„nalunaerkut“ takugugko nangânatit iliûsekarit!
„nalunaerkut“ takugugko nangânatit iliûsekarit!
„erĸumagitse, uvdlordlũnît uvdlup ĸanoĸ ilinigssâlũnît nalugavsiuk.“ — Matîuse 25:13.
1. suna pivdlugo silatusãngínerúsava niviarsiat sianîtsut Jesusip ássersũmine erĸartugai maligdlugit ilioráine?
UKIUT INÛVDLUARNANGÂRTUT inuiait utertitaussut silarssuâta atugagssaisa autdlartilernerat erĸarsautigalugo, niviarsiat sianîtsut tatdlimaussut Jesusip ássersũmine erĸartugai maligdlugit iliûseĸardlune sianĩssusigssâ! táuko inortuivdlutik iliûseĸarput ’ĸilangmiuvdlo nâlagauvfianut’ isertíneĸaratik. sianîtsut táukua ĸáumarĸutertik ĸaumatíngitsôrpât pissariaĸarneratigut. (Matîuse 25:1-12) ’nâlagauvfingmik tusagagssaĸ nuánersoĸ tamána’ „nunarssuarme inuit najugarissãne tamarssuarme“ inuit nalujungnaerutigssãnik oĸalũssíssutigineĸarêrpat, ’naggatigssardlo’ nagdliutilerpat, niviarsianut sianîtsunut ássersũneĸarsínaussut kivfartũmik ingmíkut pisínautitauvfingmut ĸaĸugulũnît periarfigssaĸarfigerĸingneĸarsínáungitsumut peĸatauvfigssaraluartik ánaisimásavât. — Matîuse 24:14, NW.
2, 3. (a) niviarsiat ĸuliussut pivdlugit ássersũne suna oĸaorĸigsârutigalugo Jesusip naggaserpâ? (b) suna píssutigalugo oĸaorĸigsârut tamána sule nalerĸutdluarpa, taimáitumigdlo ’niviarsiaĸ sianisôĸ’ katitigaĸ sumik pigssamauteĸardluartuásava?
2 tamána píssutigalugo imatut oĸaorĸigsârivdlune Jesus Kristusip ássersũne naggaserpâ: „taimáitumik erĸumagitse, uvdlordlũnît uvdlup ĸanoĸ ilinigssâlũnît nalugavsiuk.“ — Matîuse 25:1-13.
3 uvigssap Jesus Kristusip oĸausê táuko uvdluvtínut nalerĸutdluínarput, ingangmik mãnákut, ’píssutsit ârĸigssũssaunerata naggaserneĸarfiata’ autdlartíneranîtdle ukiut 72-it ĸângiúsimangmata. ukiut taima amerdlatigissut ĸângiúsimagaluartut ’niviarsiap sianisûp’ katitigkap sivnerútut uvdlordlũnît uvdlup ĸanoĸ ilinigssâlũnît ’matup’ matuneĸarfigssâ sule naluvât. ’mato’ matuneĸarpat nâlagauvfingmut ĸilangmĩtumut isersínauvfigssaerúsimásaoĸ ’uvigssaĸ’ sivnerútut ’uvigssât’ ilagísavdlugo. ’niviarsiatut sianisûtut’ iliûseĸarusugtut anersãkut ûliagssamauteĸartuáinartariaĸarput. taimailiordlutik ĸaumassoĸ ĸaumatípât ’nâlagauvfingmik tusagagssaĸ nuánersoĸ tamána’ tusardliutdlugo inuit nunarssuarme tamarme inuiaĸatigîngne tamane ítut nalujungnaerutigssãnik ’naggatigssap’ nagdliúnigssâta tungânut. — Matîuse 24:14, NW; Mákorse 13:10; sarĸúmersitat 14:6, 7.
„savat“ „savaussat“dlo mãnákut avigsârtíneĸartut
4. Mattæusip agdlagâ nâpertordlugo, Jesusip ’najũneranut’ „nalunaerĸut“ip ilâtut Jesusip naggámik ássersûtâ suna erĸũtariaĸarpa?
