1. Jiisusi qanittukkut qanoq iliorumaarpa?

 PIFFISSAMI allanngorfiungaar­tussami inuuvugut! Qanittukkut Jiisusip inuit tamaasa eqqartuutissavai. Eqqartuus­siffissaq tamanna sioqqullugu qanoq pisoqassasoq Jiisusip ilinniar­titaminut oqaluttuaraa. Takussaan­ngitsumik ‘najuunnis­saminut naggatissallu nalaanut ilisarnaatit’ eqqartorpai. (Mat 24:3) Taakku Matiusi kapitali 24-mi 25-milu, Makkorsi kapitali 13-mi aamma Lukkarsi kapitali 21-mi allassimapput.

2. Suut sammissavagut, qanorlu iluaqutigis­savagut?

² Jiisusip assersuusiat pingasut atorlugit asannilluni mianersoq­quaatigut. Taakku tassaapput savat savaasallu pillugit assersuusiaq, arnanik inuusuttunik qulinik assersuusiaq talentinillu assersuusiaq. Assersuusianit taakkunannga paasisin­naavarput inuup pissusilersornera tunngavigalugu Jiisusip taanna eqqartuutissagaa. Allaaserisami matumani assersuusiat taakku qanoq ilinniarfigisin­naallugillu maleruarsin­naagigut sammineqassaaq. Sammisassarput siulleq tassaavoq savat savaasallu pillugit assersuusiaq.

SAVAT SAVAASALLU

3. Qaqugu Jiisusip inuit eqqartuutissavai?

³ Jiisusip savat savaasallu pillugit assersuusiamini nassuiarpaa inuit nutaarsiassanik nuannersunik tusarnaar­nissamik qatanngutiminillu tanitanik tapersersuinissamut periarfis­saqartut qanoq eqqartuutis­sallugit. (Mat 25:31-46) ‘Annikil­liornar­tussarsuarmi’ Harmagedonni sioqqutitsiarlugu eqqartuus­sissaaq.  (Mat 24:21) Soorlu savanik paarsisup savaatini savaasanit immikkoor­tittarai, Jiisusip malinnitsiminik tanitanik tapersersuisut aalajaatsut tapersersuin­ngitsunit immikkoor­tissavai.

4. Esaja 11:3, 4 naapertorlugit qanoq nalunngilarput Jiisusi naapertuil­luartumik eqqartuus­sissasoq? (Aamma asseq takuuk).

⁴ Biibilimi siulittuutigineqarpoq Jehovap eqqartuus­sisutut toqqagaa, Jiisusi, naapertuil­luartumik eqqartuus­sissasoq. (Esaja 11:3, 4 atuakkit). Inuit pissusilersornerat, isiginnit­taasiat oqaloriaasiallu – aamma qatanngutini tanitat qanoq pisaraat – maluginiaq­qissaartarpai. (Mat 12:36, 37; 25:40) Jiisusip nalunngilaa kikkut qatanngutiminik tanitanik taakkualu suliaannik tapersersuisut. a Kristusip qatanngutaanik tanitanik tapersersueriaatsit pingaartut ilagaat nutaarsiassanik nuannersunik oqaluus­sinermi peqataaneq. Taakkuninnga tapersersuisut ‘naapertuil­luartutut’ naliler­neqassapput nunarsuarmilu ‘naassaan­ngitsumik inuunissamik’ periarfis­sineqas­sallutik. (Mat 25:46; Saqq 7:16, 17) Aalajaat­tuarsimasunut akissarsiap nuanningaassusia! Annikil­liornar­tussarsuarmi tamatumalu kingorna aalajaat­tuartut atii “inuunerup mappersagaani” allanneqassapput. – Saqq 20:15.

5. Savat savaasallu pillugit assersuusiaq qanoq ilinniarfigaarput, kikkullu soqutigissavaat?

⁵ Aalajaal­lutillu ilumoorfigin­nittuugit. Jiisusip savat savaasallu pillugit assersuusiaani pingaarnertut nunarsuarmi inuunissamik neriugisallit pineqarput. Uppernertik ersersit­tarpaat oqaluus­sinermi Kristusip qatanngutaanik tapersersuinikkut aamma inussiap aalajaalluni silatuup Jiisusimit toqqarneqartup siulersuineranik maleruaanikkut. (Mat 24:45) Aammali qilaliar­nissamik neriugisallit Jiisusip assersuusiamini mianersoq­qussutaa eqqumaf­figisariaqarpaat. Sooq? Aamma taakkua pissusilersornerat, isiginnit­taasiat oqaloriaasiallu Jiisusimit maluginiar­neqarmata. Aap, taakku aamma aalajaat­tuartariaqarput. Jiisusip assersuusiai allat marluk pingaarnertut tanitanut mianersoq­qussutaapput. Taakku Matiusi kapitali 25-mi atuarneqarsin­naapput. Tulliullugu sammeriartigu arnanik inuusuttunik qulinik assersuusiaa.

