Gûtip ikiuineratigut sángĩssutitit ángigissat ajugauvfigíkit

„tamaisa píssagtitsissivkut sapíngiláka.“ — Filípimiut 4:13.

1. atâtap isumatsagsimassup suna ĸínutigâ?

NUKAGPIARAK’ norĸardlune inukutdlersartûvoĸ. * noĸardlune inukutdlerângame ĸanermigut ĸápiortorssûssarpoĸ, ilâtigutdlo imermut ingnermutdlũnît ordlussardlune. atâtâta isumatsagsimavdlune angut náparsimassunik ajorungnaersitsisínaussutut ilisimaneĸartoĸ ornigpâ. angutip táussuma pigínáussusînik atâtaussup tatigingningnera ĸularineĸalermat, atâtaĸ nivdlerpoĸ: „ugperpunga, ugpíngíssutsivkut ikiúnga.“

2. ĸanoĸ ĸularísángilarput Gûtip ikiorusugkâtigut sángĩssutivta ajugauvfiginiarnerine?

² atâtaĸ Jesusip ikiuinigssânik ĸínuteĸartoĸ táuna uvagut ilíniarfigisínauvarput. angutip miserratigíngilâ ugperssutsimigut ímaĸa amigauteĸardlune; ĸularíngilâle Jesusip ikiũkusungnera. uvavtínútaoĸ taimáisínauvoĸ, sángĩssutivut — ímaĸalo ángigissaussut — nalúngínavtigik, ajugauvfiginiardlugitdlo ilungersoravta. Jehova Gûtip uvavtínut ikiũkusungnigssâ ĸularísángilarput, sôrdlútaoĸ inuit avdlat sujornatigut ikiortarsimagai. (nalerĸiuguk Mákorse 1:40-42.) ássersûtitut taineĸarsínauvoĸ apustile Paulus ikiortarmago, táuna sángĩssuteĸarmat peĸangârnerup ajorssarneruvdlũnît  kingunerisínaussãnik. pîtsoĸ ímaĸa pisôrssuángorusúsaoĸ; pigigsârtûssup sángĩssutigisínauvâ ingminut iluarisimârdlune angussaĸardluarsimanerminik tatigingnigpatdlârnine, peĸángínerussunigdlo nikagingningnine. (Jûpe 31:24, 25, 28) sángĩssutit taimáitut Paulusip ĸanoĸ ilivdlune ajugauvfigai imalũnît ingalangniarpai? oĸarpoĸ: „tamaisa píssagtitsissivkut sapíngiláka.“ — Filípimiut 4:11-13.

3. suna pivdlugo silatusârnerúsava sángĩssutivut ajugauvfiginiaruvtigik?

³ silatusãsaugut Gûtip píssaunera píssagtíneĸautigalugo sángĩssutivut ajugauvfiginiardlugit ilungersoruvta, ilagínarnagit mãnákut issertoratdlarmata. Jehova pivdlugo tugsiausiortoĸ oĸarpoĸ: „Nalunnginnamigit uummatip isertarisai.“ (Tussiaat 44:22) sángĩssutivut ajugauvfigíngíkuvtigik, ímaĸa kingorna pâsineĸarumârput angnertunerussumik ajoĸutigssavtínik. imáitarame: „inuit ilaisa ajortuliait tamanit ilisimaneĸarput, ingerdláinartumigdlo erĸartũneĸartarput; ilaisale ajortuliait kingusingnerussúkut aitsât pâsineĸarumârput.“ (1 Timûtiuse 5:24, NW) sángĩssutaugajugtut mardluk kristumiut Jehovamut iluaritíkusugtut sianigissariaĸagait misigssoriartigik.

sángĩssut ángigissaĸ kinguâgssiûtitigut igdligússuseĸarnermut atassoĸ

4, 5. (a) kinguâgssiûtitigut igdligússuseĸarnermik ingassáussíngitsumik isuma suna bîbilimĩpa? (b) kinguâgssiûtitigut igdligússuseĸarneĸ pivdlugo bîbilime sunik mianerssorĸússuteĸarpa?

