Frankrigimi Mulhousemi sulisar­tut il­loqarfian­ni nakuuserfiusar­tutut ilisimaneqar­tumi, inun­ngor­punga. Meeraal­lunga eq­qaamavara ineqarfit­ta eq­qaani ilaqutariit isumaqatigiin­natik nakuuser­tar­tut. Ilaqut­tatsin­ni ar­nat nikagineqar­tar­put angutinil­lu isumasior­neqar­neq ajorlutik. Ilin­niar­tin­neqar­punga angutit meeq­qal­lu isumagiumal­lugit ar­nat igaf­fim­miit­tus­siaan­naasut.

Peroriar­tor­nera imaan­naan­ngitsuuvoq. Qulinik ukioqar­tunga ataatama imerajut­tuunini toq­qutigaa. Ukiut tal­limat qaangium­mata angajuma ilaat im­minor­poq. Kingunitsian­ngualu ilaqut­tan­ni saqitsaat­toqar­nerani toqutaasoqarmat takun­nit­tuunera quarsaarutigeqaara. Ilaqut­tama savin­nik aal­laasinil­lu atuisar­nis­san­nik pisariaqaleraangal­lu unataasar­nis­san­nik ilin­niar­tip­paan­nga. Inuusut­tuugama paatsiveqan­ngitsoq kakior­tit­talerlungalu imer­taler­punga.

16-inik ukioqarlunga ul­lut tamaasa baajat qulit 15-il­lu akor­nan­ni imer­taler­pak­ka, sivitsun­ngitsorlu ikiaroor­taler­punga. Ileq­qupalaak­ka akiler­niarlugit saviminer­nik tuniniaasalerlungalu til­lin­niar­taler­punga. 17-iin­nar­nik ukioqarlunga par­naarus­saaq­qaar­punga. Til­lin­niar­neq nakuuser­nerlu pil­lugit 18-eriarlunga eq­qar­tuus­saavunga.

20-t sin­nilaarlugit ukioqarlunga atuk­kak­ka ajor­neruler­put. Ul­lormut marihuanat 20-t pujor­tar­talerlugil­lu heroini al­lal­lu atorlugit ikiaroor­taler­punga. Arlaleriarlunga ikiaroor­neq toq­qutigingajap­para. Ikiaroor­nar­tunik tuniniaasalerama savin­nik aal­laasinil­lu sak­kulisar­tuaan­nar­punga. Taamaal­lunga angut aal­laavara, qujanar­tumil­li aqerluata qitequtaata un­ngersarfia eq­qoramiuk aqerloq tam­mip­poq! 24-nik ukioqarlunga anaanaga toqum­mat kamas­saqar­neruler­punga. Tungin­nut pisut­tut ersigalunga aq­quser­ngup il­luatungaanukar­tar­put. Paggit­tarat­ta weekendini politeeqarfim­mi iser­titsivim­miin­ngik­kuma nap­parsim­mavim­mi ikik­ka pas­sutsit­tar­pak­ka.

28-nik ukioqarlunga katip­punga. Ilimagineqareersutut nuliara ataq­qinagu nikas­sar­tarlugulu unatar­tar­para. Aap­pariit­tut sam­misaqaqatigiin­neq ajor­pugut. Isumaqarlunga pin­nersaatinik til­litanik amerlasuunik tuniguk­ku naam­mas­sasoq. Ilimagin­ngisan­nil­li pisoqar­poq. Nuliara Jehovap Nalunaajaasuinit Biibilimik atuaq­qis­saaqatigineqar­taler­poq. Siul­lermik atuaq­qis­saareerluni pujor­tar­tarun­naarlunilu aningaasanik til­litanik piumasarun­naarlunilu  pin­nersaatit uan­nut uter­tip­pai. Kamaqaanga. Biibilimik atuaq­qis­saar­tar­nera pil­lugu akerlilersorlugulu sikaritsip pujuanik kiinaatigut supisar­para. Aam­ma sanilitsin­nut il­laruaatigisar­para.

Un­nuat ilaan­ni silaqar­nanga iner­put ikual­latsit­toor­para. Nuliama panip­put tal­limanik ukiulik uangalu an­naap­paatigut. Silat­torama ilerasuuteqaqaanga. Misigivunga Guutimit isumak­keerfigineqarsin­naananga. Eq­qaavara palasip inuit ajor­tut an­niarfim­mukas­sanerarai. Al­laat tar­nip nap­paataanut nakorsap oqarfigaanga: “Ikioriarfis­saqan­ngin­navit neriuutis­saqan­ngilatit!”

