Angajoqqaakka Schweizimiit Canadami Ontariop nunaqarfittaanut Timminsimut, saffiugassanik piiaaffiusumut, nuunnerupput, uangalu 1934-mi inunngorpunga. 1939-p missaani anaanama Napasuliaq Alapernaarsuiffik atuartalerpaa, Jehovallu Nalunaajaasuisa ataatsimiinnerini, qatanngutigiit arfineq-marluusugut ilagaluta, najuuttalerpoq. Sivitsorian­ngitsoq nammineq Jehovamik Nalunaajaasun­ngorpoq.

Anaanap Nalunaajaasun­ngornera ataatap nuannarinngilaa, anaanalli sallusuissut nuannaringaarpaa aalajangersimallunilu Jehova aalajaaf­figiniarlugu. 1940-kkut aallartin­neranni Jehovap Nalunaajaasuisa sulinerat Canadami inerteq­qutaaleraluarmal­luunniit aalajaat­tuarpoq. Aamma naak ataatamit oqaatsitigut nuannin­ngitsunik tusartin­neqartaraluarluni inussiar­nersumik ataqqin­nittumillu pissusilersorfigiuaannarpaa. Maligas­saalluarnera qatanngutikkalu Jehovap kiffartorfiginissaanut iluaqutigingaarparput. Qujanar­tumillu piffissap ingerlanerani ataata akuersaar­nerulerpoq ilaqutariiusugullu pissuseris­saarfiginerulerluta.

1950-imi aasaagaa New Yorkimi ataatsimeersuarneq “Teokratiip ineriar­tornera”-nik qulequtalik najuuffigaara. Qatanngutit nunanit tamalaaneersut naapereerlugit Ilinniarfimmilu Gileadimi naammassisut apersor­neqarneri soqutiginartut tusarnaareerlugit aalajangerpunga Jehovamut kiffartorninni iliuuseqar­neruler­niarlunga. Piffissaq tamaat kiffartuler­nissara suli aalajangiusimanerulerpara. Angerlarama ingerlaannaq pioneritut kiffartuler­nissannik qinnuteqarpunga. Canadami immikkoor­tortaqarfimmit akissutisivunga imermut morsutsitaanissara isumageq­qaalaaq­qullugu. Oktobarip aallaqqaataanni 1950-imi imermut morsutsitaavunga. Qaammat ataaseq qaangiutiinnartoq pionerin­ngorpunga Kapuskasingimilu kiffartor­tussatut  siullerpaamik suliassin­neqarlunga. Illoqarfik taanna angerlarsimaf­fitsinniit kilometererpaalus­suarnik ungasitsigaaq.

1951-imi upernaakkut immikkoor­tortaqarfik oqaluus­sisartunik franskisut oqalussin­naasunik, Quebecip nunaqarfiisa ilaannut franskisut oqaluttoqarfiusumut nuukkumasin­naasunik, ujartuivoq. Tassani oqaluus­sisartut pisariaqar­tinneqaqaat. Uanga franskisut tuluttullu oqaluttuni peroriar­tortuusunga neqeroorama Rouynimi suliassin­neqarpunga. Tassani ataasin­nguamil­luunniit ilisarisimasaqan­ngilanga. Soorlu siuliani eqqaareeriga adresse pappiaqqami allassimasoq kisiat pigaara. Ajunngitsumilli kinguneqarpoq. Marcelilu ikinngutigiil­lualerpugut, ukiunilu sisamani tulliuttuni Quebecimiinnera nuannareqaara. Piffissap ingerlanerani specialpioneritut kiffartulerpunga.

Quebecimiitillunga Ilinniarfimmi Gileadimi, taamani South Lansingimi New Yorkimiittumi, klassit 26-ssaannut qaaqqusaagama pissangaqaanga. Februaarip 12-anni 1956-imi soraarum­meeratta Afrikap Kitaani maannakkut Ghanamik ilisimaneqartumi suliassin­neqarpunga. b Angalanis­sannulli pappiaqqat naammas­sinissaat Canadamut utaqqiar­toqqaaral­larpakka, eqqarsarlunga sapaatit-akunnialuinnarni utaqqis­sallunga.

