Toqu pillugu ilumoortoq alianartoq
TAKORLOORUK tusaamasaq, immaqa nipilersortartoq nuannaartorisat, pillugu isiginnaagassiaq isiginnaarlugu. Meeraanera, nipilersornermik ilinniartinneqarnera sungiusarnerpassuilu aallarniutigineqarput. Taava tusarnaartitsisoq, nunarpassuarnut angalasoq nunarsuarlu tamakkerlugu tusaamasanngortoq takuat. Sivitsunngitsoq utoqqalivoq isiginnaagassiallu naggataatungaani toqulluni.
Tusaamasaq pillugu isiginnaagassiaq oqaluttualiaannaanani piviusunik tunngaveqarpoq. Pineqartoq nipilersortartuugaluaruni, ilisimatuujugaluaruni, timersortartuugaluaruni tusaamasaagaluaruniluunniit alla oqaluttuaq allaaneruallaarnavianngilaq. Pineqartoq angusarpassuaqarpoq, utoqqalisimanngitsuugunili toqullunilu qanoq angusaqarsinnaagaluarnersoq eqqarsaatigiuk.
Tamanna alianarpoq, kisianni tamatta taamak siunissaqarpugut. (Oqaluussisartup oqaasii 9:5) Qanorluunniit ilioraluarutta utoqqalillutalu toqussaagut. Immaqaluunniit napparsimaneq ajutoornerluunniit pissutigalugu toqoriataarsinnaavugut. Biibilimi allassimaneratut tassaaginnarpugut “pujoq ersersimatsiaannariarluni peeruttoq”. – Jaaku 4:14.
Inuuneq nalunarsinnaallunilu siunertaqarpasinngimmat eqqarsartariaaseq una inuit ilaasa malittarpaat: “Nerillutalu erngutiinnarniarta, aqagu toqussagatta!” (1 Korinthimiut 15:32) Inuppassuilli taamatut inooriaaseqarput nalunnginnamikku qanoq ilisukkulluunniit toqusinnaallutik siunissamullu tunngatillugu neriuuteqannginnamik. Inuunerup ilaani, pingaartumik erloqinartorsiornermi, immaqa ima eqqarsartoqartarpoq: ‘Inuuneq taamaattussaannaava?’ Tamanna sumi akineqarsinnaava?
Amerlasuut neriuutigisarpaat ilisimatuunit tamanna akineqassasoq. Ilisimatusarneq nakorsaasiornerlu iluaqutigalugit inuuneq sivitsorneqarsimavoq. Ilisimatuullu ilaasa inuunerup suli sivitsornerunissaa sulissutigaat. Qanorluunniit angusaqaraluarpata uku suli apeqqutaapput: Sooq utoqqalillutalu toqusarpugut? Akeqqatta toqup ajugaaffigineqarnissaa neriuutigisinnaavarput? Allaaserisani tulliuttuni sammisat taakku misissorneqassapput apeqqullu una akineqarluni: Inuuneq taamaattussaannaava?