⁴ Gûtip tuníssutaisa nuáningârnerpât ilagât áiparîngneĸ, kinguâgssiorsínáussuseĸ kinguâgssiorusússuserdlo ilángutdlugit. (1 Môrsase 1:28) kinguâgssiûtitigut igdligússuseĸarneĸ áiparît asaĸatigîngneratigut erssersíneĸartartoĸ píssusigssamisôrdlunilo minguitsûvoĸ. nangmineĸ áipane atoĸatigalugo inûp kinguâgssiûtitigut nuánârnigssâ bîbilime ajúngínerarneĸarpoĸ. (ússatit 5:15-19) kisiánile inuk kinguâgssiûtitigut igdligússutsine malĩnardlugit iliortugssáungilaĸ. tamána nererusungnivtínut nalerĸiuteriartigo. tamavta píssusigssamisôrtumik nererusugtarpugut; tássale imáingilaĸ nunujumanata nererusulersínaussugut. ãmátaoĸ sume, súkut ĸanordlo ilivdluta nerinigssarput soĸutángitsutut issigísángilarput. — ússatit 25:16, 27.

⁵ ímaĸa Paulus nuliaĸarsimavoĸ, nalúngilâlo áiparît atoĸatigîgtarnerat tugdluartûssoĸ. (1 Korintumiut 7:1-5) taimáitumik áiparît atoĸatigîgtarnerat pinago suna avdla pivâ agdlagkame: „taimáitumik avatise nunamiussut toĸulersísigik kángunartuliorneĸ, mingungnartuliorneĸ, kinguâgssiûtitigut igdligússuseĸarneĸ, pileríssuseĸ ajoĸutaussoĸ, piumatûnerdlo pivdlugit.“ (Kulorsamiut 3:5, NW) pigunarpai kinguâgssiûtitigut erssernerit áiparît tugdluartumik atoĸatigîngnerata avatânĩtut. apustile oĸarsimavortaoĸ: „tamavse timise pigisínáusavase iluarsiartortitdluse atarĸinartitdlusilo, kinguâgssiûtitigut pileritûmik igdligússuseĸarnase.“ (1 Tásalûníkamiut 4:4, 5, NW) issertuángitsumik ajoĸersûtit Gûtip súnîneratigut isumagssarsiarititaussut tamáko kristumiut áipaĸartut ãmátaoĸ áipaĸángitsut iluaĸutigisínauvait.

6. suna pivdlugo kristumiut ingmingnut nãmagsitínavêrsãsápat?

⁶ ’kinguâgssiûtitigut pileritûmik igdligússuseĸarneĸ’ erssersíneĸarajugpoĸ inûp nangmineĸ kinguâgssiũne agtûavdlugo igdligutsagsârneratigut. tamána taineĸarpoĸ ingminut anissôrtíniarneĸ imalũnît ingminut nãmagsitíneĸ. angutine arnanilo áipaĸángitsune tamána atorneĸarajugpoĸ. ãmátaordle áipaĸartut ilarpagssuisa atortarpât. taima atorneĸarajugtigingmat nakorsat ilarpagssuisa píssusigssamisôrnerarpât agdlâtdlo iluaĸutaunerardlugo. kisiáne taimatut ilerĸoĸarnerup akerdlerâ Gûtip uvavtínut ajoĸersûtâ „kinguâgssiûtitigut pileritûmik igdligússuseĸar“navêrĸuvdluta. tamatumúnga suna píssutaussoĸ, sunalo píssutigalugo kristumiut ilerĸupiluk tamána soraerútariaĸarât, pâsinerúsavarput Jesusip ajoĸersûtâ misigssoruvtigo.

7. ingminut nãmagsitínavêrsârnigssamut patsisaussoĸ avdla suna Matîuse 5:28-mĩpa?