Init­ta ikual­lan­nerata kingor­na sakik­kun­nut nuup­pugut. Nalunaajaasut nuliara pulaarmas­suk aperaak­ka: “Ajor­tuliar­pas­suak­ka pil­lugit Guutip isumak­keerfigisin­naavaanga?” Biibilimi Korinthimiunut al­lak­kat siul­liit 6:9-11 takutip­paat. Tas­sani iliuutsit Guutip iner­teq­qutigisai al­las­simap­put, aam­mali al­las­simavoq: “Ilasi taamaas­simagaluar­put.” Oqaatsinit taak­kunan­nga paasivara al­lan­ngorsin­naal­lunga. Taava Johan­nesip al­lagaasa siul­liit 4:8 takutin­neratigut Guutimit asaneqar­nin­nik up­per­narsaavigaan­nga. Qiim­maal­lan­nermik aperaak­ka sapaatip-akun­neranut marloriarlutik Biibilimik atuaq­qis­saaqatigisarsin­naaneraan­nga, kristumiul­lu ataatsimiin­nerinut najuut­taler­punga. Jehovamut qinujuar­punga.

Qaam­mat ataaseq qaangium­mat ikiaroor­nar­tut imigas­sal­lu unitsin­niarlugit aalajanger­punga. Sivitsun­ngitsoq timik­kut akiuus­suataaler­punga. Sin­nat­tupilut­taler­punga, niaqorlorujus­suar­taler­punga, noqar­taler­punga al­latigul­lu ator­nerluiun­naar­nin­nik kingunerlutsitsisalerlunga. Jehovamil­li paarineqar­tutut nakus­satsin­neqar­tutul­lu misigivunga. Apustilitut Paulusitut misigivunga. Paulusip Guutimit ikior­neqar­nini ima al­laatigaa: “Tamaasa pis­satsitsisik­kut atus­sal­lugit sapin­ngilak­ka.” (Filip­pimiut 4:13) Pif­fis­sap ingerlanerani pujor­tar­tarun­naar­punga. – 2 Korinthimiut 7:1.

Biibili pis­susin­nik ilaqutariit­tul­lu inuunitsin­nik pitsaanerulersitsinis­samut iluaqutigaara. Nulian­nut isigin­nit­taasera al­lan­ngor­poq. Inus­siar­nersumik oqaluut­talerlugulu qutsavigisaler­para. Aam­ma panin­nut ataatatut pis­suseqaler­punga. Ukioq ataaseq Biibili atuaq­qis­saareerlugu nuliama maligas­siuinera ilaarlugu Jehovamut tun­niul­luin­nar­punga kuisil­lungalu.

Qularin­ngilara Biibilimi najoq­qutas­siat an­nas­sutigalugit. Al­laat ilaqut­tak­ka Nalunaajaasuun­ngitsut oqar­tar­put al­lan­ngorsiman­ngitsuuguma ikiaroor­nar­tunik ator­nerluineq paggit­tar­nerluun­niit toq­qutigisimas­sagaluariga.

Uiusup ataataasul­lu akisus­saaf­fii Biibilimi nas­suiar­neqar­tut iluaqutigalugit al­lan­ngorluin­nar­punga. (Efesosimiut 5:25; 6:4) Ilaqutariit­tut sam­misaqar­taler­pugut. Maan­na nuliara igaf­fim­miigin­nar­tus­satut isigiun­naarlugu pif­fis­saq tamaat oqaluus­sisar­tutut kif­far­tor­nerani tapersersor­tar­para. Nuliamalu ilagiin­ni utoq­qaaner­tatut kif­far­tor­nin­ni tapersersorluar­tar­paanga.

Jehovap Guutip asan­nin­nera nal­lit­tuineralu as­sut kil­litsis­sutigaak­ka. Pis­susii nuan­nersut inun­nut neriuutis­saqan­ngitsutut isigineqar­tunut, uat­tut it­tunut, oqalut­tuarerusungaar­tar­pak­ka. Nalun­ngilara kialuunniit minguitsumik siuner­taqarluar­tumil­lu inuuler­nis­samut Biibili iluaqutigisin­naagaa. Angutinik aamma ar­nanik asan­nin­nis­saq ataq­qin­nin­nis­sarlu ilik­kaan­nar­nagu aam­ma im­minut ataq­qinis­sara Biibilimit ilik­kar­para.