4 ’píssutsit ârĸigssũssaunerata naggaserneĸarfiata’ naggatigssâta nagdliutíngínerane, inungnik avigsârtitsineĸ avdla nãmagsineĸartariaĸarpoĸ, „naggatigssap nalâ“ne inûnivtínut nalunaerĸutip avigsârtitsineĸ tamána ilagingmago. (Dâniale 12:4, NW) tássûna savat savaussatdlo pivdlugit Jesusip ássersûtâ piviussúngortíneĸarpoĸ, ássersûtdlo tamána agdlautigalugo Kristusip takugssaunane ’najũneranut’ „píssutsitdlo ârĸigssũssaunerata naggaserneĸarfigssânut“ „nalunaerĸut“ pivdlugo sujuligtûtânik angnertûssumik agdlauserissane Mattæusip naggaserpâ.
5. inuit savatut savaussatutdlo avigsârtíneĸarnigssât súkut pissugssauva?
5 Jesusip tamána ĸanoĸ sujuligtûtigigâ malugeriaruk, sôrdlo Matîuse 25:31-46-me agdlauserineĸartoĸ. ássersûsiane oĸalugtuarilerpâ uko oĸauseralugit: „inûvdle ernera tikiúkune nâlangnássutse atisimavdlugo íngilitdlo tamaisa ilagalugit, tauva igsiásavoĸ igsiavíssârssuarmine nâlangnássutsime piane; inuiaĸatigîtdlo tamarssuarmik sânut katerssúsáput, avigsârtísavailo sôrdlo savanik pârssissup savat . . . [savaussanit, NW] avigsârtítarai. savatdlo . . . talerpingme tungânut pisísavai [savaussatdlo, NW] sâmingme tungânut.“ tauva ĸanoĸ pissoĸásava? Jesus nangitdlune oĸarpoĸ:
6. savanik pârssissup kúngiussup inuit talerpingme tungânĩtut ĸanoĸ oĸarfigai?
6 „tauva kúngip talerpingme tungânĩtut oĸarfigiumârpai: ĸaigitse atâtama pivdluarĸussai ukorsê, nâlagauvfik silarssûp túngavilerĸârneranit ilivsínut piarêrsimassoĸ kingornússarisiuk. kâgtungame nerisípavsinga; imerusugtunga ímípavsinga; tikeraussunga igdlusisípavsinga; tamaĸángitsunga atissalerpavsinga; náparsimassunga takusarpavsinga; parnaerússivingmĩtunga ornigpavsinga.“
7. inuit iluartut, savatut ítut, suna aperĸutigísavât, kúngivdlo ĸanoĸ akísavai?
7 „tauva iluartut akiumârpât oĸardlutik: Nâlagaĸ, ĸanga takugavtigit kâgtutit, nerdlerdlutitdlo? imerusugtutitdlũnît, ímitdlutitdlo? ĸanga takugavtigit tikeraussutit, igdlusisitdlutitdlo? tamaĸángitsutitdlũnît, atissalerdlutitdlo? ĸanga náparsimassutitdlũnît parnaerússivingmĩtutitdlũnît takugavtigit ornigdlutitdlo? kúngivdlo akiumârpai oĸardlune: ilumut oĸarfigâvse: ukua ĸatángutima mingnínguit ilât sumik pigigse tamatumínga uvanga pivavsinga.“
8. (a) inuit savaussatut ítut suna takuvdlugo nangânatik iliûseĸángitsôrpat? (b) tauva kúngip sumut autdlartísavai, iluartutdle, savatut ítut, sumut autdlartísavdlugit?
8 „savaussat“ „nalunaerĸut“ takoriardlugo nangânatik iliûseĸángitsôrput. katerssat „savat“ suliáinik táuko suliaĸángitsôrput. taimáitumik ima atuarsínauvugut: „tauvalo sâmingme tungânĩtútaoĸ oĸarfigísavai: uvavnit autdlaritse perdlorĸussaussuse ukorsê, ingneĸ nâgssáungitsumik ikumassoĸ Diâvulumut íngilînutdlo piarêrsimassoĸ ornigsiuk. kâgtungame nerisíngilavsinga; imerusugtunga ímisíngilavsinga; tikeraussunga igdlusisíngilavsinga; tamaĸángitsunga atissalíngilavsinga; náparsimassunga parnaerússivingmĩtungalo takusángilavsinga. tauva táukuátaoĸ akiumârpât oĸardlutik: Nâlagaĸ, ĸanga takugavtigit kâgtutitdlũnît imerusugtutitdlũnît tikeraussutitdlũnît tamaĸángitsutitdlũnît náparsimassutitdlũnît parnaerússivingmĩtutitdlũnît, kivfartorfiginagdlo? tauva akiumârpai oĸardlune: ilumut oĸarfigâvse: ukua mingnínguit ilât sumik píngínavsiuk tamatumínga uvangátaoĸ píngilavsinga. autdlarumârputdlo táuko nâgssáungitsumik [uternavêrsitáusavdlutik, NW], iluartutdle nâgssáungitsumik inũsavdlutik.“
9. „savat“ „savaussat“dlo pivdlugit Jesusip ássersûtâta uvdlumíkut erĸũnerata nalâne ĸanoĸ ilioruvit aitsât pivdluarsínáusavit?