⁷ Jesus oĸarpoĸ: „pileritsautdlugo arnamut issigiuáinartup ũmámigut avdlasiorfigerêrpâ.“ (Matîuse 5:28, NW) nalúngilâ avdlasiornigssamik igdligutsagdlune erĸarsarnerup kángunartuliorneĸ kingunerissarâ. ingminut nãmagsitínermik ajúngíneraissut agdlât miserratigíngilât ingmingnut nãmagsitítut tînganermut túngassumik erĸarsautáinarssortarmata. atuagkame Talking With Your Teenager-mik (inûsugtuarartangnik oĸaloĸatigingningneĸ) taigûtilingme inûsugtut „ingminut nãmagsitíníkut nuánersumik misigisínaunigssaĸ sianissumik erĸarsautigiuáinarât“ erĸartorneĸarêrmat, nangitdlune agdlagsimavoĸ: „ímaĸa takordlûissarput ingassagtumik tîngavdlutik, imalũnît angutaugunik anguteĸatimingnik arnaugunigdlo  arnaĸatimingnik imalũnît utorĸaunerussut sôrdlo ilíniartitsissitik, erĸardlitik, agdlâtdlo [angajorĸâtik] atoĸatigigitik. ímaĸa angutip arnavdlo ingmingnut pilerivfigineránut túngassumik nakûserneĸ misigissûssârdlugo takordlôrtarpât. tamáko tamarmik píssusigssamisôrdluínarput.“ taimáipale? kristumiut takordlûinerit taimáitut ingminutdlo nãmagsitíneĸ „píssusigssamisôr“nerarsínaunerpait erĸarsautigiguníkik Jesusip oĸausê ’ũmatíkut avdlasiorneĸ’ mianerssorĸussíssutigigamiuk, Paulusivdlo ilitsersûtâ „kinguâgssiûtitigut pileritûmik igdligússuseĸar“ĸunagit? nâgga, takordlûinerit taimáitut ingminutdlo nãmagsitíneĸ  — inûsugtumit inersimassumitdlũnît, áipaĸángitsumit áipaĸartumitdlũnît atorneĸaraluartut — soraerúneĸartariaĸarput.

sángĩssut ángigissaĸ tamána ĸanoĸ ajugauvfigineĸarsínaussoĸ

8, 9. ilisimaneĸartut sût erĸarsautigigunigit inûp ingminut nãmagsitítarneĸ soraerúniardlugo iluaĸutigísavai?

⁸ kristumiup tamána ángigissaussumik sángĩssutigiguniuk, ĸanoĸ iliorsínauva soraerúniardlugo, ’timine pigisínaorĸuvdlugo iluarsiartortitdlune atarĸinartitdlunilo’? (1 Tásalûníkamiut 4:4, NW) oĸautsimigut Gûtip naleĸangârtumik ikiorpâtigut.

⁹ sujugdlermik akuererĸârtariaĸarparput Jehova najorĸutagssiaĸarmat. katísimángitsut atoĸatigîngnerat, tássa kángunartuliorneĸ avdlasiornerdlo, ersserĸigsumik ajornerarpai. (Eprîarit 13:4) taimáitumik pâsiguvtigo táussuma avĸutigerĸussai iluaĸutaunerpaussut, áiparîngnerínarme atoĸatigîngníkut nuánârniartásaugut. (Tussiaat 25:4, 5) atuagkame Adolescence-ime (angutitut arnatutdlũnît inersimalilerneĸ) E. Atwaterimit agdlagsimavoĸ inûsugtut ingminut nãmagsitíneĸ erĸartorângamíko ’taĸimassartut, igtôrtartut perĸigsimissartutdlo’. ilâtigut píssutautíneĸarpoĸ ’asaĸatigît atoĸatigîngnermíkut ĸaníssusiat ingminut nãmagsitíniarníkut amigarmat’. âp, iluaĸutauvoĸ atoĸateĸarusungnine nunúsavdlugo áiparît asaĸatigîgdlutik atoĸatigîngneráne nãmagsineĸarsínaulernigssâta tungânut.

10. ilerĸupiluk tamána soraerúniardlugo inûp avdloriarnerit sût nãmagsisínauvai?