ARNAT INUUSUTTUT QULIT

6. Arnat inuusuttut ilaat tallimat qanoq ersersippaat silatuujullutik? (Matiusi 25:6-10)

⁶ Jiisusip assersuusiamini allami oqaluttuaraa arnat inuusuttut qulit uissamik naapigiaasut. (Mat 25:1-4) Tamarmik uissap katittorsiorfimmut iseqatiginissaa neriuutigaat. Jiisusi oqarpoq taakkua ilaat tallimat ‘silatuujusut’ allalli tallimat ‘sianiitsuusut’. Arnat silatuut ilimasul­lutillu piareersimapput. Uissap qanorluunniit kingusitsigisukkut, allaat unnuakkut kingusissukkut, tikiunnissaanut utaqqinissamut piareersimapput. Taamaattumik taarsinissaanut piareersimallutik qullilisarput. Allaat sivisuumik utaqqis­sagunik uuliassamaateqarput. (Matiusi 25:6-10 atuakkit). Taamaattumik uissaq tikimmat arnat silatuut piareersimasut ikumasunik qulleqartut katittorsiorfimmut iseqatigisin­naavaat. Tamatumunnga assingusumik kristumiut tanitat Kristusip tikiunnissaata tungaanut ilimasul­lutillu piareersimasut uissap, Jiisusip, qilammi kunngeqarfianut isertitaasin­naapput. b (Saqq 7:1-3) Taavami arnat inuusuttut tallimat sianiitsut?

7. Arnanut sianiitsunut tunngatillugu qanoq pisoqarpa, aamma sooq?

 ⁷ Arnat inuusuttut silatuut assiginagit sianiitsut tallimat uissap tikiunnissaanut piareersiman­ngillat. Qullii uuliaarullutik qamipput, uuliassamaateqan­ngillallu. Paasigamikku uissaq tikiutingajalersoq uuliasiniar­tariaqarput. Uuliasiniarlutik suli utinngitsut uissaq tikiuppoq. Taava “arnat inuusuttut piareersimasut uissaq katittorsiorfimmut iseqatigimmassuk matu matuneqarpoq”. (Mat 25:10) Arnat sianiitsut uterlutik iserusummata uissap oqarfigai: “Ilisarisiman­ngilassi.” (Mat 25:11, 12) Uissap qanorluunniit sivisutigisumik utaqqinissaanut piareersiman­ngillat. Tanitat tamanna qanoq ilinniarfigisin­naavaat?

8-9. Tanitat arnanik inuusuttunik assersuusiaq sumik ilinniarfigisin­naavaat? (Aamma asseq takuuk).

⁸ Piareersimal­lutillu eqqumagit. Jiisusip siulittuutiginngilaa tanitat eqimattanut marlunnut immikkoor­tinneqassasut – ilaat naggatissap tungaanut aalajaat­tuarnissamut piareersimassasut eqimattallu aappaat taamaan­ngitsut. Ersersippaali tanitanut naggatissap tungaanut pinertusaar­nissamut piareersiman­ngitsunut qanoq pisoqassasoq. Tassa akissarsinavian­ngillat. (Joh 14:3, 4) Tamanna eqqumaf­figisassaavoq! Nunarsuarmi inuunissamik qilaliar­nissamil­luunniit neriugisaqaraluarutta tamatta arnanik inuusuttunik assersuusiap mianersoq­qussutaa pimoorut­tariaqarparput. Tamatta immikkut eqqumallutalu naggatissamut pinertusaar­nissamut piareersimasariaqarpugut. – Mat 24:13.

⁹ Piareersimanissap eqqumanissallu pingaaruteqassusia ersersin­niarlugu arnanik inuusuttunik assersuusiaq oqaluttuarereerlugu Jiisusip talentinik assersuusiaq oqaluttuaraa. Assersuusiami tamatumani eqiasuitsuunissap pingaaruteqassusia erseqqis­sarneqarpoq.

