ATUAQQISSAAGASSAQ 38
Anersaakkut ilaquttatit qanillikkit
“Pavunnalerpungagooq uanga Ataatannut ilissilu Ataatassinnut.” – JOH 20:17.
ERINARSUUT 3 Jehova, neriuffigivatsigit nakuussutigalutillu
QILANAARTUUT *
1. Inuit aalajaatsut Jehova qanoq taasinnaavaat?
JEHOVAP ilaqutariissortaanut ilaapput Jiisusi, ‘pinngortitani tamani erniusut siullersaat’, inngilerpassuillu. (Kol 1:15; Tuss 103:20) Jiisusip nunarsuarmiinnermini ersersippaa inuit aalajaatsut Jehova ataatamissut taasinnaagaat. Jiisusip Jehova ajoqersukkaminut eqqartoramiuk ima taavaa: ‘Uanga Ataataga ilissilu Ataatarsi.’ (Joh 20:17) Aamma Jehovamut tunniulluinnarlutalu imermut morsutsinneqaratta, tassa kuisikkatta, qatanngutit angutit arnallu asannittut ilaqutarilerpagut. – Mark 10:29, 30.
2. Allaaserisami matumani suut sammissavagut?
2 Inuit ilaasa Jehova Ataatatut asannittutut isiginissaa sapernartittarpaat. Allat qatanngutitik qanoq asannittuliorfigisinnaanerlugit immaqa naluaat. Allaaserisami matumani sammissavarput Jehova Ataatatut asannittutut qanillisinnaasatsitut isiginiassagatsigu Jiisusip qanoq ikioraatigut. Aamma paasissavarput qatanngutitsinnik pinnittarnitsinni Jehova qanoq ilaarsinnaagipput.
JEHOVAP IMMINUT QANILLINISSAT KISSAATIGAA
3. Qinnut najoqqutassaasoq iluaqutigalugu Jehova qanoq qanillisinnaavarput?
3 Jehova ataataavoq asannittoq. Jiisusip kissaatigaa Jehovamut isiginnittaatsini ilaassagipput – tassa Jehova angajoqqaatut asannittutut oqaloqatikkuminartutullu isigissagipput, Matt 6:9) Jiisusip Jehova ima taaqqusimasinnaagaluarpaa: ‘Ajugaqanngitsoq’, ‘Pinngortitsisoq’ imaluunniit “kunngiusoq atajuartussaq” – taaguutimmi taakku tamarmik naleqqullutillu Biibilimeersuupput. (1 Mos 49:25; Es 40:28; 1 Tim 1:17) Taakkuli atornagit Jiisusip Jehova ‘Ataatatut’ taaqquaa.
inussiarniitsutut naalagarsiortitsisutullu isiginagu. Tamanna erserpoq Jiisusip ajoqersukkani sunik qinnuteqartarnissaannik ilinniartikkamigit. Qinnut najoqqutassaasoq ima aallartippaa: “Ataatarput.” (4. Qanoq nalunngilarput Jehovap imminut qanillinissarput kissaatigigaa?
4 Jehovap Ataatatut asannittutut isiginissaa sapernartittarpiuk? Inuit ilaat taamatut misigisarput. Peroriartornitsinni angajoqqaagut asannittuusimanngippata ataataasup asannittuusinnaanera takorlooruminaatsissinnaavarput. Tuppallernaqaaq nalunagu Jehova misigissutsitsinnik paasinnilluinnartuusoq! Qanillerusuppaatigut. Taamaattumik oqaatsimini ima kajumissaarpaatigut: “Guuti qaninniarsiuk, taava taanna ilissinnut qanillissaaq.” (Jaak 4:8) Jehovap asavaatigut tamanillu Ataataalluarnerpaalluni.
5. Lukasi 10:22 naapertorlugu Jehovamut qanillinissatsinnut Jiisusip qanoq ikiorsinnaavaatigut?
5 Jiisusip Jehovamut qanillinissatsinnut ikiorsinnaavaatigut. Jiisusip Jehova ilisarisimalluinnaramiuk pissusiinillu ilaarsilluinnartarami ima oqarsimavoq: “Uannik takunnittup Ataataq takuaa.” (Joh 14:9) Jiisusip qatanngutigiinni angajullersatullusooq Ataatarput qanoq ataqqillugulu naalassinnaagipput, qanoq iluarinngisaanik iliornaveersaarsinnaasugut qanorlu taassumannga iluarisaasinnaasugut ilinniartippaatigut. Ingammilli Jehovap asannittuunera inussiarnersuuneralu Jiisusip inuuneranit erserpoq. (Lukasi 10:22 atuaruk). Assersuuteqariarta.