¹⁰ Gûtip oĸausiane sule ãmalo ikiûtigssaĸarpoĸ imáitumik ilitsersûteĸarame: „ilumôrtut sûtdlũnît, agssuarnaitsut sûtdlũnît, iluartut sûtdlũnît, minguitsut sûtdlũnît, . . . nersornartut sûtdlũnît, sût ilerĸûvdluartûnersut, . . . tamáko erĸarsautiginiarsigik.“ (Filípimiut 4:8) ersserĸigpoĸ ássilíssat angutip arnavdlo ingmingnut pilerivfigineránut túngassut oĸalugtualiatdlo kángunartuliornermik imagdlit ’minguitsûnatigdlo ilerĸûvdluartûnatigdlo nersornartũngitsut’. ingmingnutdle nãmagsitítartut tamáko nuánârsautigissarpait. taimáitumik sángĩssut tamána ajugauvfigísavdlugo aulajangersimassut igdligutsangnartut taimáitut ingalagdluínartariaĸarpait. misigisimassat erssersípât inuk tînganíkut igdligutsalerune sujornatigut ingminut nãmagsitíniarnermik kinguneĸartaraluartumik, igdligutsangnine migdlisísínáusagâ sût iluartut sûtdlo minguitsut erĸarsautiginiardlugit tamaviârutigiguniuk. tamána ingmíkut pissariaĸartarpoĸ kisimĩkângat imalũnît târtumĩkângat, taimatúme pissoĸartitdlugo ajortuliaĸ ángigissaĸ tamána nãmagsineĸarnerussarmat. * — Rûmamiut 13:12-14.

11. sángĩssut tamána ajugauvfiginiardlugo iluaĸutausínaussut avdlat táikit.

¹¹ tamatumúnga atatitdlugo iluaĸutauvortaoĸ suliaĸartuáinardlune: „mianerssorĸigsâritse saĸivdluarniardluse, ilisimaitsutut pínase ilisimatûtutdle; uvdlutdlo pigínauvfiussut asiutínavêrsigik, uvdlut ajormata.“ (Evfisumiut 5:15, 16) inuk kristumiutut inersimavdluartoĸ tatigissat ángigissaĸarfigíngisat ĸínuvigeriaruk sujúnersûtigerĸuvdlugit ĸanoĸ iliûserisínaussatit isumavdluarnartut. (Isaia 32:2) tamána sángĩssutigisimagaluardlugo ajugauvfigalugule amerdlasût oĸartarput kristumioĸatimik ilâta isumagingnigdluartup sujuariarnersutik malingnaivfigísagâtik nalúngínamíko, ingmingnut nâlagkersorsínáussusertik ineriartortísínausimagigtik. sôruname Jehova ĸaningneĸ tatigissarísavarput ángigissaĸarfigíngisarput. taimáitumik pissariaĸardluínarpoĸ táuna ĸinuníkut sâgfigissásavdlugo, ikiuinigssânik ĸínuvigalugo. (Filípimiut 4:6, 7) sángĩssut tamána ajugauvfiginiardlugo sivisungâtsiartumik ilungersoraluartoĸ ’nákáinarune’, Gûte píssaunermik ĸínuvigisínauvâ; tauva ilungersorĸigsínauvoĸ iluagtísínáusánguatsiardlunilo, sujornagornit sivisunerussumik ingminut nâlagkersorsínauvdlune. — Eprîarit 12:12, 13; Tussiaat 103:13, 14.

imigagssanik vĩnimigdlo atornerdluineĸ akiorniardlugo

12. kristumiup imigagssaĸ ĸanoĸ issigísavâ?

¹² ’vĩne Gûtimik inungnigdlo tipaitsugtitsissaraoĸ,’ bîbilime agdlagsimavoĸ. (erĸartũssissut 9:13) âp, vĩne imigagssatdlo tipaitsungnarsínáuput ĸasuersautausínauvdlutigdlo. (Tussiaat 104:15) kiale miserratigísavâ imigagssat timíkut ilerĸugssatigutdlo navianartorsiortitsisínaunerat? aulakôrneĸ ajornartorsiutauvoĸ angnertôĸ. sángĩssut tamána taima sualugtigingmat, Gûtip mianerssorĸuvâtigut imerajugtut ilagîngnut ilaussortaujungnaersíneĸarsínaussut  nâlagauvfingmigdlo pigingneĸataunigssaĸ píngitsôrsínauvdlugo. (1 Korintumiut 5:11-13; Galâsiamiut 5:19-21) kristumiut tamána nalúngilât, pâsivâtdlo aulakôrnavêrsârtariaĸardlutik. aulakôrnerdle táisángíkáine, imigagssanik imertarnerup ’ajortuliaĸ ángigissaĸ’ kingunerisínaunerpâ?

13. imigagssamut uverisínauneĸ navsuiaruk.

¹³ âp, nauk kristumio imigagssanik ingassángitsumik imertaraluardlune, taimáitoĸ sángĩssutigilersínauvâ. angutip matumûna Heinzimik ateĸartitavta tamána ĸanoĸ misigilerâ malugeriaruk.

