ITSAQ Israalikkut kulturianni nipilersorneq pingaaruteqangaarpoq. Nipilersortartut erinarsor­tartullu Biibilimi eqqaaneqarajupput. Soqutiginartumik Biibilip imarisaasa 10 procentiisa missaat erinarsuutaapput, assersuutigalugu Tussiaatit, Erinarsugassiat Pingaar­nersaat aamma Upputit erinarsugassiatut allataapput. Atuagaq Music in Biblical Life naapertorlugu Biibilimi erseqqis­sarneqarpoq Israalikkunnut nipilersorneq nalinginnaasoq.

Ulluinnarni nipilersorneq. Israalikkut misigis­sutsitik ersersik­kumallugit nipilersortarput. (Es 30:29) Kunngimik ivertitsinerni, nalliut­torsiornerni sakkutuullu ajugaareer­neranni arnat qitiitigalutik erinarsorlutillu sianaalatitsisarput. (Eqq 11:34; Sam 1. 18:6, 7; Kng 1. 1:39, 40) Aamma aliasuk­kaangamik upputinik erinarsortarput. (Nal 2. 35:25) Ersarippoq Israalikkut nipilersornermik nuannarisaqar­torujussuusut.

Kunngik­kormiuni nipilersorneq. Israalimi kunngit nipilersornermik tusarnaarneq nuannaarutigaat. Kunngip Saulip Daavi nipilersor­tarniassammat kunngik­kormiunut ilanngutitippaa. (Sam 1. 16:18, 23) Kingusin­nerusukkullu Daavi nammineq kunngin­ngorami nipilersuutissanik ilusilersueriarluni sanatitsivoq, erinniortarpoq, taalliortarpoq guutisiorfiulerumaartumilu nipilersoqatigiissat aaqqissuullugit. (Nal 2. 7:6; Am 6:5) Kunngip Saalumuup illussaarsuani angutinik arnanillu erinarsor­tartoqarpoq. – Oqal 2:8.

Guutisiornermi nipilersorneq. Jehovap guutisiorfiginerani Israalikkut nipilersortarput. Jerusalemmimi guutisiorfimmi nipilersul­laqqissut 4.000-upput. (Nal 1. 23:5) Cymbelinik, kukkilat­tarissanik, sianaanik qarlortaatinillu nipilersuuteqarput. (Nal 2. 5:12) Aammali inuinnaat Jehovamik guutisior­nerminni nipilersortarput erinarsorlutillu. Israalikkut amerlasuut Jerusalemmimut nallius­siartoraangamik erinarsuutit aalajangersimasut, tassa Tussiaatit 120-134, atortarpaat. Juutillu allagaataat naapertorlugit ullormi qaangiiffimmi nereqatigiinnermi unnersiutigin­nissutinik erinarsortarput. a

Nipilersorneq aamma uagutsinnut pingaaruteqarpoq. (Jaak 5:13) Guutisior­nitsinnimi erinarsor­tarpugut. (Ef 5:19) Erinarsoqatigiit­tarnerlu uppeqatigiittut immitsinnut qanillis­sutigisarparput. (Kol 3:16) Aamma artornar­torsior­nitsinni erinarsuutit nakussatsis­sutigisarpagut. (ApS 16:25) Tassa erinarsornikkut nipilersor­nikkullu Jehovamut uppernerput asannin­nerpullu kusanarluin­nartumik ersersis­sinnaavagut.