6. Jehovap Jiisusimut tusarnaartarneranik assersuuteqarit.
6Jehovap qitornani tusarnaartarpai. Assersuutigalugu ernini angajulliliani tusarnaarpaa. Jiisusip nunarsuarmiinnerani qinnuterpassui tusarnaartarpai. (Luk 5:16) Pingaarutilinnik aalajangigassaqartilluni, soorlu apustilinik aqqaneq-marlunnik toqqaaniarnermini, qinugaangat Jehova tusarnaartarpoq. (Luk 6:12, 13) Aamma Jiisusi annikilliorluni qinummat Jehovap tusarnaarpaa. Killuutigineqanngitsiarnermini misilinneqarnissani artornartoq pillugu qamannga pisumik Ataataminut qinuvoq. Jiisusip qinnutaa tusarnaaginnarnagu nakussatsinniarlugu Jehovap inngili taassumunnga aallartippaa. – Luk 22:41-44.
7. Jehovap innuttami qinnutaannik tusarnaartarnera nalunagu qanoq misigivit?
7 Nalitsinni Jehovap kiffartorfiginnitsimi qinnutaat tusarnaartarpai, aamma piffissaq eqqorlugu pitsaanerpaamillu akisarpai. (Tuss 116:1, 2) Qatanngutip arnap Indiamiup tamanna misigaa. Misigissutsikkut artorsarsimavoq tamannalu pillugu qamannga pisumik Jehovamut qinusimalluni. Ima allappoq: “2019-imi JW Broadcasting® maajimoortumi isumakuluuteqaraangatta annilaangagaangattalu qanoq iliortarsinnaasugut sammineqarpoq. Tamanna pisariaqartilluinnarakku qinnutinnut akissutaasorivara.”
8. Jehovap Jiisusimik asanninnini qanoq ersersittarpaa?
8 Jehovap Jiisusi asallugulu nunarsuarmiinnerani isumassorpaa, taamatuttaaq uagut asallutalu isumassortarpaatigut. (Joh 5:20) Jiisusip anersaakkut, misigissutsikkut timikkullu pisariaqartitai tamaasa isumagisarpai. Ernini asallugulu iluaralugu oqarfigisarpaa. (Matt 3:16, 17) Jiisusi Ataatami qilammiusup asannittup najortuarumaaraani nalunnginnamiuk kisimiittutut misiginngisaannarpoq. – Joh 8:16.
9. Jehovap uagutsinnik asanninneranut suut takussutissaappat?
9 Jiisusitut tamatta Jehovamit asaneqarnerput misigisarparput. Assersuutigalugu Jehovap imminut kajungilersippaatigut, aamma nuannaartikkusulluta misigissutsikkullu pisariaqartitagut isumagiumallugit asannittunik ataasioqatigiittunillu anersaakkut ilaqutaqalersippaatigut. (Joh 6:44) Aamma anersaakkut inuussutissanik pilersortuarpaatigut. Allaallu timikkut pisariaqartitatta matussusernissaannut ikiortarpaatigut. (Matt 6:31, 32) Jehovap uagutsinnik asanninnera eqqarsaatigisarutsigu taassuminnga asanninnerulissaagut.
JEHOVA ILAARLUGU ANERSAAKKUT ILAQUTTATIT ASANNITTULIORFIGIKKIT
10. Jehovap qatanngutitsinnik pinnittarnera qanoq ilinniarfigisinnaavarput?
10 Jehovap qatanngutigut asavai. Uagulli ilaannikkut asanissaat asanninnermillu ersersitsiviginissaat sapernartissinnaavarput. Kulturikkummi tunuliaquttatsigullu assigiinngissinnaasarpugut. Tamattalu allat pakatsissutigisinnaasaannik kukkusarpugut. Taamaakkaluartoq anersaakkut ilaqutariittut asaqatigiinnerulersinnaavugut. Qanoq? Ataatatta qatanngutitsinnik asannittuusup ilaartarneratigut. (Ef 5:1, 2; 1 Joh 4:19) Jehova qanoq ilinniarfigisinnaagipput sammeriartigu.
11. Jehova ilaarlugu Jiisusi qanoq ‘nallittuingaartuua’?
11Jehova ‘nallittuingaartuuvoq’. (Luk 1:78) Nallittuingaartuusup inuk naalliuuteqartoq malugigaangamiuk ikiorusulerlugulu tuppallersarusulertarpaa. Jehova ilaarlugu Jiisusi inunnik nallittuisarpoq. (Joh 5:19) Ilaanni inuppassuarnit orninneqarami Jiisusip “nalligingaalerpai paarinerlugaallutillu naakkinarsisimangaarmata savatut paarsisoqanngitsutut”. (Matt 9:36) Nalligiinnarnagilli ikiorniarlugit iliuuseqarpoq. Napparsimasut ajorunnaarsippai aamma ‘suleruluttut nanertugaasullu’ ikiorlugit. – Matt 11:28-30; 14:14.