TALENTINIK ASSERSUUSIAQ

10. Inussiat marluk qanoq ersersippaat aalajaallutik? (Matiusi 25:19-23)

¹⁰ Jiisusip talentinik assersuusiamini oqaluttuaraa inussiat marluk naalakkaminnut aalajaatsut  pingajualli aalajaan­ngitsoq. (Mat 25:14-18) Inussiat marluk naalakkap iluanaarutigisaanik sulilluaramik aalajaapput. Naalakkap nunamut allamut aallalerami inussiaatini talentinik, tassa aningaasarpas­suarnik, tunivai. Inussiat aalajaatsut marluk eqiasuitsuul­lutillu aningaasat silatusaartumik atorpaat. Qanoq kinguneqarpa? Aningaasat marloriaatin­ngortippaat. Naalakkap tamanna paasigamiuk nersualaarpai ‘nuannaaqatigalugillu’. (Matiusi 25:19-23 atuakkit). Inussiammi pingajuat? Aningaasat naalakkami tunniussai qanoq pivai?

11. Inussiaq ‘eqiasuttoq’ qanoq pineqarpa, aamma sooq?

¹¹ Inussiat pingajuat talentimik ataatsimik tunineqartoq ‘eqiasuttuuvoq’. Naalakkap naatsorsuutigigaluarpaa talenti silatusaartumik atussagaa. Inussialli aningaasat nunamut assaallugit toqqorpai. Naalakkani utermat iluanaarutis­sarsisimanngilaa. Taamaaliun­nginnami utoqqatsernani naalakkani ‘sukannersutut’ taavaa. Isiginnit­taasiali tamanna ajortuuvoq. Inussiaq taanna naalakkaminit iluarineqanngilaq. Tamatuma kingunerisaanik talentimik arsaarneqarpoq naalakkamilu inoqutaanit anisitaalluni. – Mat 25:24, 26-30.

12. Inussiat aalajaatsut marluk kikkunnut assersuutaappat?

¹² Inussiat aalajaatsut marluk kristumiunut tanitanut aalajaatsunut assersuutaapput. Naalakkap, Jiisusip, oqarfigai ‘nuannaaqatigis­sallugit’. Qilaliarnissaq, tassa toqusunit makititaanissaq siulleq, akissarsiarissavaat. (Mat 25:21, 23; Saqq 20:5a) Inussiarli eqiasuttoq tanitanut mianersoq­qussutaavoq. Qanoq ililluni?

13-14. Tanitat talentinik assersuusiaq sumik ilinniarfigisin­naavaat? (Aamma asseq takuuk).

¹³ Eqiasuitsuugit. Arnanik inuusuttunik assersuusiaq assigalugu talentinik assersuusiami Jiisusip ersersin­nianngilaa tanitat ilaat eqiasut­tunngussasut. Nassuiarpaali aallussil­luarunnaarunik qanoq pisoqassasoq. ‘Qaaqquneqarnertik toqqarneqar­nertillu’ annaassavaat Kunngeqarfimmullu qilammiittumut isersin­naatitaas­sanatik. – Pet 2. 1:10.

 ¹⁴ Jiisusip arnanik inuusuttunik assersuusiaani talentinillu assersuusiaani ersersin­neqarpoq kristumiut tanitat tamarmik piareersimal­lutillu eqqumasariaqartut aammalu eqiasuitsuusariaqartut. Jiisusi tanitanut mianersoq­qussutaasunik allanik oqaaseqarpa? Aap. Jiisusip tanitanik eqqartuus­siffissamut tunngatillugu oqaasii Matiusi 24:40, 41-milu atuarsin­naavagut.

KIKKUT ‘ILALIUN­NEQASSAPPAT’?

15-16. Matiusi 24:40, 41 iluaqutigalugit tanitat qanoq paasisin­naavaat ilimasut­tuusariaqarlutik?

¹⁵ Assersuusiat taakkua pingasut oqaluttuarin­nginneranni Jiisusip eqqartorpaa tanitat ilaat naggammik eqqartuus­siffissami akuerineqassasut allalli akuerineqas­sanngitsut. Oqarpoq angutit marluk narsaam­miissasut arnallu marluk karrinik aserorterissasut. Assigiimmik suliaqarpas­sikkaluartut Jiisusi oqarpoq ‘aappaa ilaliun­neqassasoq aappaalu qimanneqas­salluni’. (Matiusi 24:40, 41 atuakkit). Taava malinnitsini ima kajumis­saarpai: “Naalagarsi ullormi sorlermi tikiutis­sanersoq nalugassiuk ilimasut­tuaritsi.” (Mat 24:42) Jiisusi arnanik inuusuttunik assersuusioreerluni assingusumik oqaaseqarpoq. (Mat 25:13, q.a.i.) Jiisusip oqaasii taakku imminnut attuumas­suteqarpat? Taamaap­pasippoq. Tanitat ilumoortut aalajaatsullu kisimik ‘ilaliun­neqassapput’, tassa Kunngeqarfimmut qilammiittumut Jiisusimit tikilluaq­quneqassasut. – Joh 14:3.

