ATUAQQISSAAGASSAQ 44
Kristumiutut neriuutit upperilluinnaruk
“Naalagaq neriuffiguuk.” – TUSS 27:14.
ERINARSUUT 118 “Uppernermik annerusumik tunisigut!”
QILANAARTUUT *
1. Jehovap sumik neriuutissippaatigut?
JEHOVAP nuannerluinnartumik naassaanngitsumik inuunissamik neriuutissippaatigut. Ilaasa anersaatut toqujuitsutut qilammiinnissaq neriuutigaat. (Kor 1. 15:50, 53) Amerlanerilli nunarsuarmi peqqilluinnarluni pilluarlunilu inuunissaq naassaanngitsoq neriuutigaat. (Saqq 21:3, 4) Qilanaarisarput naassaanngitsumik qilammiinnissaq nunarsuarmiinnissarluunniit apeqqutaatinnagu neriuuterput erligaarput.
2. Neriuuterput sunik tunngaveqarpa, aamma sooq?
2 Oqaaseq “neriuuteqarneq” Biibilimi atorneqartoq “nuannersunik pisoqarumaarneranik ilimasunnertut” nassuiarneqarsinnaavoq. Jehova neriorsuisuummat siunissaq pillugu neriuutitta eqquunnissaa qularinngilarput. (Rom 15:13) Jehovap neriorsuutigisai suunersut ilisimavagut, neriorsuutigisanilu eqquutitittuaannarai nalunngilarput. (Mos 4. 23:19) Jehova oqaatsini naapertorlugit iliuuseqarusullunilu iliuuseqarnissamut pissaaneqartoq upperilluinnarparput. Taamaattumik neriuuterput takorluugaannaasumik kissaatigisamilluunniit tunngaveqarani piviusunik tunngaveqarpoq.
3. Allaaserisami matumani suut eqqartussavagut? (Tussiaat 27:14)
3 Ataatatta qilammiusup asavaatigut, kissaatigaalu tatigissagitsinni. (Tussiaat 27:14 atuaruk). Jehova neriuffigilluinnarutsigu qanorluunniit pisoqaraluarpat sapiillutalu nuannaarsinnaavugut. Neriuuterput qanoq illersuutigisaripput sammeriartigu. Neriuut qanoq kitsatut aamma niaqorornaveeqqutitut issinnaasoq sammeqqaassavarput. Taava neriuutitta upperinera qanoq nakussatsissinnaagipput eqqartussavarput.
NERIUUTERPUT KITSATUT IPPOQ
4. Neriuut qanoq kitsatut ippa? (Hebræerit 6:19)
4 Apustilip Paulusip Hebræerinut allakkamini neriuut kitsamut assersuuppaa. (Hebræerit 6:19 atuaruk). Immakkut angalasarami Paulusip nalunngilaa kitsat umiarsuarmik saavigussaannginnissamut iluaqutaasartut. Ilaanni umiarsuarmut ilaanermini anorersuarsioqataavoq. Umiarsuaq anorersuarmit ikkarlunnut ulorianartunut saavigussaannginniassammat umiartortut kitsat ningippaat. (ApS 27:29, 39-41) Soorlu kisaq umiarsuarmut saavitsaalisitsisartoq, anorersuarsiortutut ajornartorsioraangatta neriuuterput Jehovamit qimagukkiartunnginnissamut iluaqutigisarparput. Misilinneqarnerni anorersuartut ittuni pissutsit aaqqikkumaarnerat pillugu neriuuterput toqqissisimassutigisarparput. Eqqaamajuk Jiisusip malersorneqarumaarnerput pillugu mianersoqqugaatigut. (Joh 15:20) Siunissami akissarsiassarput eqqarsaatigeqqissaarutsigu Jehovamut kiffartortuarsinnaavugut.
5. Jiisusip toqusussaagaluarluni neriuut suna nukittoqutigaa?
5 Jiisusip anniarluni toqusussaalluni nalunngikkaluarlugu neriuut aalajaattuarnissaminut qanoq iluaqutigigaa eqqarsaatigiuk. Ukiumi 33-mi ullormi piinsimi Jiisusip isumalluarnera pillugu siulittuut Tussiaatiniittoq apustilip Petrusip issuarpaa: “[Timiga] neriuummi najugaqassaaq Ilivermiitiinnassannginnamma ilumoorfiginnitsivillu mikiarnissaa akuerissannginnakku. … Najorukkit nuannaangaalersissavarma.” (ApS 2:25-28; Tuss 16:8-11) Jiisusip toqusussaalluni nalunngikkaluarlugu Guutip makitikkumaaraani Ataatanilu qilammi najuleqqissallugu neriuutigilluinnarpaa. – Hebr 12:2, 3.