9 ássersûtip sujuligtûtaussup tamatuma erĸũnerane ivdlit ímaĸa peĸatauvutit. ajúngitsuliat Jesusip erĸartugai malugaigit? Jesusip ’ĸatángutai’ taimailiorfigaigit? táuko pivdlugit „sava“tut iliûseĸarsimaguvit pivdluarsínauvutit!
10. Jesusip ’ĸatángutine’ inuitdlo „sava“nut „savaussa“nutdlo ássersũneĸartut ĸanoĸ ingmíkôrtitsivfigai, taimailiornermutdlo bîbilime sumik túngavigssaĸarpa?
10 Jesusip anersãkut ’ĸatángutine’ inuitdlo savatut savaussatutdlũnît píssusigdlit ingmíkôrtípai. ássersûtip erĸũneragut ’ĸatángutai’ tássáuput inuit Jesus maligdlugo Gûtimut iláinarsiúngitsumik túniutdluínarsimassut. Jesus maligdlugo túniutdluínarnertik tamanut takutípât imermut morssugtitauvdlutik kuisíkamik. ãmátaoĸ Jehova, kúngip Jesus Kristusip atâtâ, táukua atâtagilerpât ĸilangmiussoĸ, Gûtip táuko anersâminik ivdlernartumik ernersiaringmagit, tássûnalo Gûtip ernera anersãkut „ĸatángut“igilerpât. tamána pivdlugo ĸilangmiup nâlagauvfiane inigssaĸartitáuput angajortik, Jesus Kristus, „kúngit kúngiat nâlagkatdlo nâlagât“ ilagalugo. (sarĸúmersitat 19:16) tamatumúnga atatitdlugo táuna pivdlugo ima agdlagsimavoĸ: „tamarmingme atautsimit píput iluartitsissordlo iluartitaussutdlo. tamána píssutigalugo kángusungnane ĸatángutiminik taivai, oĸarame: arĸit ĸatángutivnut oĸalûtigiumârpara, ilagît akornáne únersiutigísavavkit.“ (Eprîarit 2:11, 12) tássane Tussiaat 22:23-p oĸausertai Gûtip erneranut nâlangnarsisitamut, Jesus Kristusimut, atortûtíneĸarput.
11. Jesusip anersãkut ’ĸatángutaisa’ sivnere sule nunamĩtut ĸavsîúpat, sivnerútutdlo tássáupat katerssat, imalũnît „ilagît“, sût?
11 Jesus Kristusip kúngitut nâlagaussup anersãkut ’ĸatángutaisa’ sivnere sule nunamĩput. katerssatut, imalũnît „ilagîgtut“, issigalugit tássáuput „inugsiaĸ ilumôrdlunilo silatôĸ“ „píssutsit ârĸigssũssaunerata naggaserneĸarfia“ pivdlugo sujuligtũmine Jesusip erĸartugâ. oĸarpoĸ: „kiname tauva inugsiauva ilumôrdlunilo silatôĸ nâlagâta igdlume kivfaminut pârssissúngortitâ, pivfigssaĸ erĸortoĸ nagdliútarângat nerissagssáinik tunissarĸuvdlugit? inugsiaĸ táuna pivdluásaoĸ nâlagâta, tikiúkune, taimailiortoĸ nâpigpago. ilumut oĸarfigâvse, pigissaminut tamanut pârssissúngortísavâ.“ — Matîuse 24:45-47, NW.
12. (a) 1919-imîtdle „inugsiaĸ“ katitigaĸ suna suliaralugo malungnangârpa? (b) ’pigissanut’ sunut „inugsiaĸ“ pârssissúngortíneĸarame? (c) „inugsiaĸ“ mãnákut sulissoĸ sûp ilagâ?
