1-2. Qanoq pitsaanerpaamik Biibili atuarlugulu misissorsin­naavarput? Assersuuteqarit.

 TAKORLOORUK illusiniar­nerlutit aalajangiilerlutit. Illup pisiarin­nginnerani suut takorusus­savigit? Illup silataata assinga takuinnarlugu naammassava? Naamik, soorunami illu iserfigalugu initai tamaasa takorusus­savatit. Immaqa aamma illup titartagartaa misissorusussavat paasiumallugu qanoq sananeqarsimanersoq. Soorunami angerlarsimaf­fissanni sumininnguit tamaasa takorusus­savatit.

² Biibilimik atuarnitsinni misissuinitsinnilu assingusumik iliuuseqar­tarsinnaavugut. Biibilimik ilisimatooq oqarsimavoq Biibilip oqariartuutaa illumut angisuumut toqqavis­sualimmut portusuunillu napasulialimmut assingusoq. Taavami Biibilimiittut tamaasa qanoq paasilluarsin­naavigit? Sukkasuumik atuaruit ‘Guutip oqaaserisaanik illernartunik ilinniar­titsissutit tunngaviusuinnaat’ paasissavatit. (Hebr 5:12) Soorlu illu misissor­niarlugu iserfigisariaqarit, taamatuttaaq Biibili iserfigalugulusooq sunnguit tamaasa misissorsin­naavatit. Biibilimik misissuinissamut periuseq pitsaasoq tassaavoq atuagartaasa imminnut qanoq ataqatigiitsiginerisa misissor­nissaat. Ilumoortut suut upperinerlugit paasiin­narnagu aammali sooq taakku upperinerlugit paasiniartaruk.

3. Apustilip Paulusip uppeqatini qanoq kajumis­saarpai, aamma sooq? (Efesossimiut 3:14-19)

³ Guutip oqaasiani sumininnguit tamaasa paasissagutsigit ilumoortut itisuut misissus­savagut. Apustilip Paulusip uppeqatini kajumis­saarpai Guutip oqaasia peqqissaartumik misissoq­qullugu.  Taamaalillutik “silissuseq, takissuseq, portussuseq itissuserlu” paasilluarsin­naavaat uppernerminnilu ‘sorlaqarlutillu aalajaas­sinnaallutik’. (Efesossimiut 3:14-19 atuakkit). Uaguttaaq taamaalior­tariaqarpugut. Sammeriartigu Guutip oqaasianiittut qanoq ililluta paasilluar­nerusin­naagigut.

4. Jehova qanillinias­sagatsigu susinnaavugut? Assersuuteqarit.

⁴ Kristumiuugatta Biibilimi ilinniar­titsissutit tunngaviusuinnaat paasinissaat naammagin­ngilarput. Guutip anersaava ikiortigalugu “allaat itisuut Guutimut tunngasut” paaserusut­tarpagut. (Kor 1. 2:9, 10) Soormi Jehovamut qanillis­sutigisannik misissueq­qissaaruit? Assersuutigalugu itsaq kiffaminut asannit­tuliortarsimanera misissorsinnaavat, tamannalu pissutigalugu upperil­luinnalersinnaavat aamma illit asagaatit. Aamma itsaq Jehovap Israalikkunnit qanoq guutisiorfigineqarusunnera misissorsinnaavat kristumiunillu nalitsinni qanoq guutisiorfigineqarusun­neranut sanilliullugu. Imaluunniit siulittuutit Jiisusip nunarsuarmiin­nermini eqquutsitai sukumiisumik misissorsin­naavatit.

5. Illit suna sukumiisumik misissorusus­sinnaaviuk?

⁵ Biibilimik atuaqqis­saarnermik nuannarisaqartut aperineqarput Biibilimi itisuut suut misissorusunneraat. Akissutaasa ilaat atuarumallugit ungalusaq “ Sammisat nammineq misissorsin­naasatit” takuuk. Jehovap Nalunaajaasuisa ujarliutaat atorlugu sammisat taamaattut misissorneri nuannaarutigingaarsin­naavatit. Biibilimik sukumiisumik misissuiguit uppernikkut nakussatsil­lutillu “Guuti ilisimalissavat”. (Uss 2:4, 5) Maanna Biibilimi ilumoortut itisuut misissorsin­naasatta ilaat sammeriartigit.

