4:18-20, 29, 31.
6 Jiisusip ajoqersugai aamma allatigut unamminiagaqarput. Assersuutigalugu Allakkat Illernartut pissarsiariuminaapput. Ullumikkut Biibililersaarutaaterpassuaqarpugut, taamanikkulli taamaattuuteqanngillat. Aamma oqaatsit assigiinngitsorpassuit atorlugit oqaluussisariaqarput. Taamatut unamminiagaqaraluarlutik ajoqersukkat aallussilluartut taakku ajornarsorisamik iliuuseqarput, tassa ukiut 30-t missaasa ingerlanerinnaanni nutaarsiassaq nuannersoq “qilaap ataani pinngortitanut tamanut” oqaluussissutigaat. – Kol 1:6, 23.
7. Ukiut 100-t sinnerlugit matuma siorna Jehovap kiffaasa Guutip soqqugaatik qanoq nalunngilaat, suppallu?
7 Nalitsinni. Jehovap innuttani siulersorlugillu nakussatsittuarpai. Guutip oqaatsini isumassarsiarititaasoq atorlugu siulersortarpaatigut. Tassani Jiisusip kiffartornera suliamillu aallartitaminik ajoqersukkaminut ingerlatitseqqusinera pillugit atuarsinnaavugut. (Matt 28:19, 20) Zion’s Watch Tower juuli 1881-imoortumi ima allassimavoq: “Jehovap taninngilaatigut inunnit ataqqisaaqqulluta pisuunngoqqullutaluunniit, tanippaatigulli pigisavut tamaasa atorlugit nutaarsiassamik nuannersumik oqaluusseqqulluta.” Atuagassiaaqqami oqaluussisartunut ilitsersuutitalimmi (To Whom the Work Is Entrusted-imi) 1919-imi saqqummersinneqartumi ima allassimavoq: “Suliarujussuussaaq, Naalakkalli suliassiissutigaa, taassumalu nakussatsissavaatigut.” Kristumiut siulliit assigalugit qatanngutit taakku sapiillutik suliassiissutigineqartoq suliaraat, upperilluinnarpaallu anersaaq illernartoq iluaqutigalugu inunnut tamanut oqaluussisinnaallutik. Uaguttaaq ullumikkut taakkunatut tatiginnitsigaagut.
8-9. Jehovap peqatigiissortaasa oqaluussinerujumallutik periaatsit suut atorsimavaat?
8 Jehovap peqatigiissortaasa nutaarsiassamik nuannersumik siaruarterinermi atorsinnaasatik pitsaanerpaat atortarsimavaat. Ilaatigut uku: Biibililersaarutit naqitikkat, isiginnaagassiaq “Skabelsens Fotodrama”, oqaluttartut, biilit højtalerillit, radiukkut aallakaatitassiat ukiunilu kingulliunerusuni qarasaasiat internetilu. Guutillu peqatigiissortai kisiartaallutik paasissutissanik oqaatsini amerlasoorpassuarni saqqummersitsisarput! Sooq taamaaliortarpat? Inuit tamalaat namminneq oqaatsiminni nutaarsiassaq nuannersoq tusarsinnaaniassammassuk. Jehova kinaassusersiortuunngilaq; siulittuivoq nutaarsiassaq nuannersoq “inuiaqatigiinnut naggueqatigiinnullu, immikkut oqaasilinnut inuiannullu tamanut” Saqq 14:6, 7) Guutip kunngeqarfini, tassa naalagaaffini, pillugu tusarliussaq kikkunnit tamanit tusarneqassasoq kissaatigaa.
