1, 2. Jehovap kif­fai sunik akiugaqar­tar­pat?

GUUTIP kif­fai aalajaatsut tamarmik Abelip nalaaniit ul­loq man­na tikil­lugu akiugas­saqar­tar­put. Apustilip Paulusip kristumiut hebræerit Jehovamit iluarineqarumal­lutik pil­luaq­quneqarumal­lutil­lu ‘mikin­ngitsumik saas­sun­neqar­tarsimanerarlugil­lu naal­liutsitaasarsimanerar­pai’. (Hebr 10:32-34) Paulusip kristumiut akiugas­saqar­tut grækerit unam­mersuar­titsineran­ni peqataasunut – soorlu ar­pat­tar­tunut, paasar­tunut til­luut­tar­tunul­lu – as­sersuup­pai. (Hebr 12:1, 4) Ul­lumik­kut naas­saan­ngitsumik inuunis­samut ar­pan­nitsin­ni uagutsin­nik ajoqusersuerusut­tunik, nuan­naarun­naarsitserusut­tunik siunis­samilu akis­sarsias­satsin­nik an­naasaqar­nis­satsin­nik kis­saateqar­tunik akiugaqar­pugut.

² Saatani taas­sumalu silarsuaa akiuk­katsin­ni, imaluun­niit ‘paasatsin­ni’, nukit­tuner­paap­put. (Ef 6:12, tastamantitâĸ) Silarsuup matuma ajoqersuutaanit, isumaliutersuutaanit ileq­qupiluinil­lu – soorlu kinguaas­siuutitigut inuunerlun­nermit, pujor­tar­tar­nermit aam­ma imigas­samik  ikiaroor­nar­tumil­luun­niit ator­nerluinermit – sun­ner­tin­naveersaar­tariaqar­pugut. Aam­ma nikal­lunganeq san­ngiis­sutivul­lu akior­tuar­tariaqar­pavut. – 2 Kor 10:3-6; Kol 3:5-9.

3. Guutip akiuun­nis­samut qanoq ilin­niar­tit­tar­paatigut?

³ Akiugas­sat taama sak­kor­tutigisut ajugaaf­figineqarsin­naap­pat? Aap, tamaviaaraan­ni! Paulusi im­minut til­luut­tar­tumut as­sersuul­luni ima al­lap­poq: ‘Til­luut­tar­tutut silaan­narmut til­lueriar­tutut in­ngilanga.’ (1 Kor 9:26) Til­luut­tar­tup unam­misaminut akiuut­tar­neratut uagut­taaq akiugas­saqar­pugut. Tamatumani Jehovap Biibili aq­qutigalugu ikior­tarlutalu ilin­niar­tit­tar­paatigut. Aam­ma Biibililersaarutit, kristumiut ataatsimiit­tar­neri ataatsimeersuar­neril­lu aq­qutigalugit ikior­tar­paatigut. Ilitsersuutai tamaasa iluaqutigisar­pigit? Taamaan­ngip­pat pitsaaner­paamik akiuus­sin­naas­san­ngilatit, til­luut­tar­toq silaan­narmut til­luisoq as­sigis­savat.

4. Ajor­tumit qanoq ajugaaf­figitin­naveersin­naavugut?

⁴ Eq­qumaniar­tuar­tariaqar­pugut. Sooq? Ilimagin­ngisatsin­ni san­ngiin­nitsin­niluun­niit saas­sun­neqarsin­naagat­ta. Biibilimi ima mianersoq­quneqarlutalu kajumis­saar­neqar­pugut: “Ajor­tumut ajugaaf­figitin­naveerit, ajor­torli ajugaaf­figiniaruk ajun­ngitsoq atorlugu.” (Rom 12:21) Ajor­tumut akiuut­tuarut­ta ajugaasin­naavugut! Im­minul­li il­lersorun­naarluta akiuuk­kun­naarut­ta Saatanip, taas­suma silarsuaata san­ngiis­sutit­talu ajugaaf­figisin­naavaatigut. Taamaat­tumik tun­niutiin­nan­ngisaan­narit. Nikal­loqinak as­satil­lu sarliaan­nar­nagit! – 1 Petr 5:9.

5. (a) Guutimit iluarisaajumal­luta pil­luaq­quneqarumal­lutalu suna eq­qaamasariaqar­par­put? (b) Biibilimi eq­qar­tor­neqar­tut kik­kut sam­mis­savavut?