6. Neriuut pillugu qatanngut qanoq oqarsimava?
6 Kristumiutut neriuuterput qatannguterpassuatta pinertusaarnissamut iluaqutigisimavaat. Leonard Chinn, qatanngut angut aalajaatsoq Tuluit Nunaanni najugaqarsimasoq, taakkua ilagaat. Sorsunnersuup siulliup ingerlanerani sakkutuujujumannginnini pissutigalugu parnaarussaavoq. Qaammatini marlunni immikkoortitaavoq, tamatuma kingorna pinngitsaaliissummik suleruloortinneqarpoq. Taanna kingusinnerusukkut allappoq: “Nalaassimasakka pissutigalugit neriuut pinertusaarnissamut pisariaqartilluinnarlugu paasivara. Jiisusi, apustilit pruffiitillu uagutsinnut maligassaalluarput, Biibilimilu neriorsuutit erlinnartut ilisimavagut. Taakku tamarmik pissutigalugit siunissamut isumalluarpugut, tamannalu pinertusaarnissamut nakussatsissutigaarput.” Neriuut Leonardimut kitsatut ippoq, aamma uagutsinnut taamaassinnaavoq.
7. Misilinneqarnerit neriuutitsinnut qanoq sunniuteqarpat? (Romamiut 5:3-5; Jaaku 1:12)
7 Misilinneqarnermi pinertusaarnissamut Jehovamit ikiorneqaraangatta paasisarparput taassumannga iluarisaalluta. Neriuuterpullu upperinerulertarparput. (Romamiut 5:3-5; Jaaku 1:12 atuakkit). Nutaarsiassat nuannersut upperileqqaaratsigit neriuuteqalerpugut, maannali neriuuterput upperinerulersimavarput. Saatanip kissaatigaa misilinneqaatitta sapilersissagaatigut, Jehovalli annertoqqusersuineratigut pinertusaarsinnaavugut.
NERIUUTERPUT NIAQORORTINNAVEEQQUTITUT IPPOQ
8. Neriuut qanoq niaqorortinnaveeqqutitut ippa? (Tessaluunikamiunut 1. 5:8)
8 Biibilimi neriuuterput aamma niaqorortinnaveeqqummut assersuunneqarpoq. (Tessaluunikamiunut 1. 5:8 atuaruk). Sakkutuup niaqqumigut akeqqaminit ajoquserneqannginniassagami niaqorornaveeqqutini illersuutigisarpaa. Anersaakkut sorsunnitsinni Saatanip saassussisarnerinut eqqarsartaaserput illersortariaqarparput. Taassumami eqqunngitsumik eqqarsaateqaleqqulluta assigiinngitsorpassuartigut ussernartorsiortittarpaatigut. Soorlu sakkutuup niaqorornaveeqqutini illersuutigisaraa, taamatuttaaq neriuuterput eqqarsartaatsitsinnut illersuutaavoq Jehovamut aalajaattuarniassagatta.
9. Inuit neriuuteqanngitsut susarpat?
9 Naassaanngitsumik inuunissamik neriugisaqarnerput ilisimassuseqarluta iliuuseqarnissamut iluaqutigisarparput. Namminerli pilerissutsigut kisiisa eqqarsaatigiinnalerutsigit naassaanngitsumik inuunissamik neriuuterput puiortoorsinnaavarput. Itsaq kristumiut Korintimi najugaqartut ilaat eqqarsaatigeriakkit. Guutip neriorsuutaa pingaarutilik – makititaanissamik neriuut – upperiunnaarpaat. (Kor 1. 15:12) Paulusi allappoq makititaanissamik upperinninngitsut pilerigisatik kisiisa pingaartillugit inuusartut. (Kor 1. 15:32) Inuppassuit Guutip neriorsuutai neriuutiginnginnamikkit nuannaarniutit maannakkut pisinnaasatik atorluarniaannartarpaat. Uagulli siunissaq pillugu Guutip neriorsuutai upperaagut. Neriuuterput niaqorortinnaveeqqutitut ittoq eqqarsartaatsitsinnut illersuutaavoq, Jehovamullu attaveqarnitsinnut ajoqutaasumik imminuinnaq eqqarsaatiginnginnissamut iluaqutigisarparput. – Kor 1. 15:33, 34.
