átavekarnek erdlingnartok pivdluarnermut atassok

„K’INGMEK’ ûmassoĸ iluanârneruvoĸ lîuvimit toĸungassumit.“ (akugdlîssup oĸausê 9:4) oĸausiminínguit táuko atordlugit ĸanga kúngip Salomonip erssersípâ túngaviussumik ilumôrtoĸ tássa inûneĸ sunitdlũnît pigissanit ãmalo sunitdlũnît anguniagarisínaussanit tamanit pingârnerussoĸ. inûneĸángíkuvta tamáko tamarmik naleĸángitdlat. âp, inûneĸángíkuvta pivdluarneĸ anguniarsínáungilarput.

’inûnermit iluatingnarnerussoĸ’

inûneĸ pingâraluaĸissoĸ sule avdlamik ajúngínerussoĸarpoĸ. ’taimáisínauva?’ ímaĸa isumaliorputit. ’suna inûnermit nangminermit erdlingnarnerusínauva?’

tamána Israelip kúngianit Davidimit akíssutigssarsisínauvarput. píngortitsissoĸ, Jehova Gûte, sâgfigâ pingârtitsingârnine erssersíniardlugo: „Ilumoorsutsit [ilumôrtumik nuánaringnigdluarnerit, NW] iluatinnarnerummat inuunermit. Qarluma erinalimmik unnersiutigissavaatsit.“ (Tussiaat 63:4) Davidip ĸamánga pissumik oĸausîsa erssersípât ajúngitsumik Gûtimut átaveĸarníkut ilumôrtumik nuánaringnigdluarneranut peĸatauneĸ, inûnermíngãnîtdlũnît pingârnerussoĸ. sôĸ taimáipa?

inûnerup píssutâ

atago takordlôriaruk tuníssúmik nuánârutigivdluínagkangnik tuníssutisivdlutit. ímaĸa tuníssut nuánârutigivdluarpat.  ĸujasuínerorĸajaĸaordle tuníssut kisiat erĸarsautigigaluarugko tunississoĸ pínago. imáingila tuníssutisissutit píssutigalugo ivdlit tunississordlo ĸanigtumik átaveĸatigîgkavse? taimatut ĸanigtumik átaveĸatigĩngíkaluaruvse nuánârutigissangnik tuníssutisisimanaviángíkaluarputit.

ãma taimatut inûneĸ pivdlugo oĸartoĸarsínauvoĸ. taima pingârtigingmat erĸaimassariaĸarparput sumit pinerdlugo ãmalo sôĸ sule piginerdlugo. nangminerme píngortísimángilarput, ãmalo Jehovap nuname píngortitarpagssue tupingnangârtut pinagit inûnerput atatísínáungínavtigo. (Tussiaat 100:3; apustilit suliait 14:17) píngortitsissivta angisûp, Jehova Gûtip, ilumôrtumik nuánaringnigdluarnerata erssernerâ uvagut inûsínaugavta ãmalo inûneĸ nuánârutigisínauvdlugo. taimáitumik erssaríngila sôĸ kúnge David ũmámigut ilũngardlune isumaĸartoĸ Gûtip ’ilumôrtumik nuánaringnigdluarnera inûnermit iluatingnarnerussoĸ’?

iluarissânik píngortitsissumut átaveĸarnerup inûnermit agdlât pingârnerunera ãma avdlamik píssuteĸarpoĸ — sujunigssarput tássánga túngaveĸarmat. atago misigssoriartigo sôĸ taimáinersoĸ.