oqaluussissutigineqarumaartoq. (9 Taavami inuit attavigineqariaannaanngitsut, immaqa inissiat najugaqarfiat paarsisoqarnerat parnaaqqasarneralluunniit pissutigalugu iserfigineqariaannaanngimmata? Inuit taakku oqaluussiffigisinnaajumallugit Jehovap peqatigiissortaasa tamanut oqaluusseriaatsit assigiinngitsut atortalerpaat. Assersuutigalugu 2001-imi atuagaasiviit angallattakkat takutitsiviillu allatut ittut Frankrigimi kingusinnerusukkullu sumiiffinni allani Siulersuisoqatigiit akuersineratigut atorneqalerput. Ajunngitsumillu qisuariartut amerlapput. New Yorkimi angallannerpaaffiusut ilaanni 2011-mi aallartisarneqarpoq illoqarfissuarni immikkut ittumik tamanut oqaluussineq. Ukiup siulliup ingerlanerani atuakkat 102.129-t aamma atuagassiat 68.911-t agguaanneqarput. Inuillu 4.701-it Biibilimik atuaqqissaaqatigineqarumallutik saaffiginnipput! Erseqqippoq Jehovap anersaani illernartoq atorlugu periaaseq tamanna tapersersoraa. Taamaattumik Siulersuisoqatigiit akuersineratigut nunarsuarmi tamarmi atuagaasiviit angallattakkat atorneqartalerput.
10. Oqaluussillaqqinnerulerumalluta susinnaavugut?
10 Illit iliuuserisinnaasatit. Jehovap ataatsimiinnerit aqqutigalugit ilinniartitsisarnera iluaqutigilluaruk. Oqaluussisartoqatigiit attavigisatit oqaluusseqatigisakkit. Taakkunani pisariaqartitat naapertorlugu ikiorneqarsinnaallutillu allat maligassaalluarnerat qiimmassaatigisinnaavat. Oqaluussinermi pinertusaarit. Soorlu allassimaffimmi qulequtarisatsinni eqqaasinneqartugut anersaamit illernartumit ikiorneqarnitsigut, inuit pissaaneratiguunngitsoq, Guutip piumasaatut iliorpugut. (Zak 4:6) Guutimmi suliassiissutaa suliaraarput.
JEHOVA AAQQISSUGAALLUARNERMUT EQQISSINERMULLU GUUTIUVOQ
11. Kristumiut siulliit nalaanni Siulersuisoqatigiit Guutip innuttai aaqqissugaalluartuusinnaaqqullugit qanoq suleqatigiippat?
11 Kristumiut siulliit nalaanni. Siulersuisoqatigiit Jerusalemimiittut ataasioqatigiillutik suleqatigiipput Guutip innuttai aaqqissugaalluarlutillu ApS 2:42) Assersuutigalugu ukiup 49-p missaani kipineqarneq ilagiinni oqqassutigineqalermat Siulersuisoqatigiit anersaamit illernartumit siulersorneqarlutik tamanna pillugu eqqartuipput. Tamannami ilagiinni isumaqatigiinngissutaajuarpat oqaluussineq akornuserneqassagaluarpoq. Apustilit utoqqaanertallu juutiugaluarlutik juutit ileqqutoqaannit tamakkuninngaluunniit ilinniartitsisunit sunnerneqanngillat. Guutilli oqaasiani misissuipput anersaavanillu siulersortillutik. (ApS 15:1, 2, 5-20, 28) Qanoq kinguneqarpa? Aalajangiinerat Jehovamit pilluaqquneqarpoq, eqqisseqatigiillutillu ataasiussuseqatigiittuarput, oqaluussinerlu ingerlalluarpoq. – ApS 15:30, 31; 16:4, 5.
eqqissisimasinnaaqqullugit. (12. Nalitsinni Jehovap peqatigiissortaasa aaqqissugaalluarlutillu eqqisseqatigiinnerannut suut ersiutaappat?