10. Neriuut eqqunngitsumik eqqarsalinnginnissamut qanoq illersuutigisinnaavarput?
10 Aamma Jehovap iluarisaatut iliorsinnaanata eqqarsalinnginnissamut neriuuterput iluaqutigisarparput. Assersuutigalugu ilaat immaqa ima eqqarsartarput: ‘Naassaanngitsumik inuusussat ilaginavianngilaannga. Ajukkuppunga. Guutip najoqqutassiai maleruarsinnaanngilakka.’ Jobimut tuppallersaasuusaartup Elifazip assingusumik Jobi eqqarsalersinniarpaa. Ima oqarpoq: “Qanoq ililluni inuk imminut pinngitsuutissinnaava?” Aamma oqarpoq: ‘Guutip illernartortaniluunniit tatigisinnaannginnamigit allaammi qilak minguitsutut isiginngilaa.’ (Job 15:14, 15) Salluliuutipalaat! Eqqaamajuk Saatani taama eqqarsalersitsiniaasoq. Taassuma nalunngilaa taama nuanniitsumik eqqarsartuaruit neriuutaarukkiartuaassasutit. Taamaattumik salluliuutit itigartikkit Jehovallu neriorsuutai isiginiarnerullugit. Qularinngisaannaruk Jehovap naassaanngitsumik inuutikkusukkaatit ikiorumaaraatillu tamatuma angunissaanut. – Tim 1. 2:3, 4.
NERIUUTIT UPPERILLUINNARUK
11. Neriuutitta eqquunnissaata tungaanut sooq naammagittassaagut?
11 Neriuutitta upperilluinnarnissaa ilaannikkut ajornakusoorsinnaasarpoq. Guutip neriorsuutiminik eqquutitsiniarnera utaqqikatalersoorsinnaavarput. Jehova piujuaannarsimagami piffissamut isiginnittaasia isiginnittaatitsinniit allaaneruvoq. (Pet 2. 3:8, 9) Pitsaanerpaamik neriorsuutini eqquutitikkumallugit iliuuseqarumaarpoq, imaassinnaavorli piffissami naatsorsuutigisatsinni iliuuseqassanngitsoq. Guutip neriorsuutiminik eqquutitsinissaa naammagittarluta utaqqitillugu qanoq ililluta neriuummik upperinninnerput nakussatsissinnaavarput? – Jaak 5:7, 8.
12. Neriuut uppernerlu qanoq imminnut ataqatigiippat? (Hebræerit 11:1, 6)
12 Jehova qanimut attaveqarfigiuarutsigu neriuuterput upperilluinnarsinnaavarput, taassumami neriuuterput piviusunngortissavaa. Neriuuteqassagutta Jehova “piviusuusoq qamanngalu pisumik ujarlersiminik akissarsisitsisartoq” upperisariaqarparput. (Hebræerit 11:1, 6 atuakkit). Jehovap piviusuunera upperilluinnarutsigu neriorsuutini tamaasa eqquutitissagai qularinnginnerussavarput. Jehovamut qanoq attaveqarluarnerulersinnaanerluta taamaalillutalu neriuutitta upperilluinnartuarnissaanut iliuuserineqartussat misissulaariartigit.
13. Guuti qanoq qanillisinnaavarput?
13 Jehovamut qinusarit oqaasialu atuartarlugu. Jehova takusinnaanngikkaluarlugu qanillisinnaavarput. Qinunikkut saaffigisinnaavarput qularinagu tusarnaarumaaraatigut. (Jer 29:11, 12) Guuti tusarnaarsinnaavarput oqaasiata atuarneratigut eqqarsaatigeqqissaarneratigullu. Jehovap itsaq ilumoorfiginnitsiminik isumassuinera pillugu atuaraangatta neriuuterput upperilluinnarnerulertarparput. Biibilimi allassimasut tamaasa “ilinniarfiginiassagatsigit allanneqarsimapput. Allakkat Illernartut iluaqutigalugit pinertusaarlutalu tuppallersarneqartaratta neriuuteqarpugut”. – Rom 15:4.
14. Sooq Jehovap allanut iliuuserisimasai eqqarsaatigisariaqarpagut?
14 Jehovap neriorsuutiminik eqqortitsisarnera eqqarsaatigeqqissaartaruk. Guuti Aaperaamut Saaramullu qanoq iliuuseqartoq eqqarsaatigeriaruk. Meerartaarnissamut utoqqaavallaarput. Guutilli neriorsorpai meerartaassasut. (Mos 1. 18:10) Aaperaat tamanna qanoq isumaqarfigaa? Biibilimi allassimavoq: “Inuiaqatigiippassuarnut ataatanngornissani upperaa.” (Rom 4:18) Inuit isaanni neriunartoqarpasinngikkaluartoq Jehovap neriorsuutini eqquutitikkumaaraa upperilluinnarpaa. Angullu aalajaatsoq taanna pakatsisinneqanngilaq. (Rom 4:19-21) Pisimasut taamaattut ersersippaat Jehova neriorsuutiminik eqquutitsiuartoq. Naak pisut uagutsinnut ajornarpasissinnaagaluartut Jehova tatigiuarsinnaavarput.