 ilâ ilumôrpoĸ inûneĸ sivikingmat nalorninardlunilo? ímaĸa ukiorpagssuarne pingârtitdlugo sulerulôrtoĸartarpoĸ atortorigsârutitigut anguniagaĸ sunalũnît piviussúngortíniardlugo. kisiáne toĸo ernĩnaĸ pigssarsiarerêrsimassanik tamanik arsâringnigtarpoĸ. kúngip Salomonip ilisimassup oĸarneratordluínaĸ ípoĸ: „sumingme inûp peĸautigísanerpai suliane tamaisa ũmámilo piniarnere, seĸernup atâne erdloĸíssutigissane? mássa inûnine nâvdlugo igpingiatortarpoĸ, narrutsangnartutdlo nukingíssutigai [nungutdlarsautigai], únuákutdlũnît ũmáne ĸasuerneĸ ajulersitdlugo. tamássátaoĸ piúngitsoĸ.“ — akugdlîssup oĸausê 2:22, 23; nalerĸiuguk 2:3-11.

tássa mássákut taimáipoĸ, kisiáne píngortitsissivta sujunertarâ ingminut asangnigtut nâlagtutdlo tamarmik, misigíssutsimik táussumínga, pakatsinermik avãngusungnermigdlo, uvdlumíkut nãmagalugo atortariaĸagkavtínit aniguisíneĸarumârtut. neriorssũmik táussumínga nuáningârtumik Jehovap ĸularungnaersípâtigut: „igdluliúsángitdlat avdlap inigssânik, íkússuísángitdlatdlo avdlap nerissagssânik; ínugtama uvdlue orpiup uvdluisut ísangmata, agssangmigdlo suliait nungutdlartísavait [atúsavait] ĸinigkama.“ — Isaia 65:22.

Gûtip nuánaringnigdluarneranik ilumôrtumik erssersitsineĸ tamána uvdlumíkut inûnivtínit kigdleĸartumit ĸajangnartumitdlo pitsaunerussumik neriulersitsíngila? ilungersornerit tamarmik naleĸásáput ilumôrtumik nuánaringnigdluarneranut ilaulernermik, ârĸigssũssâne nutâme inûlernermik ãmalo inûnermik sujunertaĸardluartumik isumalingmigdlo nuánârutigingningnermik. tamána piviussúngúsagpat mássákut Jehovamit akueritítariaĸarputit ãmalo táussumúnga ínugtainutdlo ĸanigtumik átaveĸartariaĸardlutit.

ungasingnerussoĸ ungasíngínerussordlo erĸarsautigalugit pigssarsiarineĸarsínaussut

sujulianĩtut erĸarsautigalugit sianîtdliorneruvdluínásagaluarpoĸ ingminuínaĸ erĸarsautigísavdlune, máko erĸarsautigalugit: tusâmassauneĸ, pisũssuseĸ, sujumukarneĸ, ilíniagaĸarneĸ, inûnerme angussaĸardluarneĸ imalũnît sût píssutsit ârĸigssũssauneráne matumane anguniagarísavdlugit pilerigineĸartut. tamáko anguniagarísavdlugit ingmine kúkussũngíkaluarpoĸ, ilisimassariaĸarparputdle tamáko inûnivtíne pingârtínerpâguvtigik píngortitsissitsivnut akissugssaunerput tunutdliutísagavtigo. tamatumalo kingunerísavâ Jehovamit iluarissaujungnaerneĸ ãmalo ’inûnermik piviussumik’ ánaissaĸarneĸ. — 1 Timûtiuse 6:19; Lúkarse 9:24.

tamána ássersũneĸarsínauvoĸ inûsugtumut sujusigsorujugssuákut atuarungnaertumut, ilíniartitausimángitsututdlo sulivfeĸalerdlune, aningaussarsiulârnigssane pĩnardlugo. ímaĸa isumaĸarpoĸ inûneĸ agsut nuánersissoĸ, kîsame atuarnerup kigdlilersuineranit aniguigame. kisiáne ungasingnerussoĸ erĸarsautigalugo, iluaĸutigssaraluane ánáingínerpâ, sivikitsumik iluanârniáinardlune? ûngáinaĸ issiginerúngila nangmineĸ anguniagaĸ piviussúngortíniáinardlugo píngortitsissumut átaveĸarneĸ tunutdliúkáine?

