1. Inup­pas­suit Biibilimi ilisimas­susermut qanoq qisuariar­tar­pat? (Ussatit 1:20, 21)

 NUNANI tamalaani qatan­ngutit qungujul­lutik inuit angal­laf­figisar­tagaanni atuagas­sianik neqeroor­tarsimap­put. Illit taamatut kif­far­tor­nikuuit? Taamaaliorsimaguit Ussatini ilisimas­suseq aqqusinermi inun­nut tusarusut­tunut torlulasoq immaqa eqqaavat. (Ussatit 1:20, 21 atuakkit). Biibili Biibililersaarutigullu Jehovap ilisimas­susianik imaqar­put. Inuit naas­saan­ngitsumik inuulis­sagunik ilisimas­suseq tamanna pisariaqar­tip­paat. Nuan­naarutigisar­par­put Biibililersaarutitsin­nik tigusisoqaraangat. Inuilli ilaasa Biibilimi allas­simasut ilin­niarusun­neq ajor­paat. Ilaasa illaatigisar­paatigut. Eqqarsar­tar­put Biibili nalitsin­nut naleq­qutin­ngitsoq. Allat najoq­qutas­siat atoqatigiin­nermut tun­ngasut Biibilimiit­tut isorisar­paat isumaqarlutik taak­kunin­nga maleruaasut asan­nin­natillu isor­nar­torsiuisar­tut. Taamaat­torli Jehova kik­kun­nik tamanik ilisimas­suseqalersitsiniar­tuar­poq. Qanoq ilil­luni?

2. Jehovap ilisimas­susia qanoq pis­sarsiarineqarsin­naava, inuilli amerlanerit qanoq iliorusut­tar­pat?

² Jehovap ilisimas­sutsini ilaatigut Biibili aqqutigalugu tusarliut­tar­paa. Atuagaq taanna kik­kun­nit tamanit pis­sarsiarineqariaan­naavoq. Biibililersaarutigummi? Jehovap ajun­ngisaar­neratigut oqaatsini 1.000-nit amerlanerusuni pis­sarsiarineqarsin­naap­put. Tusar­naar­tut, tassa atuar­tut ilik­kak­kamin­nillu maleruaasut, iluaqutigis­savaat. Inuilli amerlanerit Jehova tusar­naar­niar­nagu aalajangersimap­put. Aalajangigas­saqaleraangamik immin­nut tatiginerusar­put inoqatitil­luun­niit tusar­naarusun­nerul­lugit. Allaat imaas­sin­naavoq Biibilimi allas­simasunik maleruaaner­put pil­lugu ammut isigisaraatigut.  Sooq inuit taama qisuariar­tar­nersut allaaserisami matumani sam­mis­savar­put. Siul­ler­tulli ilisimas­suseq Jehovameersoq qanoq pis­sarsiarisin­naanerip­put sam­meq­qaariar­tigu.

3. Ilisimas­suseqalerumal­luta qanoq ilior­tariaqar­pugut?

³ Ilisimas­suseqarutta ilisimasagut atorlugit ajun­ngitsumik aalajangiisin­naavugut. Aam­mali allamik iliuuseqar­tariaqar­pugut. Biibilimi allas­simavoq: “Naalak­kamik mianerin­nin­neq ilisimas­susermut aal­lar­niutaavoq, Iller­nar­tuusumik ilisiman­nin­neq silaqas­suseqalersitsisar­poq.” (Uss 9:10) Taamaat­tumik pingaarutilim­mik aalajangigas­saqaleraangatta Jehovap isumaa paasiniar­tariaqar­par­put. Taamaaliorsin­naavugullu Biibilip Biibililersaarutit­talu misis­soq­qis­saar­nerisigut. Taamaalioraangatta takutit­tar­par­put eqqor­tumik ilisimas­suseqarluta. – Uss 2:5-7.

4. Sooq Jehovap kisimi piviusumik ilisimas­suseqalersis­sin­naavaatigut?

⁴ Jehovap kisimi piviusumik ilisimas­suseqalersis­sin­naavaatigut. (Rom 16:27) Sooq oqarsin­naavugut ilisimas­suseq Jehovameersuusoq? Siul­ler­tut, Pin­ngor­titsisuugami pin­ngor­titani pil­lugit kil­leqan­ngitsumik ilisimasaqar­poq. (Tuss 104:24) Aap­paat­tut, Jehovap iliuusii tamarmik ilisimas­suseqar­neranik ersersitsip­put. (Rom 11:33) Pingajuat­tut, Jehovap siun­nersuutai pitsaasut maleruaasunut iluaqutaajuaan­nar­put. (Uss 2:10-12) Ilisimas­suseqalis­sagutta ilumoor­tut tun­ngaviusut taakku akuerisariaqar­pagut, aalajangiinialeraangat­talu aamma iliuuseqaleraangatta najoq­qutarisarlugit.

