ivdlit silarssûp inuinit kanok avdlautigivit?
ivdlit silarssûp inuinit kanok avdlautigivit?
„Gûtisiorneĸ Gûtip atâtap minguitsûtitâ agssuaríngisâlo tássa imáitoĸ: . . . silarssuarmit mingugtína-vêrsârdlune.“ — JÂKO 1:27.
1, 2. kina oĸarsimava kristumiut silarssûp inuinit avdláusassut? suna pivdlugo Jehovap nalunaiaissuisa nautsorssûtigissariaĸarpât silarssûp inuinit avdlaunigssartik?
JESUSIUNA oĸarĸârtoĸ kristumiut silarssûp inue ilagísángíkait. (Juánase 15:19) toĸunigssanilo aĸagútoĸ atâtaminut ĸinunermine oĸarpoĸ: „oĸautsingnik tuniváka, silarssûvdlo inuisa ûmigssorpait ilagíngínamíkik, sôrdlo uvangátaoĸ silarssûp inuisa ilagíngíkãnga.“ tauva kingunitsiánguagut nangitdlune oĸarpoĸ: „silarssûp inuisa ilagíngilait, sôrdlo uvangátaoĸ silarssûp inuisa ilagíngíkãnga.“ — Juánase 17:14, 16.
2 kristumiûneraĸatigîngne ugpeĸatigît amerdlanerssaisa oĸautsit táuko nãmagsiniardlugit norĸáissutigíngilâtdlũnît. kisiánile Jehovap nalunaiaissuisa pâsivât uvdlumíkut kristumiut avdlatut ajornartumik silarssûp inuinit ingmíkôrsimassariaĸartut. nalúngilât silarssûp matuma Satan nâlagarigâ. (Juánase 14:30; 1 Juánase 5:19) silarssûp inue ilagalugit tássauvoĸ Satanimit súnigauvdlune. Jakob mianerssorĸussivdlune agdlagpoĸ: „taimaingmat silap pînik asangnigkumáinartoĸ Gûtimut akerartortigitítaraoĸ.“ (Jâko 4:4) taimáitumik táukunánga avdlaunigssarput nautsorssûtigissariaĸarparput.
3. sût píssutigineruvdlugit Jehovap nalunaiaissue inoĸatimingnit avdláupat?
3 kisiánile Jehovap nalunaiaissue ĸanoĸ ilivdlutik avdláupat? Jesus oĸarsimavoĸ kristumiut timíkut silarssuarmit pêrsíneĸásángitsut. (Juánase 17:15) taimáiporme; Jehovap nalunaiaissuisa silarssuarmiut najugaĸatigait, amerdlanerssaitdlo inuit tamarmik ilerĸuátut áipanigdlutigdlo ĸitorniortarput. táukútaoĸ sulivfigssarsiortariaĸarput, aningaussat nalêrúkiartornerat ajornartorsiutigissarpât, akilerârtardlutigdlo. kisiánile avdláuput. Jehovap nalunaiaissue pivdlugit ilángutagssiamine, avîsime Amerikame sarĸúmersartume ugperissarsiornermut túngassunik tusagagssiortup navsuiarpâ avdláussusiánut suna píssutausorigine. oĸarpoĸ: „nalunaiaissut issornartorsiuissimik amerdlanerssáinit avdláussutigínguatsiarpât ugpernerata inôriautsimingnit avigsârtitagssáungínera, ugperneratdlo aulajangîssûvoĸ ĸanoĸ ilivdlutik kíkutdlo ilagalugit pivfigssamingnik atuinigssãnut.“ tássame! Jehovap nalunaiaissue Jehova Gûtimut túniutdluínarsimáput. Gûtip neriorssûtai bîbilime agdlagsimassut ugperivdluínarpait, Gûtivdlo inungnut inássutai tamaisa maleruartariaĸartutut issigalugit. (1 Juánase 5:3) tamána avdláussutigât.
4. silarssûp inuinit ingmíkôrsimaniarnerme sût ajornartorsiutaussarpat? taimaingmat, tauva tamavta ilâtigut ĸanoĸ iliortariaĸartarpugut?
