Jehovamut attaveqarluaqqilernissat sulissutigiuk
ILAAJUNNAARSITAASIMASORPASSUIT ukiut tamaasa Kristumiut ilagiivinut ilaalerseqqinneqartarput. Utertoqarnera ‘qilammi nuannaarutaangaartarpoq’. (Luk 15:7, 10) Illit ilaalerseqqinneqarsimaguit qularissanngilat Jiisusip, inngilit Jehovallu tamanna nuannaarutigingaaraat. Jehovamilli attaveqarnerpit nakussassarnerani assigiinngitsunik unamminiagaqartarsinnaavutit. Taakku ilaat suuppat aamma suut iluaqutigisinnaavigit?
UNAMMINIARNARSINNAASUT
Ilaalerseqqinneqartorpassuit nikallornartunik eqqarsaateqaqqajaasarput. Taamaattumik kunngi Daavi qanoq misigisimasoq immaqa paasisinnaavaat. Taanna ajortuliaminik isumakkeerfigineqareersimagaluarluni ima allappoq: “Sapiissuseeruppunga.” (Tuss 40:13; 65:4) Ilaalerseqqinneqartoq ukiorpassuarni kanngusussinnaavoq ilerasussinnaalluniluunniit. Isabelle ukiut 20-t sinnerlugit ilaajunnaarsitaaqqasimavoq. * Ima oqarpoq: “Jehovamit isumakkeerfigineqarsinnaanera upperiuminaatsittorujussuuara.” Illit nikallornartunik eqqarsaateqarpallaartaruit anersaakkut sanngiilliartoqqilersinnaavutit. (Uss 24:10) Taamaattumik nikallornartunik eqqarsaateqarnaveersaartarit.
Ilaalerseqqinneqartut allat Jehovamut attaveqarlualeqqissinnaanerlutik ernumassutigisarpaat. Antoine ilaalerseqqinneqareerluni ima oqarpoq: “Misigisimavunga ilaajunnaarsitaanngikkallarama ilikkarsimasarpassuakka puigorsimallugit.” Misigissutsit taamaattut pissutigalugit ilaalerseqqinneqartut ilaasa kiffartornerminni tamaviaarnissartik tunuarsimaarfigisarpaat.
Assersuusioriarta. Takorlooruk inuup angerlarsimaffini anorersuarmit ajoquserneqarsimasoq
iluarsaanniaraa. Piffissarujussuaq nukippassuillu atugassani eqqarsaatigalugit suliassani ilungersunartutut isigisinnaavaa. Tamatumunnga assingusumik ingasattumik ajortuliorsimallutit Jehovamut attaveqarnerit innarlersimagukku attaveqarluaqqilernissat ilungersorlutit sulissutigisariaqarpat. Kisimiinngilatilli.Jehova ima kajumissaarivoq: “Qaagitsi, akunnitsinni aaqqitassat aaqqitsigit.” (Es 1:18, NW) Illit Jehovamut attaveqarluaqqilernissat ilungersorlutit sulissutigereerpat, tamannalu Jehovap pingaartingaarpaa. Uternerimmi Saatanip sallutuujuneranik Jehovap uppernarsaatitut atorsinnaavaa. – Uss 27:11.
Uteravit Jehova qanillattorpat Taannalu ilinnut qanilliniarluni neriorsuivoq. (Jaak 4:8) Uteqqinnerillu nuannaarutaagaluartoq ilagiinnut ilaaqqilersutut misigissaguit iliuuseqarnerusariaqarputit. Ataatatsinnut ikinngutitsinnullu, Jehovamut, attaveqarnerit nakussassartuartariaqarpat. Qanoq taamaaliorsinnaavit?
INORNARTINNGISANNIK ANGUNIAGAQARTARIT
Inornartinngisannik anguniagaqarniartarit. Jehova paratiisissamillu neriorsuutaa pillugit ilikkarsimasatit suli eqqaamasimassavatit. Kisiannili oqaluussisarneq, ataatsimiittarneq qatanngutinillu peqateqartarneq ileqquliuteqqittariaqarpatit. Anguniagarisinnaasavit ilaat maanna sammeriartigit.