5. Inuit ilisimas­suseq Jehovameersoq akueriuman­ngik­kaangas­suk qanoq kinguneqar­tarpa?

⁵ Oqaluus­sinermi naapitatta ilaasa pin­ngor­titat ilusilersorluagaasut nas­suerutigigaluarlugit upperin­ngilaat Pin­ngor­titsisoqar­toq. Naapitatta allat Guuti upperinerar­tar­paat, Biibilimili ilin­niar­titsis­sutigineqar­tut itsangaval­laar­nerar­tar­paat nam­min­nerlu piumasamit­tut inooriaaseqarusun­nerul­lutik. Qanoq kinguneqar­tumik? Guutip ilisimas­susia pin­nagu inuit nam­min­neq ilisimas­suser­tik tutsuigim­mas­suk pis­sutsit ajun­ngin­nerulersimap­pat? Piviusumik pil­lualerlutillu siunis­saq pil­lugu neriuuteqalersimap­pat? Piviusut ilumoor­toq una ersersip­paat: “Ilisimas­sut siuneqar­nerlu pilersaarutillu iluatsis­sin­naan­ngil­lat Naalak­kap piumasaanut akerliugunik.” (Uss 21:30, Testamentitoqaq) Taamaat­tumik ilisimas­suseqalerumal­luta Jehova qin­nuigiuarusup­par­put! Ajoraluar­tumilli inuit amerlanerit taamaaliorusun­ngil­lat. Sooq?

6. Kik­kut Jehovap ilisimas­susia tusarusun­neq ajor­paat? (Ussatit 1:22-25)

⁶ Inup­pas­suit ‘ilisimas­suseq aqqusinermi nipituumik torlulasoq’ tusarusun­neq ajor­paat. Biibili naaper­torlugu inuit eqimat­tat pingasut ilisimas­susermik itigar­titsip­put: ‘Misilit­tagakitsut, mitaatil­liisut sianiitsullu.’ (Ussatit 1:22-25 atuakkit). Taak­kua sooq Guutip ilisimas­susia itigar­tin­neraat qanorlu taakku ilaar­naveersaarsin­naanerigut sam­meriar­tigu.

7. Sooq ilaat aalajanger­pat misilit­tagakitsuugin­nar­niarlutik?

⁷ “Misilittagakitsut” tas­saap­put tusak­kamin­nik tamanik upperin­nit­tut sal­loqit­taruminar­tullu. (Uss 14:15) Oqaluus­sinitsinni naapit­tar­pagut, assersuutigalugu mil­lionilip­pas­suit upperisarsior­nik­kut siut­tunit politik­kik­kul­luun­niit pisor­tanit sal­loqit­tar­neqarsimasut. Ilaasa sal­luliorfigineqarsimaner­tik  paasigaangamikku annilaarutigisar­paat. Ussatit 1:22-mili eqqaaneqar­tut misilit­tagakitsuuner­tik iluariin­naramikku aalajangerput misilit­tagakitsuugin­nar­niarlutik. (Jer 5:31) Nam­min­neq iluarisamit­tut ilior­tar­put, Biibilimilu ilin­niar­titsis­sutigineqar­tut ilin­niarusun­nagillu inas­sutai maleruarusun­ngilaat. Amerlasuut arnaq Canadamiu upperisarsior­nermik pingaar­titsisoq isumaqatigaat, taanna Nalunaajaasunit pulaar­neqarami oqarsimavoq: “Palasip sal­loqit­tarsimagunisigut nam­mineq pisuuvoq uaguun­ngitsoq!” Piaaralutik paasisaqarusun­ngitsut assigerusun­ngil­luin­nar­pagut! – Uss 1:32; 27:12.