4 avdlanitdle avdlauvdlune nuánarineĸarnarnanilo ajornaitsũngilaĸ. uvdluínarne inûnerme inungnit avdlanit avdláungíniarneĸ sákortôrujugssûssarpoĸ. tamangajavta inúngûseralugo kigsautigârput inoĸativtínit avdlauvatdlãngínigssarput. akerdlerĩssuteĸalerângat kagdlũnavêrsârtariaĸarnartunik, nakimaitsumik ugperssuseĸarune aitsât inuk inoĸáminit avdlausínáusaoĸ Jehovavdlo inássutai maleruarsínauvdlugit. (apustilit suliait 5:29; 15:28, 29) taimáitumik silatusârnerúsaoĸ tamavta ingmíkut ingmivtínut misiligtaruvta pâsiniardlugo sume inigssisimanerput silarssuarmit avdlauneĸ erĸarsautigalugo. — 2 Korintumiut 13:5.
oĸalũssissarnermik autdlússivdluarneĸ
5. (a) nalunaiaissũngitsut ilaisa Jehovap nalunaiaissuisa oĸalũssissarnermik autdlússivdluarnerat ĸanoĸ oĸautigissarpât? (b) bîbilime túngaviussumik najorĸutaussut sût kivdlingneĸautigalugit nalunaiaissut suliagssaĸ tamána ilungersûtigissarpât?
5 Jehovap nalunaiaissuisa oĸalũssissarnermingnik autdlússivdluarnertik tusâmassautigât. tamána ingmíkut ilisarnautigât avdlanitdlo avdláussutigalugo. inuit ilaisa nersornartípât — ilaisale narrautigissardlugo. ajoĸersuiartortitat îvangkîliulereĸatigît ardlãnêrsut nalunaerutigât silarssuarme sumut pigaluarunigdlũnît inuit nunane tássane najugaĸavigsut Jehovamut nalunaiaissûssut autdlússivdluardlutik oĸalũssissartûssut nâpítaritik! „silarssuarme sumĩkaluaráinilũnît ajoĸersuiartortitat kíkutdlũnît sivisungâtsiartumik oĸaloĸatigigáine nuname tássane píssusiussut pâsiniardlugit, tamatigut Jehovap nalunaiaissue taineĸartarput,“ naĸitertitaisa ilãne agdlagsimavoĸ. suna pivdlugo nalunaiaissut suliagssaĸ táuna taima autdlutdluartigât? tusagagssamik nuánersumik oĸalũssíssutigingningneĸ Gûtip piumassaringmago kristumiuvdlo ilumôrtup ilisarnautigingmago. (Matîuse 28:19, 20; Evfisumiut 6:14, 15; sarĸúmersitat 22:17) uvdlumíkut, oĸalũssissarnermíkut Jehovap nalunaiaissuisa tamanut takutípât Gûtip nâlagauvfianut aulajaitsumik ilumôrnertik inuitdlo avdlat Jehovamik patdlorfigingningnigssãnut ikiũkusungnertik. — Isaia 2:2-4; Matîuse 24:14.
6. nâlagauvfingmik tusagagssamik nuánersumik oĸalũssíssutigingningneĸ pivdlugo isumarput misigssorniardlugo aperĸutit sût ingmivtínut aperĸutigisínauvavut?
6 oĸalũssissarneĸ ivdlit ĸanoĸ pingârtitsigaiuk? silarssûp inuisa amerdlanerssait isumaĸarput inûtigssarsiorneĸ, ímaĸalũnît súngivfingme sangmissaĸarnerit, ugperissarsiornermíngãnît pingâruteĸarnerussut. (2 Timûtiuse 3:4; 1 Juánase 2:16) Paulusivdle Timoteus agdlagfigâ: „misigssortuáinarit ingminik pivdlutit ajoĸersuineritdlo pivdlugo. tamáko aulajangiutdlugit, taimailiordlutíme ánagtíkumârputit tusartititdlo ánagtíkumârdlugit.“ (1 Timûtiuse 4:16, NW) ivdlit taimatut isumaĸarfigaiuk? erĸaimaviugtaoĸ apustile Peterip mianerssorĸússutâ ’Jehovap uvdlugssâta nagdliuvfigssâ erĸarsautigiuáinásagit’? (2 Pîtruse 3:12, NW) taimáikuvit, tauva nalúsángilátaoĸ nâlagauvfingmik tusagagssamik nuánersumik oĸalũssíssutigingningneĸ nukingingnartorujugssûssoĸ. tamatumínga sianigingningnerup iliûseĸalersísínauvâtit nalunaiaissũngitsut erĸumîgissãnik.