⁵ Ajugaajumal­luta sooq akiuun­nerluta eq­qaamasariaqar­par­put. Akiuup­pugut Guutimit iluarisaarusul­lutalu pil­luaq­quneqarusuk­kat­ta. Hebræerit 11:6-imi ima al­las­simavoq: “[Guutimut] pisup up­perisariaqar­paa taan­na tas­saareersoq ujarlersinilu akis­sarsisis­sagai.” Jehovamik ujarler­neq taas­suman­nga iluarisaarusul­luni tamaviaar­ner­tut paasisariaqar­poq. (ApS 15:17) Biibilimi angutit ar­nal­lu tamatumun­nga tun­ngatil­lugu maligas­saal­luar­tor­pas­suit al­laatigineqar­put. Jaaku, Rakeli, Josefi Paulusilu misigis­sutsik­kut timik­kul­lu ar­torsaatigisamin­nik misigisaqar­put. Iluatsip­pul­li. Maligas­siuineran­nit erser­poq tamaviaarut­ta uagut­taaq Jehovamit pil­luaq­quneqarsin­naasugut. Qanoq? Taman­na sam­meriar­tigu.

6. Jaakup piner­tusaar­nis­saminut suna iluaqutigaa, qanorlu akis­sarsisin­neqar­pa? (Al­laaserisap aal­laq­qaataani as­siliaq takuuk).

⁶ Angut aalajaatsoq Jaaku Jehova asagamiuk taas­sumun­ngalu at­taveqar­nini pingaar­tik­kamiuk akiuun­nermini piner­tusaar­poq. Kinguaami pil­luaq­quneqarumaar­neranik Jehovap neriorsuutaa up­peril­luin­nar­paa. (1 Mos 28:3, 4) Jaakup 100-ngajan­nik ukioqarluni Guutimit pil­luaq­quneqarumal­luni al­laat in­ngili paavaa. (1 Mosesi 32:25-29 atuak­kit). Jaaku in­ngilimut pis­saasumut akiuun­nis­samut pigin­naaneqarami? Soorunami naamik! Aalajangersimal­luin­nar­porli, pil­luaq­quneqarumal­lunilu  tamaviaar­poq! Jehovap Jaaku piner­tusaarmat pil­luaq­quaa Israelimil­lu, ‘Guutimut akiuut­tumik’ isumalim­mik, atserlugu. Jaakup Jehovamit iluarisaaneq pil­luaq­quneqar­nerlu akis­sarsiarai, uagut­taaq taamatut akis­sarserusup­pugut.

7. (a) Sooq Rakeli erloqiva? (b) Rakeli sua, qanorlu pil­luaq­quneqar­pa?

⁷ Jaakup nuliata asangaagaata, Rakelip, aam­ma uiminut Jehovap neriorsuutaa qanoq eq­quutis­sanersoq paaserusungaar­paa. Rakelili er­nisuitsuuvoq. Biibilip nalaani taman­na ar­nanut erloqis­sutaangaar­tar­poq. Rakeli erloqigaluarluni qanoq piner­tusaar­pa? Neriut­tuarlunilu Jehovamut akulikin­nerusumik qinusaler­poq. Ilumoorluni qin­nutai Jehovap tusaramigit Rakeli meeq­qanik pil­luaq­quaa. Rakeli taamaat­tumik ima oqar­poq: ‘Unam­merujus­suareerlunga ajugaavunga.’ – 1 Mos 30:8, 20-24.

8. Josefi qanoq erloqinar­torsior­pa, qanorlu maligas­siuil­luar­pa?

⁸ Josefip angajoq­qaami Jaakup Rakelil­lu aalajaal­lutik maligas­siuinerat erloqinar­torsior­nermini iluaqutigigunar­paa. 17-inik ukioqarluni inuunera al­lan­ngorluin­nar­poq. Qatan­ngutiminit sin­ngasunit inus­siatut tunineqar­poq. Kingusin­nerusuk­kut pisuus­suteqan­ngik­kaluarluni Egyptenimi ukior­pas­suar­ni par­naarus­saavoq. (1 Mos 37:23-28; 39:7-9, 20, 21) Josefili nikal­lor­nanilu narrutsaq­qaler­nanilu akiniaan­ngilaq. Sooq? Josefip Jehovamut ikin­ngutaanini uum­matik­kut iluun­ngarluni pingaar­tit­tuaramiuk. (3 Mos 19:18; Rom 12:17-21) Josefip maligas­siaa iluaqutigisin­naavar­put. Atugarliorluta peroriar­torsimagaluarut­ta maan­nak­kul­luun­niit atugarlioraluarut­ta akiuut­tuar­tariaqarlutalu piner­tusaar­tariaqar­pugut. Taamaaliorut­ta Jehovamit pil­luaq­quneqar­nis­sar­put qularin­ngil­luin­narsin­naavar­put.  – 1 Mosesi 39:21-23 atuak­kit.