6. (a) Pilersaarutip siunertallu suna assigiin­ngissutigaat? (b) Sooq oqarsin­naavugut Jehovap inunnut nunarsuarmullu siunertaa ‘atuuttuar­tussaasoq’? (Efesossimiut 3:11)

⁶ Assersuutigalugu Guutip siunertaa pillugu Biibilimi qanoq allassimasoqarnersoq  eqqarsaatigiuk. Pilersaarut siunertarlu assigiin­ngillat. Pilersaarut tassaavoq apuuffissamut sukkuus­sanerluni aalajangigaq. Pilersaarulli iluatsin­ngitsoorsinnaavoq aqqut ingerlavigisaq asserneqarsimappat. Siunertaq apuuffissamut assersuutigisin­naavarput. Nalunngilarput sumut apuukkusulluta, ingerlavis­sarpulli aalajangereer­neqarnanilu allanngor­tinneqarsinnaavoq. Qujanartumik Jehovap ‘siunertani atuuttuartoq’ qanoq naammas­sissanerlugu Biibilimi paasitik­kiartuaarpaa. (Ef 3:11) Qanorluunniit pisoqaraluarpat siunertani naammas­sissavaa, suummi tamaasa siunertaminut naleqqus­sartarpai. (Es 55:11) Aamma Jehovap iliuusiisa kingunissai atajuassapput. Jehovap siunertaa suua, naammas­siniarlugulu qanoq allannguisariaqarsimava?

7. Inuit siulliit pikitsitsimmata Jehovap siunertani naammas­siniassagamiuk qanoq allannguiva? (Matiusi 25:34)

⁷ Guutip inuit siulliit qanoq siunertaqarfiginerlugit ima oqarfigai: “Kinguaas­siorlusi amerliar­toritsi nunarsuaq tamakkerlugu ilissinnullu naalatsigitillugu; naalagaagitsilu ... aalasunut tamanut.” (Mos 1. 1:28) Adami Evalu inuit ajortilin­ngornerannik kinguneqartumik pikitsitsimmata imaanngilaq Jehovap siunertaa naammas­sineqarsin­naajunnaartoq. Naammas­sineqar­nissaanut nutaamik pilersaarusiorpoq. Ingerlaannaq aalajangerpoq qilammi Kunngeqarfik pilersis­sallugu, Kunngeqarfillu aqqutigalugu Jehovap inunnut nunarsuarmullu siunertani naammas­sissavaa. (Matiusi 25:34 atuaruk). Piffissani nalliummat Jehovap ernini angajul­liliani nunarsuarmukartippaa inuit Kunngeqarfik pillugu ilinniar­tinnias­sammagit inuuninilu akigalugu ajortimit toqumillu aniguisin­niassam­matigut. Taava Jiisusi makitin­neqarluni qilaliar­tinneqarpoq Guutip kunngeqarfiani kunngitut naalakkersuisus­saagami. Guutilli siunertaa pillugu suli ilinniar­nerusin­naavugut.

8. (a) Biibilimi sammineqartoq pingaarneq suua? (b) Efesossimiut 1:8-11 nassuiar­neqartutut Jehovap aamma suna naammas­sissavaa? (Saqqaani assiliaq takuuk).

⁸ Jehovap aqqata illernarsisin­neqarnissaa Biibilimi pingaarnertut sammineqarpoq. Atialu illernarsisin­neqassaaq nunarsuarmut siunertani Kunngeqarfik Kristusimit kunngiuf­figineqartoq aqqutigalugu naammas­sippagu. Jehovap siunertaa allanngor­tinneqarsin­naanngilaq. Neriorsuinikuuvormi oqarnermisut iliorumaarluni. (Es 46:10, 11; Hebr 6:17, 18) Nunarsuaq paratiisin­ngussaaq tassanilu Adamip Evallu kinguaavi naapertuil­luartut naammal­luinnar­tunngorlutik naassaan­ngitsumik inuussapput. (Tuss 37:29) Jehovalli naammas­sisassai taakkuin­naanngillat, aamma siunertarivaa kiffani qilammiittut nunarsuarmiittullu tamarmik ataasioqatigiilissasut. Taava kikkut tamarmik ilumoorfigin­nillutik Jehova kisimi oqartus­saasutut naalassavaat. (Efesossimiut 1:8-11 atuakkit). Jehovap siunertani nuannersumik naammas­siumaaraa ilisimallugu ilaa nuanneq?