12 Nalitsinni. Jehovap innuttaasa aaqqissugaalluarnissaat eqqissisimanissaallu Jehovap peqatigiissortaasa sulissutigiuarsimavaat. Zion’s Watch Tower novembarip 15-iat 1895-imoortumi Korinthimiunut allakkat siulliit 14:40 tunngavigalugu allaaserisaq ima qulequtaqarpoq: “Ippinnanngitsumik torersumillu.” Tassani ima allassimavoq: “Apustilit aaqqissugaalluarneq pillugu kristumiunut siullernut oqaasissarpassuaqarput ... ‘Siornatigut allagaasut tamarmik uatsinnut ilinniutissaallutik allassimanerisa’ eqqaamajuarnissaat pingaaruteqarpoq.” (Rom 15:4) Nalitsinni Jehovap peqatigiissortaasa aaqqissugaalluarnerat eqqissisimanerallu erseqqippoq, soorlu kristumiut siulliit nalaanni taamaattoq. Assersuutigalugu ilagiinni allani – allaalluunniit nunami allami – Napasuliaq Alapernaarsuiffik-mik atuaqqissaaqatigiinneq najuuffigissagukku nalussanngilat atuaqqissaaqatigiinneq qanoq aqunneqarumaartoq allaaserisarlu sorleq atuaqatigiissutigineqarumaartoq. Tamanna toqqissisimanarissavat. Guutip anersaava kisimi taama ataasioqatigiissitsisinnaavoq! – Sef 3:9.
13. Jaaku 3:17 tunngavigalugu suut eqqarsaatigissavavut?
13 Illit iliuuserisinnaasatit. Jehovap kissaatigaa innuttami ‘aalajangiusimassagaat anersaakkut ataasiussuseq’. (Ef 4:1-3) Uku eqqarsaatigikkit: ‘Ilagiinni ataasiussuseq eqqissinerlu siuarsarpakka? Siuttuusunut naalattarpunga? Tatiginartuuvunga, ingammik ilagiinni akisussaaffeqaruma? Piffissamik eqqorluaasarpunga, ikiuiumatuujuvunga kiffartorusussuseqarlungalu?’ (Jaaku 3:17 atuaruk). Taakku eqqarsaatigereerlugit paasigukku arlaatigut pitsanngorsaasariaqarlutit anersaaq illernartoq qinnutigiuk. Anersaamit illernartumit inuttut ilusilersortinnerujartortillutit iliuuseriniakkatillu sunnerneqarnerujartortillugit qatanngutinnit asaneqarnerujartorlutillu pingaartinneqarnerujartussaatit.
JEHOVAP ILINNIARTILLUTALU PISARIAQARTITATSINNIK ISUMAGISARPAATIGUT
14. Kolossemiut 1:9, 10-lu naapertorlugit kristumiut siulliit nalaanni Jehovap innuttani qanoq ilinniartippai?
14 Kristumiut siulliit nalaanni. Jehovap innuttaminik ilinniartitsinini nuannaarutigisarpaa. (Tuss 32:8) Kissaatigaa innuttami ilisarisimassagaanni, asassagaanni naassaanngitsumillu inuussasut. Tamakku angusinnaavavut Jehovamit ilinniartinneqarnitsigut. (Joh 17:3) Jehovap kristumiut siulliit ilagiivi aqqutigalugit innuttani ilinniartippai. (Kolossemiut 1:9, 10 atuakkit). Tamatumani anersaaq illernartoq – ikiorti Jiisusip neriorsuutigisimasaa – pingaaruteqarpoq. (Joh 14:16) Anersaaq illernartoq iluaqutigalugu ajoqersukkat Guutip oqaasianik paasisaqarnerulerput Jiisusillu oqaasiinik iliuusiinillu, kingusinnerusukkut iivangkiiliuni allanneqartunik, eqqaasinneqarlutik. Ilisimalikkatik tamakku kristumiut siulliit uppernikkut nakussatsissutigaat aamma Guutimik, erneranik uppeqatiminnillu asanninnerulissutigalugit.