12 ’inugsiap’ táussuma kináussusia pivdlugo Jesusip aperĸutâ pisimassuviussut akivât. „ilagît“ „inugsia“tut kivfartûteĸartut tássáuput ’ĸatángutai’ Gûtip Jesusimut túniússai sule nunamĩtut. tássáupútaoĸ ’niviarsiaĸ sianisôĸ’ katitigaĸ. 1919-imîtdle „inugsiaĸ“ táuna malungnartípoĸ Nâlagkap inoĸutaine ’igdlume kivfat’ anersãkut inũssutigssanik nutânik bîbilimêrsunik tunissardlugit, „pivfigssaĸ erĸortoĸ nagdliútarângat“ taimailiortardlune. taimáitumik Nâlagkap takugssáungitsup „inugsiaĸ“ katitigaĸ tatiginartoĸ táuna „pigissaminut tamanut“ anersãkut ítunut pârssissúngortípâ. taimáipoĸ pingârtumik ’nâlagauvfingmik tusagagssap nuánersup’ nunarssuarme tamarme, kúngip nâlagauvfigissâne, oĸalũssíssutigineĸarneranut atatitdlugo. mána tikitdlugo nâlagauvfingmik nalunaiautigingningneĸ tamána angnertusiartuínarsimavoĸ! „inugsiaĸ ilumôrdlunilo silatôĸ“ sulissoĸ „nalunaerĸut“ip ilagâ malungnartoĸ, „nalunaerĸut“ip nalujungnaersingmatigut ukiut sût nagdliúsimaneránik.
13. ĸangamíngãnîtdle ’inuiaĸatigît tamarssuarmik’ kúngip sânut katerssorsimápat, ĸangalo ’inugsiap’ „savat“ kúngip talerpiata tungânut katerssulerpai?
13 „savat“ iluartut „inugsiaĸ“-mut katitigkamut ilaussut ajúngitsumik iliorfigissarpait. savat savaussatdlo ássersûtaussut inũput inuiaĸatigîngnit mãnákut nâlagauvfingmik nalunaiaivfigineĸartunit tamanêrsut. savanut savaussanutdlo ássersũneĸardlutik ’inuiaĸatigît tamarssuarmik’ kúngip ĸilangme igsiavíssârssuarmine Gûtimik nalussut uvdluisa 1914-ime nâneránîtdle igsiassup sânut katerssorput. katerssorneránut atatitdlugo ukioĸ 1935 malugissariaĸarpoĸ. Vagttårnip paĸatigîgfia, ’inugsiap’ katitigkap sákugissâ, taimaníkut nunarssuarme tamarme 49-nik ingmíkôrtortaĸarfeĸarpoĸ. ukiume tássane ’inugsiap’ inuit nunamĩtut savatut píssusigdlit ingmíkut soĸutigilerpai, kúngip nâlagaussup Jesus Kristusip talerpiata tungânut katerssorneĸarnigssât sujunertaralugo. tássûna táukua inuiaĸatigîngnit tamanêrsut „inugsiaĸ“ katitigaĸ ĸaningnerussumik atássuteĸarfigilerpât.
14. Juánase 10:16-ime agdlagsimassoĸ erĸarsautigalugo, iluartut savatut ítut ĸanoĸ issigineĸalersimápat, mãnákutdlo Vagttårnip peĸatigîgfiata ingmíkôrtortaĸarfîsa ĸavsiussut táuko kivfartorfigait?
14 iluartut savatut ítut táuko tangnârissumik nalingínaussumigdlo ’inungnik Gûtip iluarissainik’ taineĸásáisáput. (Lúkarse 2:14, ĸavdlunâtut atortugssautitaĸ) katerssatut Gûtimik mianeringnigtutut inuiaĸatigîngne tamane ítutut aulajangersimángitsutut ârĸigssugáungitsututdlo — savatut támarsimassutut itdlutik — issigineĸásáisáput. Jesus oĸarpoĸ ’savat avdlat’ katerssorumârdlugit tauvalo „inugsiaĸ“-mut katitigkamut ilaussut sivnerinut ilángutitdlugit „savautit“ atausíngortitdlugit. (Juánase 10:16) taimanernîtdle ’savat avdlat’ katerssorneĸarnerat „píssutsit ârĸigssũssaunerata naggaserneĸarfi“anut nalunaerĸutip ilagâ malungnangârtoĸ. kivfartorfigineĸarnigssãnutdlo Vagttårnip peĸatigîgfia mãnákut 95-inik ingmíkôrtortaĸarfeĸarpoĸ.
