Inuunermik sivitsuiniartarneq
“Suut tamaasa suliarisimavai ajunngitsumik eqqortumillu piffissarlu eqqorlugu, aammattaaq naassaanngissuseq inuit uummataanniitissimavaa.” – Oqaluussisartup oqaasii 3:11, quppernerup ataani ilanngussaq.
ITSAQ kunngip silatuup Salomop oqaasii inuit qanorpiaq misiginerannik ersersitsipput. Immaqa inuunerup sivikinnera toqullu avaqqunneqarsinnaannginnera pissutigalugit inuit sivisunerusumik inuunissaq assut kissaatigiuarsimavaat. Ukiuni tuusintilinni inuunermik sivitsuiniartarsimapput.
Gilgamesh, Sumeriami kunngi, assersuutigisinnaavarput. Taassuma inuunera pillugu oqaluttualiarpassuaqarpoq. Ilagaallu Gilgamesh pillugu pissarsualersaarut, tassani oqaluttuarineqarpoq toqu qanoq avaqqunneqarsinnaasoq paasiumallugu ulorianartorsiorluni angalasoq. Tamatumani iluatsinngilaq.
300-kkunni Kr.in.si. Kinami kuultiliorniaraluartartut imerpalasumik kviksølvimik toqunartumillu akoqalaartumik qalaartitsinermikkut inuunertusaasioriaraluarput. Ilimagineqarpoq Kinami kaasarit arlallit tamanna toqussutigigaat. Europami ukiuni akullerni kuultiliorniaraluartartut ilaasa kuulti arrortinneqarsinnaanngitsoq inuunermik sivitsuisinnaasorigamikku imerneqarsinnaasunngortinniaraluarpaat.
Nalitsinni biologit genetikerillu ilaasa inuit sooq utoqqalisartut paasiniartarpaat. Ilisimatuut taamaaliornermikkut uppernarsarpaat utoqqalisarneq toqulu qanoq unitsinneqarsinnaasut paasissallugu inuit suli assut neriuutigigaat. Taamatulli misissuinerminni sunik angusaqarsimappat?
GUUTIP “NAASSAANNGISSUSEQ INUIT UUMMATAANNIITISSIMAVAA”. – OQALUUSSISARTUP OQAASII 3:11, QUPPERNERUP ATAANI ILANNGUSSAQ.
UTOQQALIARTORTARNERMUT PISSUTAASUP NALITSINNI PAASINIARNEQARNERA
Ilisimatuut inuit celliinik misissueqqissaartartut utoqqalisarnitsinnut toqusarnitsinnullu pissutaasoq 300-nit amerlanerusunik assigiinngitsunik nassuiaatissaqartippaat. Ukiuni kingullerni ilisimatuut uumasut inuillu cellii sivisunerusumik piusinnaanngortissimavaat. Tamanna pissutigalugu inuit nuimasut sooq toqusarnerput ilisimatuunit paasineqarniassammat aningaasaliisarput. Ilisimatuut qanoq iliorsimappat?
Inuunerup sivitsorniarneqarnera. Biologit ilaat isumaqarput telomerit, kromosomit isuiniittut, pissutigalugit utoqqaliartortartugut. Cellet avissaarnerminni sananeqaatit pillugit paasissutissartai telomerinit illersorneqartarput. Cellelli avissaaraangata tamatigut telomerit naalisarput. Naggataatigut cellet avissaassaaraangata utoqqaliartulertarpugut.
2009-mi Nobelimik nersornaaserneqartup Elizabeth Blackburnip suleqataasalu enzymi telomerit
naaliartortarnerannik, tamatumalu kingunerisaanik cellet pisoqaliartortarnerannik, arriillisitsisartoq suussusersivaat. Nalunaarusiamili nassuerutigineqarpoq telomerit inuunermik sivitsuineq ajortut.Cellenik allannguinikkut utoqqalinerup sunniutai aamma unitsinniarneqarsinnaapput. Cellet avissaarnissamut pisoqalivallaaleraangamik timip nappaammut akiuussutissaata celliinut eqqaminniittunut kukkusumik kalerrisaarilersinnaapput, tamannalu aseruuttoornermik, anniartuarnermik napparsimalernermillu kinguneqarsinnaavoq. Qanittumi Frankrigimi utoqqaat, ilaat 100-t sinnerlugit ukiullit, peersiffigeriarlugit cellii ilisimatuunit allanngortinneqarput. Ilisimatuuni aqutsisoq, professori Jean-Marc Lemaître, nalunaarpoq cellet “pisoqaliartornerat killup tungaanut saatsinneqarsinnaasut” suliaminnit ersersinneqartoq.
ILISIMATUSARNIKKUT INUUNERPUT SIVITSORNEQARSINNAAVA?
Ilisimatuut ilaat oqartarput utoqqaliartorneq akiorniarlugu amerlasuunik iliuuseqartoqarsinnaagaluartoq inuit inuunermik sivitsuinerungaarsinnaanngitsut. Ilumoorpoq inuit inuunerat 1800-kkunniit sivitsornerujartorsimasoq. Kisianni eqqiluisaarnerup nappaatinullu tuniluuttunut nakorsaatit pitsaanerulernerat aamma antibiotikummit akiuussutissallu atornerat tamatumani pissutaaneruvoq. Genetikerit ilaat isumaqarput massakkut inuuneq pissusissamisoortumik sivisussuseqartoq.
Ukiut 3.500-t missaasa matuma siorna Biibilimik allaqataasup Mosesip una nassuerutigaa: “[Ukiut] inuuffigisassavut 70-iusinnaapput imaluunniit 80-it, nukissaqassagutta, ajugaasimaarutissartaalli tamarmi tassa naalliunnartoq ajunaarnerlu; ingerlalertorput, timmisutullu qimaguppugut.” (Tussiaat 90:10) Inuit inuunermik sivitsuiniarsarisaraluarput, inuunerulli sivisussusia Mosesip allaatigisaanit sivisunerungaanngilaq.
Uumasulli soorlu uillut ilaat Kalaallillu Nunaanni eqalussuaq ukiut 200-t sinnerlugit uumasinnaapput Californiamilu orperujussuit ukiut tuusintillit piusinnaallutik. Inuunitta sivisussusaa taakkununnga uumassusilinnulluunniit allanut sanilliukkutsigu immaqa eqqarsassaagut: ‘Ukiuni 70-ini 80-iniluunniit inuunerput taamaattussaannaava?’