Massakkut pillualertoqarsinnaavoq
NAPPARSIMANERUP, utoqqalinerup toqullu sunniutai annernartut atugarinagit inuuneq qilanaarisinnaavat! Nalitsinnili inuppassuit amerlasuunik ajornartorsiuteqarlutillu unamminartitaqarput. Suna iluaqutigisinnaaviuk? Massakkut pilluarnissamut nalerisimaarnissamullu Biibili iluaqutigisinnaavat. Inuunermi unamminartut ilaat Biibilillu qanoq iluaqutaasinnaanera eqqarsaatigikkit.
NALERISIMAALERNEQ
Siunnersuut Biibilimeersoq: “Aningaaserituussutsissi qanoq inuunissarsi aalajangissanngilaa, pigisasili naammagisigit.” – Hebræerit 13:5.
Silarsuarmi nioqqutissarpassuit pigineqartariaqartutut saqqummiunneqartartut imaaginnavipput. Biibilimili allassimavoq ‘pigisavut naammagisinnaagivut’. Qanoq?
‘Aningaaserituussuseq’ ingalassimajuk. Inuppassuit ‘aningaaserituujugamik’ peqqissutsiminnut, ilaquttaminnut, ikinngutiminnut, najoqqutassiaminnut allaallu ataqqinassutsiminnut ajoqutaasumik qanorluunniit iliorumasarput. (1 Timotheusi 6:10) Tamannali imminut akilersinnaanngilaq. Pigisaleritoormi naammatsiuitsuuvoq. – Oqaluussisartup oqaasii 5:9.
Inuit pigisanit pingaarnerutikkit. Soorunami pigisat iluaqutaasinnaapput. Pigisalli asasinnaanatalu qujamasuffigisinnaanngilaatigut; inuit kisimik taamaaliorsinnaapput. Ilumoortunik ‘ikinnguteqarneq’ inuunermi nalerisimaarnissamut iluaqutigisinnaavarput. – Ussatit 17:17.
BIIBILIMI SIUNNERSUUTIT MALINNERISIGUT MASSAKKUT PILLUALERSINNAAVUGUT
PEQQIILLIORNERMI PINERTUSAARNEQ
Siunnersuut Biibilimeersoq: “Uummatikkut nuannaarneq peqqinnartuuvoq.” – Ussatit 17:22.
Nuannaarneq peqqiilliornermi pinertusaarnissamut iluaqutaasinnaavoq. Peqqiilliornermili qanoq nuannaarsinnaavugut?
Qujamasuttuugit. Ajornartorsiutivut kisiisa eqqarsaatigisarutsigit ‘ullut tamarmik atoruminaatsutut’ misinnarsinnaapput. (Ussatit 15:15) Biibilimili ‘qujaniartarnissamik’ kajumissaarneqarpugut. (Kolossemiut 3:15) Inuunermi nuannersut qanorluunniit annikitsigisut qujamasuutigisarnissaat ilinniaruk. Seqernup tarrikkiartornera alianaatsoq, qatsunganersuaq asasattalu qungujunnera pisuunnguallaataasarput.
Allat ikiortakkit. Peqqiillioraluarlutaluunniit “tunisineq pilluarnarneruvoq tigusinermit”. (Apustilit Suliaat 20:35) Allanit qutsavigineqaraangatta nalerisimaarnerulertarlutalu ajornartorsiutivut eqqarsaatigivallaarunnaartarpavut. Allat pitsaanerusumik inuuneqalernissaannik ikiornerisigut pitsaanerusumik inuuneqalersinnaavugut.
AAPPARIINNERMIK NAKUSSATSITSINEQ
Siunnersuut Biibilimeersoq: ‘Suna pingaartittariaqartoq paasisinnaalersiuk.’ – Filippimiut 1:10.
Aappariit peqatigiippiarneq ajortut imminnut ungasilliartulersinnaapput. Taamaattumik uiusut nuliaasullu aappariinnerminnik – inuunermi pingaartittariaqartut ilaannik – salliutitsigunik silatusaassapput.
Sammisaqaqatigiittaritsi. Sammisaqaqatigiinnissarsi pilersaarusiortarsiuk. Biibilimi allassimavoq: “Marluugaanni ataasiinnaanermit pitsaaneruvoq.” (Oqaluussisartup oqaasii 4:9) Igaqatigiissinnaavusi, timersoqatigiissinnaavusi, eqqissisimaaqatigiissinnaavusi angalaaqatigiissinnaallusiluunniit.
Asanninnerit ersersittaruk. Biibilimi uiusoq nuliaasorlu asaqatigiinnissamik ataqqeqatigiinnissamillu kajumissaarneqarput. (Efesosimiut 5:28, 33) Asannilluni qungujunneq, eqissineq annikitsumilluunniit tunissuteqarneq aappariinnermik nakussatsitsingaarsinnaavoq. Soorunami aappariit atoqatigiinnikkut tunniusimanermik taamaallaat imminnut ersersitsivigisinnaapput. – Hebræerit 13:4.