7. oĸalũssissarneĸ pivdlugo inuit amerdlasût ĸanoĸ iliûseĸarsimápat? suna pivdlugo?
7 ássersûtigalugo taineĸarsínauvoĸ John, Ghaname ilíniartitsissoĸ bîbilime agdlagsimassunik maleruartariaĸartutut issigingnigtoĸ. sulivfingmine soraerpoĸ pivfigssaĸ sivisunerussoĸ atorsínaujumavdlugo inoĸáminik nâlagauvfik pivdlugo oĸalũssinermine. Brianip, inûsugtup tulûp, universitetime atuarnigssamut periarfigssane taimaitípâ avdlamik atorfeĸarane oĸalũssissartúngorumavdlune; tamánarpiardlo píssutigalugo Eve, arnaĸ amerikamioĸ, ilíniarfigssuarme sivisuvatdlãngitsumik atuarêrnermine taimaitípoĸ. inûsugtut táuko sujunigssaĸ erĸarsautigalugo ĸanoĸ iliûsigssamingnik ârĸigssuinerdlugpat sianîtsuliorpatdlũnît? bîbilimik maleruartariaĸartutut issigingnigtut isumaĸásáput táukua ĸanoĸ iliornerat silatusârnerussoĸ túngaveĸardluartumigdlo erĸarsarnerussoĸ. sujunigssartik nalorninartumik kinguneĸaratarsínaulersínago, periuseĸarput sujunigssartik isumangnarungnaersíniardlugo. sôrdlo Paulus oĸartoĸ, suliagssaĸ ĸinigât ánássutigssauvoĸ, ’nangmingneĸ tusartaisalo ánássutigssât’. — 1 Timûtiuse 4:16.
ilerĸulersûtit avdlaussut
8. Eprîarinut agdlagkat 1:9-me túngaviussumik najorĸutaussoĸ suna píssutauva Jehovap nalunaiaissuisa inungnit avdlanit avdlauneránut?
8 túngaviussumik najorĸutagssaĸ unátaoĸ kristumiut silarssûp inuinit avdláussutigât: „iluarneĸ asavat iluáinerdlo ûmigalugo.“ (Eprîarit 1:9) oĸautsit táukua ataĸatigissait nâpertordlugit Jesus Kristus tássane pineĸarpoĸ, kisiánile Jehovap nalunaiaissuisa pâsivât oĸautsit táuko kristumiunútaoĸ najorĸutagssaussut. (1 Pîtruse 2:21) Gûtip iluarneragâ asassariaĸarparput Gûtivdlo inatsisáineragâ ûmigissariaĸardlugo.
9. (a) inatsisaitsuliornerit ilait táikit. (b) ilagît kristumiut inatsisáinernik isumâta silarssûp inuisa isumãnit suna avdláussutigâ?
9 inatsisáinerit ilait apustile Paulusip taivai oĸardlune: „kinguâgssiûtitigut kángunartuliortutdlũnît gûtipilugsiortutdlũnît avdlasiortutdlũnît angutitdlũnît píngortitat píssusiánut akerdliussumik atortítut, angutitdlũnît anguteĸatimingnik atoĸatigingnigtut, tigdligtutdlũnît piumatûtdlũnît imerajugtutdlũnît mitautigdlîssutdlũnît iluanârniapilugtutdlũnît Gûtip nâlagauvfia kingornússarísángilât.“ (1 Korintumiut 6:9, 10, NW) uvdlumíkut silarssûp inuisa túngaviussumik najorĸutagssat, ingangmik ilerĸugssatigut najorĸutagssat, taimaitípait. bîbilimile najorĸutagssat inuk piumatdlerângat aitsât maleruagagssatut issigineĸarsínáungitdlat. bîbilime agdlagsimavoĸ kristumio ilerĸordlugtúngorune asangnigtumik ikiorneĸásassoĸ avdlamik ilerĸoĸalernigssânut. (Galâsiamiut 6:1; Jâko 5:19, 20) nâlagserîtsumik avdlángorumángigpat, tauva kristumiut ilumôrtut ilagiungnáisavât. — 1 Korintumiut 5:9-13.