Jehova qinunikkut oqaloqatigikulasaruk. Ataatatta qilammiusup paasisinnaavaa ilerasunnerit pissutigalugu qinunikkut saaffiginninnissat ajornakusoortissinnaagit. (Rom 8:26) Taamaakkaluartorli ‘qasusuillutit qinusaruit’ Jehovamik ikinnguteqarusungaarnerit ersersissavat. (Rom 12:12) Andrej ima oqaluttuarpoq: “Ilerasungaartarpunga kanngusullungalu. Qinoreernerilli tamaasa oqiliallattarpunga. Eqqissiallattaqaangalu.” Qanoq qinussallutit nalugukku kunngip Daavip qinnutai Tussiaatit 51-imi 65-imilu allassimasut eqqarsaatigisakkit.
Biibili akuttunngitsumik atuaqqissaartaruk. Taamaaliortaruit uppernerulerlutillu Jehova asanerulissavat. (Tuss 19:8-12) Felipe ima oqaluttuarpoq: “Biibili aalajangersimasumik atuarlugulu misissoqqissaarneq ajorakku anersaakkut sanngiillivunga. Ilaajunnaarsitaagamalu Jehova aliasutsippara. Taamatut kukkoqqikkusunnginnama aalajangerpunga Biibili atuaqqissaakulasalerniarlugu.” Illit aamma taamaaliorsinnaavutit. Suna misissussanerlugu nalornissutigigukku qatanngut Jehovamut attaveqarluartoq ikiortiserisinnaavat.
Qatanngutinik ikinngutitaartoqqigit. Uteqqittut ilaasa qatanngutinit ajortumik isigineqarnissartik ernumassutigisarpaat. Larissa ima oqaluttuarpoq: “Kanngusuttorujussuuvunga. Misigisimavunga qatanngutikka aliasutsillugillu pakatsisissimallugit. Sivisoorujussuarmik taamatut misigivunga.” Illittaaq taamatut misigiguit qularutigissanngilat utoqqaanertat allallu anersaakkut inersimalluartut ikiorusungaaraatsit. (Ungalusaq “ Utoqqaanertat iliuuserisinnaasaat” takuuk). Uteqqinnerit nuannaarutigingaarpaat ingerlalluarnissallu kissaatigalugu. – Uss 17:17.
Ilagiinnut qanoq qanillinerusinnaavit? Ataatsimeeqataajuartarit qatanngutitillu akuttunngitsumik oqaluusseqatigisakkit. Tamanna qanoq iluaqutigissaviuk? Felixip oqaasii maluginiakkit: “Uternissara ilagiit qilanaaraat. Tikilluaqqusaasutut misigitinneqarpunga. Tamarmillu misigitippaannga isumakkeerfigineqarsimasunga Jehovamillu kiffartuussiuarsinnaasunga.” – Ungalusaq “ Illit iliuuserisinnaasatit” takuuk.
TUNNIUTIINNAQINAK
Jehovamik ikinnguteqaqqilerniarnerit Saatanip akornusersorniarlugu anorersuartullusooq ajornartorsiortittassavaatit. (Luk 4:13) Jehovamut attaveqarluarumallutit maanna sapinngisannik iliuuseqaruit tamanna piareersimaffigisinnaavat.
Jehovap savaatini ima neriorsorpai: “Savat tammartut ujassavakka siammartullu katersorlugit, ikiligaasut mattuserlugit, sanngiitsut nakussatsillugit.” (Ez 34:16) Jehovap ilaajunnaarsitaasimasorpassuit imminerminut attaveqarluaqqilernissaannut ikiorsimavai. Qularnanngilluinnarpoq illit aamma ikiorusukkaatit.
^ par. 4 Atit ilaat allanngortitaapput.