8. Qanoq misilit­tagaqarluar­nerulersin­naavugut?

⁸ Pis­sutis­saqarluar­tumik Biibilimi kajumis­saar­neqar­pugut misilit­tagakin­ner­put iliuuseqarfigis­sagip­put ‘silaqas­sutsimullu tun­ngatil­lugu inersimal­luar­tun­ngus­sasugut’. (Kor 1. 14:20) Biibilimi najoq­qutas­siat maleruar­nerisigut misilit­tagaqarluar­neruler­tar­pugut. Ajor­nar­torsiutillu ilaasa pin­ngitsoor­tin­nis­saan­nut silatusaar­tumillu aalajangiisar­nis­samut Biibilip iluaqutaanera paasis­savar­put. Aalajangik­katta eqqarsaatigisar­nis­saat iluaqutaavoq. Assersuutigalugu Biibilimik ilin­niar­tin­neqar­tarlutillu ataatsimiigiar­taruit sulili Jehovamut tun­niul­luin­narsimanallu imermut morsutsitaasiman­ngik­kuit anguniak­kat tamanna qanoq angusin­naanerlugu eqqarsaatigigukku pitsaas­saaq. Imermut morsutsin­neqareersimaguit nutaarsias­sat nuan­nersut pil­lugit oqaluus­sil­laq­qin­nerulerlutillu ilin­niar­titsil­laq­qin­neruler­niar­tuar­pit? Aalajangiinivit ersersip­paat Biibilimi ilik­kak­katit malil­lugit iliuuseqar­tar­tutit? Allat kristumiutut pis­suserineqar­tus­sanik ersersitsivigisar­pigit? Aaq­qitas­saqarutta Jehovap oqaasii ‘misilit­tagakitsunik ilisimasun­ngor­titsisar­tut’ eqqarsaatigeq­qis­saar­tariaqar­pagut. – Tuss 19:8.

9. “Mitaatil­liisut” ilisimas­sutsimik itigar­titsil­lutik qanoq ersersit­tar­paat?

⁹ Inuit eqimat­tat aap­paat ilisimas­sutsimik Guutimeersumik sumigin­naasut tas­saap­put “mitaatilliisut”. Ilaan­nik­kut oqaluus­sitil­luta inuit taamaat­tut naapit­tar­pagut. Allanik illaruaatigin­nit­tar­ner­tik nuan­naraat. (Tuss 123:4) Biibilimi mianersoq­qus­sutigineqar­poq ulluni kingul­lerni illaruaatigin­nit­tor­pas­suaqas­sasoq. (Pet 2. 3:3, 4) Lotsip ningaavi assigalugit nalitsinni inuit ilaasa mianersoq­qus­sutit Guutimeersut soqutigin­ngilaat. (Mos 1. 19:14) Amerlasuullu Biibilimi najoq­qutas­sianik maleruaasunik illaruaatigin­nit­tar­put. “Guutiitsutut pileris­susipilutik malil­lugit” inoorusuk­kamik illaruaatigin­nit­tar­put. (Juud 7, 17, 18) Mitaatil­liisut Biibilimi allaatigineqar­nerat tunus­sisunut Jehovamillu itigar­titsisunut allanut tul­luar­poq!

10. Qanoq iliorluta mitaatil­liisun­ngor­naveersaarsin­naavugut? (Tus­siaat 1:1)

¹⁰ Mitaatil­liisun­ngun­ngin­nis­sar­put qanoq mianersuutigisin­naavar­put? Ilaatigut isor­nar­torsiueq­qajaasut ilaginaveersaar­nerisigut. (Tussiaat 1:1 atuaruk). Tunus­sisut tusar­naar­nagillu allataat atuar­neq ajor­pagut. Mianersun­ngik­kutta naam­magit­taal­lioq­qajaasin­naavugut Jehovallu periaasii peqatigiis­sor­taasalu ilitsersuutaat qularilerlugit. Taamaat­tumik imminut aperis­saagut: ‘Nutaanik ilitsersor­neqaraangatta nas­suiaatinil­luun­niit allan­nguisoqaraangat naam­magit­taal­lior­tar­punga? Siulersuisut kuk­kunersior­niar­tar­pakka?’ Aaq­qiiniapal­lak­kutta Jehovap iluaris­savaatigut. – Uss 3:34, 35.

11. ‘Sianiitsut’ Jehovap najoq­qutas­siai qanoq igaat?

¹¹ Inuit eqimat­tat pingajui ilisimas­susermik akuersiuman­ngitsut tas­saap­put ‘sianiitsut’. Guutip najoq­qutas­siai atoqatigiin­nermut tun­ngasut maleruarusun­ngin­namik­kit sianiitsuup­put. Nam­min­neq eqqor­tuusorisamin­nik  ilior­tar­put. (Uss 12:15) Taamaat­tut Jehova, ilisimas­susermik Pilerfiusoq, itigar­tit­tar­paat. (Tuss 53:2) Oqaluus­sinermi naapik­kaangatsigit Biibilip najoq­qutas­siaanik ataq­qin­nin­ner­put pil­lugu soq­qusaal­lutik isor­nar­torsior­tar­paatigut, pitsaanerusumilli neqeroorutis­saqaratik. Biibilimi allas­simavoq: “Ilisimas­suseq qutsip­pal­laarami sianiitsumut inor­naqaaq, sianiitsoq isaaf­fimmi oqaasis­saqar­neq ajor­poq.” (Uss 24:7) Sianiitsoq siun­nersuutinik pitsaasunik oqaasis­saqar­neq ajor­poq. Tupin­nan­ngilaq Jehovap ima mianersoq­qum­matigut: “Angut sianiitsoq qimaguk.” – Uss 14:7.