12. Ilaatigut qanoq nallittuisinnaavugut?
12 Qatanngutitsinnik nallittuissagutta qanoq ajornartorsiuteqarnersut eqqarsaatigeqqaartariaqarparput. Assersuutigalugu imaassinnaavoq
qatanngut arnaq perulunnartumik peqqiilliuuteqartoq. Tamanna naammagittaalliuutigineq ajorpaa, ikiorneqassagunili qujamasuutigissagunarpaa. Ilaquttani isumagisinnaasarpai? Immaqa nerisassiornermi illulerinermiluunniit ikiorneqaruni qujamasuutigissavaa. Qatanngulluunniit angut suliffeeruttoq suliffittaaqqinnissaata tungaanut uagutsinninngaaneernera oqaatiginngikkaluarlugu aningaasatigut ikiorsinnaavarput.13-14. Jehova ilaarlugu qanoq tukkortuusinnaavugut?
13Jehova tukkusuujuvoq. (Matt 5:45) Qatanngutitta ikioqquneqarnissaat utaqqinagu Jehova ilaarlugu siulliulluta iliuuseqarnitsigut nallittuisarsinnaavugut. Jehovap peqquneqanngikkaluarluni seqineq nuisittarpaa. Seqernullu kissaa tamanut, qujamasuttunuinnaanngitsoq, iluaqutaasarpoq. Pisariaqartitatsinnik isumaginnittarnermigut Jehovap asalluta ersersittarpaa. Jehova taama inussiarnertigalunilu tukkortigimmat asangaarparput!
14 Ataatarput qilammiusoq ilaarlugu qatanngutitta ilarpassui tukkorlutik siulliullutik iliuuseqartarput. Assersuutigalugu 2013-imi ulussaarsuaq Haiyan Filippinerinut pitoraammat aseruinerujussuaqarpoq. Qatannguterpassuatta angerlarsimaffitik pigisatillu annaavaat. Anersaakkulli ilaquttaminnit nunarsuarmi sumi tamaneersunit ikiorneqapallapput. Aningaasatigut tunisisoqarpoq sanaartoqataajartortunillu tikittoqarluni, tamannalu pissutigalugu ukioq ataaseq qaangiutinngitsoq angerlarsimaffiit 750-ingajaat iluarsaanneqarput sanaqqinneqarlutilluunniit! Aamma COVID-19-ip atuunnerani qatanngutit uppeqatitik ikiorumallugit ilungersorput. Anersaakkut ilaquttatta ikiupallattarnerisigut taakku asallugit ersersittarparput.
15-16. Lukasi 6:36 naapertorlugu Ataatarput qilammiusoq qanoq ilaarsinnaavarput?
15Jehova nallittuisuullunilu isumakkeerfiginnittartuuvoq. (Lukasi 6:36 atuaruk). Ullut tamaasa Ataatatta qilammiusup nallittuinera misigisarparput. (Tuss 103:10-14) Jiisusip malinnitsini naammalluinnanngitsuusut nallittorlugillu isumakkeerfigisarpai. Allaat ajortuliagut pillugit isumakkeerfigineqarsinnaaniassagatta inuunini pilliutitut tunniuppaa. (1 Joh 2:1, 2) Jehova Jiisusilu nallittuillutillu isumakkeerfiginnikkumasarmata qanillerusuppagut, ilaa?
16 ‘Isumakkeerfigeqatigiittarutta’ anersaakkut ilaqutariittut asaqatigiinnerulissaagut. (Ef 4:32) Ilaannikkulli allat isumakkeerfigiuminaatsissinnaasaratsigit tamanna sulissutigisariaqartarparput. Qatanngut arnaq misigivoq Napasuliaq Alapernaarsuiffik-mi allaaserisaq “Isumakkeerfigeqatigiittaritsi” taamaaliornissaminut iluaqutigalugu. * Ima allappoq: “Allaaserisaq atuaqqissaarakku isumakkeerfiginninneq qanoq paasisariaqartoq paasilluarnerulerpara. Nassuiarneqarpoq isumakkeerfiginnikkumaneq tassaanngitsoq pissusilersornermik eqqunngitsumik iluarinninneq ajortulialluunniit ajoqusiineranik suusupaginninneq, tassaasorli ajortuliat pillugit narrutsassimajunnaarluni qamuuna eqqissisimaleqqinneq.” Jehova ilaarlugu qatanngutitsinnik isumakkeerfiginneriaannaagaangatta ersersittarparput taakku asallugit.