ĸanordlũnît ulapitsigigaluarângavta iluagtitsiuáinarpugut pingârtitatut issigissavta pivfigssaĸarfiginigssânut nukigssaĸarfiginigssânutdlo, ilâ? inuit píngortitat píssusiánut pâsisimangnigdluardlune Jesusip naitsumik oĸautigalugo tíkuarpâ: „ũmativsime peĸûtise najortarpait.“ — Matîuse 6:21.

’peĸûtit’ sût ũmativit najorpai? silap matuma pínersautikujue kussagsautâlo agsut kajungernarsínáuput. kisiáne ivdlit  nangmineĸ apereriarit: tamákua ilimagineĸartutut iluanârutausínaunere ĸanoĸ sivisutigissumik atasínáupat? pivdluarnermik ilumôrtumik pilersitsissarpat imalũnît, putumanartut ássigalugit, sivikitsuínarmik pivdluarnermik misigivfiunerpat, kingunerissardlugulo „aĸagutârnerit“ kigsautiginángitsut ánernartutdlo?

silatusârtumik ĸinersigit

uvavtínut ilíniarfiúsaoĸ inuit Lotip nalâne inûsimassut ĸimerdlũsavdlugit. „nerivdlutigdlo imerdlutigdlo pisivdlutigdlo tuniniaivdlutigdlo naussugssanigdlo íkússuivdlutik igdluliortut,“ Jesus oĸarpoĸ. avdlatut oĸautigalugo ulapísimaĸaut pingârtutut issigissatik pigssarsiariniardlugit, Gûtip piumassâ soĸutiginago. tamatuma suna kingunerâ? „uvdlormile Lútip Sûtumamit anivfiane ingnermigdlo ikuatdlagsáumigdlo ĸilangmit siagdlerpoĸ tamaisa nungutitdlugit.“ uvagut iluaĸutigssavtínut Jesus nangitdlune oĸarpoĸ: „taimátaoĸ uvdlorme inûp ernerata sarĸúmerfigssâne íkumârpoĸ.“ — Lúkarse 17:28-30.

nalunángilaĸ ’uvdloĸ’ tássaussoĸ uvdlumíkut. nâgssáungitsumik pivdluarnigssarput erĸarsautigalugo Jehova Gûte ĸavsêriardlune oĸautsine ínugtanilo peĸatigîgsut avĸutigalugit inuiangnut tamanut maleruarĸussaminik nalunaeruteĸartarpoĸ. ĸaerĸuvâtigut nangminigssarsiortumik anguniagaĸarneĸ tunorĸuvdlugo ãmalo isumaĸatigilerĸuvdlune. sianîtdliornerorĸajaĸaoĸ pivfigssarput tamât nukivutdlo tamaisa atordlugit nangmineĸ soĸutigissavtínut atúsagaluaruvtigik, taimailivdlutalo nalunaerutâ maleruarĸussailo asangnigtut tusarumanagit. apustile Paulusip oĸarneratut pâsissariaĸarparput pivfigssap ilungersornássusia: „ata, tamássa nagdliútoĸ nuánersoĸ; tamássa uvdloĸ ánáussivik.“ — 2 Korintumiut 5:20; 6:2.

píssutsit ârĸigssũssaunerata ajortup matuma naggatigssânit aniguinigssamingnut nuánârdlutik erinisugtunut ilauvdlutit pivdluarĸussaunigssamut, píssutsinigdlo ârĸigssũssinigssamut nâpertuivdluartumut Gûtip neriorssûtânut isernigssamut peĸataorusugpit? aperĸutauvoĸ suna mássákut ilingnut pingârnerussutut issiginerit, ĸanordlo iliornersutit Gûtip iluarissânik átavigilerusugdlugo. tamána ivdlit nangmineĸ aulajangigagssarât! (wD 1/4 85)

[Qupp. 5-mi assiliartat]

tunississumut ĸujamasugkuvit . . .

. . . tunississumúme ĸutsingnerpaussumut, Jehova Gûtimut?