Ciudad Mantemi, nunap Mexicop ilaani alianaatsorsuarmi Tamaulipasimiit­tumi, inun­ngor­punga. Il­loqarfiup in­nut­tai amerlanerit tuk­kor­tuul­lutil­lu pitsaasuup­put. Ajoraluar­tumil­li aaq­qis­suus­saasumik pinerlun­nerit pis­sutigalugit il­loqarfik toq­qis­sisimanan­ngil­luin­nar­poq.

Ataatsimik angajoqarlungalu marlun­nik nukaqar­punga. Angajoq­qaama ilagiin­ni katuul­lini kuisitsip­paan­nga, kingusin­nerusuk­kul­lu oqaluf­fim­mi erinarsoqatigiin­nut ilan­ngup­punga. Eq­qar­tuun­neqar­nis­san­nut naas­saan­ngitsumul­lu an­niarfim­miin­nis­san­nut an­nilaangangaarama Guutimit iluarisaarusup­punga.

Tal­limanik ukioqar­tunga ataatama qimap­paatigut. Aliasuutigeqaara qamuunalu imaqan­ngitsutut misigilis­sutigalugu. Taama asatigigitsin­ni sooq qiman­neraatigut paasisin­naan­ngilara. Nukap­piaq­qat sisamaasugut pilersor­niarluta anaanaga nalunaaqut­tap-akun­ner­pas­sui sulisariaqar­tar­poq.

Taman­na iluatsil­lugu atuarfim­mit qimaal­lunga meeq­qat angajul­liit peqatigisar­pak­ka. Oqaasipilut­tar­nis­san­nik, pujor­tar­tar­nermik, til­lin­niar­tar­nermik paan­nit­tar­nermil­lu ilin­niar­tip­paan­nga. Al­lanut naalagaaniar­neq nuan­narigak­ku til­luun­neq, paasar­neq sak­kunil­lu atuineq ilin­niar­pak­ka. Inuusut­tuaran­ngor­punga nakuuserumatooq. Aal­laasersor­tunut ilaaq­qutikulasar­punga, arlaleriarlungalu aq­qusiniin­narmi aagin­naal­lunga toquin­nar­tus­satut qimaan­nar­neqar­tarlunga. Anaanan­nguara taamatut nanil­lunga tuaviin­naq nap­parsim­mavim­mukaatipal­lak­kaangaminga aliasut­tarsimas­saqaaq.

Meeraaqatiginikuusama Jorgep 16-inik ukioqar­tunga pulaar­paatigut. Jehovap Nalunaajaasuinut ilaanerar­poq pingaarutilim­mil­lu oqariar­tuuteqar­nerarluni. Biibili atorlugu up­perisaminik nas­suiaatiler­paatigut. Atuar­nikuun­ngisaan­nar­para Guutil­lu aq­qa taas­sumalu siuner­tai pil­lugit ilin­niar­neq pis­sangagalugit. Jorge Biibilimik atuaq­qis­saaqatigiumal­luta neqeroormat akuersivugut.

An­niarfik Biibilimi ilin­niar­titsis­sutigineqan­ngitsoq paasigak­ku iluaal­laqaanga. (Tus­siaat 146:4; Oqaluus­sisar­tup oqaasii 9:5) Taman­na paasigak­ku  Guuti siooragiun­naarlugu Ataatatut meeq­qaminut ajun­ngin­ner­paamik kis­saas­sisutut isigiler­para.

Biibilimik atuaq­qis­saar­tar­nin­ni siumukar­til­lunga paasiler­para inut­tut pis­susin­nik al­lan­nguisariaqarlunga. Maniguun­nerusariaqarlungalu nakuuserumatunera unitsit­tariaqar­para. Korinthimiunut al­lak­kani siul­ler­ni 15:33-mi al­las­simasoq una iluaqutigaara: “Ikin­ngutipalaaqar­neq ileq­qorik­kaluar­tunut aseruutis­siisar­poq.” Inut­tut pis­susera al­lan­ngor­tin­niaruk­ku inuit uan­nik ajor­tumik sun­niuteqar­tar­tut peqatigisarun­naar­nis­saat paasivara. Ikin­ngutiginikuusak­ka peqatigisarun­naarlugit kristumiut ilumoor­tut – inuit nakuuser­neq ator­nagu Biibilimi najoq­qutas­siat atorlugit aaq­qiagiin­ngis­sutimin­nik aaq­qiisar­tut – ikin­ngutigiler­pak­ka.

Al­las­simaf­fik iluaqutigisara al­la tas­saavoq Romamiunut al­lak­kat 12:17-19. Ima al­las­simavoq: “Ajor­toq akileqinasiuk ajor­toqataanik ... Ajor­nan­ngip­pat – ilis­si aalajangiisuusin­naagus­si – inuit tamaasa eq­qis­seqatiginiarsigit. Nam­mineerlusi akiniaaqinasi ... al­las­simasoqarmat: ‘Akiniut pigaara, uanga akiliiumaar­punga,’ oqar­poq Naalagaq.” Naaper­tuil­luan­ngitsulior­nerit Jehovap kis­saatigisamisut pif­fis­sarititaminilu iliuuseqarfigiumaarai akueraara. Nakuuserumatus­susera iperariar­tuaar­para.