12. Sianiitsut ilaan­ngin­nis­saan­nut suna iluaqutigisin­naavar­put?

¹² Guutip siun­nersuutaanik nuan­narin­nin­ngitsut assiginagit Guutip eqqarsar­tariaasianik inatsisaanillu tamanik nuan­narin­nin­nermik ineriar­tor­titsivugut. Naalan­nerup kingunis­sai naalan­ngin­nerup kingunis­saan­nut sanil­liuk­kutsigit nuan­narin­nin­nerulersin­naavugut. Jehovap siun­nersuutaanik pitsaasunik sianiil­liorlutik itigar­titsisut qanoq ajor­nar­torsior­tar­tut maluginiar­tak­kit. Taava eqqarsaatigiuk Guuti naalak­kakku inuunerit qanoq nuan­ner­tigisoq. – Tuss 32:8, 10.

13. Jehovap siun­nersuutiminut pitsaasunut naalan­nis­samut pin­ngitsaalisar­paatigut?

¹³ Jehovap ilisimas­sutsini kimil­luun­niit pigineqalersin­naatip­paa, kinaluun­niilli pin­ngitsaalil­lugu tamatumin­nga akuersitin­neq ajor­paa. Ilisimas­sutsimilli tusar­naan­ngin­nerup qanoq kinguneqarsin­naanera eqqar­tor­paa. (Uss 1:29-32) Jehova naalan­niar­nagu aalajanger­tut “qanoq inuuseqar­nermik inerit­tui neris­savaat”, tassa kingunis­sai ator­tariaqas­savaat. Pif­fis­sap ingerlanerani inooriaaser­tik pis­sutigalugu naal­liuutigisamin­nik ajor­nar­torsiuteqas­sap­put siunis­samilu Jehovamit suujun­naarsitaas­sal­lutik. Jehovalli siun­nersuutaanut pitsaasunut tusar­naar­tut maleruaasullu ima neriorsor­neqar­put: “[Uan­nut] naalat­toq aarlerinaatsumik najugaqas­saaq eqqis­sil­lunilu inuus­sal­luni perlus­sanik aarlerigisaqar­nani.” – Uss 1:33.

14-15. Ussatit 4:23 qanoq ilin­niarfigaar­put?

¹⁴ Guutip ilisimas­susia malil­lugu iliuuseqaraangatta iluaqutigiuaan­nar­par­put. Soorlu sam­mereerip­put Jehovap ilisimas­susia pis­sarsiariuminar­poq. Assersuutigalugu Jehova Ussatini tamatigut atoriaan­naasunik siun­nersuuteqar­poq. Siun­nersuutit pitsaasut taak­kua ilaat sisamat sam­meriar­tigit.

¹⁵ Uummatit assersuutaasoq paarilluaruk. Biibilimi allas­simavoq: “Paarisas­san­nit tamanit annermik uum­matit paariuk inuuneq tas­san­nga aal­laaveqarmat.” (Uss 4:23) Uum­mat paaril­luarumal­lugu qanoq ilior­toqar­tariaqar­toq eqqarsaatigiuk. Peq­qin­nar­tunik nerisariaqar­pugut, eqaarsaar­tariaqar­pugut ajoqutaasunillu ileq­qoqar­naveersaarluta. Uum­mater­put assersuutaasoq paariumal­lugu assingusumik iliuuseqar­tar­pugut. Ullut tamaasa Guutip  oqaasianeersunik immersor­tar­pugut. Ataatsimiin­ner­nut piareersar­tarlutalu najuut­tarlutalu akisar­pugut. Oqaluus­seqataasar­nik­kut iliuuseqar­tuar­pugut. Aamma aliik­kutat kinguaas­siuutitigut inuunerlun­ner­tal­lit aliik­kutarin­ngin­nerisigut ikin­ngutipalaallu ikin­ngutigilin­ngin­nerisigut isumak­kut ajoqutaasunik ileq­qulius­sinaveersaar­pugut.