15. Jehovap siulittuutaa Esaja 2:2, 3-milu allassimasoq qanoq eqquuppa?
15 Nalitsinni. Jehovap siulittuutigaa inuiaat tamarmik taassuma aqqutigeqqusaanik ilinniartinneqarumallutik “ullussani kingullerni” qaqqaanut assersuutaasumut ornigutissasut. (Esaja 2:2, 3 atuakkit). Siulittuutip tamatuma eqquunnera maanna takusinnaavarput. Pallorfiginninnerup ilumoortup pallorfiginninnerit eqqunngitsut tamaasa akimorpai. Jehovap anersaakkut pilersuilluassusia! (Es 25:6) “Inussiaq aalajaallunilu silatooq” (NW) aqqutigalugu naammattorsuarnik nerisassaqartiinnarata aamma assigiinngitsorpassuarnik, soorlu allaaserisanik, oqalugiaatinik, filminik filmiaqqanillu titartakkanik, pilersorpaatigut. (Matt 24:45) Jobip ikinngutaatut Elihutut ima oqartutut misigivugut: “Kina [Guutitut] ajoqersuisinnaassuseqarpa?” – Job 36:22.
16. Anersaakkut qanoq siumukarsinnaavit?
16 Illit iliuuserisinnaasatit. Guutip anersaava iluaqutigalugu taassuma oqaasiani atuaqqissaakkatit atuakkatillu maleruarsinnaalissavatit. Tussiaasiortutut ima qinugit: “Ajoqersunnga Naalagaq aqqutigeqqusannik, inuusinnaaqqullunga sallusuissutinni. Uummatima illit aqqit kisiat mianeriliuk.” (Tuss 86:11) Anersaakkut inuussutissat Jehovap oqaatsini peqatigiissortanilu aqqutigalugit pilersitai iluaqutigiuakkit. Soorunami ilisimasaqarniaannarlutit taamaaliussanngilatit. Sallusuissut uummammiuliukkusuppat inuuninnilu maleruarusullugu. Taamaaliorninni Jehovap anersaava iluaqutigissavat. Aamma qatanngutitit qiimmassarusuppatit. (Hebr 10:24, 25) Sooq? Anersaakkut ilaqutarigakkit. Guutip anersaava qinnutigisaruk ataatsimiinnerni uummammit pisumit akisarsinnaaqqullutit pisassaqaraangavillu pitsaanerpaamik iliuuseqarsinnaaqqullutit. Taamaalioruit Jehovamut Jiisusimullu ersersissavat taakkua ‘savaataannik’ asanninnerit. – Joh 21:15-17.
17. Jehovap peqatigiissortaanik aalajaallutit tapersersuinerit sutigut ersersissinnaaviuk?
17 Qanittukkut peqatigiiffik Guutip anersaavanit siulersorneqartoq nunarsuarmi peqatigiiffituaalissaaq. Taamaattumik Jehovap peqatigiissortaani aallussilluarlutit suleqataagit. Jehovap kinaassusersiornani asanninnera ilaaruk naapitannut tamanut nutaarsiassap nuannersup oqaluussissutigineratigut. Aaqqissugaalluarnermik eqqissinermillu nuannarisaqarnera ilaaruk ilagiinni ataasiussuseqarnermik siuarsaanikkut. Ajoqersuisorsuaq tusarnaaruk anersaakkut nerisassaqartitsineranik naammattorsuarnik iluaqutiginnilluarnikkut. Taava Saatanip silarsuaa piuneerunneqalerpat siooranak sapiissuseqarlutit Jehovap peqatigiissortaani ilumoorfiginnillutik suleqataasunut ilaassaatit.
ERINARSUUT 3 Jehova, neriuffigivatsigit nakuussutigalutillu
^ imm. 5 Upperilluinnarpiuk Jehovap peqatigiissortani ullumikkut siulersorai? Allaaserisami matumani Jehovap kristumiut siulliit ullumikkullu innuttani qanoq siulersorai sammissavarput.
^ imm. 1 NASSUIAAT: Jehovap peqatigiissortai qilammiittortaqarlutillu nunamiittortaqarput. Allaaserisami matumani oqaaseq “peqatigiissortat” atorneqaraangat nunamiittut pineqartarput.
^ imm. 52 ASSIMI MALUGISASSAT: Nunani pisariaqartitsiffiunerusuni kiffartortut filmimi isiginnaareerlugit pioneri arnaq taakkunatut iliorusulerpoq. Pisariaqartitsiffiunerusumilu kiffartulerami anguniakkani anguaa.