9. Jaaku, Rakeli Josefilu qanoq ilaarsin­naavavut?

⁹ Uagut­taaq erloqinar­torsior­tarsin­naavugut. Im­maqa naaper­tuil­luan­ngitsumik pineqar­tar­pugut, nikagineqar­tar­pugut, il­laruaatigineqar­tar­pugut sin­ngagineqar­tarlutaluun­niit. Nikal­lor­nata Jaakup, Rakelip Josefil­lu nuan­naarlutik Jehovamut kif­far­tor­nis­samin­nut iluaqutigisaat eq­qaamasariaqar­pavut. Guutip pis­satsil­lugil­lu im­minut ikin­ngutaanermin­nik pingaar­titsil­luin­narmata pil­luaq­quai. Akiuut­tuarlutil­lu qin­nutimin­nut naaper­tuut­tumik iliuuseqar­tuar­put. Ul­luni kingul­ler­ni inuugat­ta siunis­samut neriuutit­ta nakus­satsin­nis­saa pingaaruteqar­poq! Jehovamit iluarisaajumal­lutit akiuun­nis­samut, tas­sa tamaviaar­nis­samut, piumas­suseqar­pit?

10, 11. (a) Sooq Guutimit pil­luaq­quneqarumal­luta akiuut­tariaqarsin­naavugut? (b) Eq­qor­tumik aalajangiinis­samut suut iluaqutigis­savavut?

¹⁰ Sooq Guutimit pil­luaq­quneqarumal­luta akiuut­tariaqar­pugut? Siul­ler­tut, naam­mal­luin­nan­ngitsuugat­ta pileris­susipiloqarsin­naagat­ta. Ilaasa oqaluus­sinermik nuan­narin­nin­nis­sar­tik saper­nar­tit­tar­paat, al­lal­lu peq­qiil­lior­neq kiserlior­nerluun­niit nikal­lungas­sutigisar­paat. Al­lat im­min­nik ajual­latsitsisut isumak­keerfigiuminaatsit­tar­paat. Qanorluun­niit sivisutigisumik Jehovamut kif­far­torsimagaluarut­ta tamat­ta Guutimut, akis­sarsisitsisar­tumut, kif­far­tor­nitsin­nik saper­nar­nerulersitsisunik akiugas­saqar­tar­pugut.

¹¹ Aap, ingam­mik pileris­susipilun­nik akiugaqar­nermi eq­qor­tumik aalajangiiniar­neq kristumiuunerlu saper­narsin­naap­put. (Jer 17:9) Taamatut misigiguit anersaamik il­ler­nar­tumik tuneq­qul­lutit Jehovamut qinugit. Qinuneq anersaarlu il­ler­nar­toq eq­qor­tulior­nis­samut Guutimil­lu iluarisaaler­nis­samut iluaqutigisin­naavatit. Qin­nutitit naaper­torlugit ilior­nis­sat aalajangiusimajuk. Ul­lut tamaasa Biibilimik atuar­tarlutil­lu nam­mineq ilaqutariit­tul­lu atuaq­qis­saar­nis­samut pif­fis­saqar­tarit. – Tus­siaat 119:32 atuaruk.

12, 13. Kristumiut marluk pileris­susipilumin­nik aqutsinis­saq qanoq ilik­kar­paat?

¹² Qatan­ngutit­ta pileris­susipiluit ajugaaf­figinis­saan­nut Guutip oqaasianik, anersaavanik Biibililersaarutitsin­nil­lu iluaqutigin­nit­tar­neran­nik as­sersuutis­sar­pas­suaqar­poq. Inuusut­tuaq­qap Vågn op! decembarip 8-at 2003-moor­tumi al­laaserisaq “Hvordan kan man bekæmpe forker­te ønsker?” atuaramiuk qanoq oqar­pa? “Eq­qun­ngitsumik eq­qarsaateqar­naveersaar­neq tamaviaarutigisar­para. Al­laaserisami ‘amerlasuut eq­qun­ngitsunik eq­qarsaateqar­naveersaar­nis­saq saper­nar­tingaar­taraat’ atuarak­ku qatan­ngutigiis­suar­nut ilaasutut misigiler­punga. Misigivunga kisimiin­nanga.” Inuusut­tup taas­suma aam­ma Vågn op! oktobarip 8-at 2003-moor­tumi al­laaserisaq “Godkender Gud en alter­nativ livs­stil?” iluaqutigaa. Al­laaserisami tas­sani taamatut akiugaqar­tuar­nerup ‘kapinar­tumut timimut kap­puteq­qasutut’ as­sersuutigineqar­nera maluginiar­paa. (2 Kor 12:7) Taak­ku minguitsumik pis­suseqar­nis­saq pil­lugu  akiuuk­kaluarlutik siunis­samut nuan­nersumik neriuuteqar­put. Ima nangip­poq: “Taman­na pis­sutigalugu ul­lut tamaasa aalajaat­taler­punga. Pis­sutsit aaq­qis­suus­saanerata matumani ajor­tumi ul­lut tamaasa aniguisar­nias­sagat­ta Jehovap peqatigiis­sor­tamigut ikiuisar­nera qujamasuutigeqaara.”

