Atuartartut apeqqutaat
Israalikkut inoqajuitsumiinnerminni mannat aqissiusarsuillu saniatigut allanik nerisartagaqarpat?
Israalikkut ukiuni 40-ni inoqajuitsumiinnerminni pingaarnertut mannat nerisarpaat. (Mos 2. 16:35) Jehova aamma marloriarluni aqissiusarsuarnik nerisassaannik pilersitsivoq. (Mos 2. 16:12, 13; Mos 4. 11:31) Israalikkulli aamma allamik nerisassaqartarput.
Assersuutigalugu Israalikkut Jehovamit imeqarfiusumut nerisassaqarfiusumullu ‘tammaarfigisinnaasaminnut’ siulersorneqartarput. (Mos 4. 10:33) Sumiiffiit taakkua ilagaat Elimi. “Tassani aqqaneq-marlunnik puilasoqarpoq 70-inillu palmeqarluni.” (Mos 2. 15:27) Ilimanarpoq palmit taakku tassaasut orpiit daddelequtit. Atuakkami allassimavoq “sumiiffippassuarni orpeqartartoq daddelequtinik. Inoqajuitsumi inuit millionillit orpiit taakkua inerititaat pingaarnertut inuussutigisarpaat. Orpiimmi taakku iluaqutigalugit nerisassaqartarput, uuliaateqartarput alanngiffissaqartarlutillu.” – Plants of the Bible.
Imaassinnaavoq qooqqumi erngup kuuffigisartagaani, ullumi Wadi Feiranimik taaneqartartumi, sumiiffik naggorissoq Israalikkut tammaarfigisimagaat. a Atuagaq Discovering the World of the Bible naapertorlugu Wadi Feiran 130 kilometerinik isorartutigaaq, Siinaajimilu qooqqup erngup kuuffigisartagaasa isorartunerpaasa, alutornarnerpaasa ilisimaneqarnerpaasalu ilagaat. Immamiit 45 kilometerinik qooroq taanna ingerlavigalugu sumiiffik naggorissoq tikinneqassaaq. Sumiiffik naggorissoq taanna immamiit 610 meterinik portunerusumiippoq, aamma 4,8 kilometerinik isorartutigaaq. Palmerpassuaqarpoq, oqartoqartarporlu naatsiivittut Edenitut alutornartigisoq. Tuusintilinnik daddelequtinik palmeqarmat itsarli inuit taakunngartarsimapput.
Sumiiffimmi naggorissumi Feiranimi palmit daddelequtit
Israalikkut Egypteni qimakkamikku naqittakkanik, naqittaavinnik immaqalu qajuusiassanik uuliamillu nassarput. Soorunalimi taakku sivisuumik inuussutigisimanavianngilaat. Israalikkut aamma “savat ussigillu amerlasoorpassuit” nassarpaat. (Mos 2. 12:34-39) Inoqajuitsumili pissutsit imaannaanngitsuummata uumasut ilarpassui toqusimassapput. Aamma ilaat Israalikkunnit nerineqarsimassapput allallu pilliutigineqarsimassallutik, allaat guutipilunnut. b (ApS 7:39-43) Taamaakkaluartoq Israalikkut uumasuutaateqarput, Jehovammi ima oqarfigisimavai: “Qitornasi ukiuni 40-ni inoqajuitsumi maani nersutaatinik paarsisutut angalaassapput.” (Mos 4. 14:33) Nersutaateqaramik imaassinnaavoq immuuteqartut ilaannikkullu neqitorsinnaasartut. Taakkuli inuit 3 millionit missaannut ukiuni 40-ni inuussutissatut naammanngillat. c
Uumasut suminngaanniit nerisassanik imermillu pisarpat? d Ilimanarpoq taamani inoqajuitsumi siallernerusarlunilu naasoqarnerusoq. Indsigt i Den Hellige Skrift atuagaq 1 naapertorlugu ukiut 3.500-t matuma siorna Israalikkut tammaarfigisaanni imeqarneruvoq. Taamaattoqarsimanera takusinnaavarput erngup kuuffigisarsimasaanik paqqersimasunik qoororpassuaqarmat. Taamaakkaluartoq inoqajuitsoq inuuffigissallugu tujorminartuullunilu navianarpoq. (Mos 5. 8:14-16) Jehova tupinnartuliornikkut imermik pilersitsisimanngitsuuppat Israalikkut uumasuutaallu toqusimassagaluarput. – Mos 2. 15:22-25; 17:1-6; Mos 4. 20:2, 11.
Moorsisi Israalikkunnut oqarpoq Jehovap mannanik tunisimagai paasitinniarlugit “inuup timiusaannaq inuussutiginngimmagu, oqaaserli sunaluunniit Naalakkap qarnanit anisoq inuussutigisarmagu”. – Mos 5. 8:3.
a Vagttårnet maajip aallaqqaataat 1992-imoortumi qupp. 24-25 takukkit.
b Israalikkut inoqajuitsumiinnerminni Jehovamut uumasunik pilliuteqarneri marluk Biibilimi eqqaaneqarput – siulleq palasit ivertinneqarmata aappaalu ullormi qaangiiffimmi. Taakku tamarmik Israalikkut Egyptenimiit aniguisinneqarfianniit ukiup ataatsip missaa qaangiuttoq 1512-imi Kr.in.si. pipput. – Mos 3. 8:14–9:24; Mos 4. 9:1-5.
c Israalikkut ukiut 40-ngajaat inoqajuitsumeereerlutik uumasut 700.000-t sinnerlugit sorsunnermi tiguarpaat. (Mos 4. 31:32-34) Taamaakkaluartoq nunamut neriorsuutigisamut isernermik tungaanut mannatortuarput. – Jos 5:10-12.
d Jehova innuttaminut oqarmat tamarmik immikkut mannanik pisariaqartitaminnik katersuisassasut isummersinnaavugut uumasut mannatorneq ajortut. – Mos 2. 16:15, 16.