„nalunaerĸut“ takuvdlugo nalerĸútumik suliaĸartut akilerneĸásáput
15. ’nâlagauvfik kingornússarísaguníko’ „savat“ maleruagagssarerĸussat sût maleruartariaĸarpait?
15 Jesusip ássersûtâ nâpertordlugo „savat“ iluartut „píssutsit ârĸigssũssaunerata naggaserneĸarfi“ane maleruagagssarerĸussat aulajangersimassut maleruartariaĸarpait. Kristusip anersãkut ’ĸatángutai’ ’inugsiamut ilumôrdlunilo silatûmut’ katitigkamut ilaussut ilisarissariaĸarpait akueralugitdlo. „savat“ „inugsia“mut katitigkamut ilaussut ajúngitsumik iliorfigissartariaĸarpait, sôrdlo erĸúngitsumik parnaerússaugângata takusartardlugit. „savat“ taimailiortariaĸarput atâtamit ĸilangmiussumit pivdluarĸussáusagunik kúngimitdlo Jesus Kristusimit ĸaerĸuneĸásagunik, sôrdlo oĸartoĸ: „nâlagauvfik silarssûp túngavilerĸârneranit ilivsínut piarêrsimassoĸ kingornússarisiuk.“ — Matîuse 25:34.
16. oĸarame „nâlagauvfik . . . kingornússarisiuk“, kúngip „savat“ sumut iserĸuvai, sorssungnerme sume amiákûvdlutik inũsangmata?
16 „savat“ táuko kúngip anersãkut ĸatángutigíngínamigit, ĸaerĸúngilai igsiavíssârssuarnut ĸilangmĩtunut ingerĸuvdlugit nâlagauvfingme ukiunik tûsintinik sivisússusilingme kúngioĸatigerĸuvdlune. oĸarame „nâlagauvfik . . . kingornússarisiuk“ ĸaerĸuvai nâlagauvfiup ukiugssainut iserĸuvdlugit silap matuma nâlagauvfê gûtîtsut tamaisa ’sorssungnerme Gûtip ajugaĸángitsup uvdlugssarssuane piumârtume’ Harmagedonime aserorêrunigit. (sarĸúmersitat 16:13-16) savatut ítut mãnákut inûssut ilarpagssue sorssungnigssame sorssungnerit angnerpârtãne amiákûvdlutik inũsáput toĸunatigdlo Kristusip kúngiuvfigssânut ukiunik tûsintinik sivisússusilingmut isísavdlutik.
17. ĸanoĸ isumaĸarfigalugit kúngip „savat“ oĸalugfigai, ĸanordlo iliornermigut táukunúnga kingornússaritísínaussaminik kingornússagssarsisimava?
17 taimáitumik kúngip Jesus Kristusip „savat“ táuko ĸitornamisut oĸalugfigai, kúngip kingornússarititânik kingornússinigssãnut pivfigssángormat. nuname inûgame nãmagdluínartoĸ inuiait tamarmik utertíneĸautigssãnik pigdliutitut utertitsíssutigssatut toĸugame, nangmineĸ pâratîsime nuname inûsínautitaunerigaluane taimaititdluínarpâ. (Lúkarse 23:39-43) tamána erĸarsautigalugo ’Adamip kingugdliup’ „inuk sujugdleĸ, Âtame“, ajortuliortoĸ kinguâgssaminigdlo tamanik pâratîsimik nunamĩtumik ánaissaĸartitsissoĸ, ássigíngilâ. taimáitumik Jesus Kristus makísimassoĸ, inuiait utertitaussut tamarmik ’isuanut atâtât’, kingornússaĸartitsivoĸ nuname savatut ítut pigssãnik. (1 Korintumiut 15:45; Isaia 9:6, 7, NW) inuiait tamarmik nagguvigât „inuk sujugdleĸ, Âtame“ pâratîsime inûsínautitaugaluartoĸ periarfigssarpagssuaĸartordlo. kisiánile pâratîse ánaissaĸ táuna Gûtip nâlagauvfiatigut ’Adamip kingugdliup’, Jesus Kristusip, sujulerssuineratigut pilersíneĸarĸigkumârpoĸ.