9. Biibilip atuarneratigut siunissaq pillugu qanoq ilisimasaqalersin­naavugut?

⁹ Edenimi Jehovap siulittuutaa Mosesimik allakkat siulliit 3:15-imi allassimasoq eqqarsaatigiuk. b Tassani pisussat piumasaanut eqquutsitsisussat pineqarput. Aatsaalli ukiut tuusintillit siulittuutip oqaatigineqarnerata kingorna pisussaapput. Assersuutigalugu Guutip Aaperaat oqarfigaa kinguaani neriorsuutigisaq, Kristusi, inunngorumaartoq. (Mos 1. 22:15-18) Taava siulittuutigineqartutut ukiumi 33-mi Jiisusi ‘kimmimmigut kiineqarpoq’.  (ApS 3:13-15) Siulittuummilu pisussaq kingulleq, tassa Saatanip niaquata aserorneqarnissaa, aatsaat ukiut 1.000-t sinnerlugit qaangiuppata pisussaavoq. (Saqq 20:7-10) Saatanimillu malinnittut Jehovap kiffaanik akerlilersuineranni naggataarutaasumik pisussat Biibilimi sukumiisumik nassuiar­neqarput.

10. (a) Ungasin­ngitsukkut suut pissappat? (b) Isumakkut uummatikkullu qanoq piareersarsin­naavugut? (Quppernerup ataani ilanngussaq takuuk).

¹⁰ Pisussat immikkuul­larissut Biibilimi siulittuutigineqartut uku eqqarsaatigikkit. Siullertut, inuiaat ‘eqqissisitsinerarlutillu isumannaas­suseqalersitsinerassapput’. (Tes 1. 5:2, 3) Inuiaallu upperisarsiornerit eqqunngitsut saassup­patigit annikil­liornar­tussarsuaq aallarteriataassaaq. (Saqq 17:16) Tamatuma kingorna ‘inuup Ernera pissaaneqarluni alutornangaarlunilu qilammi nuissatigut aggersoq’ immaqa immikkuul­larissumik takuneqassaaq. (Mat 24:30) Jiisusip inuit eqqartuutissavai savat savaasallu avissaar­titillugit. (Mat 25:31-33, 46) Saatanili tunuarsimaar­navianngilaq. Guutip innuttai uumigingaaramigit naalagaaffiit iligiit, Biibilimi Gogimik Magogimeersumik taaneqartartut, aqqutigalugit Jehovap innuttai saassutissavai. (Ez 38:2, 10, 11) Aamma annikil­liornar­tussarsuarmi tanitat nunarsuarmiittut kingulliit qilaliar­tinneqassapput, Kristusi sakkutuuilu anersaajusut peqatigalugit Harmagedonnimi sorsussapput. Taamaalillunilu annikil­liornar­tussarsuaq naggaser­neqassaaq. c (Mat 24:31; Saqq 16:14, 16) Taava Kristusip ukiut tuusintini nunarsuarmut naalakkersuinera aallartissaaq. – Saqq 20:6.

11. Naassaan­ngitsumik inuusinnaaneq eqqarsaatigalugu qanoq misigivit? (Aamma assilissat takukkit).

¹¹ Maanna siunissaq ungasin­nerusoq eqqarsaatigiuk. Biibilimi allassimavoq Pinngor­titsisitta ‘naassaan­ngissuseq inuit uummataan­niitissimagaa’. (Oqal 3:11, q.a.i.) Tamanna ilinnut Jehovamullu attaveqarninnut qanoq isumaqas­sanersoq eqqarsaatigiuk. Atuakkami Kom nær til Jehova-mi qupp. 319-imi  soqutiginartumik ima allassimavoq: “Ukiuni hundredilinni, tuusintilinni, millionilinni allaallu milliardilinni inooreerluta Jehova Guuti pillugu ilisimasaqar­nerungaassaagut. Misigis­saagulli nuannersorpas­suarnik kisitas­saanngitsunik suli ilinniagas­saqarluta. ... Takorloorsin­naanngisatsitut paratiisissami inuuneq aatsaat taama imaqarluarlunilu nuanner­tigissaaq. Jehovamullu qanilliuarsin­naanerput qaqugorsuarmut nuannaarutaanerpaassaaq.” Tamannali pitinnagu Biibilimi suut allat misissorsin­naavagut?