Heinz, nulia ĸitornaitdlo ilumôrtumik kristumiúngorput ilagîngnilo átavigissamingne suliniarĸigsârtûvdlutik. Heinz ilagîngne utorĸaunertángortitauvoĸ ilagîngnilo igdloĸarfingme tássanĩtune „sukarssûsorineĸar“dlune. (Galâsiamiut 2:9) ilimanartumik ĸitornaminik perorsainermigut ilungerssũssissariaĸarpoĸ ilagîngnigdlo pârssinermigut isumakulûteĸartardlune. (2 Korintumiut 11:28) sulivfingminile ulapârnermit erĸigsisínauneĸ ajorpoĸ ĸasussôrtardlunilo, niuverniaĸatigĩme sulivfigissai ingmíkôrtortârput, nâlagâtalo ajornartorsiuterpagssuit aulajangersagagssarpagssuitdlo Heinzimut suliaritípai.

únúkut Heinz erĸigsisimaneĸ ajorpoĸ, malugilerpâle najorsilârneĸ ĸasuersautigisínauvdlugo. kristumiûgame inersimavdluartoĸ mianerssorĸigsârtarpoĸ ingassagtumik imerneĸ ajordlune aulakôrnavêrsârdlunilo. únúkut najorsilârtarpoĸ; uvdlúkut imigagssanik aulakôrnartortalingnik imerusugtángilaĸ, nerigângamilo najorsineĸ ajordlune. „vĩnimut uveri“simasorineĸángilaĸ. — 1 Timûtiuse 3:8.

ilimagineĸángíkaluartumik Heinz náparsímavingmut unigtíneĸarpoĸ pilagtíkiartordlune. tauva malungniutit erĸumîtsut tákutilerput. sumut malungnautaunersut? náparsímavingme nakorsat pâsinasuarpât Heinzip píngernavêrsârneĸ nâgdliûtigigâ. sunauvfa, timâta aulakôrnartoĸ píngitsôrsínaujungnaersimavâ. ilaĸutaisa tamána tupâtdlautigât; ĸimángilâtdle, kisiánile imíngernavêrsârdluínarumavdlune aulajangerneragut tapersersordlugo.

14. imigagssap imertartoĸ ĸanoĸ igdlaruautigssángortísínauvâ?

¹⁴ inuit ilaisa malugissarpât ingassagpatdlârtumik imertalersimavdlutik, taimáitumik imertarnertik issertorniartarpât, ilaĸútatik ikíngutitigdlo pâsitíkumanagit ĸavsinik ĸanordlo akulikitsigissumik najorsissardlutik. ilaitdlo isumaĸángíkaluarput imigagssamut uverisimavdlutik, nauk uvdlormut inûnermingne najorsissarneĸ ĸitiussúngorsimagaluartoĸ. táukua tamarmik ilâtigut sualugtumik imertôrnigssât, imalũnît issertortúkut imigagssanut uverisimanigssât ârdlerĸutiginarpoĸ. ússat una erĸarsautigeriaruk: „vĩne mitagdlersorssûvoĸ, imigssaĸ silaerúnartoĸ perpalugtartorssûvoĸ; tássunga támartut ilisimatũngúsángitdlat.“ (ússatit 20:1) imáikame: imerpatdlârtoĸ sorĸusaitsumik iliûseĸarsínauvoĸ igdlaruautigissauvdlunilo, mitautigissagssáinángordlune. avdlatigútaordle vĩne mitagdlersorssûsínauvoĸ. inuk mitautigissagssauvoĸ isumaĸarune issertortúkut imertarnine Gûtip takusínáungíkâ.

15. Paulusip oĸausê Korintumiunut agdlagkane sujugdlît 9:24-27-me agdlagsimassut kristumiup imigagssamik imertarneranut ĸanoĸ súniuteĸásápat?

