1. Inngilip suna tusarliuppaa, tamannalu qanoq misigilis­sutigaarput?

 INNGILIMIT oqaluun­neqartuuguit tusarnaaq­qissaas­sagaluarpiuk? Ullumikkut inngili “inuiaqatigiinnut, naggueqatigiinnut, qanorluunniit oqaasilinnut inuiannullu tamanut” tusarlius­sassaqarpoq. Sumik? ‘Guuti mianeralugulu ataqqisiuk. Qilammik nunarsuarmillu pinngor­titsisoq guutisiorfigisiuk.’ (Saqq 14:6, 7) Jehova Guutiuvoq ilumoortutuaq kikkut tamarmik guutisiorfigisariaqagaat. Guutisiorfimmi anersaakkut ittumi kiffartorsin­naatitaanerput qujamasuutigingaarparput, ilaa?

2. Guutisiorfik anersaakkut ittoq suua? (Aamma takuuk ungalusaq “ Guutisiorfik anersaakkut ittoq tassaanngilaq ...”)

² Guutisiorfik anersaakkut ittoq sorpiaava, sumilu nassuiarluar­neqarpa? Guutisiorfik anersaakkut ittoq tassaavoq Jiisusip utertitsis­sutitut pilliutaa tunngavigalugu guutisiorneq Jehovap pilersitaa. Apustilip Paulusip tamanna nassuiarpaa kristumiut hebræerit Judiiami najugallit allaffigigamigit. b

3-4. Sooq Paulusip kristumiut hebræerit Judiiamiittut isumakuluutigai, qanorlu ikiorpai?

³ Sooq Paulusip kristumiut hebræerit Judiiamiittut allaffigai? Marlunnik pissutis­saqarunarpoq. Siullertut, qiimmas­sarniarlugit allaffigai. Amerlanersaat juutitut upperisaqarlutik peroriar­torsimapput. Imaassin­naavorlu kristumiun­ngornertik pissutigalugu upperisarsiornikkut siuttuusorisimasaminnit  illaruaatigineqartartut. Sooq? Kristumiummi kusanartumik guutisiorfeqar­natillu pilliiveqar­natillu Guutimut pilliisussanik palaseqan­nginnamik. Immaqa kristumiut illaruaatigineqarnertik nikallus­sutigisimavaat uppernikkullu sanngiil­lissutigalugu. (Hebr 2:1; 3:12, 14) Immaqalu taakkua ilaat allaat juutit upperisaannut uternis­saminnik eqqarsaateqarsimapput.

⁴ Aappaattut, Paulusip kristumiut hebræerit paasitippai ‘nerisassat tamuasarissat’, tassa Guutip oqaasiani ilinniar­titsissutigineqartut itisuut, paasilluar­nissaat ilungersuutigival­laarsiman­ngikkaat. (Hebr 5:11-14) Ilaat Moorsisip inatsisaanik maleruaagunarput. Paulusilli nassuiarpaa Moorsisip inatsisaani piumasaqaatigineqartunik pilliinikkut ajortit tamakkiisumik isumakkeer­neqarsin­naanngitsut. Taamaat­tumillu Moorsisip inatsisai atuukkun­naarsin­neqarput. Taava Paulusip ilumoortut itisuut taakkua ilaat sukumiisumik nassuiarpai. Uppeqatinilu eqqaasippai Jiisusip pilliutaa tunngavigalugu pitsaanerusumik neriuuteqartut ‘Guutimut qanillis­sutigisin­naasaminnik’. – Hebr 7:18, 19.

5. Hebræerinut allakkani suut paasisariaqarpagut, aamma sooq?

⁵ Paulusip uppeqatiminut hebræerinut nassuiarpaa sooq kristumiutut guutisioriaasertik juutit guutisioriaasiannit pitsaanerungaarnersoq. Juutit guutisiornerat ‘pisussat tarraannaraat, Kristusimilli timitaler­neqarput’. (Kol 2:17) Tarraq takugaangatsigu naluneq ajorparput arlaata tarrarigaa. Taamatuttaaq juutit guutisioriaasiat piviusut pisussat tarraannaraat, pitsaanerusumimmi guutisioriaaseqar­tussaammat. Ajortuliatsinnik isumakkeerfigineqaq­qulluta akuerisaasumillu guutisiorsin­naajumalluta Jehovap pilersitaa paasilluar­tariaqarparput. Hebræerinut allakkani nassuiar­neqartutut ‘tarraq’ (juutit guutisiornerat) ‘timitaler­neqarneranut’ (kristumiut guutisior­nerannut) sanilliuteriartigu. Taamaalilluta guutisiorfik anersaakkut ittoq qanorlu uagutsinnut tunngas­suteqarnersoq paasilluar­nerussavarput.