Ilaan­ni un­nuk­kut angerlar­til­lunga puiun­ngisaan­nak­kan­nik pisoqar­poq. Pinerlun­niaqatigiit inuusut­tut akerarinikuusama saas­sup­paan­nga, naalagaasorlu tunuk­kut patil­lunga suaar­poq: “Im­minut il­lersor­niarit!” Pisumi tamatumani saas­sun­neqar­nera naam­magalugu atoq­qul­lugu Jehovamut ikioq­qupal­lap­punga. Akiniaarusungaaraluarlunga qimagutiin­nar­punga. Aqaguani naalagaasoq naam­mat­toor­para. Kamaam­mingaaraluarlunga im­minut noqis­sin­naajumal­lunga nipaatsumik Jehova qin­nuigeq­qip­para. Inuusut­toq taan­na uan­nukar­poq tupaal­laatigeqisan­nil­lu oqarluni: “Ip­pas­saq pisimasoq pil­lugu isumak­keerfigin­nga. Ilumoorlunga oqas­saguma ilit­tut ik­kusuk­kaluar­punga. Biibilimik atuaq­qis­saar­talerusup­punga.” Kaman­nera aqus­sin­naasimagak­ku nuan­naarutigingaar­para! Tamatumalu kingunerisaanik Biibilimik atuaq­qis­saaqatigiit­taler­pugut.

Ajoraluar­tumik ilaqut­tama Biibilimik atuaq­qis­saar­tar­ner­tik taamani ingerlatiin­nan­ngilaat. Taamaak­kaluar­toq arlaan­naal­luun­niit akor­nutiginagu atuaq­qis­saar­tuar­nis­sara aalajangiup­para. Nalun­ngilara Guutip in­nut­taasa peqatigisar­nerisigut qamuuna an­niarun­naarsin­naal­lungalu pisariaqar­titan­nik anersaak­kut ilaqutaqalersin­naal­lunga. Siumukar­tuar­punga, 1991-imilu Jehovap Nalunaajaasuisut kuisip­punga.

Kamas­saqar­tuul­lunga nakuuser­tuul­lungalu naalagaaniar­tuunikuuvunga. Biibilili inuunin­nik al­lan­nguisitsil­luin­nar­poq. Maan­na Biibilip eq­qis­sinermik oqariar­tuutaa kik­kun­nul­luun­niit tusar­naarumasunut oqaluus­sis­sutigisar­para. Ukiut 23-t kingul­liit pif­fis­saq tamaat oqaluus­sineq im­mik­kut pisin­naatitaaf­figisimavara.

Pif­fis­sap ilaa Mexicomi Jehovap Nalunaajaasuisa im­mik­koor­tor­taqarfian­ni kajumis­sutsin­nit sulivunga. Taakani Claudia, ar­naq kristumiu inuusut­toq eqiasuingaar­toq naapip­para, 1999-imilu katip­pugut. Jehovap ikior­tis­san­nik taama aalajaatsigisumik pil­luaq­qus­sutis­sarsisimam­manga qujamasungaar­punga!

Ilagiin­ni Mexicomiutut us­sersorluni oqaasilin­ni tusilar­tut Jehovamik ilin­niar­til­lugit kif­far­tor­pugut. Kingusin­nerusuk­kut Biibilimik ilin­niar­titsis­sal­luta Belizemut qaaq­qusaavugut. Maani pilimanian­ngitsumik inuugaluarluta pil­luarluta inuunis­satsin­nut pisariaqar­titavut tamaasa pigaavut. Sumil­luun­niit pitsaanerusoqan­ngilaq.

Pif­fis­sap ingerlanerani anaanaga Biibilimik atuaq­qis­saaq­qit­talerlunilu kuisip­poq. Aam­ma angajora, nulialu meeraal­lu maan­na Jehovamik Nalunaajaasuup­put. Taamani ikin­ngutigisimasama oqaluus­sif­figisama ilaat maan­na aam­ma Jehovamut kif­far­tor­put.

Ajoraluar­tumik ilaqut­tama ilaat kamajas­suser­tik at­tatiin­naramik­ku toqusimap­put. Al­lan­nguisiman­ngik­kaluaruma inuunera taamatut­taaq kinguneqarsimasin­naagaluar­poq. Qujamasungaar­punga Jehovap im­minut kif­far­tor­timinul­lu, Biibilimi najoq­qutas­siat inuunin­ni maleruarsin­naaq­qul­lugit kamagit­tarlutik inus­siar­nerlutil­lu ilin­niar­titsisunut, kajungilersis­simam­manga.