Paatsuuinimininnguua?
Niviarsiarannguup fabrikkip pujoorfiatigut pujoq allanngoralersoq takuaa. Isummerpoq fabrikki nuialiorfiusoq. Paatsuuinimininnguaq taamaattoq quianarpoq. Paatsuuinerujussuarli inuunitsinnut sunniuteqarsinnaavoq. Assersuutigalugu nakorsaatip puuani allassimasut paatsooraanni kingunerlorujussuarsinnaavoq.
Anersaakkut ittunik paatsuuineq kingunerlungaarnerusinnaavoq. Assersuutigalugu inuit ilaasa Jiisusip ajoqersuutai paatsoorpaat. (Johannesi 6:48-68) Paasisaqarusunnatik Jiisusip ilinniartitsissutai tamaasa itigartippaat. Uggornassusia!
Siunnersortissarsiorlutit Biibili atuartarpiuk? Taamaappat tamanna nersornarpoq. Atuakkavilli ilaanik paatsuuisinnaavit? Inuppassuit paatsuuisarput. Paatsoorneqartartut pingasut sammeriartigit.
-
Inuit ilaasa Jiisusip oqaasii uku paatsoortarpaat: ‘Ersigisiuk [Guuti] tarnimik timimillu Anniarfimmi aserortitsisinnaasoq.’ (Matthæusi 10:28) Guuti inunnik ajortunik anniarfimmi ikualasumi pillaasartoq upperaat. Biibilimili erseqqissumik allassimavoq ‘toqungasut sunnguamilluunniit ilisimasaqanngitsut’, taamaattumillu anniaateqarsinnaanngillat. (Oqaluussisartup oqaasii 9:5) Biibilimilu ajoqersuutigineqarpoq ‘Guuti tassaasoq asanninneq’ inuillu innermi naalliutsinngisaannassagai. (1 Johannesi 4:8; Jeremia 7:31) Grækerit oqaasiat, ge’enna, ‘Anniarfimmik’ nutserneqartartoq isumaqaannarpoq piuneerussaalluinnarneq. Taamaattumik Guuti ersigissavarput, tassa mianerissavarput, taassuma aalajangertussaammagu nunami naassaanngitsumik inuussanersugut inuussannginnersugulluunniit.
-
Nuna innermit piuneerunneqassava?
Inuit ilaasa oqaatsit isumassarsiarititaasut uku paatsoortarpaat: “Suut tamarmik aalajangersimasumik piffissaligaapput. Inunngorfissaqarpoq toquffissaqarlunilu.” Isummertarput Guutip inuk qaqugorpiaq toqussasoq aalajangertaraa. (Oqaluussisartup oqaasii 3:1, 2) Oqaatsinili taakkunani pineqaannarpoq inuup kialuunniit toqu avaqqussinnaanngikkaa. Aamma Guutip oqaasiani ilinniartinneqarpugut aalajangikkavut inuunitta sivisussusianut sunniuteqarsinnaasut. Imami allassimavoq: “Naalakkamik mianerinninneq inuunermik sivitsortitsisarpoq.” (Ussatit 10:27; Tussiaat 90:10; Esaja 55:3) Qanoq? Guutip oqaasianik ataqqinnikkutta peqqiilliutaasinnaasut iliuuserinaveersaassavavut, assersuutigalugu imerajuttuunatalu kinguaassiuutitigut inuunerlussanngilagut. – 1 Korinthimiut 6:9, 10.
-
Qilaat nunallu ‘ikuallagaanissaannik’ Biibilimi allassimanera paatsoorlugu isumaqartoqarpoq Guutip nunarsuaq piuneerutissagaa. (2 Petrusi 3:7) Guutili neriorsuivoq nuna piuneerunneqanngisaannassasoq. Guutip ‘nuna aalajaatsumik tunngavilerpaa naassaanngitsumik patajaallisillugu’. (Tussiaat 104:5; Esaja 45:18) Innermik suujunnaarsitaanertulli piuneerunneqartussat tassaapput inuit ajortut, tassaanani nunarsuaq. Qilaallu assersuutaanngitsut tassaasinnaapput avataarsua imaluunniit Guutip ineqarfia. Taakku suujunnaarsitaassanngillat.
SOOQ BIIIBILI PAATSOORNEQARTARPA?
Soorlu assersuutinit taakkunannga paasigipput Biibilip ilaa paatsoorneqarajuppoq. Sooq Guutip taamaattoqartarnera akueraa? Ima eqqarsartoqarsinnaavoq: ‘Guuti sunik tamanik ilisimasaqaruni sooq erseqqissumik allataasumik kikkunnit tamanit paasineqarsinnaasumik atuagaliortitsisimanngila?’ Biibilip paatsoorneqartarneranut pissutaasut pingasut sammeriartigit.