6. Tupeq guutisiorfik qanoq atorneqartarpa?

⁶ Juutit guutisiornerat. Paulusi tupeq guutisiorfik 1512-imi Kr.in.si. Moorsisimit napparneqartoq tunngavigalugu nassuiaavoq. (Takuuk ungalusaq “Juutit guutisiornerat – Kristumiut guutisiornerat”). Tupeq  guutisiorfik Israalikkut nooqattaar­nerminni nassartarpaat. Jerusalemmimi guutisiorfiup qarmarsuallip sananeqarnerata tungaanut ukiuni 500-ngajanni atorneqarpoq. (Mos 2. 25:8, 9; Mos 4. 9:22) Aamma ‘Tupermik Naapeqatigiit­tarfimmik’ taaneqarpoq, tassanilu Israalikkut pilliil­lutillu Jehovamik guutisiortarput. (Mos 2. 29:43-46) Aammali tupeq guutisiorfik pingaar­nerungaartumut assersuutaavoq.

7. Guutisiorfik anersaakkut ittoq qanga pilersin­neqarpa?

⁷ Kristumiut guutisiornerat. Itsaq tupeq guutisiorfik “qilammiittut tarraraat”, guutisiorfimmullu anersaakkut ittumut assersuutaalluni. Paulusi allammat “tupeq taanna nalitsinnut [assersuutaasoq]” taamani guutisiorfik anersaakkut ittoq pilersin­neqareersimassaaq. (Hebr 8:5; 9:9) Aap, ukiumi 29-mi pilersin­neqarpoq. Ukiumi tassani Jiisusi imermut morsutsitaavoq, anersaamik illernartumik tanitaavoq guutisiorfimmilu anersaakkut ittumi ‘palasiunertut annerusutut’ Jehovap ivertitaatut kiffartulerluni. c – Hebr 4:14; ApS 10:37, 38.

8-9. Palasiuneq annerusoq Jiisusi Kristusi Israalikkunni palasiunernit qanoq allaanerua? (Hebræerit 7:23-27)

⁸ Juutit guutisiornerat. Palasiuneq Israalikkut sinnerlugit Guutimut sassartarpoq. Israalikkunni Aaronni palasiunertut siullertut Jehovamit toqqarneqarpoq, tuperlu guutisiorfik atoqqaar­tinneqarmat kiffartulerluni. Kisianni Paulusip nassuiarpaa “palaserpassuit toqu pissutigalugu palasiujuarsin­naannginnamik [kingoraar­taattartut]”. d (Hebræerit 7:23-27 atuakkit). Aamma palasiunerit naammal­luinnan­ngitsuugamik namminneq ajortuliatik pillugit pilliisariaqartarput. Palasiuneq annerusoq, Jiisusi Kristusi, taakkunannga allaanerul­luinnarpoq.

⁹ Kristumiut guutisiornerat. Palasiunerput Jiisusi Kristusi “[tupermi] ilumoortumi, inunnit napparneqarnani Jehovamit napparneqartumi, kiffartorpoq”. (Hebr 8:1, 2) Paulusi nassuiaavoq ‘Jiisusi naassaan­ngitsumik inuugami palasimik kingoraar­teqanngitsoq’. Paulusi aamma allappoq Jiisusip ‘mingutsin­neqarsiman­ngitsup ajortilinnit allaanerusup’ Israalikkunni ‘palasiunerit ajortuliatik pillugit ullut tamaasa pilliutissanik sassaas­sisariaqartut assigin­ngikkai’. Maanna juutit guutisior­neranni pilliivik pilliutillu sammilaariartigit paasiumallugu sumut assersuutaanersut.

10. Pilliivimmi kanngus­saasumi pilliutit sumut tikkuussippat?

¹⁰ Juutit guutisiornerat. Toqqup guutisiorfiup isaariaata sioraani kanngus­saasumik pilliiveqarpoq, tassanilu uumasut Jehovamut pilliutigineqartarput. (Mos 2. 27:1, 2; 40:29) Pilliutilli taakku aqqutigalugit inuit ajortuliaminnik tamakkiisumik isumakkeerfigineqarsin­naanngillat. (Hebr 10:1-4) Tupermi guutisiorfimmi uumasunik pilliuteqar­tuartarnerat pilliummut tamakkiisumik ajortaarutitsisin­naasumut tikkuussivoq.