18. ĸanoĸ pâsissariaĸarpa agdlagsimangmat nâlagauvfiup nâlagauvfigissagssâ „silarssûp túngavilerĸârneranit [savanut] piarêrsimassoĸ“?
18 pâratîsimit sujugdlermit anisitaorêrsimaleramik aitsât Adam Evalo ĸitorniortalerput. ernerisa áipât, iluartoĸ Abel, erneránit angajugdliliamit, Kainimit, toĸúneĸarpoĸ. taimáitumik ernerat Set Abelip taortigssâtut issigineĸarpoĸ. Kitorniulermata inuiait silarssuât pilersíneĸarpoĸ. tamánale pitínago, inuiait angajorĸâve pâratîsimit anisíneĸarmata, Jehova Gûte nãkigtangârtumik neriorssûteĸarpoĸ, oĸardlune pulateriârssûp ássersûtaussup, Satanip Djævelip, niaĸua ’kinguâgssap’ aserorterumârâ. ’kinguâgssaĸ’ táussuma kúngit nagguvigisimásavai, ãmátaoĸ Gûtip sujunertâ piumârtugssanigdlo ilisimangningnera nâpertordlugo nâlagauvfingmut atatíneĸásavdlune. (1 Môrsase 3:15) Satan pulateriârssûssoĸ kinguâvilo ĸanoĸ-iliorsínaujungnaersíneĸarpata, inuiait akornáne utertíneĸartut nuna nâlagauvfiup nâlagauvfigissâ inûvfigilerumârpât, ĸilangme nâlagkersuissut atãne, kinguâgssaĸ ajugaussoĸ pulateriârssungmik kinguâvinigdlo aserorterissoĸ nâlagkersuissoralugo. taimáitumik „nâlagauvfik“ savatut ítut atâtamingnit ’isuanut atâtaussu’mit, Jesus Kristusimit, kingornússarissât tássauvoĸ nâlagauvfiup nâlagauvfigissagssâ „silarssûp túngavilerĸârneranit [táukunúnga] piarêrsimassoĸ“.
19. Harmagedonip kingornatigut nuname píssutsinik ârĸigssũssineĸ ĸanoĸ ítumik autdlartíneĸásava?
19 savaussat ássersûtaussut Harmagedonime sûjungnaersíneĸardlutik uternavêrsitáusangmata, „savat“ amiákûvdlutik inûssut Harmagedonip kingornatigut nuname pâratîsiussume píssutsit ârĸigssũssaunerat iluartumik autdlartitísavât. tamána pivdlugo Jesus oĸarpoĸ: „autdlarumârputdlo táuko [savaussatut ítut] nâgssáungitsumik [uternavêrsitáusavdlutik, NW], iluartutdle nâgssáungitsumik inũsavdlutik.“ — Matîuse 25:46.
20. ĸanoĸ iliortariaĸarpugut „nalunaerĸut“ip ilai kúkussumik pâsinavêrsârdlugit?
20 Gûtimik nalussut uvdluisa 1914-ime nâneránîtdle ’píssutsitdlo ârĸigssũssaunerata naggaserneĸarfiata’ ukiume tássane autdlartíneranîtdle, „savat“ „savaussat“dlo Jesusip ’najũnera’nut nalunaerĸúmik pâsingningnertik ássigĩngíssutigât. ĸularutigssáungitsumik ukiut erĸartûtivfiussut inûvfigigavtigik, aperĸut una pingârtorujugssûvoĸ: uvagut „nalunaerĸut“ ĸanoĸ isumaĸartíparput? uvagut isumarput malĩnardlugo navsuiarniásaguvtigo, ímaĸa „nalunaerĸut“ip ilai kúkussumik isumaĸartísagaluarpavut. taimáitumik silatusârnerúsaoĸ aperiguvta: „nalunaerĸut“ip katitigaussup sumik pâsitísagâtigut Jesus Kristus ĸanoĸ oĸarpa? táuna nâpertordlugo „nalunaerĸut“ip pâsitítugssauvâtigut píssutsit ârĸigssũssaunerata mãnákut atũtup ungasíngitsúkut ’angnikitdliornartugssame angisûme’ nunarssuaĸ tamákerdlugo ulerssuarmit Noap uvdluine pisimassumit aseruinerungârtume nâjumârnigssânik. — Matîuse 24:21; sarĸúmersitat 7:14.