10. suna pivdlugo Jehovap nalunaiaissuisa ilagîgsitik inatsisaitsuliornernut igdlersortariaĸarpait?
10 oĸartoĸarpoĸ periauseĸ tamána asangníngitsuliornerussoĸ imalũnît ingassáussinerussoĸ. taimatut oĸartut silarssûp inuisa ilerĸugssanik aulajangiússĩnarniángínerussumik isumât piumaneruvât. ivdlit taimatut isumaĸarpit? imalũnît pâsiviuk ilagît taimatut periauseĸarnermíkut erssersíngíkât ajortuliortumik asangníngíneĸ, erssersíkâtdle ajortuliortup inatsisaitsuliorneranik ûmigssuineĸ? ãmátaoĸ pâsiviuk ilagît kristumiut taimatut periauseĸartariaĸartut kristumiûjuásagunik? Jakob agdlagpoĸ: „Gûtisiorneĸ Gûtip atâtap minguitsûtitâ agssuaríngisâlo tássa imáitoĸ: . . . silarssuarmit mingugtínavêrsârdlune.“ (Jâko 1:27) ugpeĸatigît ĸanoĸ oĸarsínáusápat erĸortumik ugperissaĸardlutik sualugtumik ajortuliamit mingugtíkunik?
11. kristumiunut najorĸutaussut bîbilime agdlagsimassut kristumiup oĸalugtausianut ĸanoĸ súniuteĸásápat?
11 kristumiup ’ajortumik ûmigssuinera’ tássunga kigdlíngilaĸ. bîbilime agdlagsimavoĸ: „[kángunartuliornerdle] mingungnartutdlo nalingínait piumatûnerdlo taineĸásángitdlatdlũnît ilivsíne, iluartut taima ilerĸugssaĸarmata, kángunartutdlo oĸautsitdlo sianîtsorpatdlagtut ĸuiasârnipalâtdlo tamáko atugagssáungitsut.“ (Evfisumiut 5:3, 4) taimáitumik kristumiut ilumôrtut ilisarnautigait kángunartunik oĸauseĸartángíneĸ, paĸuminartunik oĸardluartáungíneĸ pîtáinartunigdlo alĩkusersoĸatigîgtángíneĸ. pîtaiuitsumik erĸarsartartut minguitsumigdlo oĸalugtartut uvdlumíkut ĸaĸutigôrnerujartorput.
12. nuánârsautit erĸarsautigalugit Jehovap nalunaiaissue ĸanoĸ silarssûp inuinit avdláupat?
12 nuánârsautit agdlât erĸarsautigalugit Jehovap nalunaiaissue avdlaussarput. ’silarssuaĸ ilũngât ajortup píssauneĸarfigingmago,’ silarssûp inuisa alĩkusersuinere Jehovap nalunaiaissuisa mianerssûtigissarpait. (1 Juánase 5:19, NW) nuánârsautit alĩkutagssatdlo, atuagagssiat, videot, filmit, nipilerssoriautsit TV-kôrusiatdlo anersâpilulerinermik pîtáinartunigdlũnît imaĸartut, imalũnît nakûsernermik píssusivigíngisamisôrtumik nâgdliugtitsinermigdlo nuánarissaĸarnermit pissumik imaĸartut atúngisáinarpait. ãmátaoĸ alĩkutagssiat „ilaĸutarît tamarmik nuánârutigisínaussait“-tut taineĸartartut, nalingínarnik atoĸateĸartarnermik imalũnît ilerĸugssatigut najorĸutagssanik taimaititsinermik kristumiut akuerisínáungisáinik erĸarsartitsinerussartut kristumiut mianerssûtigissariaĸarpait. (1 Korintumiut 15:33) bîbilimik maleruartariaĸartutut issigingnigtut alĩkutagssiat kristumiune taineĸartugssáungitsutdlũnît nuánârsautiginiásángilait.
