Naassaanngitsumik inuusussatut pinngortitaavugut
INUIT tamarmik sivisuumik pilluarlutik inoorusuttarput. Peqqilluni pilluarlunilu soraarfeqanngitsumik inuuneq qanoq nuannertigissasoq takorlooruk! Asasatta ilaginissaat, nunarsuup angalaarfiginissaa soqutigisattalu ilinniarnissaat piffissaqarfiginerussavavut.
Sooq inuit naassaanngitsumik inoorusuttarpat? Allakkani Illernartuni allassimavoq Guutip taamatut kissaateqartilluta pinngortikkaatigut. (Oqaluussisartup oqaasii 3:11, quppernerup ataani ilanngussaq) Aamma allassimavoq ‘Guuti tassaasoq asanninneq’. (1 Johannesi 4:8) Guutip asannittup naassaanngitsumik inoorusussusilittut pinngorteriarluta toqusussanngortissimappatigut pissusissamisuussava?
Tamatta toqorusunngilagut. Biibilimilu toqu ‘akeqqatut’ tikilluaqqusaanngitsutut allaatigineqarpoq. (1 Korinthimiut 15:26) Ilaat toqujaartartut allat inuuneqqortunerusarput. Kikkulli tamarmik toqusussaapput. Amerlasuut toqunissartik eqqarsaatigigaangamikku annilaangalertarput. Toqu ajugaaffigineqassava? Ilumut taama pisoqarsinnaava?
NERIUUTISSAQARNERMUT UPPERNARSAATIT
Tupaallaatigissaviuk paasillugu Guutip inuit toqusarnissaat siunertarinngisaannarsimagaa? Inuit nunarsuarmi naassaanngitsumik inuunissaat Guutip siunertarisimagaa Biibilip atuagartaani Mosesimik allakkani siullerni uppernarsarneqarpoq. Jehovap * Guutip nunarsuaq inunnit najugarineqarniassammat piareersaqqissaarpaa. Taava inuk siulleq, Adami, pinngortippaa paratiisimullu, naatsiivimmut Edenimut, inissillugu. “Guutillu pinngortitani tamaasa isigai, takuaalu ajunngingaartut.” – 1 Mosesi 1:26, 31.
Guutip Adami naammalluinnartutut pinngortippaa. (5 Mosesi 32:4) Adamip nulia, Eva, aamma arlaatigulluunniit ajoquteqarani isumakkut timikkullu naammalluinnartuuvoq. Jehovap ima oqarfigai: “Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu; naalagaagitsilu aalisakkanut immamiittunut qilaallu timmiaanut nersutinullu nunami aalasunut tamanut.” – 1 Mosesi 1:28.
Adamip Evallu nunarsuaq kinguaaminnik ulikkaassagunikku piffissarujussuaq atussavaat. Eva meerartaartartussaavoq, meerartaavilu meerartaartartussaapput Guutip siunertaatut nunarsuup ulikkaarnissaata tungaanut. (Esaja 45:18) Pissusissamisuussava eqqarsassalluni Jehovap Adami Evalu taamatut siunissaqartissagai taamaallaat meeqqamik immaqalu ernuttamik angumerinissaasa tungaannut inuusussaassappata, siunertarlu naammassineqarnersoq paasinngisaannassallugu?
Uumasunut naalagaanissamik suliassiissut aamma eqqarsaatigiuk. Adami uumasunik atsiinissamik peqquneqarpoq, tamannalu sivisusussaavoq. (1 Mosesi 2:19) Uumasunulli naalagaassaguni ilinniaqqaartariaqarlugillu qanoq paarissanerlugit paasiniaqqaartariaqarpaa. Tamanna sivisoorujussuusimassaaq.
Aappariit siulliit sivisoorujussuarmik inuusussatut pinngortinneqarsimanerat Guutip nunarsuup ulikkaarneqarnissaa uumasunullu naalagaanissaq pillugit ilitsersuutaanit ersersinneqarpoq. Adamilu sivisoorujussuarmik inuuvoq.
INUIT NUNARSUARMI PARATIISIMI NAASSAANNGITSUMIK INUUNISSAAT GUUTIP SIUNERTARAA
SIVISOORUJUSSUARMIK INUUPPUT
Adami, ukiut 930-t
Metusalemi, ukiut 969-it
Noa, ukiut 950-it
Nalitsinni, ukiut 70-it 80-illuunniit
Biibilimi ersersinneqarpoq itsaq inuit nalitsinnut sanilliullugu sivisunerujussuarmik inuusarsimasut. Ima allassimavoq: “Ukiut Adamip inuuffigisai katillutik 930-nngorput.” Tamatuma kingorna angutit arfinillit allat ukiut 900-t sinnerlugit inuusut eqqaaneqarput! Taakku tassaapput Seti, Enoshi, Kenani, Jeredi, Metusalemi aamma Noa. Taakku tamarmik Noap nalaani ulersuaqarnera sioqqullugu inuupput, Noalu ulersuaqarnera ukiunik 600-nik sioqqullugu inunngorpoq. (1 Mosesi 5:5-27; 7:6; 9:29) Qanoq taama sivisutigisumik inuusinnaagamik?
Angutit taakku tamarmik inuit naammalluinnartuunerisa kinguninngua inunngorput. Taama sivisutigisumik inuunerannut tamanna pissutaagunarpoq. Naammalluinnassuserli sivisuumillu inuuneq qanoq ataqatigiippat? Aamma toqu qanoq ajugaaffigineqassava? Taakku akissutissarsiumallugit sooq utoqqalillutalu toqusartugut paaseqqaartariaqarparput.
^ imm. 6 Biibili naapertorlugu Guuti Jehovamik, imaluunniit Jahvemik, ateqarpoq.