12. Qilammiittut qanoq takorloorsin­naavagut? Assersuuteqarit.

¹² Jehova ‘qilammi ineqartoq’ najorlugu qanoq innersoq Biibilimi paasisaqalaarpugut. (Es 33:5) Jehova peqatigiis­sortaalu qilammiittut pillugit nuannersut eqqaaneqarput. (Es 6:1-4; Dan 7:9, 10; Saqq 4:1-6) Assersuutigalugu ‘qilak ammarmat Guutius­sutsimillu takusaqarluni’ Ezekielip takusai mianernartut pillugit atuarsin­naavugut. – Ez 1:1.

13. Sooq Jiisusip qilammi iliuuserisar­tagaanut qujamasuppit? (Hebræerit 4:14-16)

¹³ Qilammi Jiisusip kunngiunera aamma misigin­neqataalluni palasiunera eqqarsaatigikkit. “Pisariaqar­titsinermi” ikiorneqar­nissamik nallittor­neqarnis­samillu qinunikkut “Guutip ajunngisaangaartartup issiavis­saarsuanut” Jiisusi aqqutigalugu sassarsin­naavugut. (Hebræerit 4:14-16 atuakkit). Ullut tamaasa Jehovap Jiisusillu iliuuserisimasaat maannalu iliuuserisartagaat eqqarsaatigisas­savagut. Uagutsinnut asanninnerat killitsis­sutigingaarlugu Jehovamut kiffartor­nitsinni aallussil­luassaagut. – Kor 2. 5:14, 15.

14. Jehovamut Jiisusimullu qujamasunnerput qanoq ersersil­luarsin­naavarput? (Aamma assilissat takukkit).

¹⁴ Guutitsinnut erneranullu qujamasunnerput ilaatigut ersersil­luarsin­naavarput inuit allat  Jehovamut kiffartuler­nissaannik Jiisusimillu ilinniar­titanngor­nissaannik ikiuinikkut. (Mat 28:19, 20) Apustili Paulusi Guutimut Kristusimullu qujamasukkami taamaaliorpoq. Nalunngilaa Jehovap piumasarigaa “inuit tamalaat annaanneqarlutillu ilumoortoq pillugu eqqoqqis­saartumik paasisimasaqalissasut”. (Tim 1. 2:3, 4) Paulusip ‘ilaannaan­nilluunniit annaassaqarumalluni’ oqaluus­sinermini ilungersuus­silluni sapinngisaminik inuppassuit ikiortarpai. – Kor 1. 9:22, 23.

15. Tussiaat 1:2 naapertorlugu suna pillualis­sutigis­savarput?

¹⁵ Tussiaasiortut ilaata inuk Jehovap “inatsisaanik nuannarisaqartoq inatsisaalu eqqarsaatigalugit ullukkullu unnuakkullu” pilluartutut iluatsil­luartutullu allaatigaa. (Tuss 1:1-3) Biibilimik nutserisut ilaat versit taakku pillugit allappoq “inuup Guutimit siulersor­neqarnissani ima kissaatigitigissagaa allaat tamanna pillugu ujartuissasoq, misissueq­qissaassasoq sivisuumillu eqqarsaatigin­nissasoq”. Aamma allappoq “ullut ilaanni Biibilimik atuanngitsooruni ulloq taanna maangaan­nartissagaa”. Biibilip immikkuualuttortai soqutiginartut imminullu qanoq naapertuunnera misissoq­qissaarukkit nuannaarutigis­savatit. Guutip oqaasiata peqqissaartumik misissorsin­naanera nuanningaarami, ilaa?

16. Allaaserisami tulliuttumi suna sammissavarput?

¹⁶ Oqaatsini aqqutigalugu ilumoortut nuannersut Jehovap ilinniar­titsissutai paasiuminaatsuun­ngillat. Allaaserisami tulliuttumi ilumoortut itinerusut ilaat sammissavarput – tassa guutisiorfik anersaakkut ittoq Paulusip kristumiunut hebræerinut allakkamini nassuiaatigisaa. Neriuutigaarput tamatuma misissoq­qissaarnissaa nuannaarutigingaassagit!