Angalanis­sannulli allagartat taakku qaammatini arfineq-marlunni Torontomi utaqqivakka. Utaqqitillugit ilaqutariinni Crippsikkunni najugaqarpunga, tassaniitil­lungalu taakkua paniat, Sheila, ilisarisimalerpara. Asannilerpugut. Katikkumas­samaalerut­torlugu angalanissannut visummissara tiguara. Sheilalu Jehovamut qinunikkut ikioqquvugut, isumaqatigiip­pugullu aallassasunga. Aamma allaqatigiit­tarniarluta isumaqatigiippugut katissaguttalu qaqugu katissanerluta paasinarsiumaartoq. Taama aalajangerneq imaannaanngilaq, kingumulli qiviassaguma eqqortumik aalajangersimavugut.

Qaammat ataaseq qimuttuitsorlunga, umiarsuarlunga timmisar­torlungalu angalareerlunga Accramut Ghanamiittumut tikippunga. Ghanami ilageeqatigiinnik arlalinnik nakkutil­liisutut suliassin­neqarpunga. Nakkutigisassamali aamma ilagaat nunat Ghanap eqqaaniittut Elfenbenskysten  (Côte d’Ivoire) aamma Togoland (Togo). Piffissap annersaani kisimiillunga immikkoor­tortaqarfiup biiliinik angalasarpunga. Angalatillunga qatanngutinut tikeraar­tarnera nuannarisaqaara!

Sapaatit-akunnerisa naaneranni ilageeqatigiit ataatsimeersuar­neranni suliaqar­tarpunga. Ataatsimeersuar­tarfeqan­ngilagut. Taamaattumik qatanngutit seqernup kissaanut illersuutaasin­naasunik palmit pilutaannik bambusinut ikkussuillutik qaliaasaliortarput. Ataatsimeersuaqataasut tamarmik nerisas­siuunneqartarput, qerititsiveqan­ngimmalli qatanngutit uumasunik pisariaqaraangat nerisassatut toqutassanik piareersimasuuteqartarput.

Ataatsimeersuarnerit taama ittut ilaanni quianar­torsisarpugut. Ilaanni Herb Jennings, c ajoqersuiar­tortitaq asanartoq, oqalugiar­tillugu nersussuaaraq nerisarfimmiit qimaasoorutigaat. Oqaluttarfik tusarnaartullu akulloq­quallugit qimaasaqat­taarpoq. Qatanngutip Herbip oqalugiarnini unitsil­latsiarmagu nersussuaaraq paatsiveerutitallappoq. Taamaalisorlu qatanngutit nukittuut sisamat nerisarfimmut uterteq­qippaat najuuttut qiimmat­taatigeqisaannik ersaartaatigeqisaannillu.

Ataatsimeersuarnerit akornanni nunaqarfimmiunut qanittumiittunut filmi Den Nye Verdens Samfund i Virksomhed isiginnaar­tittarpara. Isiginnaar­titsiniaraangama annoraamineq qaqortoq qisunnut marlunnut imaluunniit orpinnut marlunnut qilerlugu siaartarpara. Nunaqarfimmiut nuannarisaqaat! Amerlasuut aatsaat siullermeerlutik filmimik isiginnaartarput. Filmimi inuit imermut morsutsitaasut takugaangamikkit ersaartaaterujus­suartarput. Filmimik isiginnaartut paasisarpaat peqatigiif­fiusugut nunarsuaq tamakkerlugu ataasius­suseqartut.

Ukiut marluk missaat Afrikameereerlunga New Yorkimi nunat tamat ataatsimeersuar­nissaannut 1958-imi peqataanissara qilanaareqaara. Sheila, Quebecimi specialpioneritut kiffartortoq, ataatsimeersuarnermi naapeqqikkakku nuannaaqaanga. Allaqatigiit­tuartarpugut maannali najoqqilerluta. Katikkumagannilu akuersivoq. Qatanngut Knorr d allaffigaara aperalugulu Sheila Gileadimi ilinnialersin­naannginnersoq Afrikamilu kiffartoqatigilerlunga, akuersivorlu. Kiisami Sheila Ghanamut tikippoq. 1959-imi oktobarip pingajuanni Accrami katippugut. Misigaagut Jehova inuunitsinni salliuk­katsigu pilluaq­qusaangaarluta.