16. Sooq Ussatit 23:4, 5-imilu allas­simasut iluaqutigaagut?

¹⁶ Pigisatit naammagikkit. Biibilimi ima siun­nersuuteqar­poq: “Pisuun­ngor­niar­neq noq­qaas­sutigeqinagu, … isitit pisuus­sutinut saatsik­kuk­kit peerutereersimas­sap­put, sulunil­lutimmi nat­toralit­tut qul­larsareersimas­sap­put.” (Uss 23:4, 5) Inuit aningaasaatitik pigisatillu annaariaan­naavaat. Pisuulli piitsullu aningaasarsior­nis­sar­tik isumakuluutigival­laar­tar­paat. Taman­nalu pis­sutigalugu tusaamaneqar­ner­tik, attaveqatigiin­ner­tik allaallu peq­qis­suser­tik iliuutsimik­kut innarler­tar­paat. (Uss 28:20; Tim 1. 6:9, 10) Jehovalli ilisimas­susia iluaqutigalugu aningaasat tungaatigut oqimaaqatigiis­saarisumik isigin­nit­taaseqar­pugut. Taman­nalu piumatuun­ngun­ngin­nis­samut iluaqutigigatsigu nuan­naarluta pigisagut naam­magivagut. – Oqal 7:12.

17. Qanoq ilisimasutut oqaaseqarsin­naavugut? (Ussatit 12:18)

¹⁷ Oqalutsinnak eqqarsaqqaarit. Sis­suin­ngik­kutta oqaatsitsigut ajoqusiingaarsin­naavugut. Biibilimi allas­simavoq: “Eqqarsariaq­qaar­nani oqaaserisat panatut kapisisar­put, ilisimasulli oqaa katsorsaataasar­poq.” (Uss 12:18) Allat kuk­kus­sutaanik oqaatis­suaatigin­nin­naveersaar­tarutta attaveqatigiil­luarsin­naavugut. (Uss 20:19) Oqaatsitsigut annersitsiumanata tup­pal­lersaajumal­lutali Guutip oqaasia atuarlugulu eqqarsaatigisariaqar­par­put. (Luk 6:45) Biibilimi allas­simasut eqqarsaatigeq­qis­saarutsigit oqaatsigut ‘ilisimas­sutsip puilaf­fiatut’ tup­pal­lersaatitut ilersin­naap­put. – Uss 18:4.

18. Ussatit 24:6-ip maleruar­nis­saa oqaluus­sinermi qanoq iluaqutigisin­naavar­put?

¹⁸ Ilitsersuutinik maleruaagit. Biibilimi ima atoriaan­naasumik siun­nersuuteqar­poq: “Pilersaarusioq­qaarlutit sorsus­saatit, amerlasuunik  siun­nersor­teqaruit ajugaas­saatit.” (Uss 24:6) Versi taanna oqaluus­sil­laq­qin­nerulerlutalu ilin­niar­titsil­laq­qin­neruler­nis­satsin­nut qanoq iluaqutigaar­put? Nam­mineq piumasar­put malin­nagu siun­nersuutigineqar­tut malin­niar­tar­pagut. Ataatsimiin­nitsinni pitsaasunik siun­nersor­neqarlutalu ilitsersor­neqar­tar­pugut Biibililu tun­ngavigalugu ilin­niar­titsil­laq­qis­sut ilin­niarfigisin­naal­lugit. Inuillu Biibili paasinias­sam­mas­suk Jehovap peqatigiis­sor­taanit sak­kunik, soorlu Biibililersaarutinik isigin­naagas­sianillu, atorluarsin­naasatsin­nik tunineqar­tar­pugut. Sak­kut taak­kua atorluar­nis­saat ilin­niar­piuk?

19. Ilisimas­suseq Jehovameersoq qanoq isumaqarfigaajuk? (Ussatit 3:13-18)

¹⁹ Ussatit 3:13-18 atuakkit. Guutip oqaasiani siun­nersuutit pitsaasut qujamasun­naqaat! Taak­koqan­ngitsuup­pat qanoq iliorsimas­sagaluar­ner­pugut. Ussatini siun­nersuutit ilaat allaaserisami matumani eqqar­tor­pagut. Soorunami Biibili tamarmi siun­nersuutinik pitsaasunik Jehovameersunik ulik­kaar­poq. Siun­nersuutaasa sutigut tamatigut maleruar­nis­saat aalajangiusimatigu. Inuit amerlanerit Guutip ilisimas­susianik pingaar­titsin­ngil­lat, uagulli qularin­ngilar­put ‘iperaanaveersaar­tut pil­luar­tut’.