¹⁶ Ilimasuttuugit. Tanitaq anersaakkut ilimasun­ngikkuni ‘toqqakkanut katersor­neqatussanut’ ilaassanngilaq. (Mat 24:31) Guutimut kiffaasut tamarmik, qanorluunniit neriugisallit, Jiisusip mianersoq­qussutaa aalajaallutik ilimasut­tuujuarnikkut eqqumaf­figissavaat.

17. Sooq Jehovap qaqugukkut tanitanik toqqaasarnera isumakuluutigis­sanngilarput?

¹⁷ Jehova ilisarisimal­luaratsigu naapertuil­luartumik eqqartuussinera tatigaarput. Taamaattumik Jehovap aalajaatsut ilaat ukiuni kingulliunerusuni tanitatut toqqarniarlugit aalajangerpagu isumakuluutigis­sanngilarput. c Jiisusip viinnequteqarfimmik assersuusiaani nalunaaqutaq tallimat missaanni sulisus­sarsiarineqartut eqqarsaatigisin­naavagut. (Mat 20:1-16) Taakku siusinnerusukkullu sulisus­sarsiarineqartut assigiimmik akissarsisin­neqarput. Tamatumunnga assingusumik tanitat qaquguk­kulluunniit toqqarneqaraluartut aalajaat­tuarunik qilaliar­nissamik akissarsissapput.

MIANERSOQ­QUSSUTIT EQQUMAF­FIGIKKIT

18-19. Suut ilikkarpagut?

¹⁸ Allaaserisami matumani suut sammineqarpat? Nunarsuarmi naassaan­ngitsumik inuunissamik neriugisallit maanna annikil­liornar­tussarsuarmilu Jehovamut aalajaat­tuarlutillu ilumoorfigin­nittuarnerat qanoq pingaaruteqar­tigisoq erseqqis­sarneqarpoq. Harmagedonni sioqqullugu Jiisusi eqqartuus­sisutut aalajangiissaaq ‘naapertuil­luartut naassaan­ngitsumik inuuneqalissasut’. – Mat 25:46.

¹⁹ Assersuusiat tanitanut mianersoq­qussutaasut marluk aamma sammivagut. Jiisusip arnanik inuusuttunik assersuusiaani arnat taakkua ilaat tallimat silatuujupput. Taakku uissap tikiunnissaanut qanorluunniit sivisutigisumik utaqqinis­saminnut piareersimal­lutillu eqqumapput. Arnalli sianiitsut piareersiman­ngillat. Taamaattumik uissap katittorsiornermut iseqqunngilai. Uaguttaaq Jiisusip  pissutsinik ajortunik maanna atuuttunik suujunnaarsitsinissaanut qanorluunniit sivisutigisumik utaqqinis­satsinnut piareersimasariaqarpugut. Jiisusip talentinik assersuusiaani inussiat aalajaatsut marluk eqiasuitsuunerat aamma sammivarput. Taakku naalakkaminnit iluarineqarumallutik sulilluarsimapput. Inussiarli eqiasuttoq anisitaavoq. Qanoq ilinniutigaarput? Jehovamut kiffartor­nitsinni naggatissap tungaanut sulilluar­tuartariaqarpugut. Kiisalu sammivarput tanitat Jiisusimit qilaliar­tinneqas­sallutillu ‘ilaliun­neqassagunik’ ilimasut­tuusariaqartut. Tanitat qilammut ‘katersor­neqarnissartik’ qilanaaringaarpaat. Sorsunnerup Harmagedonnip kingorna “Savaaqqap katinnerani” Jiisusimut nuliartaan­ngussapput. – Tes 2. 2:1; Saqq 19:9.

20. Mianersoq­qussutit eqqumaf­figigutsigit Jehovap qanoq pissavaatigut?

²⁰ Eqqartuus­sinissap qanilliar­tupallattup siooraginissaanut pissutis­saqanngilagut. Aalajaat­tuarutta ‘inuup Ernerata saavani atasinnaaq­qulluta’ Ataatatta qilammiusup ‘pissaanermik nalingin­naanngitsumik’ asannilluni tunissavaatigut. (Luk 21:36; Kor 2. 4:7) Nunarsuarmiin­nissamik qilammiin­nissamil­luunniit neriuuteqaraluarutta Jiisusip assersuusiamini mianersoq­qussutai eqqumaf­figigutsigit Ataatatta iluaris­savaatigut. Jehovap ajunngisaangaarnera angingaarmat aalajaatsut atii tamarmik ‘inuunerup mappersagaani’ allanneqarumaarput. – Dan 12:1; Saqq 3:5.