¹⁵ Gûtip anersâvata inerititaisa ilagât ingminut nâlagkersorsínauneĸ — inûnerme tamatigut pissariaĸartûssoĸ. (Galâsiamiut 5:22, 23, NW) Paulusip kristumioĸ arpaliútarfingme arpagtartumut ássersũpâ. ajugauniaĸátáutut „nungutdlutik sût tamaisa taimaitíkatdlartarpait“ — „niaĸorut aserujassoĸ piumavdlugo“. kristumiútaoĸ ingmingnut nâlagkersordlutik „sût tamaisa taimaitíkatdlar“tariaĸarpait akigssarsiagssaĸ naleĸarnerungârtoĸ — INÛNEK’ — piumavdlugo. Paulusip ersserĸigsarpâ ’timerput kivfaussutut ilissariaĸarigput, avdlanut oĸalũssissartugut nangmineĸ angilugtorĸunata’, ajortuliaĸ ángigissaĸ, sôrdlo imigagssanik atornerdluineĸ, patsisigalugo ajagtugaorĸunata. — 1 Korintumiut 9:24-27.

16. inûp ĸanoĸ iliordlune aulajangersínauvâ imigagssaĸ sángĩssutiginerdlugo?

¹⁶ sángĩssut tamána ajugauvfiginiardlugo kristumiumio ĸanoĸ iliorsínauva? iluaĸutigísavâ erĸaimaniaruniuk nauk imertarnine inungnut  avdlanut takutsailiorsínaugaluardlugo, Gûtimut takutsailiorsínaunago. (1 Korintumiut 4:5) tauva ilumôrtumik — Gûtip tákuanilusôĸ — inûp imertarnine erĸarsautigissariaĸarpâ. (nuánâgínarniardlune aulakôrniardlunilũnît imertarneĸ pivarput, nerititdlune najorsilârneĸ pinago.) oĸartoĸarsínauvordle: ’imigagssardle píngitsôrsínauvara. imernerdle nuánârutigĩnarpara; ĸasuersautigissarpara. piumagaluaruma imíngernavêrsârsínauvunga.’ tauva, imerpatdlârnigssap imigagssamutdlo uverinigssap navianarsínaunerat erĸarsautigalugo, ĸáumat atauseĸ ĸáumatitdlũnît mardluk imíngernavêrsârnigssat sôĸ misilingniángiliuk? imalũnît, ajornartorsiutauneranik misiutigingnigtut taima amerdlatigingmata, aulajangerniarit pivfigssame imerfigissartagkangne imíngernavêrsãsavdlutit. sulivfingminit soraerângame, ínalerângame, imalũnît katerisimârtunut ilaugângame, imertaraluartoĸ, tauva taimailinerine imíngernavêrsârsínauvoĸ. taimailiorune ĸanoĸ misigalune malugisínáusavâ. imíngernavêrsârnine ajornartorsiutigiguniuk, imalũnît ĸasuersínáungíkune, tauva pâsilísavâ imerneĸ sángĩssutigigine.

17. suna píssutigalugo kristumio imigagssamik sángĩssuteĸartoĸ ilungersortariaĸarpa ajugauvfiginiardlugo?

¹⁷ kristumiup pâsilerêrsimaguniuk Gûtimutdlo misiutigiungnaerdlugo imigagssanik aulakôrnartortalingnik sángĩssuteĸardlune, ajugauvfiginiarnigssâ artornángínerúsaoĸ. ímaĸa ilisimarêrpâ bîbilime agdlagsimassoĸ ’silaĸángitsoĸ’ erĸarsartartoĸ ’arajutsissákut imigaĸ mamatdlârissoĸ, issertortúkutdlo nerissaĸ [imigardlũnît] alianaitdlârissoĸ’. ússatinile agdlagsimavoĸ taimatut erĸarsartut toĸup avĸutâgut ingerdlassut. ilisimatûvdle navêrneĸarnine ajoĸersorneĸarninilo nuánarissarpai, ’ilisimangãngitsûjungnáisavdlunilo, tauvalo inũsavdlune, sianisût avĸutât atuarĸigsârdlugo’. (ússatit 9:1, 6, 8, 13-18) âp, sángĩssutivta ángigissaussut ajugauvfiginiarnerine Gûtip ãmátaoĸ ikiortarpâtigut kingunigssainik, nagsatarisínaussainik, sujumut ilisimatitdluta.

ilungersornivut avdlat takusínáungisait pivdlugit Jehovap akilerumârpâtigut

18. sángĩssutivut issertugaussut ajugauvfiginiartitdlugit, suna ĸularísángilarput? (ússatit 24:12; 2 Sâmuale 22:25-27)