¹³ Aam­ma USA-mi qatan­ngutip ar­nap misigisaa eq­qarsaatigiuk. Taan­na ima al­lap­poq: “Pif­fis­saq eq­qorlugu anersaak­kut nerisas­sanik tun­nius­sisar­nersi pil­lugu qutsavigerusup­pas­si. Al­laaneq ajor­poq al­laaserisat uan­nut al­lat­tarisi. Jehovap uumigisaanik pileris­susipiloqar­neq ukior­pas­suar­ni akior­tuar­tar­para. Ilaan­nik­kut akiuuk­kusuk­kun­naar­tutut misigisar­punga. Nalun­ngilara Jehova nal­lit­tuisuul­lunilu isumak­keerfigin­nit­tar­toq, pileris­susipiloqaramali pileris­susipiluil­lu qamuuna iluk­kut uumigin­ngin­nak­kit ikior­neqarsin­naan­ngitsutut misigisar­punga. Taamatut iluk­kut im­minut akior­tar­nera erloqis­sutigisar­para. ... Al­laaserisaq ‘Jehovamik “ilisiman­nit­tumik uum­mateqar­pit”?’ Napasuliaq Alaper­naarsuif­fik marsip 15-iat 2013-imoor­tumi saq­qum­mer­toq atuareerlugu Jehovamit ikior­neqarusut­tutut misigiler­punga.”

14. (a) Paulusip akiuk­kani pil­lugit qanoq misigiva? (b) San­ngiis­sutivut qanoq ajugaaf­figisin­naavavut?

¹⁴ Romamiut 7:21-25 atuak­kit. Paulusip nalun­ngilaa pileris­susipilun­nik san­ngiis­sutinil­lu akiugaqar­neq qanoq tamaviaar­nar­tigisoq. Jehovali qin­nuigisaruniuk, ikiuiumaar­toq tatigiguniuk Jiisusil­lu pil­liutaanik up­perin­nin­nini ersersik­kuniuk akiuun­nermi ajugaasin­naal­luni qularin­ngilaa. Uagum­mi? San­ngiis­sutivut ajugaaf­figisin­naavavut? Aap, Paulusi ilaarutsigu im­minul­lu tatiginata Jehova tatigil­luin­narutsigu uter­titsis­sutitul­lu pil­liut up­perigutsigu.

15. Jehovap aalajaat­tuar­nis­samut misilin­neqar­nermilu piner­tusaar­nis­samut qanoq ikiorsin­naavaatigut?

¹⁵ Ilaan­nik­kut Guutip qanoq pimoorus­sitiginitsin­nik ersersitsinis­sar­put utaq­qeq­qaar­tar­paa. As­sersuutigalugu perululerut­ta naaper­tuil­luan­ngitsumil­luun­niit pineqarut­ta, imaluun­niit ilaqutar­put taamatut misigisaqar­pat, qanoq ilius­saagut? Jehova tatigil­luin­narutsigu aalajaat­tuar­nis­samut, nuan­naar­tuar­nis­samut ikin­ngutigiuar­nis­saanul­lu nakus­satseq­qul­luta kimigiiserfigis­savar­put. (Fil 4:13) Kristumior­pas­suit, itsaq nalitsin­nilu inuusut, qinuneq nakus­satsitsisar­toq piner­tusaar­tuar­nis­samul­lu isumal­lualersitsisar­toq ersersis­simavaat.

16, 17. Sunis­sat aalajangiusimaviuk?

¹⁶ Diaavulup nikal­lus­sasutit as­satil­lu sarliaan­nalis­sagitit kis­saatigingaar­paa. Taamaat­tumik ‘ajun­ngitsoq aalajangiuguk’. (1 Th 5:21) Saatanimut, taas­suma silarsuaanut pileris­susipilun­nul­lu akiuun­nin­ni ajugaasin­naavutit. Guutip nakus­satsik­kumaaraatit ikiorumaaraatil­lu up­peril­luin­naruk­ku ajugaasin­naavutit. – 2 Kor 4:7-9; Gal 6:9.

¹⁷ Taamaat­tumik akiuut­tuarlutil­lu aalajaal­lutil­lu piner­tusaar­tuarit. Qularin­ngil­luin­narsin­naavat Jehovap ‘pil­luaatis­sanik kil­leqan­ngitsunik kueraaf­figiumaaraatit’. – Mal 3:10.