JEHOVAP ILAQUTARIISSORTAANIISSINNAANERIT QUJAMASUUTIGIUK
17. Matthæusi 5:16 naapertorlugu Ataatarput qilammiusoq qanoq ataqqinarsisissinnaavarput?
17 Qujamasuutigingaarparput nunarsuaq tamakkerlugu ilaqutariinnut asaqatigiittunut ilaanerput. Kissaatigaarpullu sapinngisamik amerlanerpaat guutisioqatigilerumaaraatigut. Taamaattumik Jehovap innuttaanut Ataatatsinnullu qilammiusumut tusaamanerlugaatitsisumik iliuuseqarnaveersaartariaqarpugut. Nutaarsiassamut nuannersumut kajungilersitsisinnaasumik pissuseqarusuttarpugut. – Matthæusi 5:16 atuaruk.
18. Oqaluussinermi sapiissuseqarnissatsinnut suna iluaqutigissavarput?
18 Ataatarput qilammiusoq naalattaratsigu ilaannikkut illaruaatigineqartarpugut malersorneqartarlutaluunniit. Upperisatsinnik allanut oqaluttuarnitsinni sapiissuseeruttutut misigigutta qanoq iliussaagut? Jehovamit Jiisusimillu ikiorneqarnissarput ilimagisinnaavarput. Jiisusip ajoqersukkani oqarfigai qanoq oqassanerlutik isumakuluutigissanngikkaat. Matt 10:19, 20.
Ima oqarpoq: “Oqaasissassinnik tunineqarumaarpusi. Ilissimi oqaluttuunngilasi, Ataatassiliuna anersaava ilissitigut oqaluttoq.” –19. Sapiilluni oqaluussisumik assersuuteqarit.
19 Robert assersuutigisinnaavarput. Biibilimik ilinnialeqqaarnermi nalaani Biibili pillugu suli ilisimasakilluni Sydafrikami sakkutuut eqqartuussiviannut sassartitaavoq. Sapiilluni eqqartuussisumut nassuiarpaa qatanngutiminik kristumiunik asanninnini pissutigalugu sakkutuujumanani. Anersaakkut ilaqutaqarnini qujamasuutigingaarpaa! Taava eqqartuussisoq ima apereriataarpoq: “Qatanngutitit kikkuugamik?” Robertip taamatut aperineqarnissani ilimaginngikkaluarpaa, ullormulli allassimaffik Matthæusi 12:50 ingerlaannaq eqqaavaa. Tassani ima allassimavoq: “[Kinaluunniit] ataatama qilanniittup piumasaanik iliortoq tassa nukara najagalu anaanagalu.” Robertip Biibilimik ilinnialerlaajugaluarluni Jehovap anersaavanit ikiorneqarluni apeqqut tamanna apeqqutillu ilimaginngisani allat akisinnaasimavai. Jehovap Robert tulluusimaarutigisimassaqaa! Aamma uagut tulluusimaarutigisarpaatigut sapernartikkaluarlugu sapiilluta taanna tatigalugu oqaluussigaangatta.
20. Suna aalajangiusimasariaqarparput? (Johannesi 17:11, 15)
20 Qanortoq asaqatigiittunik anersaakkut ilaqutaqarnerput qujamasuutigiuartigu. Ataataalluarnerpaamik Ataataqarpugut qatannguterpassuaqarlutalu asannittunik. Taakku qujamasuutigiuartariaqarpagut. Saatanip malinnittaasalu uumissuisut Ataatatsinnit qilammiusumik asaneqarnerput pillugu qulalersinniartarpaatigut avissaartuutsinniartarlutalu. Jiisusilli Ataatatsinnut paareqqullutalu ataasioqatigiittuaqqulluta qinnuppaatigut. (Johannesi 17:11, 15 atuakkit). Jehovap qinnut tamanna akivaa. Jiisusi ilaarlugu Ataatatsinnit asaneqarnerput ikiorneqartarnerpullu qularinngisaannartigit. Aamma anersaakkut ilaquttatta qaninnerujartuinnarnissaat aalajangiusimatigu.
ERINARSUUT 107 Guutip asanninnermik najoqqutassiaa
^ par. 5 Immikkut ittumik pilluaqquneqarpugut, tassa qatanngutit angutit arnallu asannittut ilaqutaraagut. Tamatta asaqatigiinnerulerusuppugut. Qanoq taamaaliorsinnaavugut? Ataatatta asannittup uagutsinnik pinnittarnerata ilaarneratigut aamma Jiisusip uppeqatittalu ilaarnerisigut.
^ par. 57 ASSIMI MALUGISASSAT: Jehovap Jiisusi naatsiivimmi Getsemanemiittoq nakussatsikkumallugu inngili taassumunnga aallartippaa.
^ par. 59 ASSIMI MALUGISASSAT: COVID-19-ip atuunnerani qatanngutitta ilarpassui nerisassanik piareersaassillutillu pajuttuisarput.
^ par. 61 ASSIMI MALUGISASSAT: Anaanaasup panini qatanngummut parnaarussivimmiittumut qiimmaallannartumik allagaqartoq ikioraa.