11. Pilliivik sumut assersuutaava? (Hebræerit 10:5-7, 10)

¹¹ Kristumiut guutisiornerat. Pilliivik kanngussaasoq Guutip ernerminut piumasaanut assersuutaavoq. Sooq? Jiisusip inuit pillugit inuunini utertitsis­sutitut pilliutigissagaa Jehovap piumasaraa. (Mat 20:28) Jiisusillu imermut morsutsin­neqarnermigut ersersippaa Jehovap piumasaatut iliorusulluni, soorlulusooq pilliivimmi toqusussatut sassarluni.  (Joh 6:38; Gal 1:4) Jiisusip inuunini naammal­luinnartoq “ataasiaammik” pilliutigimmagu inuit Kristusimut uppertut tamarmik ajortuliaminnik tamakkiisumik isumakkeerfigineqarsin­naanngorput. (Hebræerit 10:5-7, 10 atuakkit). Maanna toqqup guutisiorfiup iluaniittut sunut assersuutaanersut misissulaariartigu.

12. Kikkut Illernartumut Illernar­nerpaamullu isersin­naatitaasarpat?

¹² Juutit guutisiornerat. Toqqup guutisiorfiup kingusin­nerusukkullu Jerusalemmimi guutisiorfiit qarmarsuallit ilui imminnut assingupput. Marlunnik ineqarpoq – ‘Illernartoq’ aamma ‘Illernar­nerpaaq’ – taakkulu saagorsuarmik immikkoor­tinneqarput. (Hebr 9:2-5; Mos 2. 26:31-33) Qullilerfik kuultiusoq, tipigis­saatinik ikumatitsivik aamma iffianut-qaqortunut illernartunut nerriviusaq Illernar­tumiipput. ‘Palasit taninneqarsimasut’ kisimik palasitut kiffartor­niaraangamik Illernartumut isersin­naatitaasarput. (Mos 4. 3:3, 7, 10) Isumaqatigiissummut illerfiusaq kuultiusoq Jehovap najuunneranut assersuutaasoq Illernar­nerpaamiippoq. (Mos 2. 25:21, 22) Palasiuneq kisimi ukiumut ataasiaan­narluni, tassa ullormi saammaan­nartitsivimmi, Illernar­nerpaamut saagorsuarmik asserneqartumut isersin­naatitaasarpoq. (Mos 3. 16:2, 17) Ukiut tamaasa nammineq ajortuliani nunaqqatimilu ajortuliaat pillugit pilliutit aavat saammaan­neqaatissatut sassaak­kumallugu isertarpoq. Piffissap ingerlanerani Jehovap anersaani illernartoq atorlugu  paasinarsisippaa taakku sunut assersuutaanersut. – Hebr 9:6-8. e

13. Tupermi guutisiorfimmi Illernartoq Illernar­nerpaarlu sunut assersuutaappat?

¹³ Kristumiut guutisiornerat. Kristumiut amerlan­ngitsut anersaamik illernartumik taninneqarsimapput Jehovamullu immikkut ittumik attaveqarlutik. 144.000-t taakku qilammi Jiisusi ilagalugu palasitut kiffartor­tussaapput. (Saqq 1:6; 14:1) Suli nunarsuarmiitillutik Guutimit taninneqarlutik qitornavis­siartaarineqarput. Toqqup guutisiorfiup initaa Illernartoq taakkua taamatut immikkut ittumik Guutimut attaveqar­nerannut assersuutaavoq. (Rom 8:15-17) Guutisiorfimmi Illernar­nerpaaq qilammut Jehovap sumiiffigisaanut assersuutaavoq. Illernartup Illernar­nerpaallu akornanni “saagorsuaq” Jiisusip inuttut timaanut assersuutaavoq. Inuttummi timeqarluni guutisiorfimmi anersaakkut ittumi palasiunertut annerusutut qilammut isersin­naanngilaq. Inuttut timini pilliutigigamiuk Jiisusip tanitat qilaliar­nissaannut aqqutis­siuuppai. Taakku aamma qilammi akissarsisin­neqarumallutik inuttut timeqarun­naartariaqarput. (Hebr 10:19, 20; Kor 1. 15:50) Jiisusip makititaanermi kingorna guutisiorfimmi anersaakkut ittumi Illernar­nerpaamut iserpoq, piffissallu ingerlanerani tanitat tamarmik tassani ilagilissavaat.