15. Sooq Guutip uagutsinnut iliuuserisimasai eqqarsaatigisassavagut?
15 Jehovap ilinnut iliuuserisimasai eqqarsaatigisakkit. Biibilimi neriorsuutit eqquuttut illit qanoq iluaqutigereersimanerlugit eqqarsaatigiuk. Assersuutigalugu Jiisusi neriorsuivoq Ataatami illit pisariaqartitannik pilersorumaaraatit. (Mat 6:32, 33) Jiisusip aamma neriorsorpaatit Jehovap anersaamik illernartumik tuniumaaraatit qinnuigigunni. (Luk 11:13) Jehovap neriorsuutit taakku eqquutitissimavai. Neriorsuutit allat aamma eqquutsissimasai iluaqutigisimasatit eqqaassajunnarsivatit. Assersuutigalugu isumakkeerfigerusullutit, tuppallersarumallutit anersaakkullu inuussutissanik tuniumallutit neriorsorsimavaatit. (Mat 6:14; 24:45; Kor 2. 1:3) Guutip illit pillutit iliuuserereersimasai eqqarsaatigeqqissaarukkit siunissami ilinnut iliuuseriumaagai neriuutiginerulissavatit.
NERIUUT NUANNAARUTIGIUK
16. Sooq neriuut tunissutaava erlinnartoq?
16 Naassaanngitsumik inuunissamik neriuut Guutitsinnit tunissutaavoq erlinnartoq. Siunissaq nuannersoq piviusunngortussaq qilanaaraarput. Neriuuterput kitsatut nikitsaaliuisitsisartutut misilinneqarnerni malersorneqarnermilu pinertusaaqqulluta aalajaassutigisinnaavarput, allaat toqumik sioorasaarneqarutta. Niaqorortinnaveeqqutitut eqqarsartaatitsinnut illersuutigaarput, taamaalilluta ajortut itigartissinnaallugillu ajunngitsuliorsinnaaqqulluta. Neriuuterput Biibilimik tunngavilik Guutimut qanillissutigaarput, ersersippaalu qanoq asatigigaatigut. Qulanngivilluta neriuuterput nukittoqutigaarput.
17. Sooq neriuuterput nuannaartitsisarpa?
17 Paulusip Romamiut allaffigigamigit ima kajumissaarpai: “Neriuut nuannaarutigisiuk.” (Rom 12:12) Paulusip qularinnginnamiuk aalajaattuaruni naassaanngitsumik qilammiilerumaarluni tamanna nuannaarutigisinnaavaa. Aamma uagut Jehovap neriorsuutini eqquutitissagai upperilluinnaratsigu neriuuterput nuannaarutigisinnaavarput. Soorlu tussiaasiortoq allattoq: “Pilluarpoq … Naalakkamut Guutiminut neriulluartoq …, [Guuti] ilumoorsutsiminik attassivoq naassaanngitsumik.” – Tuss 146:5, 6.
ERINARSUUT 139 Nuna nutaaq takorlooruk
^ Jehovap siunissaq pillugu nuannersumik neriuutissippaatigut. Neriuut tamanna isumalluarluta nukittoqutigaarput. Qanorluunniit ajornartorsioraluarutta Jehovamut aalajaattuarnissamut iluaqutigaarput. Aamma eqqunngitsumik eqqarsaateqaleqqunata illersuutigaarput. Soorlu allaaserisami matumani sammissagipput, taakku tamarmik kristumiutut neriuutitta upperinerata nakussatsinnissaanut pissutissaalluarput.
^ ASSINI MALUGISASSAT: Soorlu sakkutuup niaqorornaveeqqutini illersuutigisaraa aamma soorlu kisaq umiarsuarmut saavitsaalisitsisartoq, neriuuterput eqqarsartaatsitsinnut illersuutigalugulu misilinneqarnerni aalajaassutigisarparput. Qatanngutip arnap Jehova isumalluarluni qinnuigigaa. Guutip Aaperaamut neriorsuutiminik eqquutitsinera qatanngutip angutip eqqarsaatigeqqissaaraa. Qatanngutip angutip allap Jehovamit qanoq ikiorneqarsimalluni eqqarsaatigigaa.