UKIUT tamaasa inuit 6 millioninit amerlanerusut Japanimi qeqertaasami Shimami orpippassuaqarfimmut avinngarusimasumiittumut angalasarput. Isemi illernarnerpaaq – sumiiffik seqinermut guutigititap arnap shintop, Amaterasu Omikamip, ukiut 2.000-t missaanni pallorfigineqartarfia – ornittarpaat. Pallorfiginnittut assatik siggutillu asattornerisigut imminnut minguiaqqaartarput. Illernartitallu haiden-iata (pallorfiginnittarfik) saavanut pigaangamik sikinnermikkut, assatik pattannerisigut guutimullu arnamut qinunermikkut ileqqulersuuteqartarput. * Shintop pallorfiginnitsimi allanik upperisaqarnissaat akuerisarpaa, aamma buddhistit, kristumiuunerartut allallu illernartitami tassani shintosiornermi ileqqulersuutit ajoqutissaqanngitsutut isigisarpaat.

Silarsuarmi upperisarsiornerit annerpaartaat amerlasuut illernartitaqartarput, * inuillu millionillit taakku takornariartarpaat. Nunani kristumiuunerartuni oqaluffiit illernartitallu amerlasoorpassuit Jiisusimut, Mariamut iluartuutitanullu pigitinneqartarput. Illernartitat allat taamaattut Biibilimi pisunut imaluunniit ukiuni kingulliunerusuni “tupinnartulianut” pisimanerarneqartartunut imaluunniit upperisarsiornikkut eriagisat inissisimaffiannut atatillugu pilersinneqartarput. Inuppassuit sumiiffinni illernartuni qinnutitik tusarneqarumanerunissaat upperigamikku illernartitanukartarput. Allat upperisarsiornermut tunniusimanerminnik ersersitsiniarlutik illernartitamukartarput.

Illernartitap eqqaani qinnutit tusarneqarnissaat akineqarnissaallu ilimanaateqarnerua? Tunniusimanertik ersersinniarlugu illernartitanut angalasut Guutip iluarai? Pingaarnertut, kristumiut illernartitani pallorfiginnissappat? Apeqqutit akissutaat illernartitani pallorfiginninnermut qanoq isiginnittaaseqarnissatsinnik ersersitsiinnaratik pallorfiginninnerup Guutip iluarisaanik paasinninnissatsinnut iluaqutigissavarput.

Sumiiffinni illernartuni illernartitaniluunniit pallorfiginninneq Guutip qanoq isumaqarfigigaa Jiisusip arnamik Samariamiumik oqaloqateqarneranit erserpoq. Jiisusip Samariami angalanermini illoqarfiup Sykarip eqqaani qasuerserluni arnaq puilasumut imertartoq oqaloqatigilerpaa. Oqaloqatigiinnerminni arnap juutit Samariamiullu upperisarsiornikkut assigiinngilluinnarnerat ima oqarluni eqqaavaa: “Uagut siuaasavut qaqqami maani Guutimut pallortarsimapput, ilissili oqarpusi pallortarfissaq Jerusalemimiittoq.” – Johannesi 4:5-9, 20.

 Matumani arnap qaqqaq Garizimi, Jerusalemimit avammut 50 kilometerit missaanni ungasitsigisumiittoq, pivaa. Tassani Samariamiut naalaffeqarnikuupput nalliuttorsiorfigisartakkaminnik, ilaatigut poorskisiorfigisartakkaminnik. Jiisusilli assigiinngissusertik eqqartornagu arnaq ima oqarfigaa: “Arnaq, upperinnga, piffissaq nalliukkumaarpoq qaqqami maani Jerusalemimiluunniit Ataatamut pallussaarfissarsi.” (Johannesi 4:21) Juutip taamatut oqarnera tupaallannangaarami! Sooq Jerusalemimi naalaffimmi Guutimik pallorfiginnittoqartarunnaassava?

Jiisusi nangippoq: “[Piffissaq] nalliukkumaarpoq – ilami maanna nalliussimavoq – ilumoortumik pallorfiginnittut Ataatamik pallorfiginniffissaat anersaakkut ilumoornikkullu. Ataatarmi taamaattunut pallorfigeqquvoq.” (Johannesi 4:23) Juutit Jerusalemimi naalaffik alutornaqisoq pallorfiginninnerminni ukiuni hundredilikkuutaani qitiutippaat. Ukiumut pingasoriarlutik Guutiminnut, Jehovamut, pilliuteqarumallutik angalasarput. (2 Mosesi 23:14-17) Jiisusili oqarpoq tamanna allanngussasoq ‘ilumoortumillu pallorfiginnittut anersaakkut ilumoornikkullu pallorfiginnissasut’.