14. Sooq guutisiorfik anersaakkut ittoq Jehovap pilersitaa juutit guutisioriaasianniit pitsaanerungaarpa? (Hebræerit 9:12, 24-26)

¹⁴ Jiisusip Kristusip palasiunerusup utertitsis­sutitut pilliutaa tunngavigalugu guutisiornerup minguitsup Jehovap pilersitaata pitsaanerungaarnera ersarippoq. Israalimi palasiuneq uumasut aavat nassarlugu Illernar­nerpaamut assannik sanaamut isertarpoq. Jiisusili Jehovamut sassarniarluni “qilammut”, sunit tamanit illernar­nerpaasumut, iserpoq. Tassani inuttut naammal­luinnartutut nunarsuarmi inuunermik pisinnaatitaaffini pilliutigisimasani Jehovamut sassaappaa. Paulusip allaatigisaatut “imminut pilliutiginermigut” Jiisusip ajorti peersippaa. (Hebræerit 9:12, 24-26 atuakkit). Tassa Jiisusip pilliutaata ajorti nungutil­luinnarpaa. Maanna paasissavarput qilaliar­nissamik nunarsuarmiluunniit inuunissamik neriugisaqarnerput apeqqutaatinnagu guutisiorfimmi anersaakkut ittumi Jehovamut kiffartorsin­naasugut.

15. Kikkut toqqup guutisiorfiup silarliani kiffartortarpat?

¹⁵ Juutit guutisiornerat. Toqqup guutisiorfiup silataani ungaluler­neqarsimasumi palasit kiffartortarput. Ikikkagassanik pilliivissuaq kanngussaasoq aamma eqqiartarfik kanngussaasoq palasit kiffartun­nginnerminni eqqiarniaraangamik atortagaat tassaniipput. (Mos 2. 30:17-20; 40:6-8) Guutisiorfiit qarmarsuallit kingusin­nerusukkut sananeqartut marlunnik silarleqarput. Guutisiorfim­mukaraanni silarleq siulleq iserfigineqartarpoq, tassanilu palasiun­ngitsut guutisiorsin­naapput. Silarliit aappaanni guutisiorfimmut qaninnerusumi palasit kiffartortarput.

16. Kikkut guutisiorfiup anersaakkut ittup silarliini marluusuni kiffartorpat?

¹⁶ Kristumiut guutisiornerat. Jiisusi ilagalugu palasitut qilammi kiffartun­nginnerminni tanitat kinguleruttut nunarsuarmi guutisiorfiup anersaakkut ittup silarliisa aappaanni aalajaallutik kiffartorput. Israalikkut guutisiorfianni angisuumik eqqiartarfeqarnera tanitanut kristumiunullu tamanut eqqaasitsis­sutaavoq iliuutsikkut anersaakkullu minguitsuujuarnissap pingaaruteqas­susianik. Taavami  “inupparpassuit” Kristusip qatanngutaanik tanitanik ilumoorfiginnittut sumi guutisiortarpat? Apustilip Johannesip takuai ‘Guutip issiavis­saarsuata saavaniittut’. Tassa nunarsuarmi silarlermi palasiun­ngitsut iserfigisin­naasaanni assersuutaasumiipput. “Guutisiorfimmilu Guutip pigisaani ullukkut unnuakkullu kiffartorput.” (Saqq 7:9, 13-15) Tamatta guutisiorfimmi anersaakkut ittumi Jehovamut kiffartorsin­naatitaanerput qujamasunnaqaaq!

17. Jehovamut sunik pilliuteqarsin­naavugut?

¹⁷ Nalitsinni kristumiut tamarmik piffissartik, nukitik pigisatillu atorlugit Jehovamut kiffartor­nermikkut pilliuteqar­tarsinnaapput. Soorlu Paulusi hebræerinut allattoq ‘pilliummik unnersiutigin­nissummik, tassa qanitta inerititaannik, Guutimut sassaas­siuarsin­naavugut. Taamaalior­tarpugullu atia pillugu tamanut oqaluus­sinikkut.’ (Hebr 13:15) Jehovamik guutisiornerput qujamasuutigalugu ersersis­sinnaavarput sapinngisatsinnik kiffartorfigineratigut.

18. Suut iliuuseriuas­savagut, suullu puiunngisaan­nassavagut? (Hebræerit 10:22-25)

¹⁸ Hebræerit 10:22-25 atuakkit. Hebræerinut allakkat naggataatungaanni Paulusip Jehovamik guutisior­nitsinni iliuuseriuar­tariaqakkagut allaatigai. Taakku tassaapput Jehovamut qinusarneq, neriuutitta oqaluus­sissutigisarnissaa, ataatsimiigiar­tuarneq qiimmas­saqatigiit­tarnerpullu. Jehovap ullussaa “nalliutilermat tamakku tamaasa iliuuserinerus­savagut”. Saqqummersitat naggataatungaanni Jehovap inngilia ima oqarpoq: “Guuti guutisiorfigiuk!” (Saqq 19:10; 22:9) Marloriarluni taama oqarpoq pingaaruteqassusia ersersin­niarlugu. Qanortoq guutisiorfik anersaakkut ittoq pillugu ilikkakkagut tamaasa puiunngisaan­naritigit Guutitsinnullu kiffartorsin­naatitaanerput qujamasuutigiuarlugu!