1961-imi Camerounimi kiffartor­tussanngor­tinneqarpugut. Aperineqarpunga nutaamik immikkoor­tortaqarfiliornermi ikiuussin­naanersunga. Ulapeqaanga. Immikkoor­tortaqarfimmi nakkutil­liisutut nutaatut ilikkagas­sarpassuaqarpunga. Taava 1965-imi paasilerparput Sheila naartusoq. Nassuerutigissavara angajoqqaatut inuuneqaler­nissarput takorlooriarsin­naannginnakku. Akisussaaffimmut nutaamut qilanaalerut­tortugut Canadamullu uternissarput pilersaarutigilerut­toripput ajortorujus­suarmik nalaataqarpugut.

Sheila naartuminik katatsivoq. Nakorsap oqaluttuup­paatigut meerassaraluarput nukappiaraasoq. Ukiut 50-it matuma siorna tamanna pivoq, puigunngisaan­narparpulli. Aliasungaaraluarluta suliarput nuannareqigatsigu Camerounimiigin­narniarluta aalajangerpugut.

Camerounimi qatanngutit politikkikkut akuliun­naveersaar­tuunertik pissutigalugu malersugaak­kajuttarput. Tamanna ingammik præsidentissamik qinersisoqaler­tillugu sakkortusin­naasarpoq. Siooras­sutiginerpaasarput maajip 13-ianni 1970-imi pivoq Jehovap Nalunaajaasui inerteq­qutaalermata. Immikkoor­tortaqarfit­taarput kusanarluinnartoq, qaammatit tallimaannaat sioqqullugit iserterfigisimasarput pisortanit arsaarin­nissutigineqarpoq. Sapaatip-akunneranik periarfis­sinneqarluta oqaluus­sisartutut aallartitaasugut tamatta nunamit aneqquneqarpugut. Qatanngutit ulluni aggersuni qanoq atugassaqarumaarnerat isumakuluutigigatsigu qimalernerat atornaqaaq.

Qaammatini arfinilinni tulliuttuni Frankrigimi immikkoor­tortaqarfim­miippugut. Tassanngaanniit qatanngutit Camerounimiittut pisariaqar­titaannik sapinngisannik isumaginiarsaraakka. 1970-imi decembarimi Nigeriami immikkoor­tortaqarfimmut aallartitaavugut, tassanngaanniit Camerounimi suliniarneq nakkutigineqaler­tussaammat. Nigeriami qatanngutit tikilluaq­qungaarpaatigut, tassanilu ukiuni arlalinni nuannaringaak­katsinnik kiffartorpugut.

1973-imi sapernartumik aalajangigas­saqalerpugut. Sheila perulun­nartumik nappaateqarluni peqqiil­liulerpoq. New Yorkimi ataatsimeersuar­tilluta nikallungalluni oqarfigaanga: “Uanga nukissaaruppunga! Qasuvunga, piffissallu ilarujussua napparsimasarnera qatsuppara.” Ukiut 14-it sinnerlugit Afrikami kiffartoqatigivaanga. Aalajaalluni kiffartornera tulluusimaarutigeqaara, allannguisariaqarpugulli. Atukkagut eqqartoreerlugit Jehovamullu qinusaqat­taareerluta ikiorneqarluar­niassammat aalajangerpugut Canadamut uteqqin­niarluta. Oqaluus­sisartutut aallartitatut piffissarlu tamaat kiffartortutut suliagut qimattariaqaleratsigit aalajanger­niarneq aatsaat taama sapernar­tigalunilu artornartigaaq.

Canadamut tikereerluta biileer­niarfimmi illoqarfimmi Torontop avannaaniittumi ikinngutitoqqama pigisaani suliffit­taarpunga. Inissiamik attartorpugut atornikunillu pequtitaar­torluta, taamaalilluta akiitsoqarata inuusin­naavugut. Neriulluta ullut ilaanni piffissaq tamaat kiffartoq­qilersin­naalluta pilimanian­ngitsumik inooriaaseqar­niarsarivugut. Tupaallaatigisatsinnik, piffissap ilimagisatsinniit sivikin­nerusup ingerlanerani, kissaaterput piviusun­ngorpoq.