13. nuánârsautit erĸarsautigalugit taimatut kigdlilîvfigitíkavta ûngáinaĸ issigineruva? navsuiaruk.
13 ivdlit taimatut isumaĸarpit? imalũnît isumaĸarpit taimatut isumaĸaramik Jehovap nalunaiaissue ûngáinaĸ issigissûssut imalũnît kigdlilîvatdlârtûssut? taimatut isumaĸaruvit, tauva una erĸarsautigeriaruk: pâsineĸalerpat nerissagssaĸ niorĸutigssiaĸ navianartumik imaĸartoĸ pisiniarfingmilo ilissivingnit tuavĩnaĸ pêrneĸartoĸ, pisiniartut nãmagigtaitdliûtigineĸ ajorpât, oĸardlutik kivfáungíssusertik kigdlilerneĸartoĸ niorĸutigssiaĸ táunarpiaĸ pisiarisínaujungnaeramíko. akerdlianigdle ĸujamasugput toĸunartulingmik nerivdlutik náparsimalersũngínamik. tamatumúnga ássingussumik Jehovap nalunaiaissuisa nãmagigtaitdliûtigineĸ ajorpât kivfáungíssusertik ilâtigut kigdlilerneĸarnerardlugo, silarssûp inuisa alĩkutagssiaisa ilarpagssuisa mingungnartoĸarneránik pâsitíneĸarângamik. akerdlianigdle, mingungnartut taimáitut navianartorsiortitsisínauneránut igdlersorneĸaramik ĸujássutigissarpât.
asaĸatigîgsut
14. píssuseĸ suna Jesusip oĸautigâ ínugtaoĸatigît kristumiut silarssûp inuinit avdláussutigísagât?
14 kristumiup silarssuarmit ingmíkôrsimaniarnera avdlatigútaoĸ ûgtorneĸarsínáusaoĸ. toĸunigssane aĸagútoĸ Jesusip maligtine oĸarfigai: „matumánga tamarmik ilisarísavâse ajoĸersugarigivse: asaĸatigîgkuvse.“ (Juánase 13:35) suna píssutigalugo ilagît avatãnĩtut kristumiut asaĸatigîngnerat ilisarnautitut issigísavât? uvdlumíkúme píssuseĸ silarssuarme atugaunerussoĸ Paulusip oĸarneratut ingmat: „inuit inûjumârmata ingmingnik asassut, aningausseritût, . . . asangniuitsut.“ (2 Timûtiuse 3:2, 3) píssutsit taimáitut atugaungârmata, ínugtaoĸatigît silarssuarme tamarme ítut asaĸatigîgsut tupingnangãsagaluarput. Jehovap nalunaiaissue ĸatángutigîgsutut peĸatigîúput taimáitut. — 1 Pîtruse 2:17.
15. sutigut Jehovap nalunaiaissuisa asaĸatigîngnertik nivtarsínaussarpât?
15 asaĸatigîngnerat malungnangârpoĸ, nalunaiaissutdlo atautsimêrssuardlutik katerisimârângata ilagît avatãnĩtut asaĸatigîngnerat oĸauseĸautigissarpât. ajunârnerssuaĸarângat angnertûmik, nalunaiaissut tássungnarasuartarput ĸatángutitik ikioriartordlugit. ilagîngnilo kristumiut ilumôrtut asangningnermik ínimigingningnermigdlo nivtaivigeĸatigîgtarput. kristumiutdlo inugtut ingmíkut píssutsitik patsisigalugit isumaĸatigĩngíneĸalerângat, ilungersûtigissarpât ’kamageĸatigîngniardlutik isumákêrfigeĸatigîngniardlutigdlo’. — Kulorsamiut 3:12-14.
mamiatsagtitsissaríngitdlat
16. (a) píssuseĸ suna Paulusip agdlauserâ kristumiut ukiune untritilingne sujugdlerne inûssut periarfigssitdlugit ugpeĸatimingnik asangningnermik itíssusia takutísavdlugo? (b) tamatigut najorĸutagssaussoĸ uvdlumíkut ássigĩngitsorpagssuartigut atorneĸarsínaussoĸ suna navsuiarpâ?