¹⁸ inuit ilaisa ersíssutigiuáinarpât ilerĸupilungmik inungnit Gûtimitdlũnît pâsineĸarumârnigssât. taima ítumik píssuseĸarnavêrta. misiutiginavêrtigulo piussut Gûtimut takutsailiorsínáungínavtigik, „ĸanoĸ-iliornerit tamaisa Gûtip erĸartũssivingmut pisíkumârmagit, issertugaussutdlo tamaisa ilángutdlugit, ajúngitsûnersutdlũnît ajortûnersutdlũnît“. (akugdlîssup oĸausê 12:14) sángĩssutivut, ãmátaoĸ issertugaussut, anigorniartitdlugit Jehovap ikiuiniarnera ilagsitigo. tauva erinigisínáusavarput „târtume issertugkat“ ĸaumassumut pisíneĸarfigssât „ũmatitdlo pilerssârutai“sa erssersíneĸarfigssât. „tauvalo kialũnît ingmíkut nersornautigssane Gûtimit piumârpâ.“ — 1 Korintumiut 4:5; Rûmamiut 2:6, 7, 16. (wD 15/4 85)

[Quppernerup ataani ilanngussat]

erĸaimassagssat

□ issertortúkut sángĩssutit ajugauvfiginiardlugit ilungersûtigissavut Gûtip ĸanoĸ isumaĸarfigai?

□ bîbilime ilitsersûtit sût takutitsiarpât ingminut nãmagsitíniarneĸ ingalagtariaĸartoĸ?

□ ĸanoĸ iliordlune kristumiup ilerĸupiluk ingminut nãmagsitíniarneĸ ajugauvfigisínauvâ?

□ bîbilime ajorneraneĸángíname, imigagssanik imertarneĸ ĸanoĸ issertortúkut sángĩssutausínauva?

□ imigagssanik imertarneĸ issertortúkut sángĩssutigiguniuk, inuk silatusârdlune ĸanoĸ iliûseĸarsínauva ajugauvfiginiardlugo?

[Atuaqqissaarnermi apeqqutit]

[Qupp. 13-mi ungalusaq]

ingminut anissôrtíniartarnine ajugauvfigigâ

ANGUTIP INÛSUGTUP C.-mik atigdlup kinguâgssiûtitigut ineriartornine avdlatutdle misigisimavâ, atautsimigdle ajornartorsiuteĸarpoĸ. 13-inigdle ukioĸardlune ingminut anissôrtíniartarneĸ ilerĸorilersimavâ, amerdlanertigut inimine kisimĩkângame. nangmineĸ tamána kángusûtigikujugtarpâ, isumaĸardlunile tamána inungnut avdlanut ajoĸutáungitsoĸ.

19-inik ukioĸalernermine ilerĸune tamána ativigdlugo atisimavâ. ilânêriardlunilo tamána palasiminut navsuerutigissarsimagaluarpâ, táunale oĸáinartarsimavoĸ tamána kúkussûgaluartoĸ, kisiánile ingassagpatdlãngitsoĸ. C. sákutũngorame ĸaĸutiguínaĸ kisimĩtarpoĸ, taimáitumigdlo ĸaĸutiguínaĸ ingminut anissôrtíniarnermut nákáitôrtardlune. tássûnákutdlo ersserpoĸ ilerĸuliússaĸ tamána nununeĸarsínaussoĸ.

sákutûjorêrnerme kingorna C. angerdlamut uterpoĸ. tamatumûnákutdlo atuagagssiat atoĸatigîngnermut túngassut pisiarissalerpai, ernĩnardlo ilerĸupalâminut tássunga uterdlune. ingmíkut ineĸalerêrsimagame atuagkanik atoĸatigîngnernut túngassunik atuarnigssaminut periarfigssaĸardluartarpoĸ, akulikitsumigdlo uvdlormut ardlaleriardlune ingminut anissôrtíniartardlune.