 Norvalimi Ontariomiittumi ataatsimeersuar­tarfissamik sanaartortunut arfinin­ngornikkut kajumis­sutsinnik ikiuuttalerpunga. Piffissap ingerlanerani aperineqarpunga ataatsimeersuar­tarfissami nakkutil­liisoorusun­nersunga. Sheila peqqissiartorpoq, misigaagullu suliassarput nutaaq sapernaviarnatigu. Taava juunimi 1974-imi ataatsimeersuar­tarfiup inissiaataanut nuuppugut. Piffissaq tamaat kiffartoq­qileratta nuannaaqaagut!

Qujanartumik Sheila peqqissiar­tuinnavippoq. Ukiut marluk qaangiuttullu ilageeqatigiinni angalasartutut kiffartortutut suliassin­neqaratta akuersivugut. Ilageeqatigiit Manitobamiipput, Canadami nunap ilaatut ukiukkut isserujus­suartartutut ilisimaneqartumi. Issikkaluaqisorli qatanngutit asanningaarnerat nuannaarutigeqaarput. Paasivarput sumi kiffartor­nersugut apeqqutaan­ngitsoq – sumiikkaluarut­taluunniit Jehovamut kiffartor­tuarnerput pingaar­nerpaajusoq.

Ukiuni arlalinni ilageeqatigiinni angalasartutut kiffartoreerluta 1978-imi Canadami Betelimut kiffartoriar­toqquneqarpugut. Sivitsun­ngitsoq nuannarin­ngisannik pingaarutilimmilli ilinniutis­sinneqarpunga. Montrealimi immikkut ataatsimiinnermi franskisut nalunaaquttap aappaata affaanik sivisus­susilimmik oqalugiaateqarpunga. Ajoraluartumik oqalugiarninni najuuttut malinnaarpiarun­naarput, kingornalu qatanngutip Kiffartornermik Nakkutil­liisoqarfim­meersup siunnersorpaanga. Ilumulli oqalugial­laqqinnerpaananga aallaqqaammulli ilisimasariaqaraluarpara. Siunnersuutilli siunertavia paatsoorlugu qanoq siunnersuutip uannut tunniun­neqarnera isiginerusimavara. Siunnersor­neqarnera kukkullunga tunngavis­saqanngis­soraara siunnersuisullu siunnersueriaasia maluginiar­nerullugu.

Ullualuit qaangiummata Immikkoor­tortaqarfiup Ataatsimiititaliaanut ilaasortap pisimasoq pillugu oqaloqatigiumavaanga. Nassuerpunga siunnersuut tigulluarsimanagu, ajuusaarpungalu. Taava uannik siunnersuisimasoq oqaloqatigaara utoqqatserfigalugulu. Isumakkeerfigaanga. Misigisaq tamanna maniguun­nissamik ilinniutaal­luarpoq puiunngisaan­nagassara. (Uss 16:18) Maniguut­tuunissara Jehovamut qasseeriaqalunga qinnutigisarpara, aalajangerpungalu siunnersor­neqarnikka ajortumik tigoqqin­ngisaan­nassallugit.

Maanna Betelimi Canadamiittumi ukiut 40-t sinnerlugit kiffartoreersimalerpunga, 1985-imiillu Immikkoor­tortaqarfiup Ataatsimiititaliaani nuannareqisanni kiffartorlunga. 2021-mi februaarimi asangaagara Sheila toqukkut qimaguppoq. Maqaaseqaara, uangalu nammineq peqqiil­liulerpunga. Jehovamulli kiffartorninnik ulapputeqar­tuarpunga, imaallaat ‘ullut inuuffigisakka eqqarsaatigival­laanngilakka’. (Oqal 5:19) Inuuninni unamminiar­nartorpassuit nalaassimavakka, qujanar­tumilli nuannersorpassuit misigisimasakka amerlanerupput. Ukiuni 70-ini piffissaq tamaat Jehovap kiffartorfigisimanera inuuninni nalerisimaar­narnerpaavoq. Qinnutigisarpara inuusut­tortatta Jehovamut kiffartorneq inuunerminni salliut­tuassagaat, qularin­ngilarami taakkuttaaq Jehovamut kiffartornermi taamaallaat misigineqarsin­naasumik pilluarlutillu nalerisimaarumaartut.