-
Biibili maniguuttunut ilinniarusussuseqartunullu paasisassiaavoq. Jiisusi Ataataminut ima oqarpoq: “Unnersiutigaakkit Ataataq qilaap nunallu Naalagaat, ilisimasunut sianisuunullu Lukasi 10:21) Biibilip oqariartuutaa aatsaat eqqortumik isiginnittaaseqaraanni paasineqarsinnaasutut allataavoq. ‘Ilisimasut sianisuullu’ makitasuujusarsinnaapput, inuillu taamaattut Biibili paatsoorajuppaat. Inuilli ‘meerannguatut’ isiginnittaaseqartut – maniguullutillu ilinniarusussuseqartut – Guutip oqariartuutaanik paasinnilluarnissaminnut pilluaqquneqartarput. Guutip Biibili taamatut allatsikkamiuk silatussusersuani ersersippaa!
tamanna isertorakku saqqummersilluguli meerannguanut.” ( -
Biibili paasiumallugu ilumoorlutik Guutimit ikiortikkusuttunut allataavoq. Jiisusip ersersippaa inuit ilinniartitsissutiminik paasinnilluassagunik ikiorneqartariaqartut. Qanoq ikiorneqassappat? Jiisusi ima nassuiaavoq: “Anersaap Illernartup, Ataatap uanga atinni aallartitassaata tamanik ajoqersussavaasi ilissinnullu oqaaserisannik tamanik eqqaasikkumaarlusi.” (Johannesi 14:26) Tassa Biibilimik atuartut Guutip anersaava illernartoq – nukinga sulisoq – iluaqutigalugu atuakkatik paasisinnaavaat. Guutimilli ikiortikkusunngitsut taassuma anersaavanit ikiorneqarneq ajorput, taamaattumik taakkua Biibili paasiuminaassorisarpaat. Aamma kristumiut paasisimasaqareersut paasisaqarusuttunut allanut ikiuinissaannut anersaamit illernartumit kajumissisinneqartarput. – Apustilit Suliaat 8:26-35.
-
Biibilip ilaa aatsaat piffissami aalajangersimasumi inunnit paasineqarsinnaavoq. Assersuutigalugu Danieli siunissami oqariartuutigineqartussamik allatsinneqarpoq. Inngilip ima oqarfigaa: “Danieli, oqaatsit tamakku allanut isertuullugit mappersagaq naqissuseruk naggatissap nalliunnissaata tungaanut.” Ukiuni hundredilinni Biibilip atuagartaa Danielimit allataq inuppassuarnit atuarneqartaraluarluni paasivinneqarneq ajorpoq. Allaammi Danielip allatami ilai nammineq paasinngilai. Maniguulluni ima nassuerpoq: ‘Tamanna tusaraluarlugu paasinngilara.’ Aatsaat Guutip piffissarititaa nalliummat siulittuut Danielimit allataq eqqortumik paasineqarpoq. Inngili ima nassuiaavoq: “Aallarit Danieli, oqaatsit tamakku isertuussatut naqissuserneqarmata naggatissaq nalliutserlugu.” Kikkut Guutip oqariartuutaanik paasinnissappat? ‘Iluaatsut paasisaqassanngillat; paasisimasartuulli paasinnissapput.’ (Danieli 12:4, 8-10) Tassa Guuti aatsaat piffissarititani nalliuppat Biibilip ilaata aalajangersimasup isumaanik paasititsiumaarpoq.
Jehovap Nalunaajaasuisa Biibili paatsoortarsimavaat? Aap. Guutili piffissarititamini paasinarsisitsigaangat Nalunaajaasut paasinnittaatsiminnik allannguisarput. Upperaat taamaaliornermikkut Kristusip apustilii, Jiisusimit naqqinneqaraangamik maniguullutik eqqarsartaatsiminnik allannguisartut, ilaarlugit. – Apustilit Suliaat 1:6, 7.
Niviarsiarannguup nuissat suminngaannerneri pillugit eqqarsaatersuutai paatsuinimininnguupput. Biibililli ajoqersuutaa ilinnut pingaaruteqangaarpoq. Oqariartuutaata paatsuunnginnissaa qulakkeeruk. Atuakkavit paasinissaanut ikiortissarsiorit. Kikkut ikiorsinnaavaatsit? Maniguullutik Biibilimik atuaqqissaartarlutillu Guutip anersaavanit illernartumit ikiortillutik Biibilimik paasinnikkusuttut aamma Biibilip paasinissaanut Guutip piffissarititaata nalliussimaneranik upperinnittut ikiorsinnaavaatsit. Jehovap Nalunaajaasuisa oqaloqatiginissaat nittartakkamiluunniit jw.org-imi paasiniaqqissaarsimasaasa atuarnissaat tunuarsimaarutigissanngilat. Biibilimi ima neriorsorneqarpugut: “Paasisimasaqassuseq qaaqqugukku ... taava Guuti ilisimalissavat.” – Ussatit 2:3-5.