16 asangningnerup taimáitup Jehovap nalunaiaissue avdlatigut ingmíkôrtípai. uvdlumíkut takornartaujungnaersimavoĸ inuit pisínautitauvfingmingnik pingârtitsinerat síngassumigdlo igdlersûtigingningnerat. kisiánile, apustile Paulus avdlamik najorĸutagssiorpoĸ: „taimaingmat erĸigsinartut piniartigik ineriartorteĸatigîngniardlutalo.“ (Rûmamiut 14:19) versine versip táussuma ataĸatigissaine Paulusip agdlauserâ nerissagssat pivdlugit ajornartorsiut taimaníkut ajornartorsiutigineĸartartoĸ. jûtit Mosesip inatsisainik maleruaivdlutik inûssugssaussut ássiginagit, kristumiut neriumassamingnik sunigdlũnît nererĸussáuput, nerrersũngíkunik kisiáne. ilaisale, mêraunermingnîtdle nerissagssanik aulajangersimassunik maujungnartitsigajugtut, erĸigsiungnaerutigissarpât takuvdlugit kristumioĸatimik nerissagssat táukorpiait nerissarait. kristumiut táukua neriumassamingnik sunigdlũnît nerisínautitaunertik aulajangiúpât kristumioĸatimik misigíssusê soĸutiginagit? nâgga, Paulusip sujúnersûtâ maligkuníko. táuna oĸarpoĸ: „neĸitúngíkuvit vĩnisúngíkuvitdlo ĸatángúpitdlũnît nâgkiússutigissagssainik iliúngíkuvit iluarpoĸ.“ (Rûmamiut 14:21) sujúnersûtip asangningârnera! pâsisínauviuk uvagut tamána avdlatigut ĸanoĸ najorĸutarisínaunerigput?
17, 18. (a) tamatigut najorĸutaussoĸ Rûmamiunut agdlagkat 14:21-me agdlagsimassoĸ imigagssaĸ erĸarsautigalugo ĸanoĸ najorĸutarineĸarsínauva? (b) atissat erĸarsautigalugit ĸanoĸ najorĸutarineĸarsínauva? (c) ivdlit isúmat nâpertordlugo avdlatigut sutigut najorĸutagssaĸ tamána najorĸutarisínauvarput tássûnalo ugpeĸativtínut asangningnerput takutitdlugo?
17 ássersûtigalugo taisínauvarput bîbile nâpertordlugo kristumiut imigagssamik kigdlilingmik imersínaussut. (1 Timûtiuse 3:8; 5:23) inuitdle ilaisa imigagssanik imerneĸ ajornerarpât. ilaisalo sungiúsimángilât, ilaisalo saperpât. katerisimârnerme taimatut isumaĸartumik isersimassoĸarpat, táuna píngitsailiniardlugo tusangiasârdlugulũnît najorsilâĸatiginiásagaluarpiuk? imalũnît piumanerúsángínerpiuk nangmineĸ imísanatit, áipat ajornartorsiulersínavêrsârumavdlugo?
18 ássersût avdla taisigo: atissat. kristumiup ĸanoĸ ítunik atissaĸartariaĸarnigssânik bîbilime sujúnersûteĸángilaĸ, kisiáne „igpingnaitsunik igtôrajugdlutik pîtaiuitdlutigdlo“ atissinigssât sujúnersûtigineĸarpoĸ. (1 Timûtiuse 2:9) uvdlumíkut nunat amerdlanerssáine ĸanoĸ atissaĸarnigssamut najorĸutagssaĸarpoĸ agdlagsimángíkaluartunik tamanit akuerineĸartunik. najorĸutagssat tamákua atissatigut nalerĸútumik avdlángorarsínaunigssaĸ akuerât, atissamíkutdle ingassáussiniarpatdlârtoĸarpat ingminuínaĸ isumagissutut, ingmíkôrpatdlârtutut igpingnartututdlũnît isumaĸarfigineĸarajúsáput. kristumiut, angutit arnatdlo, tamána puiornavêrsãsavât. atissat erĸarsautigalugit kivfáungíssutsit kigdlilerumaviuk tusagagssaĸ nuánersoĸ pivdlugo, imalũnît ĸatángutitit mamiatsagtínavêrsârumavdlugit?