Juutit naalaffiat sumiiffimmi aalajangersimasumiippoq. Taamaattorli anersaaq ilumoornerlu tigussaasuunngillat. Taamaattumik kristumiut ilumoortut pallorfiginninnerminni sanaartugaq sumiiffilluunniit aalajangersimasoq – qaqqaq Garizimi Jerusalemimilu naalaffik sumiiffilluunniit illernartoq sunaluunniit – apeqqutaatikkunnaassagaat Jiisusip nassuiaatigaa.

Jiisusip arnamik Samariamiumik oqaloqateqarnermini aamma eqqaavaa Guutimik pallorfiginninnerup allanngornissaa ‘nalliukkumaartoq’. Qaqugu? Jiisusip imminut pilliutiginermigut juutit Mosesip inatsisai tunngavigalugit pallorfiginneriaasiat atuukkunnaarsimmagu piffissaq tamanna nalliuppoq. (Romamiut 10:4) Jiisusili aamma oqarpoq: ‘Piffissaq maanna nalliussimavoq’. Sooq? Missiarsitut ajoqersukkat katersulereeramigit, taakkualu peqqussut una maleruarusuppaat: “Guuti anersaajuvoq, taassuminngalu pallorfiginnittut taamaaliussapput anersaakkut ilumoornikkullu.” (Johannesi 4:24) Anersaakkulli ilumoornikkullu pallorfiginninneq qanoq paasisariaqarami?

Jiisusip anersaakkut pallorfiginninneq eqqaagamiuk Guutip anersaavanit illernartumit, ilaatigut Allakkanik Illernartunik paasinarsisitsisartumit, siulersortinneq pivaa. (1 Korinthimiut 2:9-12) Ilumoornerlu Jiisusip eqqaasaa Biibilimi ajoqersuutigineqartunik eqqortumik ilisimanninnermut innersuussutaavoq. Taamaattumik sumiiffimmi immikkut ittumi pallorfiginninnata Biibilimi ajoqersuutigineqartut  tunngavigalugit anersaamillu illernartumit siulersortinnikkut pallorfiginninnerput Guutip iluarissavaa.

Illernartitanulli angalasarneq illernartitanillu pallorfiginninneq kristumiut qanoq isumaqarfigisariaqarpaat? Anersaakkut ilumoornikkullu Guutimik pallorfiginninnissamik Jiisusip pallorfiginnittunut ilumoortunut peqqussutaa eqqarsaatigissagaanni ersarippoq illernartitamik sumiiffimmilluunniit illernartumi pallorfiginninneq Ataatatsinnut qilammiusumut naleqanngitsoq. Tamatuma saniatigut guutilianik pallorfiginninneq Guutip qanoq isumaqarfigigaa Biibilimi ima allaatigineqarpoq: “Guutipilussiorneq qimarratiginiarsiuk” aamma “guutipilunnut mianersoritsi!” (1 Korinthimiut 10:14; 1 Johannesi 5:21) Taamaattumik kristumiut ilumoortut sumiiffinni illernartutut isigineqartuni guutipilussiorfiusuniluunniit pallorfiginnittussaanngillat. Illernartitat sumit aallaaveqartut kristumiut ilumoortut nalunnginnamikku pallorfiginavianngilaat.

Imaanngilarli sumiiffimmi aalajangersimasumi qinusarneq, atuaqqissaartarneq imaluunniit eqqarsaatiginneqqissaartarneq Guutip oqaasiani inerteqqutigineqartoq. Sumiiffimmi torersumi naleqquttumilu ataatsimiinneq anersaakkut ittunik ilinniarnissamut eqqartuinissamullu iluaqutaasarpoq. Aamma inummik eqqaaniaaneq, soorlu ilerfumut ujarattaliineq, inerteqqutaanngilaq. Tamanna toqusimasumik eqqaamanninnermut asanninnermulluunniit ersiutaaginnarsinnaavoq. Sumiiffinnilli tamakkuninnga imaluunniit assilissanik eriagisanilluunniit illernartitsineq Jiisusip oqaasiinut naapertuutinngillat.

Taamaattumik qinnutitit Guutimit tusarneqassappata illernartitamukartariaqanngilatit. Aamma illernartitamut angalanerit Guutip iluarinaviarnagulu pilluaqqunavianngilaa. Biibilimi allassimavoq Jehova Guuti ‘qilammut nunamullu naalagaasoq naalaffinni assannik sanaasuni najugaqanngitsoq’. Imaappa Guuti uatsinnit ungasittoq? ‘Ilatsinnit kimilluunniit ungasinnginnami’ sumiikkaluaruttaluunniit qinnuigigutsinni tusassavaatigut. – Apustilit Suliaat 17:24-27.