tauva oĸalũssissartumit Jehovamut nalunaiaissunêrsumit bîbilimik atuaĸatigineĸartalerpoĸ. Gûtip ilerĸordlungneĸ ĸanoĸ issigigâ pâsigamiuk, atuagagssianik atoĸatigîngnermut túngassunik pisissarnine kángutsautigâ, taimáitumigdlo ingminut anissôrtíniartarnine taimaitíniarusulerdlugo. misiligpâ. sapâtitdle akúnere mardluk ĸângiungmata saperdluínalerpoĸ; kioskip erĸânut unigpoĸ igdligússutsimilo sákortusíssutigissãnik atuagagssiat atoĸatigîngnermut túngassut issigilerdlugit. ajorssartitaunerme tamatuma kingorna angerdlamut apũkame misigivoĸ tamána nãmagsivdluáinartariaĸardlugo — taimailiorpordlume. kisiáne tamána perĸigsimíssutigeĸâ. tamána ilerĸupalârilersimassane ĸaĸugulũnît ajugauvfigisínaunerpâ?

taimaitdlune C. ilagîngne anersãkut utorĸaunertat ilãnut kîsame sâgfigingnigpoĸ. táuna pâsingnigdluarpoĸ atuagagssianigdlo bîbilerpalârtunik, nununiarnermine nakússagtíssutigisínaussainik, ujardliutdlugo. ĸatángut táuna ãma imatut oĸarpoĸ:

’erĸarsautigeriaruk tássamigôĸ kajumíssuseĸ tamána kalungnertut ítûssoĸ. kalungnerup táussuma isua amípoĸ sángîtdlunilo. kalungneruvdle sivnerane nigartai agdliartuínarput suángaralugtuínardlutigdlo. taimatordluínaĸ íput ingminut anissôrtíniarnermut kajumigsisitsissartut. taimáitumik sapíngisamik sujusinârdlutit perusússutsivit sákortusivatdlãngínerine ĸanoĸ iliûseĸartarit. naggatâtigúme ajornardluínalersarpoĸ. kalungneĸ isuata tungâníngãnîtdle kigtorarniariaruk. perusússutsit tákutĩnartoĸ ernĩnaĸ K’ANOK’ ILIÛSEK’ARTÁSAUTIT! nikuitdlutit, avdlamut sâgdlutit, kamigpatit saligdlugit, erĸaivik anitdlugo — ardlãnigdlũnît iliûseĸardlutit. nãmagpoĸ kalungneĸ isuata tungâtigut kigtorarugko. imalũnît ardlãnik nipitûmik atuardlutit autdlartísínauvutit, sôrdlo bîbile imalũnît atuagagssiat kristumiorpalugtut erĸarsautingnik ajúngínerussumut sangutitsisínaussut.’

Jehovamut nalunaiaissut atautsimĩnerine ĸatángutip táussuma C. ĸanoĸ ingerdlaneranik aperissarpâ, nersualârtardlugo kajumigsârtardlugulo aulajangiússinermine aulajaerĸuvdlugo. sapâtit akúnere arfineĸ mardluk ajúngitsumik ingerdlavoĸ. tauva C. pakatsivoĸ ajornartorsiúmut avdlamut nákáikame; artorssartitauvoĸ kinguariautigissaminigdlo atuagagssiamik atoĸatigîngnermut túngassumik pisivdlune. pisimassut taimáitut kinguarsarpât, utorĸaunertavdle kajumigsârpâ akiũnine ingerdlatĩnarĸuvdlugo. pivfigssat nunuvfigissartagai sivitsoriartorput — sujugdlermik sapâtit akúnere ĸulingiluat, tauva 17-it, tauvalo sule sivisunerussumik. arrîtsumik ugperileriartuârpâ ajornartorsiutine táuna issertortoĸ ĸângersínaugine.

kîsame pâsilerpâ Jehovap ĸanoĸ iliornivut tamaisa ilisimagai. minguitsumik tarnip nalúngeĸatigingníssuseĸardlune Jehova Gûte kivfartũkusugkuniuk, ilerĸune tamána soraerutdluínartariaĸarpâ. iluagtípordlo! mássákutdlũnît erĸaimajungnaerpâ ĸanga kingugdlermik taimailiornerdlune. C. kristumiûvoĸ maligagssauvdluartoĸ ilagîngnilo akissugssáussutsimik tigúmissaĸalersimassoĸ, mássákutdlo pilerssâruteĸarpoĸ Gûtimut kivfartornine angnertusiniardlugo. inuk nutãngorsimavoĸ.