19-21. (a) suna pivdlugo Jehovap nalunaiaissuisa silarssûp inuinit ingmíkôrsimaniarnertik ilungersûtigât? (b) ãmátaoĸ sutigut avdlatigut tamaviârtariaĸarpugut silarssuarmit ingmíkôrsimaniardluta?
19 âp, Jesus ilumôrpoĸ oĸarame kristumiut ’silarssûp inuisa ilagísángíkait’. (Juánase 17:16) tusagagssamik nuánersumik oĸalũssíssutigingningnermíkut, ajortoĸ ingalangniardlugo inûnermíkut ugpeĸatimingnigdlo asangningnermíkut ínimigingningnermíkutdlo, Jehovap nalunaiaissue avdlanit ingmíkôrput. Jehovap nalunaiaissuisa silarssuarmit ingmíkôrsimaniarnertik pivdluarĸuneĸautigât, mingnerúngitsumik tássûna sernigssugaugamik ajornartorsiuterpagssuarnut uvdlumíkut silarssûp inuisa nâgdliûtigissartagáinut.
20 silarssuarmit ingmíkôrneĸ tamána nangmineĸ inûningne erdligaiuk ineriartortitdlugulo? erĸaimaniaruk: Jehovap nalunaiaissue angnikínerussumik avdlaugaluarunik, angnerussumik silarssuaĸ mána, Satanip Djævelip gûtipilugtut pigissâ, ássiginerúsagaluarpât. (2 Korintumiut 4:4) ’inuiagtut ivdlernartutut’ ilisarnautaerutísagaluarput, ’silarssuarmitdlo mingugtínavêrsâr’ungnáisagaluardlutik. tamána písagaluarpat, „Gûtisiorneĸ Gûtip atâtap minguitsûtitâ agssuaríngisâlo“ pigiungnáisagaluarpât. (Jâko 1:27; 1 Pîtruse 1:14-16) ilâtigut misigissaruvit silarssûp inue ássigerusungneruvdlugit, mianerssorĸússut Jâkup agdlagai 4:4-me agdlagsimassoĸ erĸainiaruk.
21 apustile Paulusip sujuligtûtigâ uvdlumíkut píssuseĸ avdla silarssûp inuine malungnangârumârtoĸ. oĸarpoĸ inuit inûjumârmata „aningausseritût“. (2 Timûtiuse 3:1, 2) oĸausîlo erĸũput; uvdlumíkut aningaussarsiornermik tamaviâruteĸarneĸ ima sákortutigingmat, inuit ilarpagssuisa inûneráne súniutauvdlune sákortunerpâĸ. tamatumûnákútaoĸ kristumiut avdláupat? silarssuarme uvdlumíkut atũtume angussaĸardluartoĸarsínauva „aningausseritû“nane? aperĸutit tamákútaoĸ kristumiut erĸarsautigerĸigsârtariaĸarpait. (wD 1/4 85)
erĸaimaviuk?
□ suna pivdlugo kristumiup silarssûp inuinit avdlaunigssane nautsorssûtigissariaĸarpâ?
□ agdlagsimavfît sût erĸarsautigalugit Jehovap nalunaiaissuisa oĸalũssissarneĸ erĸortumik isumaĸarfiginiásavât?
□ sutigut Jehovap nalunaiaissue silarssuarmit avdláusápat túngaviussumik najorĸutaussoĸ Eprîarinut agdlagkat 1:9-me agdlagsimassoĸ najorĸutaralugo inûgunik?
□ túngaviussumik najorĸutaussoĸ Rûmamiunut agdlagkat 14:21-me navsuiarneĸartoĸ najorĸutaralugo inûgunik, ilerĸue ĸanoĸ súnerneĸásápat?
[Atuaqqissaarnermi apeqqutit]
[Qupp. 13-mi assiliartaq]
Jehovap nalunaiaissuisa ilíkarpât silarssûp inuisa alĩkutagssiait mianerssûtigissariaĸaritik