21. (a) nauk ’angnikitdliornartoĸ angisôĸ’ nagdliútugssaugaluartoĸ, suna píssutigalugo tipaitsúsaugut? (b) katerssat „savat“ uvdlumíkut ítut sumik periarfigssaĸardlutigdlo pisínauvfigssaĸarpat?
21 tipaitsugitsile! „nalunaerĸut“ip takutípãtaorme Jesus Kristusip ukiune tûsintine nâlagkersuinigssâ ĸanigdlissoĸ, Satanip nuname píssutsinik ârĸigssũssinerata sûjungnaersíneĸarnerata kingornatigut autdlartísassoĸ. (Lúkarse 21:28) taimáitumik Gûtip sernigssuineratigut naleĸángitsumik periarfigssaĸarputit ’angnikitdliornartume angisûme’ tássane amiákûvdlutit inûnigssangnik píssutsinik ârĸigssũssinigssame nutaussume, nâgssáungitsumik iluarssuseĸarfiussume, inûjuarnigssangnut. toĸúngisáinarnigssangnúme periarfigssaĸarputit, nuname pâratîsiussume Jehova Gûtip ĸilangme nunamilo kisime oĸartugssauvdlune nâlagaunerata atâne soraiuitsumik pivdluarĸussauvdlutit inûsínaugavit!
22. (a) „nalunaerĸut“ takuvdlugo nangânata erĸortumigdlo suliaĸaruvta, ĸanoĸ iliúsaugut? (b) „nalunaerĸut“-mut atatitdlugo Jesus Kristus ĸanoĸ akitsisíneĸásava?
22 tauva Kristusip anersãkut ’ĸatángutai’ ilagigaluaruvtigik „savat“dlũnît iluartut ilagigaluaruvtigik, „nalunaerĸut“ takuguvtigo nangânata iliûseĸarta erĸortumigdlo suliaĸardluta. „nalunaerĸut“ip ilâta malungnangârtup suliarineĸarneranut sule angnerussumik peĸatausa, tássaungmat: „[nâlagauvfingmik] tusagagssaĸ nuánersoĸ tamána oĸalũssíssutigineĸásaoĸ nunarssuarme inuit najugarissãne tamarssuarme inuiaĸatigît tamarmik nalujungnaerutigssãnik.“ tauva „naggatigssaĸ“ nagdliugpat ersíssutigssaĸásángilagut. kisiánile tipaitsungãsaugut! ãmátaoĸ taimaníkugssaĸ Jesus Kristus akitsisíneĸásaoĸ, ’píssutsit ârĸigssũssaunerata naggaserneĸarfianut nalunaerĸúmik’ ilarpagssualingmik sujuligtuissûgame únerĸarigsoĸ. — Matîuse 24:3-mît 25:46 ilángutdlugo. (wD 1/2 85)
ivdlit akisínauvigit?
□ ukiune sune inuit savatut savaussatutdlo avigsârtíneĸartugssáupat?
□ savat savaussatdlo pivdlugit Jesusip ássersûtâta erĸũnerata nalâne ĸanoĸ ilioruvit pivdluarsínáusavit?
□ kúngip ’ĸatángutai’ ãma „inugsiaĸ ilumôrdlunilo silatôĸ“ kíkũpat?
□ ’nâlagauvfik kingornússarísaguníko’ inuit savatut ítut maleruagagssarerĸussat sût maleruartariaĸarpait?
□ Jesusip ’najũneranut’ „nalunaerĸut“ takuvdlugo nangânata erĸortumik iliûseĸaruvta ĸanoĸ iliúsaugut?
[Atuaqqissaarnermi apeqqutit]
[Qupp. 7-mi assiliartaq]
sôrdlo savanik pârssissup savat savaussanit avigsârtítarai, taimatut uvdlumíkut Jesus Kristus inungnik avigsârtitsivoĸ. ivdlit inûvit savatut ítoĸ?
[Qupp. 9-mi issuagaq]
Jesusip ’najũneranut’ „nalunaerĸut“ takuvdlugo nangânatit iliûseĸarit. taimailioruvit pâratîsime nâgssáungitsumik inũssuteĸarsínauvutit